Suɔmɔ Nikanelɔ:

Ani onuɔ he akɛ obɛŋkɛ Nyɔŋmɔ? Yɛ mɛi pii agbɛfaŋ lɛ, no tamɔ nɔ ko ní ehiŋ feemɔ kwraa. Mɛi komɛi sheɔ gbeyei akɛ ekɛ amɛ teŋ jɛkɛ tsɔ̃; mɛi krokomɛi hu nuɔ he akɛ amɛsaaa kwraa akɛ amɛaabɛŋkɛ lɛ. Shi kɛlɛ, Biblia lɛ woɔ wɔ hewalɛ yɛ suɔmɔ mli akɛ: “Nyɛtsia nyɛbɛŋkɛa Nyɔŋmɔ, ni eeetsi ebɛŋkɛ nyɛ.” (Yakobo 4:8) Emaa nɔ mi ehaa ejálɔi lɛ po akɛ: “Mi, Yehowa, o-Nyɔŋmɔ lɛ, mihiɛ oninejurɔ mli, ni miikɛɛo akɛ: Kaashe gbeyei! maye mabuao!”—Yesaia 41:13.

Mɛɛ gbɛ nɔ wɔɔtsɔ wɔbɔ mɔdɛŋ ní wɔná wɔkɛ Nyɔŋmɔ teŋ wekukpaa ní bɛŋkɛ kpaakpa tamɔ nɛkɛ, taakɛ afee he mfoniri yɛ wolo nɛɛ sɛɛ lɛ? Yɛ naanyobɔɔ fɛɛ naanyobɔɔ ní wɔnáa lɛ mli lɛ, tsakpaa lɛ damɔ le ní wɔleɔ mɔ lɛ, kɛ miishɛɛ kɛ bulɛ ní wɔnáa wɔhaa sui krɛdɛɛi ní eyɔɔ lɛ nɔ. No hewɔ lɛ, Nyɔŋmɔ sui kɛ egbɛ̀i, taakɛ ajie lɛ kpo yɛ Biblia lɛ mli lɛ, ji saneyitso ko ní he hiaa ní esa akɛ wɔkase. Gbɛ ní Yehowa tsɔɔ nɔ ejieɔ esui lɛ eko fɛɛ eko kpo lɛ he ní wɔɔsusu, ní wɔɔkwɛ bɔ ni Yesu Kristo jie lɛ kpo yɛ gbɛ ní eye emuu nɔ, kɛ gbɛ ní wɔɔtsɔ nɔ wɔná nakai sui lɛ ahe shishinumɔ baaha wɔtsi wɔbɛŋkɛ Nyɔŋmɔ. Wɔbaana akɛ Yehowa ji jeŋ muu fɛɛ Maŋtsɛ yɛ gbɛ ní ja ní eye emuu kɛmɔ shi nɔ. Kɛfata he lɛ, lɛ ji Tsɛ ní he hiaa wɔ fɛɛ. Akɛni eyɛ hewalɛ, eyeɔ jalɛ sane, eyɛ nilee, kɛ suɔmɔ hewɔ lɛ, ekwaaa ebii anɔkwafoi lɛ kɔkɔɔkɔ.

Eba akɛ wolo nɛɛ baaye abua bo ní otsi obɛŋkɛ Yehowa Nyɔŋmɔ kpaakpa, koni oná okɛ lɛ teŋ wekukpaa ní fiteŋ kɔkɔɔkɔ, bɔni afee ní ohi shi ní ojie eyi kɛya naanɔ.