Nakon te tia Wareware:

Ko namakinna bwa ko boni kaan ma te Atua? E rangi ni kangaanga namakinan anne irouia aomata aika bati. Tabeman a taku n aia iango bwa e aki kan itoman ma aomata te Atua; ao temwangina a bwara nanoia bwa a taku bwa a aki tau ni kaania te Atua. Ma e ngae n anne, e taku ana kaungaunga te Baibara nakoira: “Kam na kaania te Atua, ao ane E na kaaningkami.” (Iakobo 4:8) E karaui nanoia taan taromauria ni kangai: “N na taua ataim, Ngai ae Iehova ae Atuam, ao N na kangai nako im, Tai maku; I a buokiko Ngai.”​—Itaia 41:11.

Ti na kanga ni karekea ara itoman ae kaan ma te Atua? Karekean te reitaki n te iraorao e reke man kinaakin te aomata, mataaiakinan ao taraakin aroarona aika a kaokoro, bwa a kakawaki. Mangaia are e rangi ni kakawaki bwa ti na reiakin aroaron te Atua ma anuana aika a kaotaki n te Baibara. Ti na kaanira riki ma te Atua rinanon iaiangoan aron Iehova ni kaotiotii aroarona nako, norakin kororaoin Iesu Kristo ni maiuakini aroaro aikai, ao ataakin ae ti na kanga naba ngaira ni maiuakini. N te aro anne, ti na noria iai bwa Iehova bon te aomata ae kororaoi ae riai n Tautaeka i aoni bwaai ni kabane. Ma ae rianako riki iai, boni ngaia te Tama ae ti bane ni kainnanoia. E rangi ni mwaaka, e kaetitaeka n te aro ae riai, e wanawana, ao e tatangira. E aki kona ni kitania natina aika kakaonimaki.

E bia buokiko te boki aei bwa ko na kaania riki Iehova ae te Atua, ma ni karekea te reitaki ma ngaia ae aki kona n toki, bwa ko aonga n neboia n aki totoki.