Akwanjiwa Yimwi Muŵerenga Buku Ili:

Kumbi muwona kuti mwe pa ubwezi ndi Chiuta? Ŵanthu anandi awona kuti venivi vingachitika cha. Anyaki awona kuti Chiuta we kutali ukongwa. Penipo anyaki aŵanaŵana kuti mbakwenere cha kuja bwezi laku Chiuta. Kweni Bayibolu lititichiska mwachanju kuti: “Ndereni kufupi ndi Chiuta, ndipu nayu wanderengi kufupi ndi yimwi.” (Yakobe 4:8) Ndipu iyu wasimikiziya ŵanthu wo atimusopa kuti: “Ini, Yehova Chiuta waku, ndakolesa janja laku lamaryi, ndini Yo watikukambiya kuti, ‘Ungawopanga cha. Ndikuwovyengi.’”—Yesaya 41:13.

Kumbi tingachita wuli kuti tije pa ubwezi wakukho ndi Chiuta? Kuti tije paubwezi ndi munthu, titamba dankha kumuziŵa umampha, kuziŵa mijalidu yaki, vo wachita kweniso mo waŵanaŵaniya. Mwakuyanana waka, kuti nasi tije paubwezi ndi Chiuta tikhumbika kusambira Bayibolu kuti tiziŵi mijalidu yaki, mo waŵanaŵaniya kweniso mo wachitiya vinthu. Tikhumbika kuŵanaŵaniya mo Yehova walongore mijalidu yaki, mo Yesu Khristu nayu walongoriyanga mijalidu yeniyi kweniso mo nasi tingayilongore. Mubuku ili tiwonengi kuti Yehova ndiyu Fumu yachilengedu chosi. Ndipu chakuzirwa ukongwa ntchakuti, iyu Mbada wo tosi tikhumbikiya. Iyu watiŵajowo cha ŵana ŵaki akugomezgeka chifukwa ngwanthazi, ndi murunji, ngwazeru kweniso ngwachanju.

Buku ili likuwovyeni kuti mundere kufupi ukongwa ndi Yehova Chiuta, muje nayu pa ubwezi wo ungamala cha ndi chilatu chakuti mulutirizgi kumuthamika mpaka muyaya.