Mukwetu:

Okwete kupusha bu’be e pepi n’Efile Mukulu su? Bantu bebungi abamonaa bu bishii bilombeene kukitshika. Pangi abamonaa bu’bo bashii balombeene kwikala pepi naye, sunga shi Efile Mukulu e kula nabo. Aku namu, Bible etulungula na kifulo kyooso shi: “Efubwilei pepi n’Efile Mukulu, ê namu akefubwila pepi nenu.” (Jaake 4:8, EEM) Aye ashinkamiisha balangwidi baaye shi: “Ami Yehowa ne Efile oobe, ne mukukwate kw’eyasa dyoobe dilume, nakulungula’shi: ‘Totshiinanga, nnami akukwasha.’”​—Yeeshaya 41:13.

Mushindo kinyi watudi balombeene kobesha kwifubwila pepi n’Efile Mukulu? Bukuuku booso bwatudi balombeene kwikala na muntu, abufikaa mu kwiukeena na yawa muntu na mu kukumiina ngikashi yaaye. Byabya, bibuwa tulongye ngikashi y’Efile Mukulu na mashinda aaye abetulesha mu Bible. Kwela binangu pabitale mushindo ukwete kulesha Yehowa eyikashi dyaaye dyooso, kumona mushindo ubaadi Yesu Kidishitu mwiyileshe kalolo, na kupusha mushindo watudi balombeene namu kwiyilesha akukyebe kwitukwasha bwa kwifubwila pepi n’Efile Mukulu. Atukyebe kumona shi Yehowa nyi Nfumu mupwidikye na a binyibinyi a eyilu na nsenga. Na dingi, aye ndjo Nshetu atudi naaye lukalo. Aye Nshetu sha bukome, sha kululama, sha binangu, na kifulo, ta mukumbeene kusumbushena bana baaye basha kululama nya.

Uno mukanda ukukwashe bwa kwifubwila pepi na Yehowa Efile Mukulu, na kwikala naaye mu kipwano kishi kilombeene kutshibika, bwashi wekale na muwa na omutumbishe bwa looso.