Kũrĩ Mũthomi:

Hihi wee nĩ ũiguaga ũkuhĩrĩirie Ngai? Andũ aingĩ monaga ũndũ ũcio ta ũtangĩhoteka. Amwe monaga ta Ngai atatindanagĩra nao, angĩ nao makona ta matagĩrĩire maitho-inĩ make. O na kũrĩ ũguo, Bibilia ĩtwĩraga ũũ na njĩra ya wendo: “Kuhĩrĩriai Ngai, nake nĩ ekũmũkuhĩrĩria.” (Jakubu 4:8) Ningĩ omagĩrĩria ndungata ciake na ciugo ici: “Niĩ Jehova Ngai waku, nĩ nyitĩte guoko gwaku kwa ũrĩo, na ngakwĩra atĩrĩ, ‘Ndũgetigĩre. Nĩ ngũgũteithia.’”—Isaia 41:13.

Tũngĩka atĩa nĩguo tũgĩe na ũrata ta ũcio wa hakuhĩ hamwe na Ngai? Mũthingi wa ũrata o wothe, nĩ kũmenya mũndũ ũcio wega, gũkenio nĩ ngumo ciake njega, na gũciona irĩ cia bata. Kwoguo harĩ bata twĩrute ngumo cia Jehova Ngai, na njĩra ciake iria itaarĩirio thĩinĩ wa Bibilia. Gwĩcũrania ũrĩa Jehova onanagia ngumo ciake, kũmenya ũrĩa Jesu Kristo aacionanirie na njĩra nginyanĩru, na gũtaũkĩrũo nĩ ũrĩa o na ithuĩ tũngĩcionania nĩ gũgũtũteithia tũkuhĩrĩrie Ngai makĩria. Nĩ tũkuona atĩ Jehova nĩwe mwagĩrĩru na nĩwe wĩna kĩhooto gĩa gũkorũo arĩ Mwathani Mũnene wa igũrũ na thĩ. Makĩria ma ũguo, nĩwe Ithe witũ, ũrĩa ithuothe tũbataraga. Tondũ nĩ arĩ hinya, kĩhooto, ũũgĩ, na wendo, ndangĩtiganĩria ciana ciake njĩhokeku.

Reke ibuku rĩrĩ rĩgũteithĩrĩrie gũthiĩ na mbere gũkuhĩrĩria Jehova Ngai, na kũgĩa na ũrata ũtangĩthira hamwe nake, nĩguo ũtũũre ũmũgoocaga tene na tene.