Bilong Man i Ritim Dispela Buk:

Olsem wanem? Yu pilim olsem yu stap klostu long God? Planti man i ting ol i no inap tru long stap olsem. Sampela i ting em i stap longwe tumas; sampela narapela i ting ol i no gutpela man na bai ol i ken i go klostu long God. Tasol Baibel i mekim gutpela tok bilong kirapim yumi: “Yupela i mas i go klostu long God, na em bai kam klostu long yupela.” (Jems 4:8) God i tok promis long lain i lotuim em: “Mi, Jehova, God bilong yu, mi wok long holim rait han bilong yu, mi tokim yu, ‘Yu no ken pret. Mi bai helpim yu.’”​—Aisaia 41:13.

Yumi ken mekim wanem na bai yumi pas gut olsem wantaim God? Taim yumi laik kamap pren bilong wanpela man, dispela pasin pren inap kamap taim yumi save long em, laikim na tingim tru ol pasin bilong em. Olsem na em i bikpela samting long kisim save long ol pasin bilong God na ol pasin bilong em long mekim ol samting olsem Baibel i kamapim. Taim yumi tingim gut olsem wanem Jehova i save kamapim ol wan wan pasin bilong em, na luksave long olsem wanem Jisas Krais i bihainim stret ol dispela pasin, na yumi save long olsem wanem yumi tu i ken kamapim ol pasin bilong God, dispela bai pulim yumi i go klostu moa long em. Bai yumi save olsem Jehova em i gutpela King bilong heven na graun na i stret em i gat dispela namba. Na tu, em i gutpela Papa bilong helpim yumi olgeta. Em i gat bikpela strong, stretpela pasin, savetingting, na pasin laikim, na em i no inap lusim ol pikinini bilong em i stap gut long em.

Dispela buk i ken helpim yu long i go klostu moa long Jehova God, na long pas gut wantaim em inap oltaim, long dispela rot bai yu inap i stap bilong litimapim nem bilong em inap oltaim oltaim.