Siʻi Tokotaha-Lautohi:

ʻOkú ke ongoʻi ofi ki he ʻOtuá? Ki he tokolahi, ʻoku hā ngali taʻemalava ia. ʻOku ilifia ʻa e niʻihi he ʻokú ne fuʻu taumamaʻo; ʻoku ongoʻi mātuʻaki taʻefeʻunga ʻa e niʻihi ʻo ʻikai ha ʻamanaki. Kae kehe, ʻoku enginaki anga-ʻofa mai ʻa e Tohitapú kiate kitautolu: “ʻUnuʻunu [ofi] atu ki he ʻOtua, pea ʻe ʻunuʻunu [ofi] mai ia kiate kimoutolu.” (Sēmisi 4:8) ʻOku aʻu ʻo ne fakapapauʻi mai ki heʻene kau lotú: “Ko au Sihova ko ho ʻOtua te u puke ho toʻomataʻu, ʻa au ʻoku ou pehe atu, ʻOua ʻe manavahe; ko au ʻoku ou tokoniʻi koe.”​—Aisea 41:13.

ʻE malava fēfē ke tau kakapa atu ki ha vahaʻangatae vāofi pehē mo e ʻOtuá? ʻI ha faʻahinga kaumeʻa pē ʻoku tau fakatupulekina, ʻoku makatuʻunga ʻa e haʻí ʻi hono ʻiloʻi ʻa e tokotahá, manako mo fakamahuʻingaʻi hono ngaahi anga makehé. Ko ia, ko e ngaahi ʻulungaanga mo e ngaahi founga ʻa e ʻOtuá, hangē ko ia ʻoku fakahaaʻi ʻi he Tohitapú, ko ha malaʻe mātuʻaki mahuʻinga ia ʻo e akó. Ko e fakakaukauloto atu ki he founga ʻoku fakahāhaaʻi ai ʻe Sihova ʻa hono ʻulungaanga taki tahá, ko e sio ki he founga naʻe tapua haohaoa mai ai ʻe Sīsū Kalaisi kinautolú, pea mo hono mahinoʻi ʻa e founga te tau kau ai mo kitautolu ʻi hono fakatupulekina kinautolú ʻe tohoaki ai kitautolu ke ofi ange ki he ʻOtuá. Te tau ʻilo ai ko Sihova ʻa e Hau totonu mo haohaoa ʻo e ʻunivēsí. ʻIkai ngata aí, ko ia ʻa e Tamai ʻoku fiemaʻu kotoa ʻe kitautolú. ʻI heʻene mālohí, fakamaau totonú, potó, mo e ʻofá, ʻoku ʻikai ʻaupito ai te ne liʻaki ʻene fānau faitōnungá.

ʻOfa ke tokoniʻi koe ʻe he tohí ni ke ke ʻunuʻunu ke toe ofi ange ai kia Sihova ko e ʻOtuá, ke fakatupulekina ha haʻi mo ia ʻa ia ʻe ʻikai ʻaupito ke motu, koeʻuhi ke ke lava ʻo moʻui ai ke fakahīkihikiʻi ia ʻo taʻengata.