1, 2. (എ) നിങ്ങൾ ദൈവ​ത്തോട്‌ ഏതു ചോദ്യ​ങ്ങൾ ചോദി​ക്കാൻ ആഗ്രഹി​ക്കും? (ബി) മോശെ ദൈവ​ത്തോട്‌ എന്തു ചോദി​ച്ചു?

 ദൈവ​വു​മാ​യി ഒരു സംഭാ​ഷ​ണം നടത്തു​ന്ന​തി​നെ കുറിച്ചു നിങ്ങൾക്കു സങ്കൽപ്പി​ക്കാ​നാ​കു​മോ? ആ ചിന്തതന്നെ ഭയാദ​ര​വു ജനിപ്പി​ക്കു​ന്നു, അല്ലേ? അഖിലാണ്ഡ പരമാ​ധി​കാ​രി നിങ്ങ​ളോ​ടു സംസാ​രി​ക്കു​ന്നു! ആദ്യം നിങ്ങൾ സംസാ​രി​ക്കാൻ മടിക്കു​ന്നു, എന്നാൽ പിന്നീട്‌ നിങ്ങൾ സംസാ​രി​ച്ചു​തു​ട​ങ്ങു​ന്നു. അവൻ ശ്രദ്ധി​ക്കു​ന്നു, അവൻ പ്രതി​വ​ചി​ക്കു​ന്നു, നിങ്ങൾക്ക്‌ ഏതു ചോദ്യ​വും ചോദി​ക്കാ​നു​ള്ള സ്വാത​ന്ത്ര്യം തോന്നു​ന്നു. ഇപ്പോൾ, നിങ്ങൾ ഏതു ചോദ്യം ചോദി​ക്കും?

² പണ്ട്‌, മോശെ എന്ന വ്യക്തിക്ക്‌ സമാന​മാ​യ അനുഭവം ഉണ്ടായി. എന്നാൽ അവൻ ദൈവ​ത്തോ​ടു ചോദി​ക്കാൻ ആഗ്രഹിച്ച ചോദ്യം നിങ്ങളെ ആശ്ചര്യ​പ്പെ​ടു​ത്തി​യേ​ക്കാം. തന്നെക്കു​റി​ച്ചു​ത​ന്നെ​യോ തന്റെ ഭാവിയെ കുറി​ച്ചോ എന്തിന്‌, മനുഷ്യ​വർഗ​ത്തി​ന്റെ ദുരവ​സ്ഥ​യെ കുറി​ച്ചോ പോലും അവൻ ചോദി​ച്ചി​ല്ല. പകരം, ദൈവ​ത്തി​ന്റെ നാമം എന്തെന്ന്‌ അവൻ ആരാഞ്ഞു. ദൈവ​ത്തി​ന്റെ വ്യക്തി​പ​ര​മാ​യ നാമം മോ​ശെ​യ്‌ക്ക്‌ അപ്പോൾത്ത​ന്നെ അറിയാ​മാ​യി​രു​ന്ന​തു​കൊണ്ട്‌, അങ്ങനെ​യൊ​രു ചോദ്യം വിചി​ത്ര​മാ​യി നിങ്ങൾക്കു തോന്നി​യേ​ക്കാം. ആ സ്ഥിതിക്ക്‌, അവന്റെ ചോദ്യ​ത്തിന്‌ ആഴമേ​റി​യ അർഥം ഉണ്ടായി​രു​ന്നി​രി​ക്ക​ണം. യഥാർഥ​ത്തിൽ, മോ​ശെ​യ്‌ക്കു ചോദി​ക്കാൻ കഴിയു​മാ​യി​രു​ന്ന ഏറ്റവും പ്രധാ​ന​പ്പെട്ട ചോദ്യ​മാ​യി​രു​ന്നു അത്‌. അതിനുള്ള ഉത്തരത്തിന്‌ നമ്മെ​യെ​ല്ലാം സംബന്ധി​ച്ചി​ട​ത്തോ​ളം വലിയ പ്രാധാ​ന്യ​മുണ്ട്‌. ദൈവ​ത്തോട്‌ അടുത്തു ചെല്ലു​ന്ന​തിൽ ഒരു മർമ​പ്ര​ധാ​ന പടി സ്വീക​രി​ക്കാൻ അതിനു നിങ്ങളെ സഹായി​ക്കാൻ കഴിയും. എങ്ങനെ? ശ്രദ്ധേ​യ​മാ​യ ആ സംഭാ​ഷ​ണം നമു​ക്കൊ​ന്നു വിശക​ല​നം ചെയ്യാം.

3, 4. ദൈവ​വും മോ​ശെ​യും തമ്മിലുള്ള സംഭാ​ഷ​ണ​ത്തി​ലേ​ക്കു നയിച്ച സംഭവങ്ങൾ ഏവ, ആ സംഭാ​ഷ​ണ​ത്തി​ന്റെ സാരം എന്തായി​രു​ന്നു?

³ മോ​ശെ​യ്‌ക്ക്‌ അപ്പോൾ 80 വയസ്സാ​യി​രു​ന്നു. ഈജി​പ്‌തിൽ അടിമ​ക​ളാ​യി കഴിഞ്ഞി​രു​ന്ന തന്റെ ആളുക​ളിൽനിന്ന്‌, ഇസ്രാ​യേ​ല്യ​രിൽനിന്ന്‌, അകന്ന്‌ അവൻ ഒരു പ്രവാ​സി​യാ​യി നാലു പതിറ്റാ​ണ്ടു​കൾ ചെലവ​ഴി​ച്ചി​രു​ന്നു. ഒരു ദിവസം തന്റെ അമ്മായി​യ​പ്പ​ന്റെ ആട്ടിൻകൂ​ട്ട​ത്തെ മേയ്‌ച്ചു​കൊ​ണ്ടി​രു​ന്ന​പ്പോൾ അവൻ ഒരു വിചിത്ര പ്രതി​ഭാ​സം കണ്ടു. ഒരു മുൾപ്പ​ടർപ്പി​നു തീ പിടി​ച്ചി​രി​ക്കു​ന്നു. എന്നാൽ അതു കത്തിച്ചാ​മ്പ​ലാ​കു​ന്നി​ല്ലാ​യി​രു​ന്നു. പർവത​ച്ചെ​രു​വിൽ ഒരു ദീപസ്‌തം​ഭം പോലെ അത്‌ പ്രകാ​ശി​ച്ചു​കൊ​ണ്ടേ​യി​രു​ന്നു. കാര്യം എന്താ​ണെ​ന്ന​റി​യാൻ മോശെ അതിന്‌ അടു​ത്തേ​ക്കു​ചെ​ന്നു.  തീയുടെ നടുവിൽനിന്ന്‌ ഒരു ശബ്ദം മോ​ശെ​യോ​ടു സംസാ​രി​ച്ച​പ്പോൾ അവൻ ഞെട്ടി​പ്പോ​യി​രി​ക്ക​ണം! തുടർന്ന്‌, ഒരു ദൂതവ​ക്താ​വി​ലൂ​ടെ ദൈവം മോ​ശെ​യു​മാ​യി ദീർഘ​നേ​രം സംഭാ​ഷ​ണം നടത്തി. ഒരുപക്ഷേ നിങ്ങൾക്ക്‌ അറിയാ​വു​ന്ന​തു​പോ​ലെ, വിമു​ഖ​നാ​യി നിന്ന മോ​ശെ​യോട്‌ സ്വസ്ഥമായ ജീവിതം വെടിഞ്ഞ്‌ ഈജി​പ്‌തി​ലേ​ക്കു മടങ്ങി​പ്പോ​യി അടിമ​ത്ത​ത്തിൽനിന്ന്‌ ഇസ്രാ​യേ​ല്യ​രെ വിടു​വി​ക്കാൻ ദൈവം അവി​ടെ​വെച്ച്‌ ആവശ്യ​പ്പെ​ട്ടു.—പുറപ്പാ​ടു 3:1-12.

⁴ ആ സമയത്ത്‌, മോ​ശെ​യ്‌ക്ക്‌ ദൈവ​ത്തോട്‌ ഏതു ചോദ്യ​വും ചോദി​ക്കാ​മാ​യി​രു​ന്നു. എന്നാൽ അവൻ ചോദി​ക്കാൻ ആഗ്രഹിച്ച ചോദ്യം ശ്രദ്ധി​ക്കു​ക: ‘ഞാൻ യിസ്രാ​യേൽമ​ക്ക​ളു​ടെ അടുക്കൽ ചെന്നു: നിങ്ങളു​ടെ പിതാ​ക്ക​ന്മാ​രു​ടെ ദൈവം എന്നെ നിങ്ങളു​ടെ അടുക്കൽ അയച്ചി​രി​ക്കു​ന്നു എന്നു പറയു​മ്പോൾ: അവന്റെ നാമം എന്തെന്നു അവർ എന്നോടു ചോദി​ച്ചാൽ ഞാൻ അവരോ​ടു എന്തു പറയേണം?’—പുറപ്പാ​ടു 3:13.

5, 6. (എ) മോ​ശെ​യു​ടെ ചോദ്യം ലളിത​വും മർമ​പ്ര​ധാ​ന​വു​മാ​യ ഏതു സത്യം നമ്മെ പഠിപ്പി​ക്കു​ന്നു? (ബി) ദൈവ​ത്തി​ന്റെ വ്യക്തി​പ​ര​മാ​യ നാമ​ത്തോ​ടു​ള്ള ബന്ധത്തിൽ ചിലർ നിന്ദ്യ​മാ​യ ഏതു പ്രവൃത്തി ചെയ്‌തി​രി​ക്കു​ന്നു? (സി) ദൈവം മനുഷ്യ​വർഗ​ത്തിന്‌ തന്റെ നാമം വെളി​പ്പെ​ടു​ത്തി​യി​രി​ക്കു​ന്നു എന്ന വസ്‌തുത വളരെ പ്രധാ​ന​മാ​യി​രി​ക്കു​ന്നത്‌ എന്തു​കൊണ്ട്‌?

⁵ ഒന്നാമ​താ​യി, ആ ചോദ്യം ദൈവ​ത്തിന്‌ ഒരു നാമമുണ്ട്‌ എന്നു നമ്മെ പഠിപ്പി​ക്കു​ന്നു. ലളിത​മാ​യ ഈ സത്യത്തെ നാം നിസ്സാ​ര​മാ​യി എടുക്ക​രുത്‌. എന്നാൽ അനേകർ അങ്ങനെ ചെയ്യുന്നു. ഒട്ടനവധി ബൈബിൾ ഭാഷാ​ന്ത​ര​ങ്ങ​ളി​ലും ദൈവ​ത്തി​ന്റെ വ്യക്തി​പ​ര​മാ​യ നാമം മാറ്റി പകരം “കർത്താവ്‌,” “ദൈവം” എന്നിങ്ങ​നെ​യു​ള്ള സ്ഥാന​പ്പേ​രു​കൾ ഉപയോ​ഗി​ച്ചി​രി​ക്കു​ന്നു. മതത്തിന്റെ പേരിൽ ചെയ്‌തി​രി​ക്കു​ന്ന അത്യന്തം ദുഃഖ​ക​ര​വും നിന്ദ്യ​വു​മാ​യ സംഗതി​ക​ളിൽ ഒന്നാണ്‌ ഇത്‌. സാധാ​ര​ണ​ഗ​തി​യിൽ, ആരെ​യെ​ങ്കി​ലും പരിച​യ​പ്പെ​ടു​മ്പോൾ നിങ്ങൾ ആദ്യം ചെയ്യുന്ന സംഗതി എന്താണ്‌? അയാളു​ടെ പേര്‌ ചോദി​ക്കും, അല്ലേ? ദൈവത്തെ അറിയുന്ന കാര്യ​ത്തി​ലും അതുത​ന്നെ​യാണ്‌ ഉൾപ്പെ​ട്ടി​രി​ക്കു​ന്നത്‌. പേരി​ല്ലാ​ത്ത, നമുക്ക്‌ അറിയാ​നോ അടുക്കാ​നോ കഴിയാത്ത, ഒരുവനല്ല അവൻ. അദൃശ്യ​നാ​ണെ​ങ്കി​ലും അവൻ ഒരു വ്യക്തി​യാണ്‌, അവന്‌ ഒരു നാമമുണ്ട്‌—യഹോവ.

⁶ കൂടാതെ, ദൈവം തന്റെ വ്യക്തി​പ​ര​മാ​യ നാമം വെളി​പ്പെ​ടു​ത്തു​മ്പോൾ, ശ്രദ്ധേ​യ​വും പുളക​പ്ര​ദ​വു​മാ​യ ഒരു വസ്‌തുത അതുമാ​യി ബന്ധപ്പെ​ട്ടി​രി​ക്കു​ന്നു. തന്നെ അടുത്ത​റി​യാൻ അവൻ നമ്മെ ക്ഷണിക്കു​ക​യാണ്‌. നമുക്കു ജീവി​ത​ത്തിൽ സാധ്യ​മാ​കു​ന്ന ഏറ്റവും നല്ല തിര​ഞ്ഞെ​ടു​പ്പു നടത്താൻ, അതായത്‌ നാം അവനോട്‌ അടുത്തു ചെല്ലാൻ, അവൻ ആഗ്രഹി​ക്കു​ന്നു. എന്നാൽ യഹോവ തന്റെ നാമം നമ്മോടു പറയു​ന്ന​തി​ല​ധി​കം ചെയ്‌തി​രി​ക്കു​ന്നു. അത്‌ പ്രതി​നി​ധീ​ക​രി​ക്കു​ന്ന വ്യക്തി​യെ​ക്കു​റി​ച്ചും അവൻ നമ്മെ പഠിപ്പി​ച്ചി​രി​ക്കു​ന്നു.

7. (എ) ദൈവ​ത്തി​ന്റെ വ്യക്തി​പ​ര​മാ​യ നാമത്തി​ന്റെ അർഥം എന്താ​ണെ​ന്നാണ്‌ കരുത​പ്പെ​ടു​ന്നത്‌? (ബി) മോശെ ദൈവ​ത്തോട്‌ അവന്റെ നാമം ചോദി​ച്ച​പ്പോൾ, അവൻ യഥാർഥ​ത്തിൽ എന്ത്‌ അറിയാ​നാണ്‌ ആഗ്രഹി​ച്ചത്‌?

⁷ യഹോ​വ​ത​ന്നെ​യാണ്‌ തന്റെ നാമം തിര​ഞ്ഞെ​ടു​ത്തത്‌. ആ നാമം അർഥസ​മ്പു​ഷ്ട​മാണ്‌. “യഹോവ” എന്നതിന്റെ അർഥം, “ആയിത്തീ​രാൻ അവൻ ഇടയാ​ക്കു​ന്നു” എന്നാ​ണെന്ന്‌ കരുത​പ്പെ​ടു​ന്നു. യഹോവ മുഴു​പ്ര​പ​ഞ്ച​ത്തി​ലും അനന്യ​നാണ്‌. കാരണം അവനാണ്‌ സകലവും സൃഷ്ടി​ച്ചത്‌; അവൻ തന്റെ ഉദ്ദേശ്യ​ങ്ങൾ നിറ​വേ​റാൻ ഇടയാ​ക്കു​ക​യും ചെയ്യുന്നു. അത്‌ ഭയാദ​ര​വു​ണർത്തു​ന്ന ഒരു ആശയമാണ്‌. എന്നാൽ ദൈവ​നാ​മ​ത്തി​ന്റെ അർഥത്തിൽ മറ്റെ​ന്തെ​ങ്കി​ലും ഉൾപ്പെ​ട്ടി​ട്ടു​ണ്ടോ? മോശെ കൂടുതൽ മനസ്സി​ലാ​ക്കാൻ ആഗ്രഹി​ച്ചു എന്നതു സ്‌പഷ്ടം. അവന്‌ ദൈവ​നാ​മം അറിയാ​മാ​യി​രു​ന്നു. യഹോ​വ​യാണ്‌ സ്രഷ്ടാ​വെ​ന്നും അവനറി​യാ​മാ​യി​രു​ന്നു. ദിവ്യ​നാ​മം പുതി​യ​താ​യി​രു​ന്നി​ല്ല എന്നതാണു വസ്‌തുത. നൂറ്റാ​ണ്ടു​ക​ളാ​യി ആളുകൾ അത്‌ ഉപയോ​ഗി​ച്ചു​പോ​ന്നി​രു​ന്നു. മോശെ ദൈവ​ത്തി​ന്റെ നാമം ചോദി​ച്ച​പ്പോൾ യഥാർഥ​ത്തിൽ അവൻ, ആ നാമം പ്രതി​നി​ധാ​നം ചെയ്യുന്ന വ്യക്തിയെ കുറിച്ചു ചോദി​ക്കു​ക​യാ​യി​രു​ന്നു. ഫലത്തിൽ, അവന്റെ ചോദ്യം ഇതായി​രു​ന്നു: ‘നിന്റെ ജനമായ ഇസ്രാ​യേ​ലി​നു നിന്നി​ലു​ള്ള വിശ്വാ​സ​ത്തെ ബലിഷ്‌ഠ​മാ​ക്കു​ന്ന, നീ അവരെ യഥാർഥ​ത്തിൽ വിടു​വി​ക്കു​മെന്ന്‌ അവരെ ബോധ്യ​പ്പെ​ടു​ത്തു​ന്ന എന്ത്‌ എനിക്ക്‌ അവരോ​ടു പറയാൻ കഴിയും?’

8, 9. (എ) യഹോവ മോ​ശെ​യു​ടെ ചോദ്യ​ത്തിന്‌ എങ്ങനെ ഉത്തരം നൽകി, മിക്ക ഭാഷാ​ന്ത​ര​ങ്ങ​ളും ആ മറുപടി തെറ്റായി പരിഭാ​ഷ​പ്പെ​ടു​ത്തി​യി​രി​ക്കു​ന്നത്‌ എങ്ങനെ? (ബി) “ഞാൻ എന്താ​ണെ​ന്നു തെളി​യി​ക്കു​ന്നു​വോ ഞാൻ അതാ​ണെ​ന്നു തെളി​യും” എന്ന പ്രസ്‌താ​വ​ന​യു​ടെ അർഥ​മെന്ത്‌?

⁸ മറുപ​ടി​യാ​യി യഹോവ തന്റെ വ്യക്തി​ത്വ​ത്തിന്റെ പുളക​പ്ര​ദ​മാ​യ ഒരു വശം വെളി​പ്പെ​ടു​ത്തി. അത്‌ അവന്റെ നാമത്തി​ന്റെ അർഥവു​മാ​യി ബന്ധപ്പെ​ട്ട​താ​യി​രു​ന്നു. “ഞാൻ എന്താ​ണെ​ന്നു തെളി​യി​ക്കു​ന്നു​വോ ഞാൻ അതാ​ണെ​ന്നു തെളി​യും” എന്ന്‌ അവൻ മോ​ശെ​യോ​ടു പറഞ്ഞു. (പുറപ്പാ​ടു 3:14, NW) പല ഭാഷാ​ന്ത​ര​ങ്ങ​ളും “ഞാൻ ആകുന്നവൻ ഞാൻ ആകുന്നു” എന്നാണ്‌ ഇതിനെ പരിഭാ​ഷ​പ്പെ​ടു​ത്തി​യി​രി​ക്കു​ന്നത്‌. എന്നാൽ കൃത്യ​മാ​യ പരിഭാ​ഷ​കൾ, ദൈവം തന്റെ അസ്‌തി​ത്വ​ത്തെ സ്ഥിരീ​ക​രി​ക്കു​ക മാത്ര​മാ​യി​രു​ന്നി​ല്ലെന്നു പ്രകട​മാ​ക്കു​ന്നു. പകരം, യഹോവ തന്റെ വാഗ്‌ദാ​ന​ങ്ങൾ നിവർത്തി​ക്കാൻ ആവശ്യ​മാ​യി​രി​ക്കു​ന്ന എന്തും ‘ആയിത്തീ​രും’ അല്ലെങ്കിൽ തന്നെത്തന്നെ ആക്കിത്തീർക്കും. ജെ. ബി. റോഥർഹാ​മി​ന്റെ ഭാഷാ​ന്ത​രം “ഞാൻ എന്തെല്ലാം ആയിത്തീ​രാൻ ആഗ്രഹി​ക്കു​ന്നു​വോ അതെല്ലാം ആയിത്തീ​രും” എന്നു സ്‌പഷ്ട​മാ​യി വിവർത്ത​നം ചെയ്യുന്നു. ബൈബിൾ എഴുത​പ്പെട്ട എബ്രാ​യ​യിൽ പാണ്ഡി​ത്യ​മു​ള്ള ഒരാൾ ഈ വാക്യം ഇങ്ങനെ വിശദീ​ക​രി​ക്കു​ന്നു: “സാഹച​ര്യം അല്ലെങ്കിൽ ആവശ്യം എന്തുതന്നെ ആയാലും . . . ദൈവം അതിനുള്ള പരിഹാ​രം ‘ആയിത്തീ​രും.’”

⁹ ഇസ്രാ​യേ​ല്യർക്ക്‌ അത്‌ എന്ത്‌ അർഥമാ​ക്കി? അവർക്ക്‌ എന്തു പ്രതി​ബ​ന്ധം നേരി​ട്ടാ​ലും, അവർ ഏതു ദുർഘ​ട​സ​ന്ധി​യിൽ അകപ്പെ​ട്ടാ​ലും,  അവരെ അടിമ​ത്ത​ത്തിൽനി​ന്നു വിടു​വിച്ച്‌ വാഗ്‌ദത്ത ദേശ​ത്തേ​ക്കു വരുത്താൻ ആവശ്യ​മാ​യ എന്തും ആയിത്തീ​രു​മാ​യി​രു​ന്നു യഹോവ. തീർച്ച​യാ​യും ആ നാമം ദൈവ​ത്തിൽ വിശ്വാ​സം ജനിപ്പി​ച്ചു. ഇന്നു നമ്മുടെ കാര്യ​ത്തി​ലും ദൈവ​നാ​മ​ത്തിന്‌ അതുതന്നെ ചെയ്യാൻ കഴിയും. (സങ്കീർത്ത​നം 9:10) എന്തു​കൊണ്ട്‌?

10, 11. യഹോ​വ​യു​ടെ നാമം അവനെ ഏറ്റവു​മ​ധി​കം ധർമങ്ങൾ നിർവ​ഹി​ക്കു​ന്ന​വ​നും സങ്കൽപ്പി​ക്കാ​വു​ന്ന​തി​ലേ​ക്കും ഏറ്റവും നല്ല പിതാ​വു​മാ​യി വീക്ഷി​ക്കാൻ നമ്മെ പ്രോ​ത്സാ​ഹി​പ്പി​ക്കു​ന്നത്‌ എങ്ങനെ? ദൃഷ്ടാ​ന്തീ​ക​രി​ക്കു​ക.

¹⁰ ദൃഷ്ടാ​ന്ത​ത്തിന്‌, മക്കളെ പരിപാ​ലി​ക്കു​മ്പോൾ തങ്ങൾക്കു വ്യത്യ​സ്‌ത ധർമങ്ങൾ നിർവ​ഹി​ക്കേ​ണ്ടി വരു​മെന്ന്‌ മാതാ​പി​താ​ക്കൾക്ക്‌ അറിയാം. ഒരു ദിവസം​ത​ന്നെ ഒരു മാതാവ്‌ ഒരു നേഴ്‌സി​ന്റെ​യോ പാചക​ക്കാ​രി​യു​ടെ​യോ അധ്യാ​പി​ക​യു​ടെ​യോ ശിക്ഷക​യു​ടെ​യോ ന്യായാ​ധി​പ​യു​ടെ​യോ ഒക്കെ ധർമങ്ങൾ നിർവ​ഹി​ക്കേ​ണ്ട​തു​ണ്ടാ​യി​രി​ക്കാം. തങ്ങൾ വഹി​ക്കേ​ണ്ട​താ​യ ധർമങ്ങ​ളു​ടെ ബാഹു​ല്യം പല മാതാ​പി​താ​ക്ക​ളെ​യും പരി​ഭ്രാ​ന്ത​രാ​ക്കു​ന്നു. കാരണം, തങ്ങളുടെ കുഞ്ഞുങ്ങൾ തങ്ങളിൽ സമ്പൂർണ വിശ്വാ​സം അർപ്പി​ക്കു​ന്നു​ണ്ടെന്ന്‌ അവർക്ക​റി​യാം. പരുക്കി​ന്റെ വേദന ഇല്ലാതാ​ക്കാ​നും കൊച്ചു​കൊ​ച്ചു വഴക്കു​കൾക്ക്‌ ഒത്തുതീർപ്പു​ണ്ടാ​ക്കാ​നും പൊട്ടി​പ്പോ​യ കളിപ്പാ​ട്ടം നന്നാക്കി​ത്ത​രാ​നും മനസ്സിൽ പൊന്തി​വ​രു​ന്ന നൂറു​നൂ​റു ചോദ്യ​ങ്ങൾക്ക്‌ ഉത്തരം നൽകാ​നും അച്ഛനും അമ്മയ്‌ക്കും കഴിയു​മെന്ന കാര്യ​ത്തിൽ കുട്ടി​കൾക്ക്‌ ഒരിക്ക​ലും സംശയം തോന്നാ​റി​ല്ല. മക്കൾ തങ്ങളിൽ അർപ്പി​ച്ചി​രി​ക്കു​ന്ന വിശ്വാ​സ​ത്തിന്‌ തങ്ങൾ അർഹരാ​ണോ എന്ന്‌ ചില മാതാ​പി​താ​ക്കൾ സംശയി​ക്കു​ന്നു, ചില​പ്പോ​ഴൊ​ക്കെ സ്വന്തം പരിമി​തി​കൾ അവരെ നിരാ​ശ​രാ​ക്കു​ന്നു. ഈ ധർമങ്ങ​ളിൽ പലതും നിറ​വേ​റ്റാൻ തങ്ങൾ തികച്ചും അപ്രാ​പ്‌ത​രാ​ണെന്ന്‌ അവർ വിചാ​രി​ക്കു​ന്നു.

¹¹ യഹോ​വ​യും സ്‌നേ​ഹ​നി​ധി​യാ​യ ഒരു പിതാ​വാണ്‌. എന്നിരു​ന്നാ​ലും, തന്റെ പൂർണ​ത​യു​ള്ള സ്വന്തം നിലവാ​ര​ങ്ങൾക്കു​ള്ളിൽ നിന്നു​കൊ​ണ്ടു​ത​ന്നെ സാധ്യ​മാ​യ ഏറ്റവും നല്ല രീതി​യിൽ തന്റെ ഭൗമിക മക്കളെ പരിപാ​ലി​ക്കാൻ അവന്‌ എന്തും ആയിത്തീ​രാൻ കഴിയും. അതു​കൊണ്ട്‌ യഹോവ എന്ന അവന്റെ നാമം, സങ്കൽപ്പി​ക്കാ​വു​ന്ന​തി​ലേ​ക്കും ഏറ്റവും നല്ല പിതാ​വെന്ന നിലയിൽ അവനെ വീക്ഷി​ക്കാൻ നമ്മെ പ്രോ​ത്സാ​ഹി​പ്പി​ക്കു​ന്നു. (യാക്കോബ്‌ 1:17) മോ​ശെ​യും മറ്റെല്ലാ വിശ്വ​സ്‌ത ഇസ്രാ​യേ​ല്യ​രും യഹോവ അവന്റെ നാമത്തി​ന്റെ അർഥത്തി​നു ചേർച്ച​യിൽ പ്രവർത്തി​ക്കു​ന്ന​താ​യി പെട്ടെന്നു മനസ്സി​ലാ​ക്കി. അവൻ തന്നെത്തന്നെ അജയ്യനായ ഒരു സൈന്യാ​ധി​പ​നും പ്രകൃതി മൂലക​ങ്ങ​ളു​ടെ​യെ​ല്ലാം അധികാ​രി​യും ഒരു അതുല്യ നിയമ​ദാ​താ​വും ന്യായാ​ധി​പ​തി​യും അതിവി​ദ​ഗ്‌ധ നിർമാ​താ​വും ഭക്ഷ്യ-ജല ദാതാ​വും വസ്‌ത്ര​ത്തി​ന്റെ​യും പാദര​ക്ഷ​ക​ളു​ടെ​യും സംരക്ഷ​ക​നും അതില​ധി​ക​വും ആക്കിത്തീർത്ത​പ്പോൾ ഭയാദ​ര​വോ​ടെ നോക്കി​നിൽക്കാ​നേ അവർക്കു കഴിഞ്ഞു​ള്ളൂ.

12. യഹോ​വ​യോ​ടു​ള്ള ഫറവോ​ന്റെ മനോ​ഭാ​വം മോ​ശെ​യു​ടേ​തിൽനി​ന്നു വ്യത്യ​സ്‌ത​മാ​യി​രു​ന്നത്‌ എങ്ങനെ?

 ¹² ഈ വിധത്തിൽ ദൈവം തന്റെ നാമം അറിയി​ക്കു​ക​യും ആ നാമത്താൽ പ്രതീ​നി​ധീ​ക​രി​ക്ക​പ്പെ​ടുന്ന വ്യക്തി​യെ​ക്കു​റി​ച്ചു​ള്ള ആവേശ​ക​ര​മാ​യ വിവരങ്ങൾ വെളി​പ്പെ​ടു​ത്തു​ക​യും ചെയ്‌തി​രി​ക്കു​ന്നു. കൂടാതെ താൻ തന്നെക്കു​റി​ച്ചു പറയുന്ന കാര്യങ്ങൾ സത്യമാ​ണെന്ന്‌ അവൻ കാണി​ച്ചു​ത​രു​ക​പോ​ലും ചെയ്‌തി​രി​ക്കു​ന്നു. നാം ദൈവത്തെ അറിയാൻ അവൻ ആഗ്രഹി​ക്കു​ന്നു എന്നതിനു സംശയ​മി​ല്ല. നാം എങ്ങനെ പ്രതി​ക​രി​ക്കു​ന്നു? മോശെ ദൈവത്തെ അറിയാൻ ആഗ്രഹി​ച്ചു. ആ തീവ്ര​മാ​യ ആഗ്രഹം മോ​ശെ​യു​ടെ ജീവി​ത​ഗ​തി​യെ രൂപ​പ്പെ​ടു​ത്തു​ക​യും തന്റെ സ്വർഗീയ പിതാ​വി​നോ​ടു പൂർവാ​ധി​കം അടുക്കാൻ അവനെ പ്രേരി​പ്പി​ക്കു​ക​യും ചെയ്‌തു. (സംഖ്യാ​പു​സ്‌ത​കം 12:6-8; എബ്രായർ 11:27) പരിതാ​പ​ക​ര​മെ​ന്നു പറയട്ടെ, മോ​ശെ​യു​ടെ സമകാ​ലി​ക​രിൽ ചിലർക്ക്‌ ആ ആഗ്രഹം ഇല്ലായി​രു​ന്നു. മോശെ ഫറവോ​നോട്‌ യഹോവ എന്ന നാമം പറഞ്ഞ​പ്പോൾ ‘യഹോവ ആർ’ എന്ന്‌ ഗർവി​ഷ്‌ഠ​നാ​യ ആ ഈജി​പ്‌ഷ്യൻ ഏകാധി​പ​തി തിരിച്ചു ചോദി​ച്ചു. (പുറപ്പാ​ടു 5:2) യഹോ​വ​യെ കുറിച്ചു കൂടുതൽ അറിയാൻ ഫറവോൻ ആഗ്രഹി​ച്ചി​ല്ല. പകരം, അവൻ ഇസ്രാ​യേ​ലി​ന്റെ ദൈവത്തെ അപ്രധാ​നി​യോ അപ്രസ​ക്ത​നോ എന്ന നിലയിൽ പുച്ഛി​ച്ചു​ത​ള്ളു​ക​യാ​യി​രു​ന്നു. അത്തരം വീക്ഷണം ഇന്നു സർവസാ​ധാ​ര​ണ​മാണ്‌. അത്‌ ഏറ്റവും വലിയ സത്യത്തെ—യഹോവ പരമാ​ധി​കാ​രി​യാം കർത്താ​വാണ്‌ എന്ന വസ്‌തു​ത​യെ—ആളുക​ളിൽനി​ന്നു മറയ്‌ക്കു​ന്നു.

13, 14. (എ) ബൈബി​ളിൽ യഹോ​വ​യ്‌ക്ക്‌ അനേകം സ്ഥാന​പ്പേ​രു​കൾ കൊടു​ത്തി​രി​ക്കു​ന്നത്‌ എന്തു​കൊണ്ട്‌, അവയിൽ ചിലത്‌ ഏവ? (14-ാം പേജിലെ ചതുരം കാണുക.) (ബി) ‘പരമാ​ധി​കാ​രി​യാം കർത്താവ്‌’ എന്നു വിളി​ക്ക​പ്പെ​ടാൻ യഹോവ തികച്ചും യോഗ്യ​നാ​യി​രി​ക്കു​ന്നത്‌ എന്തു​കൊണ്ട്‌?

¹³ യഹോവ വ്യത്യ​സ്‌ത​ങ്ങ​ളാ​യ നിരവധി ധർമങ്ങൾ നിർവ​ഹി​ക്കു​ന്ന​തി​നാൽ ഉചിത​മാ​യി​ത്ത​ന്നെ തിരു​വെ​ഴു​ത്തു​ക​ളിൽ അവന്‌ അനേകം സ്ഥാന​പ്പേ​രു​കൾ ഉണ്ട്‌. ഈ സ്ഥാന​പ്പേ​രു​കൾ അവന്റെ വ്യക്തി​പ​ര​മാ​യ നാമത്തി​നു പകരമാ​കു​ന്നി​ല്ല, മറിച്ച്‌ അവ അവന്റെ നാമം പ്രതി​നി​ധാ​നം ചെയ്യുന്ന കാര്യ​ങ്ങ​ളെ കുറിച്ചു നമ്മെ കൂടുതൽ പഠിപ്പി​ക്കു​ന്നു. ദൃഷ്ടാ​ന്ത​ത്തിന്‌, അവൻ “പരമാ​ധി​കാ​രി​യാം കർത്താ​വാ​യ യഹോവ” എന്നു വിളി​ക്ക​പ്പെ​ടു​ന്നു. (2 ശമൂവേൽ 7:22, NW) ബൈബി​ളിൽ നൂറു​ക​ണ​ക്കി​നു പ്രാവ​ശ്യം പ്രത്യ​ക്ഷ​പ്പെ​ടു​ന്ന ഉന്നതമായ ആ സ്ഥാന​പ്പേര്‌ യഹോ​വ​യു​ടെ സ്ഥാനത്തെ കുറിച്ചു നമ്മോടു പറയുന്നു. മുഴു അഖിലാ​ണ്ഡ​ത്തി​ന്റെ​യും ഭരണാ​ധി​കാ​രി ആയിരി​ക്കാ​നു​ള്ള അവകാശം അവനു മാത്ര​മേ​യു​ള്ളൂ. എന്തു​കൊ​ണ്ടെ​ന്നു പരിചി​ന്തി​ക്കു​ക.

¹⁴ സ്രഷ്ടാ​വെന്ന നിലയിൽ യഹോവ അതുല്യ​നാണ്‌. വെളി​പ്പാ​ടു 4:11 പറയുന്നു: “കർത്താവേ, [“യഹോവേ,” NW] നീ സർവ്വവും സൃഷ്ടി​ച്ച​വ​നും എല്ലാം നിന്റെ ഇഷ്ടം ഹേതു​വാൽ ഉണ്ടായ​തും സൃഷ്ടി​ക്ക​പ്പെ​ട്ട​തും  ആകയാൽ മഹത്വ​വും ബഹുമാ​ന​വും ശക്തിയും കൈ​ക്കൊൾവാൻ യോഗ്യൻ എന്നു പറഞ്ഞും​കൊ​ണ്ടു തങ്ങളുടെ കിരീ​ട​ങ്ങ​ളെ സിംഹാ​സ​ന​ത്തി​ന്മു​മ്പിൽ ഇടും.” മഹനീ​യ​മാ​യ ഈ വാക്കുകൾ മറ്റൊരു വ്യക്തി​ക്കും യോജി​ക്കു​ക​യി​ല്ല. അഖിലാ​ണ്ഡ​ത്തി​ലെ സകലവും അവയുടെ അസ്‌തി​ത്വ​ത്തി​നു യഹോ​വ​യോ​ടു കടപ്പെ​ട്ടി​രി​ക്കു​ന്നു! നിസ്സം​ശ​യ​മാ​യും, പരമാ​ധി​കാ​രി​യാം കർത്താ​വും സകലത്തി​ന്റെ​യും സ്രഷ്ടാ​വും എന്ന നിലയിൽ ബഹുമാ​ന​വും ശക്തിയും മഹത്ത്വ​വും കൈ​ക്കൊ​ള്ളാൻ യഹോവ യോഗ്യ​നാണ്‌.

15. യഹോവ ‘നിത്യ​രാ​ജാവ്‌’ എന്നു വിളി​ക്ക​പ്പെ​ടു​ന്നത്‌ എന്തു​കൊണ്ട്‌?

¹⁵ യഹോ​വ​യ്‌ക്കു മാത്രം യോജി​ക്കു​ന്ന മറ്റൊരു സ്ഥാന​പ്പേ​രാണ്‌ ‘നിത്യ​രാ​ജാവ്‌’ എന്നത്‌. (1 തിമൊ​ഥെ​യൊസ്‌ 1:15; വെളി​പ്പാ​ടു 15:3, NW) അതിന്റെ അർഥ​മെ​ന്താണ്‌? നമ്മുടെ പരിമി​ത​മാ​യ ബുദ്ധിക്ക്‌ അതു ഗ്രഹി​ക്കു​ക പ്രയാ​സ​മാണ്‌, എന്നാൽ അവൻ നിത്യ​നാണ്‌—ആദിയും അന്തവും ഇല്ലാത്ത​വ​നാണ്‌. “നീ അനാദി​യാ​യും ശാശ്വ​ത​മാ​യും ദൈവം ആകുന്നു” എന്ന്‌ സങ്കീർത്ത​നം 90:2 പറയുന്നു. അതേ, യഹോ​വ​യ്‌ക്ക്‌ ആരംഭം ഇല്ലായി​രു​ന്നു; അവൻ എല്ലായ്‌പോ​ഴും ഉണ്ടായി​രു​ന്നു. അവൻ ഉചിത​മാ​യി “നാളു​ക​ളിൽ പുരാ​ത​നൻ” എന്നു വിളി​ക്ക​പ്പെ​ടു​ന്നു—അഖിലാ​ണ്ഡ​ത്തിൽ മറ്റാ​രെ​ങ്കി​ലും അല്ലെങ്കിൽ മറ്റെ​ന്തെ​ങ്കി​ലും അസ്‌തി​ത്വ​ത്തി​ലേ​ക്കു വരുന്ന​തി​നു മുമ്പ്‌ അവൻ നിത്യ​ത​യിൽ സ്ഥിതി​ചെ​യ്‌തി​രു​ന്നു! (ദാനീ​യേൽ 7:13, 22, NW) പരമാ​ധി​കാ​രി​യാം കർത്താവ്‌ എന്ന നിലയി​ലു​ള്ള അവന്റെ അധികാ​ര​ത്തെ ചോദ്യം ചെയ്യാൻ ആർക്കാണു കഴിയുക?

16, 17. (എ) നമുക്ക്‌ യഹോ​വ​യെ കാണാൻ സാധി​ക്കാ​ത്തത്‌ എന്തു​കൊണ്ട്‌, അതിൽ നാം ആശ്ചര്യ​പ്പെ​ടേ​ണ്ട​തി​ല്ലാ​ത്തത്‌ എന്തു​കൊണ്ട്‌? (ബി) യഹോവ നമുക്ക്‌ കാണാ​നോ സ്‌പർശി​ക്കാ​നോ കഴിയുന്ന എന്തി​നെ​ക്കാ​ളും യഥാർഥ​മാ​യി​രി​ക്കു​ന്നത്‌ ഏതു വിധത്തിൽ?

¹⁶ എന്നാലും, ഫറവോ​നെ​പ്പോ​ലെ ചിലർ ആ അധികാ​ര​ത്തെ ചോദ്യം​ചെ​യ്യു​ന്നു. ഭാഗി​ക​മാ​യി ഈ പ്രശ്‌ന​ത്തി​നു കാരണം, അപൂർണ മനുഷ്യർ തങ്ങളുടെ കണ്ണുകൾകൊ​ണ്ടു കാണാൻ കഴിയു​ന്ന​തിൽ കണക്കി​ലേ​റെ വിശ്വാ​സ​മർപ്പി​ക്കു​ന്നു എന്നതാണ്‌. നമുക്ക്‌ പരമാ​ധി​കാ​രി​യാം കർത്താ​വി​നെ കാണാൻ സാധി​ക്കി​ല്ല. അവൻ മാനുഷ നേത്ര​ങ്ങൾക്ക്‌ അദൃശ്യ​നാ​യ ഒരു ആത്മവ്യ​ക്തി​യാണ്‌. (യോഹ​ന്നാൻ 4:24) മാത്രമല്ല, ജഡരക്ത​ത്തോ​ടു കൂടിയ ഒരു മനുഷ്യന്‌ അക്ഷരാർഥ​ത്തിൽ യഹോ​വ​യാം ദൈവ​ത്തി​ന്റെ സന്നിധി​യിൽ നിൽക്കാൻ സാധി​ക്കി​ല്ല. യഹോ​വ​ത​ന്നെ മോ​ശെ​യോട്‌ ഇങ്ങനെ പറഞ്ഞു: “നിനക്കു എന്റെ മുഖം കാണ്മാൻ കഴിക​യി​ല്ല; ഒരു മനുഷ്യ​നും എന്നെ കണ്ടു ജീവ​നോ​ടെ ഇരിക്ക​യി​ല്ല.”—പുറപ്പാ​ടു 33:20; യോഹ​ന്നാൻ 1:18.

¹⁷ അതിൽ നാം ആശ്ചര്യ​പ്പെ​ടേ​ണ്ട​തി​ല്ല. തെളി​വ​നു​സ​രിച്ച്‌ മോശെ യഹോ​വ​യു​ടെ തേജസ്സി​ന്റെ ഒരു ഭാഗം മാത്ര​മാണ്‌ കണ്ടത്‌, അതും ഒരു ദൂത​പ്ര​തി​നി​ധി മുഖേന. ഫലം എന്തായി​രു​ന്നു? പിന്നീടു കുറെ സമയ​ത്തേ​ക്കു മോ​ശെ​യു​ടെ മുഖം “പ്രകാ​ശി​ച്ചു.” അവന്റെ മുഖത്തു നോക്കാൻ പോലും  ഇസ്രാ​യേ​ല്യർ ഭയപ്പെട്ടു. (പുറപ്പാ​ടു 33:21-23; 34:5-7, 29, 30) അപ്പോൾ, തീർച്ച​യാ​യും നിസ്സാര മനുഷ്യന്‌ പരമാ​ധി​കാ​രി​യാം കർത്താ​വി​നെ അവന്റെ മുഴു തേജസ്സി​ലും നോക്കി​നിൽക്കാൻ കഴിയില്ല! യഹോ​വ​യെ കാണാ​നും സ്‌പർശി​ക്കാ​നും കഴിയാ​ത്ത​തു​കൊണ്ട്‌ അവൻ ഒരു യഥാർഥ വ്യക്തി അല്ലെന്നാ​ണോ അതിന്റെ അർഥം? തീർച്ച​യാ​യും അങ്ങനെയല്ല, നമുക്കു കാണാൻ കഴിയാത്ത പലതി​ന്റെ​യും അസ്‌തി​ത്വ​ത്തെ നാം അനായാ​സം അംഗീ​ക​രി​ക്കു​ന്നു—കാറ്റ്‌, റേഡി​യോ തരംഗങ്ങൾ, ചിന്തകൾ എന്നിവ ഉദാഹ​ര​ണ​ങ്ങ​ളാണ്‌. മാത്ര​വു​മല്ല, യഹോവ നിത്യ​നാണ്‌, എത്ര യുഗങ്ങൾ പിന്നി​ട്ടാ​ലും അവനു മാറ്റമു​ണ്ടാ​കു​ന്നി​ല്ല! ആ അർഥത്തിൽ, അവൻ നമുക്കു സ്‌പർശി​ക്കാ​നോ കാണാ​നോ കഴിയുന്ന എന്തി​നെ​ക്കാ​ളും വളരെ​യേ​റെ യഥാർഥ​മാണ്‌. കാരണം, ഭൗതിക മണ്ഡലം പഴക്കത്തി​നും ദ്രവത്വ​ത്തി​നും വിധേ​യ​മാണ്‌. (മത്തായി 6:19) എന്നിരു​ന്നാ​ലും, നാം അവനെ കേവലം അമൂർത്ത​മാ​യ, വ്യക്തി​ത്വ​ര​ഹി​ത ശക്തിയാ​യോ അവ്യക്ത​മാ​യ ഒരു ആദികാ​ര​ണ​മാ​യോ മാത്രം കരുത​ണ​മോ? നമുക്കു നോക്കാം.

18. യെഹെ​സ്‌കേ​ലിന്‌ ഏതു ദർശനം ലഭിച്ചു, യഹോ​വ​യു​ടെ സമീപ​ത്തു​ള്ള “ജീവി​ക​ളു​ടെ” നാലു മുഖങ്ങൾ എന്തിനെ പ്രതീ​ക​പ്പെ​ടു​ത്തു​ന്നു?

¹⁸ നമുക്ക്‌ ദൈവത്തെ കാണാൻ സാധി​ക്കി​ല്ലെ​ങ്കി​ലും, സ്വർഗീയ ദൃശ്യ​ങ്ങ​ളെ കുറി​ച്ചു​ള്ള ചില പുളക​പ്ര​ദ​മാ​യ വിവര​ണ​ങ്ങൾ ബൈബി​ളി​ലുണ്ട്‌. യെഹെ​സ്‌കേൽ ഒന്നാം അധ്യായം ഒരു ഉദാഹ​ര​ണ​മാണ്‌. യെഹെ​സ്‌കേ​ലിന്‌ യഹോ​വ​യു​ടെ സ്വർഗീയ സംഘട​ന​യു​ടെ ഒരു ദർശനം നൽക​പ്പെ​ട്ടു. ഒരു ബൃഹത്തായ സ്വർഗീയ രഥമാ​യി​ട്ടാണ്‌ അവൻ അതിനെ കണ്ടത്‌. യഹോ​വ​യ്‌ക്കു ചുറ്റും ഉണ്ടായി​രു​ന്ന ശക്തരായ ആത്മജീ​വി​ക​ളെ കുറി​ച്ചു​ള്ള വർണന വിശേ​ഷാൽ ഗംഭീ​ര​മാണ്‌. (യെഹെ​സ്‌കേൽ 1:4-10) ഈ ‘ജീവികൾ’ യഹോ​വ​യോട്‌ അടുത്തു സഹവസി​ക്കു​ന്നു, അവരുടെ ആകാരം അവർ സേവി​ക്കു​ന്ന ദൈവത്തെ സംബന്ധിച്ച ചില പ്രധാന വിവരങ്ങൾ നമ്മെ അറിയി​ക്കു​ന്നു. ഓരോ​ന്നി​നും നാലു മുഖങ്ങ​ളുണ്ട്‌—കാളയു​ടേത്‌, സിംഹ​ത്തി​ന്റേത്‌, കഴുക​ന്റേത്‌, മനുഷ്യ​ന്റേത്‌. ഇവ പ്രത്യ​ക്ഷ​ത്തിൽ യഹോ​വ​യു​ടെ നാലു സുപ്ര​ധാ​ന ഗുണങ്ങളെ പ്രതീ​ക​പ്പെ​ടു​ത്തു​ന്നു.—വെളി​പ്പാ​ടു 4:6-8, 10.

19. (എ) കാളയു​ടെ മുഖം (ബി) സിംഹ​ത്തി​ന്റെ മുഖം (സി) കഴുകന്റെ മുഖം (ഡി) മനുഷ്യ​ന്റെ മുഖം എന്നിവ ഏതു ഗുണങ്ങളെ പ്രതി​നി​ധാ​നം ചെയ്യുന്നു?

¹⁹ ബൈബി​ളിൽ, കാള മിക്ക​പ്പോ​ഴും ശക്തിയെ പ്രതി​നി​ധാ​നം ചെയ്യുന്നു. അത്‌ ഉചിത​വു​മാണ്‌, കാരണം അതു വളരെ ശക്തിയുള്ള ഒരു മൃഗമാണ്‌. സിംഹം മിക്ക​പ്പോ​ഴും നീതിയെ ചിത്രീ​ക​രി​ക്കു​ന്നു, എന്തു​കൊ​ണ്ടെ​ന്നാൽ യഥാർഥ നീതി നടപ്പാ​ക്കാൻ ധൈര്യം ആവശ്യ​മാണ്‌. ആ ഗുണത്തിന്‌ സിംഹങ്ങൾ പ്രസി​ദ്ധ​മാണ്‌. അപാര​മാ​യ കാഴ്‌ച​ശ​ക്തി​ക്കു പേരു​കേ​ട്ട​വ​യാണ്‌ കഴുക​ന്മാർ, കിലോ​മീ​റ്റ​റു​കൾ ദൂരത്തി​ലു​ള്ള ചെറിയ വസ്‌തു​ക്കൾപോ​ലും  അവയ്‌ക്കു കാണാൻ കഴിയും. അതു​കൊണ്ട്‌ കഴുകന്റെ മുഖം ദൈവ​ത്തി​ന്റെ ദീർഘ​ദൃ​ഷ്ടി​യോ​ടു കൂടിയ ജ്ഞാനത്തെ നന്നായി ചിത്രീ​ക​രി​ക്കും. മനുഷ്യ​മു​ഖ​മോ? ദൈവ​ത്തി​ന്റെ പ്രതി​ച്ഛാ​യ​യിൽ സൃഷ്ടി​ക്ക​പ്പെട്ട മനുഷ്യൻ ദൈവ​ത്തി​ന്റെ മുഖ്യ ഗുണമായ സ്‌നേഹം പ്രതി​ഫ​ലി​പ്പി​ക്കാ​നു​ള്ള പ്രാപ്‌തി​യിൽ അതുല്യ​നാണ്‌. (ഉല്‌പത്തി 1:26) ശക്തി, നീതി, ജ്ഞാനം, സ്‌നേഹം—യഹോ​വ​യു​ടെ വ്യക്തി​ത്വ​ത്തി​ന്റെ ഈ വശങ്ങൾ തിരു​വെ​ഴു​ത്തിൽ കൂടെ​ക്കൂ​ടെ ഊന്നി​പ്പ​റ​ഞ്ഞി​രി​ക്കു​ന്ന​തി​നാൽ അവയെ ദൈവ​ത്തി​ന്റെ പ്രമുഖ ഗുണവി​ശേ​ഷ​ങ്ങ​ളാ​യി പരാമർശി​ക്കാ​വു​ന്ന​താണ്‌.

20. യഹോ​വ​യു​ടെ വ്യക്തി​ത്വ​ത്തി​നു മാറ്റം വന്നിരി​ക്കാ​മെ​ന്നു നാം ചിന്തി​ക്കേ​ണ്ട​തു​ണ്ടോ, നിങ്ങൾ അങ്ങനെ ഉത്തരം പറയു​ന്നത്‌ എന്തു​കൊണ്ട്‌?

²⁰ ദൈവത്തെ കുറി​ച്ചു​ള്ള വർണന ബൈബി​ളിൽ രേഖ​പ്പെ​ടു​ത്തി​യിട്ട്‌ ആയിര​ക്ക​ണ​ക്കി​നു വർഷങ്ങൾ പിന്നി​ട്ടി​രി​ക്കെ, അവനു മാറ്റമു​ണ്ടാ​യി​ക്കാ​ണും എന്നു നാം ആകുല​പ്പെ​ട​ണ​മോ? വേണ്ട, ദൈവ​ത്തി​ന്റെ വ്യക്തി​ത്വം മാറു​ന്നി​ല്ല. അവൻ നമ്മോടു പറയുന്നു: “യഹോ​വ​യാ​യ ഞാൻ മാറാ​ത്ത​വൻ.” (മലാഖി 3:6) തോന്നു​ന്ന​തു​പോ​ലെ മനസ്സു​മാ​റ്റു​ന്ന​വ​നല്ല യഹോവ. പകരം, താൻ ഒരു ഉത്തമ പിതാ​വാ​ണെ​ന്നു തെളി​യി​ക്കു​ന്ന വിധത്തി​ലാണ്‌ അവൻ ഓരോ സാഹച​ര്യ​ത്തോ​ടും പ്രതി​ക​രി​ക്കു​ന്നത്‌. ഓരോ സാഹച​ര്യ​ത്തി​ലും, തന്റെ ഗുണവി​ശേ​ഷ​ങ്ങ​ളിൽ ഏറ്റവും ഉചിത​മാ​യത്‌ അവൻ പ്രകടി​പ്പി​ക്കു​ന്നു. നാലു ഗുണങ്ങ​ളിൽ മുന്തി​നിൽക്കു​ന്ന​തു സ്‌നേ​ഹ​മാണ്‌. ദൈവം ചെയ്യുന്ന സകലത്തി​ലും അതു പ്രകട​മാ​കു​ന്നു. തന്റെ ശക്തിയും നീതി​യും ജ്ഞാനവും സ്‌നേ​ഹ​നിർഭ​ര​മാ​യ ഒരു വിധത്തി​ലാണ്‌ അവൻ പ്രയോ​ഗി​ക്കു​ന്നത്‌. ദൈവ​ത്തെ​യും ഈ ഗുണ​ത്തെ​യും അസാധാ​ര​ണ​മാ​യ ഒരു വിധത്തിൽ ബൈബിൾ ബന്ധിപ്പി​ക്കു​ന്നു. “ദൈവം സ്‌നേഹം തന്നേ” എന്ന്‌  അത്‌ നമ്മോടു പറയുന്നു. (1 യോഹ​ന്നാൻ 4:8) ദൈവ​ത്തി​നു സ്‌നേഹം ഉണ്ട്‌ എന്നോ ദൈവം സ്‌നേ​ഹ​വാ​നാണ്‌ എന്നോ അല്ല അതു പറയു​ന്നത്‌ എന്നതു ശ്രദ്ധി​ക്കു​ക. പകരം, ദൈവം സ്‌നേഹം തന്നേ എന്ന്‌ അതു പറയുന്നു. അവന്റെ വ്യക്തി​ത്വ​ത്തി​ന്റെ അടിസ്ഥാ​നം​ത​ന്നെ സ്‌നേ​ഹ​മാണ്‌, അവൻ ചെയ്യുന്ന സകലത്തി​നും അത്‌ ഒരു പ്രചോ​ദക ഘടകമാ​യി വർത്തി​ക്കു​ന്നു.

21. യഹോ​വ​യു​ടെ ഗുണങ്ങളെ മെച്ചമാ​യി അറിയാൻ ഇടയാ​കു​മ്പോൾ നമുക്ക്‌ എന്തു തോന്നൽ ഉണ്ടാകും?

²¹ ഒരു കൊച്ചു​കു​ട്ടി തന്റെ പിതാ​വി​നെ കൂട്ടു​കാർക്കു ചൂണ്ടി​ക്കാ​ണി​ച്ചു​കൊണ്ട്‌ നിഷ്‌ക​ള​ങ്ക​മാ​യ സന്തോ​ഷ​ത്തോ​ടും അഭിമാ​ന​ത്തോ​ടും കൂടെ “ഇതാണ്‌ എന്റെ പപ്പ” എന്നു പറയു​ന്നത്‌ നിങ്ങൾ കണ്ടിട്ടു​ണ്ടോ? യഹോ​വ​യു​ടെ ആരാധ​കർക്ക്‌ അവനെ സംബന്ധിച്ച്‌ സമാന​മാ​യി വിചാ​രി​ക്കാൻ സകല കാരണ​വു​മുണ്ട്‌. വിശ്വ​സ്‌ത​രാ​യ ആളുകൾ “ഇതാ, നമ്മുടെ ദൈവം” എന്ന്‌ ഉദ്‌ഘോ​ഷി​ക്കു​ന്ന ഒരു കാലത്തെ കുറിച്ചു ബൈബിൾ മുൻകൂ​ട്ടി പറയുന്നു. (യെശയ്യാ​വു 25:8, 9) യഹോ​വ​യു​ടെ ഗുണങ്ങൾ സംബന്ധിച്ച്‌ നിങ്ങൾ എത്രയ​ധി​കം ഉൾക്കാ​ഴ്‌ച നേടു​ന്നു​വോ, സങ്കൽപ്പി​ക്കാ​വു​ന്ന​തി​ലേ​ക്കും ഏറ്റവും നല്ല പിതാ​വാണ്‌ നിങ്ങളു​ടേത്‌ എന്ന്‌ അത്രയ​ധി​ക​മാ​യി നിങ്ങൾക്കു തോന്നും.

22, 23. ബൈബിൾ നമ്മുടെ സ്വർഗീയ പിതാ​വി​നെ എങ്ങനെ ചിത്രീ​ക​രി​ക്കു​ന്നു, നാം അവനോട്‌ അടുത്തു ചെല്ലാൻ അവൻ ആഗ്രഹി​ക്കു​ന്നു​വെന്ന്‌ നമുക്ക്‌ എങ്ങനെ അറിയാം?

²² ചില സന്ന്യാ​സി​മാ​രും തത്ത്വചി​ന്ത​ക​രും പഠിപ്പി​ക്കു​ന്ന​തു പോലെ ഈ പിതാവ്‌ നിർവി​കാ​ര​നോ നമ്മിൽനിന്ന്‌ അകന്നു നിൽക്കു​ന്ന​വ​നോ അല്ല. നിർവി​കാ​ര​നാ​യ ഒരു ദൈവ​ത്തോട്‌ നമുക്ക്‌ ഒരിക്ക​ലും അടുപ്പം തോന്നു​ക​യി​ല്ല. ബൈബിൾ നമ്മുടെ സ്വർഗീയ പിതാ​വി​നെ ആ വിധത്തിൽ വരച്ചു​കാ​ട്ടു​ന്നി​ല്ല. മറിച്ച്‌, അത്‌ അവനെ “സന്തുഷ്ട​നാ​യ ദൈവം” എന്നു വിളി​ക്കു​ന്നു. (1 തിമൊ​ഥെ​യൊസ്‌ 1:11, NW) അവന്‌ തീവ്ര വികാ​ര​ങ്ങ​ളും മൃദുല വികാ​ര​ങ്ങ​ളു​മുണ്ട്‌. ബുദ്ധി​ശ​ക്തി​യു​ള്ള സൃഷ്ടി​ക​ളു​ടെ ക്ഷേമത്തി​നാ​യി താൻ നൽകി​യി​രി​ക്കു​ന്ന മാർഗ​നിർദേ​ശ​ങ്ങൾ അവർ ലംഘി​ക്കു​ന്ന​തു കാണു​മ്പോൾ അവന്റെ ‘ഹൃദയം ദുഃഖി​ക്കു​ന്നു.’ (ഉല്‌പത്തി 6:6; സങ്കീർത്ത​നം 78:41) എന്നാൽ നാം അവന്റെ വചന​പ്ര​കാ​രം ജ്ഞാനപൂർവം വർത്തി​ക്കു​മ്പോൾ അത്‌ അവന്റെ ‘ഹൃദയത്തെ സന്തോ​ഷി​പ്പി​ക്കു​ന്നു.’—സദൃശ​വാ​ക്യ​ങ്ങൾ 27:11.

²³ നമ്മുടെ പിതാവ്‌ നാം അവനോട്‌ അടുത്തു ചെല്ലാൻ ആഗ്രഹി​ക്കു​ന്നു. ‘ദൈവം നമ്മിൽ ആർക്കും അകന്നി​രി​ക്കു​ന്ന​വ​ന​ല്ലെ​ങ്കി​ലും അവനെ തപ്പി​നോ​ക്കി കണ്ടെത്താൻ’ അവന്റെ വചനം നമ്മെ പ്രോ​ത്സാ​ഹി​പ്പി​ക്കു​ന്നു. (പ്രവൃ​ത്തി​കൾ 17:27) എന്നാൽ, വെറും മനുഷ്യർക്ക്‌ അഖിലാ​ണ്ഡ​ത്തി​ന്റെ പരമാ​ധി​കാ​രി​യാം കർത്താ​വി​നോട്‌ അടുത്തു ചെല്ലാൻ എങ്ങനെ സാധി​ക്കും?