Bonchchettida Nabbabiyaagoo:

Neeni Xoossaakko shiiqidabadan qoppay? Darotuyyo, hegee mule danddayettennaba milatees. Amaridaageeti I ookkonne shiiqenna giidi yayyoosona; qassi harati eti Xoossaakko shiiqana bessennabadan qoppidi, hidootaa qanxxoosona. SHin, Geeshsha Maxaafay hagaadan siiquwan zorees: “Xoossaakko shiiqite; ikka inttekko shiiqana.” (Yaaqooba 4:8) I ubba baayyo goynniyaageeta, “Taani GODAI, ne Xoossai, ne ushachcha kushiyaa oiqqana. Nena, ‘Yayyoppa, taani nena maaddana’ [yaagais]” yaagidi minttettees.—Isiyaasa 41:13.

Nuuni Xoossaara keehi dabbotanawu waati baaxetana danddayiyoo? Nuuni issi uraa loytti eriyo wodenne ayyo deˈiya dumma eeshshata nashshiyo wode aara laggetoos. Hegaa gishshawu Geeshsha Maxaafan qonccida Xoossaa eeshshatinne I issibaa oottiyo ogee nuuni xannaˈana koshshiyaaba. Yihooway ba eeshshata issuwaa issuwaa waati bessidaakko wotti dentti qoppiyoogee, Yesuus Kiristtoosi he eeshshata waati bessidaakko akeekiyoogeenne nuunikka he eeshshati deˈiyoogeeta waani gidana danddayiyaakko eriyoogee nuuni Xoossaakko shiiqanaadan oottana. Yihooway Ubbaa Haarana bessiyaagaanne wottiyoobi baynnaagaa gidiyoogaa nuuni beˈana. Qassi I nu ubbaassi koshshiya Aawa. I wolqqaama, suure pirddiyaagaa, aadhdhida eranchchanne siiqiyaagaa, qassi ammanettiya ba naata mule aggi bayenna.

Ha maxaafay neeni Xoossaa Yihoowakko kaseegaappe aaruwan shiiqanaadan, aara mule duuxxenna dabbotaa dabbotanaadan, qassi neeni merinawu A sabbanaadan maaddana mala amottoos.