Muŵazgi Wakutemweka:

Kasi mukughanaghana kuti muli pafupi na Chiuta? Ŵanthu ŵanandi ŵakughanaghana kuti vingachitika yayi kusendelera kwa Yehova. Ŵanyake ŵakughanaghana kuti wali kutali chomene; apo ŵanyake ŵakuwona kuti mbakwenelera yayi kuti ŵasendelere kwa Chiuta. Nangauli ŵanthu ŵanandi ŵakughanaghana nthena, kweni Baibolo likutichiska mwachitemwa kuti: “Sendelerani kwa Chiuta, ndipo iyo wasendelerenge kwa imwe.” (Yakobe 4:8) Chiuta wakusimikizgira ŵateŵeti ŵake kuti: “Ine Yehova Chiuta wako nkhukukora pa woko lako lamalyero, Ine nkhuyowoya nawe kuti: ‘Ungawopanga chara, ine nikovwirenge.’”—Yesaya 41:13.

Kasi tingachita wuli kuti tiŵe paubwezi wanthena na Chiuta? Ubwezi uwo tikukorana na munyithu kuti ukhore, tikwenera kumanyana makora na munthu uyo, kweniso kuzirwiska mikhaliro yapadera iyo wali nayo. Mwakuyana waka, mikhaliro ya Chiuta kweniso umo wakuchitira vinthu, nga umo vyalongosolekera mu Baibolo, ni vyakuzirwa chomene kuti tivimanye. Para tikughanaghanira umo Yehova wakulongolera mikhaliro yake yose, kuwona umo Yesu wakayilongolera makora mikhaliro iyi, kweniso kumanya makora umo nase tingayilondezgera kungatovwira kuti tisendelere kwa Chiuta. Tisambirenge kuti Yehova ndiyo nadi Muwusi wa chilengiwa chose. Nakuti iyo ni Dada muwemi chomene. Ngwankhongono, ni murunji, wavinjeru na wachitemwa, wakuŵaleka yayi ŵana ŵake ŵakugomezgeka.

Mphanyi buku ili lamovwirani kuti musendelere kwa Yehova Chiuta, muŵe nayo pa ubwezi wakuti uleke kumara mwakuti mupelekenge malumbo kwa iyo nyengo zose.