Pinablin Managbasa:

Kasin naliknam a maapit ka ed Dios? Parad karaklan, ompatnag ya imposible itan. Papagaan na arum a sikatoy arawin tuloy; liknaen met na arum a sikaray agmanepeg. Balet, sikatayo so simamaaron papasesegen na Biblia: “Singger kayo ed Dios, et sikato so onsingger naani ed sikayo.” (Santiago 4:8) Papaseguroan to ni ingen iray mandadayew ed sikato: “Siak, si Jehova a Dios mo, a mangitagey na kawanan a limam, a kuan ko ed sika, Agka antakot; tulongan [ta] ka naani.”​—Isaias 41:13.

Panon itayon nadampot so ontan a maapit a relasyon ed Dios? Diad dinanman a pikakaaron napaelet tayo, say mamapaelet et say pangamta ed too, pandinayew tan panamabli ed nikabiig iran walna to. Kanian saray kalidad tan paraan na Dios, unong a niparungtal ed Biblia, so makanan tema ya aralen. Lalo itayon onapit ed Dios diad panmolimoli ed paraan a pangipapatnag nen Jehova ed kada sakey ed saray kalidad to, diad pantebek no panon a nagnap ya impatnag nen Jesu-Kristo iratan, tan diad pantalos no panon itayo met a nabayuboan iratan. Naamtaan tayo a si Jehova so makanepegan tan nagnap a Soberano ed uniberso. Sakey ni, sikatoy Ama a kaukolan tayon amin. Sikatoy makapanyari, maptek, makabat, tan maaro, ya agton balot ikaindan iray matoor ya ananak to.

Komon ta sayan libro so ontulong ed sikan onapit a nagkalalo ed si Jehova a Dios, a mamaelet na siglaotan ed sikato ya agbalot napakset, pian manbilay kan mangidayew ed sikato diad ando lan ando.