Okuakutanga wa Soliwa:

Ove hẽ o liyevite okuti o kuete ukamba la Suku? Komanu valua, ci kasi ndu okuti ka ci tẽliwa. Vamue va sima okuti Suku o kasi enene ocipãla; vakuavo va litenda okuti ka va sesamẽla oku kala akamba va Suku. Pole, locisola Embimbiliya li tu vetiya hati: “Ameli ku Suku kuenje eye amela kokuene.” (Tiago 4:8) Handi vali, Suku wa likuminya kafendeli vaye hati: “Ame ndi Yehova Suku yove, ndi kuata eka liove liondio, Una o popia kokuove hati: ‘Ku ka kuate usumba ndu ku kuatisa.’”—Isaya 41:13.

Tu pondola oku kuata ndati ukamba wa pama la Suku? Ukamba wosi tu fetika lomunu umue, u kunamẽla koku kũlĩha omunu waco, koku u komõha kuenda koku sola ovituwa viaye via litepa. Cimuamue haico, ovituwa via Suku, lonjila a tu tata layo kuenda ndomo ca situluiwa Vembimbiliya, vi kuete esilivilo lialua oku vi lilongisa. Oku sokolola lutate ndomo Yehova a lekisa ocituwa locituwa caye, oku limbuka ndomo Yesu Kristu a lekisa lonjila ya lipua ovituwa viaco kuenda oku kuata elomboloko ndomo etu tu pondola oku lekisavo ovituwa viaco, ci tu kuatisa oku kuata ukamba la Suku. Tu ka limbuka okuti, Yehova eye muẽle o sesamẽla oku kala Tõlo yoluali luosi. Handi vali, eye Isia tu sukila oku kuata vosi yetu. Eye Ukuonene, ukuesunga, ukualondunge haeye ukuacisola okuti, lalimue eteke a yanduluka omãla vaye vakuekolelo.

Elivulu lilo, li ku kuatise oku kuata ukamba wa pama la Yehova Suku okuti, ukamba waco lalimue eteke ka u ka tepiwe, oco o kale komuenyo loku u sivaya otembo ka yi pui.