Ha Muvhali:

Naa ni ḓipfa ni tsini na Mudzimu? Vhathu vhanzhi vha vhona u nga zwenezwo a zwi konadzei. Vhaṅwe vha humbula uri u kule nga maanḓa; vhaṅwe a vha na fulufhelo ḽa uri vha nga sendela tsini nae. Naho zwo ralo, Bivhili i ri ṱuṱuwedza nga lufuno: “Sendelani tsini ha Mudzimu, na ene a sendele tsini haṋu.” (Yakobo 4:8) Nahone u fulufhedzisa vhagwadameli vhawe uri: “Ngauri Nṋe Yehova ndi Mudzimu wau, ndi khwaṱhisa tshanḓa tshau, ndi U vhudza ndi ri: U songo ofha; a U farisaho ndi Nṋe.”—Yesaya 41:13.

Ri nga kona hani u sendela tsini na Mudzimu nga yeneyo nḓila? Vhukonani vhuṅwe na vhuṅwe vhune ra vhu vhumba, vhu thoma nga u ḓivha muthu, u tama na u dzhiela nṱha pfaneleo dzawe dzo khetheaho. Ngauralo ri fanela u thoma nga u guda pfaneleo na nḓila dza Mudzimu, samusi zwo dzumbululwa Bivhilini. Nga u elekanya nga ha nḓila ye Yehova a sumbedza ngayo iṅwe na iṅwe ya pfaneleo dzawe, u sedza nḓila ye Yesu Kristo a dzi sumbedza ngayo nga ho fhelelaho, na u pfesesa nḓila ine na riṋe ra nga dzi ṱahulela ngayo zwi ḓo ri sendedza tsini-tsini na Mudzimu. Ri ḓo vhona uri Yehova ndi Muvhusahoṱhe o lugaho na o fhelelaho. Zwiṅwe hafhu, ndi Khotsi a ṱoḓwaho nga muṅwe na muṅwe. U na maanḓa, khaṱulokwayo, vhuṱali, nahone ndi wa lufuno, a nga si vhuye a ṱutshela vhana vhawe vha fulufhedzeaho.

U nga ri heyi bugu i nga ni thusa u sendela tsini-tsini na Yehova Mudzimu, u itela u vhumba vhushaka nae vhune ha sa ḓo pfuvha u itela u mu renda nga hu sa fheli.