Duahia Tauna E:

Mamina oi abia oi be Dirava kahirakahira oi noho, a? Momo idia laloa unai idia karaia diba lasi. Haida idia laloa Dirava be daudau herea; ma haida idia laloa idia be anina lasi dainai ia kahirakahira idia lao diba lasi. To, Baibel be lalokau dalanai ita ia hagoadaia: “Dirava kahirakahira umui lao, bona ia be umui kahirakahira do ia mai.” (Iamesi 4:8) Ia idia tomadiho henia taudia ia hagoadaia, ia gwau: “Lau, Iehova emu Dirava, be emu imana idibana lau dogoatao noho, bona oi dekenai lau gwau noho, ‘Oi gari lasi. Lau ese oi do lau durua.’”​—Isaia 41:13.

Unai bamona hetura karana Dirava ida be edena bamona ita abia diba? Hetura karadia lalonai, hatamonaia gauna be ita tura henia tauna ita diba namonamo, ena kara korikori ita ura henia bona ita laloa bada. Unai dainai Dirava ena kara bona dala idauidau be Baibel ese ia hahedinaraia, unai ita stadilaidia be gau badana. Iehova ese ena kara ta ta ia hahedinaraia dalana ita lalohadailaia, Iesu Keriso ese unai kara ta ta ia hahedinaraia goevagoeva dalana ita itaia, bona edena bamona ita danu ese unai kara ita hahedinaraia dalana ita lalopararalaia neganai, Dirava kahirakahira do ita lao. Do ita itaia Iehova be guba bona tanobada ena Lohiabadana maorona bona namona. Danu, ita ibounai ita ura ia be iseda Tamana. Ia be mai ena siahu, hahemaoro goeva, aonega, bona lalokau, bona ena kamonai natudia ia rakatanidia diba lasi.

Mani inai buka ese oi ia durua Iehova Dirava kahirakahira oi lao totona, bona gau ta ese ia hadikaia diba lasi hetura karana oi haginia bena do oi mauri bona Dirava oi hanamoa ela bona hanaihanai.