Komuleshi omusimanekwa

Mbela owu wete wa hedha popepi naKalunga? Aantu oyendji oye wete itaashi vulika. Yamwe oye wete kutya oku li kokule unene, yalwe oye wete inaaya gwana okuhedha popepi naye. Ihe Ombiimbeli otayi tu ladhipike tayi ti: “Hedheni kuKalunga, oye nota hedha kune.” (Jakob 4:8) Okwa shilipaleka wo aalongeli ye ta ti: “Ongame OMUWA Kalunga koye; otandi ku tsu omukumo te ti: ‘Ino tila; otandi ku kwatha.’”—Jesaja 41:13.

Ongiini tatu vulu okukala nekwatathano lyopothingo naKalunga lya fa ndyoka? Opo tu pange uukuume nomuntu gwontumba, ohatu ilongo kombinga ye nokukala twa hokwa iikala ye iiwanawa notwe yi lenga. Onkee ano, osha simanenena okukonakona omaukwatya nomikalo dhaKalunga ndhoka dhi li mOmbiimbeli. Okutedhatedha nkene Jehova hu ulike uukwatya we kehe, nokutala nkene Jesus e wu ulike wo momukalo gwa gwanenena nokukala tu shi nkene tatu vulu oku wu kokeka otashi ke tu hedhitha lela popepi naKalunga. Otatu ka mona kutya Jehova Omupangeli gweshito alihe omuyuuki nokwa gwanenena. Kakele kaashono, ye oku li wo Tate omunahole ngoka atuheni twa pumbwa. E li omunankondo, omuyuuki, omunongo nomunahole, ihe ekelehi nando oyana ye aadhiginini.

Embo ndika otali ke ku kwathela wu hedhe lela popepi naJehova Kalunga nowu pange uukuume naye mboka kaawu na siku nawu teke po, opo wu kale to mu simaneke sigo aluhe monkalamwenyo yoye.