Kovaleshi ovaholike:

Mbela ou wete wa ehena popepi naKalunga? Ovanhu vahapu ove udite kutya itava dulu okweehena popepi naKalunga. Vamwe ove udite kutya oku li kokule novanhu neenghono, ofimbo vamwe ve wete kutya inava wana okweehena popepi naye. Ndele nande ongaho, Ombiibeli otai tu ladipike pahole tai ti: “Eheneni kuKalunga, opo nee Ye ta ehene kunye.” (Jakob 4:8) Okwa shilipaleka yo ovalongeli vaye a ti: “Aame Omwene Kalunga koye handi kwata eke loye lokolulyo, Ame ou handi ku lombwele: Ino kala wa tila, Ame ohandi ku kwafa.” — Jesaja 41:13.

Ongahelipi hatu dulu okukala nekwatafano lopofingo naKalunga la tya ngaho? Opo u kale u na ekwatafano la kola naumwe, ou na okukala u mu shii nawa, nokukala wa hokwa omaukwatya aye e likalekelwa nowe a lenga. Ohatu dulu okulihonga shihapu kombinga yomaukwatya neendjila daKalunga mOmbiibeli. Okudilonga kunghee Jehova ha holola omaukwatya aye, okutala kunghee Jesus Kristus a ulika omaukwatya oo monghedi ya wanenena nokukala tu shii nghee hatu dulu oku a kulika, otashi ke tu ehenifa popepi naKalunga. Ohatu ka mona kutya Jehova okwa wana filufilu okukala Omupangeli weshito alishe. Kakele kaasho, oku li yo Tate omunahole oo atusheni twa pumbwa. Jehova ita ka efa ovana vaye ovadiinini, molwaashi omunaenghono, omuyuki, omunaendunge nomunahole.

Embo eli nali ku kwafele u ehene popepi naJehova Kalunga nokukala u na ekwatafano liwa naye olo itali xulu po nandenande, opo u kale noku mu tanga fiyo alushe.