Ne Jasombwa:

Be iwinjo ka in machiegni gi Nyasaye? Ji mang’eny neno ni mano ok nyalre. Jomoko neno ni Nyasaye ni mabor ahinya, to moko neno ni ok giwinjore e wang’ Nyasaye kendo ni ok ginyal sudo machiegni kode. Kata kamano, Muma jiwowa niya: “Suduru machiegni gi Nyasaye to en bende nosud iru.” (Jakobo 4:8) Nyasaye bende jiwo ng’ato ka ng’ato kuom jotichne kama: “An Jehova Nyasachi, amako lweti ma korachwich, An e ma awachoni niya, ‘Kik iluor. Abiro konyi.’”​—Isaya 41:13.

Ang’o ma wanyalo timo mondo wabed gi winjruok machiegni kamano gi Nyasaye? Osiep moro amora mwabedogo gi ng’ato en nikech wang’eyo ng’atno maber kendo wahero kido moko mabeyo ma en go. Omiyo, mondo wasud machiegni gi Nyasaye, onego wapuonjre Muma mondo wang’e kido ma en go kod yorene. Gik mwanyalo timo mondo okonywa sudo machiegni gi Jehova oriwo paro matut e wi kaka onyiso moro ka moro kuom kido ma en go, puonjruok kaka Yesu Kristo nyiso kido mag Nyasaye e yo maber chuth, kendo neno kaka wan bende wanyalo nyago kidogo. Ka watimo kamano, wabiro fwenyo ni Jehova ema owinjore bedo Jaloch e wi gik moko duto. Bende, wabiro ng’eyo ni en ema owinjore obed Wuonwa. E wi mano, wabiro fwenyo ni Jehova ok jwang’ ngang’ nyithinde momakore kode nikech en Nyasaye man gi teko, mohero tim makare, mariek, kendo ma jahera.

Mad bugni konyi sudo machiegni gi Jehova Nyasaye kendo okonyi loso winjruok motegno kode mondo idhi nyime pake nyaka chieng’.