Lespeki leisiman,

Yu e firi taki Gado de krosibei fu yu? Furu sma e prakseri taki a sani dati no kan kwetikweti. Son sma e prakseri taki Gado de tumusi fara fu wi; trawan e firi leki den no warti kwetikweti fu kon krosibei na Gado. Toku Bijbel e gi wi a lobi-ati rai disi: „Kon krosibei na Gado, èn a sa kon krosibei na unu” (Yakobus 4:8). A e gi den anbegiman fu en a dyaranti disi srefi: „Mi, Yehovah yu Gado, e grabu yu hori na yu reti-anu. Mi na a wan di e taigi yu: ’No frede. Misrefi o yepi yu.’”​—Yesaya 41:13.

San wi kan du fu kisi so wan krosibei banti nanga Gado? We, ala ten a de so taki wi e tron mati fu wan sma te wi sabi en bun, te wi lobi fa a sma de, èn te wi lobi den maniri fu a sma dati. Sobun, a de tumusi prenspari fu ondrosuku san Bijbel e taki fu a fasi fa Gado de èn fu a fasi fa a e du sani. Te wi e prakseri fa Yehovah e sori ibriwan fu den fasi fu en, te wi e si o soifri Yesus Krestes sori den fasi disi, èn te wi kon frustan tu fa wi kan kweki den srefi fasi dati, dan dati o yepi wi fu kon moro krosibei na Gado. Wi o si taki Yehovah abi ala reti fu de a Moro Heiwan fu hemel nanga grontapu, èn taki en na a moro bun sma fu tyari a frantwortu dati. San moro prenspari srefi, na taki en na a Papa di wi alamala abi fanowdu. A tranga, a de regtfardiki, a koni, a abi lobi, èn noiti a e gowe libi den getrow pikin fu en.

Meki a de so taki a buku disi e yepi yu fu kon moro krosibei na Yehovah Gado. Iya, meki a yepi yu fu kisi wan banti nanga Gado di no sa pori noiti, so taki yu kan tan prèise en fu têgo.