Hinigugma nga Magbarasa:

Inaabat mo ba nga duok ka ha Dios? Para ha damu nga mga tawo, baga in imposible gud ito. An iba nababaraka nga hirayo hinduro hiya; an iba naabat nga diri gud hira takos. Kondi, an Biblia mahigugmaon nga nagsasagda ha aton: “Magin duok ha Dios, ngan magigin duok hiya ha iyo.” (Santiago 4:8) Iya ginpapasarig pa ngani an iya mga magsiringba: “Ako, hi Jehova nga imo Dios, an nakapot ha imo too nga kamot, an nasiring ha imo, ‘Ayaw kahadlok. Bubuligan ko ikaw.’”—Isaias 41:13.

Paonan-o kita mangangalimbasog ha pagkaada han sugad duok nga relasyon ha Dios? Ha anoman nga pakigsangkay naton, an bugkos iginbabasar ha pagkilala ha tawo, pagdayaw ngan pagpabili han iya naiiba nga mga kalidad. Salit an mga kalidad ngan mga buhat han Dios, sugad han iginpapahayag ha Biblia, importante nga bahin nga kinahanglan pag-adman. An pamalandong ha paagi han pagpakita ni Jehova han tagsa han iya mga kalidad, an pagkita kon paonan-o hingpit nga ipinakita ito ni Jesu-Kristo, ngan an pagsabot kon paonan-o kita liwat mahimo magpatubo hito makakahimo ha aton nga magin duok pa gud ha Dios. Masasabtan naton nga hi Jehova an may katungod ngan hingpit nga Soberano han uniberso. Dugang pa, hiya an Amay nga ginkikinahanglan naton ngatanan. Tungod kay may gahum, hustisya, kinaadman, ngan gugma, diri gud niya ginbabayaan an iya matinumanon nga mga anak.

Hinaot ini nga libro makabulig ha imo nga magin duok pa gud kan Jehova nga Dios, nga makahimo hin bugkos ha iya nga diri gud mauutod, basi mahimo ka mabuhi ha pagdayaw ha iya ha kadayonan.