Ŵakunonyelwa Ŵakuŵalanga Bukuji:

Ana yili yakomboleka kumŵandichila Mlungu? Kwa ŵajinji yeleyi mpaka yiwonecheje kuŵa yangakomboleka. Ŵane akusaganisya kuti Mlungu jwangali lung’wanu ni jemanjajo. Soni ŵane akusaganisya kuti ali ŵangaŵajilwa kumŵandichila Mlungu. Nambope, Baibulo mwachinonyelo jikusatulimbikasya kuti, “Mwaŵandichile Mlungu, nipo ŵalakwe tachimŵandichila jemanja.” (Yakobo 4:8) Jwalakwe akusiŵasimichisyasoni ŵakulambila ŵakwe kuti, “Une, Ambuje Mlungu jwenu, ngumlimbisya ni kumsalila kuti, ‘Mkatenda woga; Tinjimkamuchisya.’”—Yesaya 41:13

Ana tukusosekwa kutenda chichi kuti tuŵe paunasi ni Mlungu? Unasi watukusakola ni mjetu, ukusalimba ligongo lyakuti tukusammanyilila mjetujo, kukumbila soni kusiwona ndamo syakwe kuŵa syakusosekwa mnope. Baibulo jikusasala ya ndamo sya Mlungu soni mwakusatendela yindu. Myoyo, tukusosekwa kulijiganya yindu yeleyi. Kuganichisya mwakusokoka yakusati Yehofa pakulosya ndamo jakwe jilijose, kulola yaŵatite Yesu Klistu pakulosya ndamosi soni kumanyilila yatukusosekwa kutenda kuti tukole ndamosi, mpaka kutukamuchisye kuti tumŵandichile Mlungu. Chituyiwone kuti Yehofa ni jwali jwakuŵajilwa kuŵa Jwakulamulila Jwamkulungwa jwa chilambo chosope. Nambosoni jwalakwe ali Atati ŵele jwalijose akusamsaka. Pakuŵa jwalakwe ali jwamachili, jwachilungamo, jwalunda soni jwachinonyelo, nganaŵa ŵalesile ŵanache ŵakwe ŵakulupichika.

Tukusaka kuti bukuji jakamuchisye kumŵandichila mnope Yehofa Mlungu, kuŵa paunasi wakulimba ni jwalakwe, ni chakulinga chakuti amlumbeje jwalakwe mpaka kalakala.