ຄຳນຳ
ເຖິງຜູ້ອ່ານທີ່ຮັກ:
ເຈົ້າຮູ້ສຶກໃກ້ຊິດກັບພະເຈົ້າບໍ? ສຳລັບຫຼາຍຄົນເບິ່ງຄືວ່າເປັນໄປບໍ່ໄດ້ເລີຍ. ບາງຄົນຄິດວ່າເພິ່ນບໍ່ສົນໃຈເຂົາເຈົ້າ. ສ່ວນບາງຄົນຮູ້ສຶກວ່າໂຕເອງບໍ່ດີພໍທີ່ຈະເປັນໝູ່ກັບພະເຈົ້າ. ແຕ່ຄຳພີໄບເບິນເຊີນເຮົາດ້ວຍຄວາມຮັກວ່າ: “ໃຫ້ໃກ້ຊິດກັບພະເຈົ້າ ແລ້ວເພິ່ນຈະໃກ້ຊິດກັບພວກເຈົ້າ.” (ຢາໂກໂບ 4:8) ເພິ່ນບອກກັບຜູ້ນະມັດສະການຂອງເພິ່ນວ່າ: “ເຮົາເຢໂຫວາພະເຈົ້າຂອງເຈົ້າກຳລັງຈັບມືຂວາຂອງເຈົ້າໄວ້. ເຮົາເປັນຜູ້ທີ່ເວົ້າກັບເຈົ້າວ່າ ‘ບໍ່ຕ້ອງຢ້ານ ເຮົາຈະຊ່ວຍເຈົ້າ.’”—ເອຊາຢາ 41:13
ເຮົາຈະເປັນໝູ່ສະໜິດກັບພະເຢໂຫວາພະເຈົ້າໄດ້ແນວໃດ? ໝູ່ສະໜິດເປັນຄົນທີ່ເຮົາຮູ້ຈັກດີ. ເຮົາຮູ້ວ່າລາວຄິດຫຍັງ ຮູ້ວ່າລາວຢາກເຮັດຫຍັງ ແລະເຮົາກໍມັກນິດໄສດີໆຂອງລາວ. ຍ້ອນແນວນີ້ ເຮົາຈຶ່ງຢາກສະໜິດກັບລາວຫຼາຍຂຶ້ນ. ຄ້າຍຄືກັນ ຖ້າເຮົາຢາກເປັນໝູ່ສະໜິດຂອງພະເຢໂຫວາ ເຮົາຕ້ອງຮຽນຄຳພີໄບເບິນເພື່ອຈະຮູ້ວ່າ ເພິ່ນເປັນພະເຈົ້າແບບໃດ ຄິດແນວໃດ ແລະເຮັດຫຍັງແດ່. ເຮົາຕ້ອງຄິດຕຶກຕອງກ່ຽວກັບຄຸນລັກສະນະຂອງພະເຢໂຫວາ ວິທີທີ່ພະເຢຊູຮຽນແບບພໍ່ຂອງເພິ່ນໄດ້ຢ່າງສົມບູນແບບ ແລະເຮົາຕ້ອງຄິດວ່າເຮົາຈະຮຽນແບບຄຸນລັກສະນະເຫຼົ່ານັ້ນແນວໃດ. ຖ້າເຮົາເຮັດແນວນັ້ນ ເຮົາກໍຈະເຫັນວ່າພະເຢໂຫວາເປັນຜູ້ປົກຄອງທີ່ດີທີ່ສຸດແລະເປັນພໍ່ທີ່ດີທີ່ສຸດທີ່ເຮົາຢາກມີ. ພະເຢໂຫວາພໍ່ຂອງເຮົາໃນສະຫວັນມີລິດເດດ ເພິ່ນຍຸຕິທຳ ມີສະຕິປັນຍາ ແລະຄວາມຮັກ. ເພິ່ນຈະບໍ່ປະບໍ່ຖິ້ມພວກລູກທີ່ສັດຊື່ຂອງເພິ່ນຈັກເທື່ອ.
ປຶ້ມນີ້ຈະຊ່ວຍເຈົ້າໃຫ້ໃກ້ຊິດກັບພະເຢໂຫວາພະເຈົ້າຫຼາຍຂຶ້ນ. ເຈົ້າຈະເປັນໝູ່ກັບເພິ່ນໄດ້ຕະຫຼອດໄປ ແລະເຈົ້າຈະມີຊີວິດຢູ່ເພື່ອສັນລະເສີນເພິ່ນຕະຫຼອດໄປ.
ຜູ້ຈັດພິມ
