Na wadikongo mbeti so:

Ti mo, mo yeke ndulu na Nzapa? Ti azo mingi, a yeke ngangu. Ambeni abâ so Nzapa ayo mingi na ala. Ti ambeni nde, ala bâ ala kpa oko pëpe ti ga ndulu na lo. Me na ndoye, Bible amû na e wango so: “I ga ndulu na Nzapa, na fade Lo ga ndulu na i.” (Jacques 4:⁠8). Nzapa adë même bê ti azo so avoro lo: “Mbi, L’Eternel Nzapa ti mo, Mbi gbu maboko ti mo ti koti. Mbi tene na mo, Zia mbito; fade Mbi sala na mo.”​—Ésaïe 41:​13.

E lingbi ti sala ngangu ti wara kota songo tongaso na Nzapa tongana nyen? Na yâ songo ti kamarade kue so e yeke gi ti wara, kota ye ni ayeke ti hinga zo ni. A yeke nzoni nga ti gonda lo na ti bâ na nene ni alengo ti lo so ayeke nde. Bible afa alengo na asalango ye ti Nzapa. Tongaso, a yeke kota ye ti tene zo amanda alengo so. Tongana e gbu li na ndo lege so Jéhovah afa na gigi alengo ti lo oko na oko, tongana nyen Jésus Christ afa alengo so na gigi pendere mingi, nga tongana e hinga lege so e nga kue e lingbi ti gi ti wara ni, fade e yeke ga ndulu na Nzapa mingi ahon ti kozo. Fade e yeke bâ so a yeke na lege ni si Jéhovah ayeke biani mbilimbili Gbia ti ndagigi. Na ndo ni, lo yeke mara ti Babâ so e kue e ye ti wara. Lo yeke na ngangu, na ndara, lo yeke zo ti mbilimbili, nga lo ndoye azo. Amolenge ti lo so ayeke be-ta-zo, lo yeke dö ala lo zia lâ oko pëpe.

Zia si buku so amû maboko na mo ti ga ndulu na Jéhovah Nzapa mingi ahon ti kozo. Zia a mû maboko na mo ti gi ti duti na songo na lo so aninga kpu na kpu, si mo lingbi ti ngbâ na fini ti sepela lo lakue lakue.