បុព្វកថា
ជូនចំពោះអ្នកអានជាទីស្នេហា:
តើអ្នកមានអារម្មណ៍ថា ខ្លួនមានភាពជិតស្និទ្ធនឹងព្រះឬទេ? មនុស្សជាច្រើនគិតថាខ្លួនមិនអាចមានភាពជិតស្និទ្ធនឹងព្រះបានឡើយ។ មនុស្សខ្លះមានអារម្មណ៍ថា ព្រះគង់នៅឆ្ងាយពេកពីពួកគេ រីឯមនុស្សឯទៀតអស់សង្ឃឹមដោយចាត់ទុកថា ខ្លួនមិនសមនឹងមានភាពជិតស្និទ្ធនឹងព្រះទាល់តែសោះ។ ក៏ប៉ុន្ដែ ព្រះជំរុញទឹកចិត្ដយើងដោយមានបន្ទូលពេញទៅដោយសេចក្ដីស្រឡាញ់ថា៖ «ចូលទៅជិតព្រះ នោះទ្រង់នឹងចូលមកជិតអ្នករាល់គ្នាដែរ»។ (យ៉ាកុប ៤:៨) ទ្រង់រហូតដល់ធានាអស់អ្នកដែលថ្វាយបង្គំទ្រង់ថា៖ ‹យើងនេះ គឺយេហូវ៉ាជាព្រះនៃអ្នក យើងនឹងកាន់ដៃស្ដាំអ្នក ដោយពោលនឹងអ្នកថា កុំឲ្យភ័យខ្លាចឡើយ យើងនឹងជួយអ្នក›។—អេសាយ ៤១:១៣
តើយើងគួរព្យាយាមធ្វើដូចម្ដេច ដើម្បីឲ្យមានចំណងមេត្រីភាពដ៏ជិតស្និទ្ធជាមួយនឹងព្រះដូចនេះទៅបាន? ចំណងមេត្រីភាពណាដែលយើងមាននោះ គឺស្ថិតនៅលើការស្គាល់បុគ្គលឯទៀតយ៉ាងច្បាស់ ទាំងស្រឡាញ់និងយល់តម្លៃនៃលក្ខណៈសម្បត្ដិផ្ទាល់ខ្លួនរបស់បុគ្គលនោះ។ ដូច្នេះ លក្ខណៈសម្បត្ដិនិងការប្រព្រឹត្ដរបស់ព្រះដែលត្រូវសម្ដែងតាមរយៈព្រះគម្ពីរ គឺជាអ្វីដែលយើងត្រូវសិក្សាជាចាំបាច់។ ពេលយើងរំពឹងគិតអំពីរបៀបព្រះយេហូវ៉ាសម្ដែងគុណសម្បត្ដិនិមួយៗរបស់ទ្រង់ និងពេលយើងមើលឃើញរបៀបព្រះយេស៊ូគ្រីស្ទបានត្រាប់តាមគុណសម្បត្ដិរបស់ព្រះយេហូវ៉ាយ៉ាងល្អឥតខ្ចោះ ថែមទាំងពេលយើងយល់ដឹងអំពីរបៀបយើងអាចបណ្ដុះឲ្យមានគុណសម្បត្ដិទាំងនោះផងដែរ នោះយើងនឹងត្រូវបានទាក់ទាញឲ្យចូលទៅជិតព្រះជាង។ យើងនឹងយល់ឃើញថា មានតែព្រះយេហូវ៉ាទេដែលសក្ដិសមនឹងឋានៈជាព្រះមហាក្សត្រសកលលោក និងមានតែទ្រង់ទេដែលមានសិទ្ធិមានឋានៈនេះ។ ម្យ៉ាងទៀត ព្រះយេហូវ៉ាគឺជាវរបិតាដែលយើងទាំងអស់គ្នាត្រូវការ។ ទ្រង់ខ្លាំង មានប្រាជ្ញា ប្រព្រឹត្ដដោយយុត្ដិធម៌ និងដោយសេចក្ដីស្រឡាញ់ ហើយទ្រង់មិនដែលបោះបង់ចោលបុត្រាបុត្រីដ៏ភក្ដីរបស់ទ្រង់ឡើយ។
សូមឲ្យសៀវភៅនេះជួយអ្នកចូលទៅជិតព្រះយេហូវ៉ាជាង និងចងមេត្រីភាពជាមួយទ្រង់ដែលគ្មានអ្នកណាអាចពង្រាត់បានឡើយ ប្រយោជន៍ឲ្យអ្នករស់ជារៀងរហូតដើម្បីសរសើរទ្រង់ជានិច្ច។
អ្នកបោះពុម្ព
