Kwa Atangi Azolwa:

Nga wafinama una yo Nzambi? Kwa ulolo wa wantu ediadi dimonekanga vo ke dilendakana ko. Ayingi bebanzanga vo kwanda kikilu kena; akaka ke bekwikilanga ko vo balenda finama Nzambi. Kansi, o Nkand’a Nzambi ye zola kwawonso ukutuwondelelanga vo: “Nufinama Nzambi, oyandi mpe okunufinama.” (Yakobo 4:8) Yandi kibeni ovovesanga asambidi andi vo: “Kadi mono Yave wa Nzambi aku nsimba koko kwaku kwalunene, yo kuvovesa vo, kumoni wonga ko; ikusadisa.”—Yesaya 41:13.

Aweyi tulenda vwila e ngwizani yayi yambote yo Nzambi? Muna konso kikundi tuvwanga, divavanga vo twateka zaya o muntu ndioyo yo zaya e fu yandi yo yangalela yo. Ozevo, e fu ya Nzambi ye mpila kevangilanga mambu nze una usongwanga muna Nkand’a Nzambi i diambu diamfunu kikilu difwete longokwa. Obadikanga mpila o Yave kesongelanga konso fu kiandi ye mpila Yesu Kristu kasongela yo, dikutusadisa mu finama Nzambi yo zaya mpe una tulenda vwila e fu yoyo. Tusinga mona vo o Yave wa nsongi ye Mfumu a nsema wawonso. Vana ntandu, yandi i Se tuvwidi o mfunu yeto awonso. Wau vo nkwa ngangu, wansongi, nzodi ye nkwa nkuma kalendi yambula wan’andi akwikizi ko.

Mbula nkanda wau wasadisa mu finama Yave wa Nzambi yo sikidisa kikundi yo yandi kina vo ke kilendi suka ko, kimana walenda zinga yo kunkembela yakwele mvu.