1, 2. (a) Antoray labay yon itepet ed Dios? (b) Anto so intepet nen Moises ed Dios?

SARAG mo kasin iretrato ed kanonotan mo a mitotongtong ka ed Dios? Diad pannonot labat ed satan et pansengegan la na mapagalang a takot​—a say Soberano na uniberso so mitotongtong ed sika! Masuyat ka ed primero, balet ta nayarian moy onebat. Sikatoy ontalineng, onebat, tan nasagyat ka ni ingen a bulos a mangitepet na antokaman a labay mo. No ontan, antoy labay mon itepet?

² Abayag lan panaon, wala so sakey a laki ya ontan so kipapasen to. Say ngaran to et Moises. Balet, say pinili ton itepet ed Dios et nayarin agmo ilaloan. Agto intepet so nipaakar ed inkasikato, ed arapen to, odino say pansumpalan ni ingen na katooan. Imbes, say tinepet to et say ngaran na Dios. Nayarin naimanom a nikaduma itan, lapud amta la nen Moises so personal a ngaran na Dios. Say tepet to sirin so seguradon walaan na aragdalem a kabaliksan. Diad tua, satan so sankaimportantian a tepet a nitepet nen Moises. Say ebat so mangaapekta ed sikatayon amin. Natulongan ka na satan a mangala na makanan kundang diad iyapit ed Dios. Panon ya ontan? Imanoen tayo so makatantandan tongtongan.

3, 4. Antoran agawa so angitonton ed impakapitongtong nen Moises ed Dios, tan antoy segek na nantongtongan da?

³ Si Moises so manedad ed saman na 80. Diad loob na apatiran dekada et sikatoy nisian manlapud kabaleyan to, saray Israelita, a naaripen ed Ehipto. Sakey ya agew, legan a papastolan to iray pulok na katulangan ton laki, walay nikadkaduman anengneng to. Dinmalang so sakey a tanaman, balet ta agnapopoolan. Mandarlang itan, maliwliwawa a singa parola diad diking na palandey. Inasinggeran nen Moises pian amtaen. Agaylay inkakebbiew to sanen walay nadngel ton boses a nansalita ed sikato manlapud utel na apoy! Diad panamegley na anghel a pinagkasangiyan et andukey a nantongtong so Dios tan si Moises.  Tan, unong a nayarin kabat mo la, diman et ingganggan na Dios so masuyat a Moises a taynan so mareen a bilay to tan ompawil ed Ehipto pian ibulos ed inkaaripen iray Israelita.​—Exodo 3:1-12.

⁴ Diad saman a bekta, nayarian komon nen Moises so ontepet na antokaman ed Dios. Balet, imanoen so pinili ton intepet: “Sano onsabi ak ed saray anak na Israel, tan kuan ko ed sikara so saya, Say Dios na saray atateng yo imbaki toak ed sikayo, et no tepeten da naani ed siak, Siopa so ngaran to? Anto so yebat ko ed sikara?”​—Exodo 3:13.

5, 6. (a) Say intepet nen Moises so mangibabangat ed sikatayo na anton simpli tan makanan katuaan? (b) Anto so sankagrabian a ginawa ed personal a ngaran na Dios? (c) Akin a makabkabaliksan ya imparungtal na Dios so ngaran to ed katooan?

⁵ Manuna ed amin, satan a tepet so mangibabangat ed sikatayo a walay ngaran na Dios. Agtayo nepeg ya ibaliwala iyan simplin katuaan. Ingen, dakel so mangibabaliwala ed satan. Say personal a ngaran na Dios so inekal ed dakerakel iran patalos na Biblia tan sinalatan na saray titulo, a singa say “Katawan” tan “Dios.” Sakey iya ed saray makapaermen tan sankagrabian a ginawa diad ngaran na relihyon. Peteg ya ontan lapud, anto ta so unonan gawaen mo sano mikabat ka ed sakey? Agta tepeten mo ni no anto so ngaran to? Mipadpara itan ed pikabat ed Dios. Sikatoy walaan na ngaran, aliwan manangibiig, tan sikatoy nayarian tayon kabaten tan natebek tayo. Anggaman agnanengneng, sikatoy sakey a persona, tan say ngaran et Jehova.

⁶ Sakey ni, sanen imparungtal na Dios so personal a ngaran to, walay makatantanda tan makapalikliket a magano lan nagawa. Iimbitaan to itayon mangamta ed sikato. Labay ton sankaabigan so napili tayo ed bilay​—say iyapit ed sikato. Balet nagkalalo ni so ginawa nen Jehova nen say pangipaamta to ed sikatayo na ngaran to. Imbangat to met ed sikatayo so nipaakar ed personalidad to.

7. (a) Antoy ideyan ipapasabi na personal a ngaran na Dios? (b) Anton talaga so labay a naamtaan nen Moises sanen tinepet to ed Dios so ngaran To?

⁷ Pinili nen Jehova so dilin ngaran to, sakey a napno na kabaliksan.  Say “Jehova” et ipapasabi toy ideyan “Pagmamaliwen To.” Sikatoy nikadkaduma ed interon uniberso lapud sikato so amalesa ed amin a bengatla tan pagmamaliwen ton nasumpal so amin ya gagala to. Talagan makapadinayew itan. Balet wala ni kasi arum ya tutukoyen na ngaran nen Jehova? Mapatnag a dakel ni so labay nen Moises a naamtaan. On, amta to ya si Jehova so Manamalsa, tan amta toy ngaran na Dios. Say ngaran na Dios et aliwa lan balo. Diad loob la na saray siglo et uusaren la itan na totoo. Maseguro, diad panetepet nen Moises ed ngaran na Dios et tetepeten to so nipaakar ed personan irerepresenta na ngaran. Bilang segek et singa inkuan ton: ‘Anto so iyebat ko ed baley mon Israel nipaakar ed sika a mamabiskeg na pananisia ra ed sika, a mangombinse ed sikara a sika so peteg a mangiliktar ed sikara?’

8, 9. (a) Panoy impangebat nen Jehova ed tepet nen Moises, tan anto so lingon paraan a mabetbet a pangipapatalos ed ebat To? (b) Anto so kabaliksan na balikas a “magmaliw ak unong ed antokaman a pagmaliwan ko”?

⁸ Bilang ebat et impaliwawa nen Jehova so sakey a makapadinayew ya aspekto na personalidad to, sakey ed saray ideyan ipapasabi na ngaran to. Inkuan to ed si Moises: “Siak so magmaliw ed no antoy pilien kon pagmaliwan.” (Exodo 3:14, NW) Onia so nabasa ed dakel a patalos na Biblia: “Siak so Siak.” Balet say maalwar ya impangipatalos ed New World Translation so mangipapanengneng a say Dios so aglabat mamapaneknek ed dilin kiwawala to. Imbes, ibabangat nen Jehova ed si Moises​—ontan met ed sikatayon amin—​ya Sikatoy “magmaliw,” odino pilien toy magmaliw, ed no antoy kaukolan pian nasumpal iray insipan To. Mabitar so impangipatalos nen J. B. Rotherham ed sayan bersikulo: “Magmaliw Ak no anto so makapaliket ed siak.” Oniay impangipaliwawa na sakey ya eksperto ed Hebreon Kasulatan ed satan a balikas: “Antokaman so kipapasen odino pankaukolan . . . , say Dios so ‘magmaliw’ a solusyon ed satan a pankaukolan.”

⁹ Anto so kabaliksan na satan ed saray Israelita? Antokaman so pakasbelan a kipaarapan da, anggan panon lan kairap so kipapasen a nasagmak da, antokaman so nakaukolan et ontan so pagmaliwan nen Jehova ta pian niliktar to ra manlapud  panangaripen tan itarok to ira ed Insipan a Dalin. Seguradon satan a ngaran so angisagyat na kompiyansa ed Dios. Nayarin nagawa met itan ed sikatayo natan. (Salmo 9:10) Akin?

10, 11. Panon a say ngaran nen Jehova so mangiimbita ed sikatayo a mangipasen ed sikato bilang sankainomayan ya ontukoy tan sankaabigan ya Ama? Iyilustra.

¹⁰ Pian niyilustra: Amta na atateng no panon iran magmaliw a mainomay ya ontukoy tan onadapta diad panangasikaso ra ed ananak da. Diad loob na sanagew, say sakey ya ateng so nayarin kaukolan ya onakto bilang nars, managluto, managbangat, managdisiplina, ukom, tan dakel ni. Moriaen na dakel ya agda nasabaan iray totontonen ya iilaloan dan sumpalen. Naiimatonan da so sigpot a kompiyansa na ananak da, ya agbalot manduaruwa a sarag na atateng da a pakepaen so sakit, resolbien so amin a gotgotan, apigeren so aderal a gakgalaw, tan ebatan so antokaman a biglan itepet na maupapet iran nonot da. Liknaen na arum ya atateng ya ag-ira makana ed kompiyansa na ananak da tan sagpaminsan et nadidismaya ira lapud saray limitasyon dan dili. Aabageyen day inkasikara lapud agda nagawaan so dakel ed sarayan obligasyon da.

¹¹ Si Jehova et sakey met a maaron ateng. Ingen, basta agnasumlang iray mismon naspot ya estandarte to, anggapoy agto nayarian a pagmaliwan ta pian naasikaso iray mangaraldalin ya ananak to diad sankaabigan a posiblin paraan. Kanian say ngaran to, a Jehova, so manasagyat ed sikatayo a mangipasen ed sikato bilang sankaabigan ya Ama. (Santiago 1:17) Ag-abayag et apaneknekan nen Moises tan arum niran matoor ya Israelita a si Jehova so tua unong ed ngaran to. Naimatonan da a pinagmaliw toy inkasikaton agnatalon Komandante na Militar, say Katawan na amin a natural iran elemento, agnaparaan a Manangiter na ganggan, Ukom, Arkitekto, Manangitarya na tagano tan danum, Managlanir na kawes tan sandalyas​—tan dakel ni.

12. Panon a miduma so awawey nen Faraon nipaakar ed si Jehova no ikompara ed awawey nen Moises?

¹² Kanian diad ontan a paraan et impakabat na Dios so dilin ngaran to, impaamta toy makapadinayew iran bengatla nipaakar  ed personalidad to, tan impanengneng to ni ingen ya talagan tua iray impaamta to nipaakar ed inkasikato. Agnasuppiat, labay na Dios a sikatoy nakabat tayo. Panon so ikiwas tayo? Kaliktan nen Moises a nakabat so Dios. Satan a pampilalek so angidirehi ed kurang na bilay nen Moises tan angitonton ed sikato ya onapit a maong ed mangatatawen ya Ama to. (Numeros 12:6-8; Hebreos 11:27) Makapaermen, dagdaiset ed kapanaonan nen Moises so walaan na ontan a pilalek. Sanen sinalambit nen Moises so ngaran nen Jehova ed si Faraon, onia so inyebat na satan a matangsit ya Ehipsion manuley: “Siopa ta si Jehova?” (Exodo 5:2) Agnilabay nen Faraon so pakaaral ni na dakel nipaakar ed si Jehova. Imbes, agto inkabkabilangan tan imbaliwala to so Dios na Israel. Satan a panmoria so kaslakan a tuloy natan. Niyamot ed totoo so sakey ed sankaimportantian ed amin a katuaan​—si Jehova so Soberanon Katawan.

13, 14. (a) Akin a naikdan si Jehova na dakel a titulo ed Biblia, tan antoray pigara ed saratan? (Nengnengen so kahon ed  pahina 14.) (b) Akin a si Jehova lambengat so kualipikadon natawag a say “Soberanon Katawan”?

¹³ Si Jehova so mainomay ya ontukoy, maong ya onadapta, a sikato so makanepegan a mangakbibit ed dakel a titulo diad Kasulatan. Agpapalumbasan na sarayan titulo so personal a ngaran to; imbes, saratan so nagkalalo nin mangibabangat ed sikatayo nipaakar ed irerepresenta na ngaran to. Alimbawa, sikatoy natatawag a say “Soberanon Katawan a Jehova.” (2 Samuel 7:22, NW) Satan a matalonggaring a titulo, a piganlasus a nabasa ed Biblia, so mangibabaga ed sikatayo nipaakar ed posisyon nen Jehova. Sikato labat so walaan na kanepegan a Manuley ed interon uniberso. Konsideraen no akin.

¹⁴ Si Jehova so nikadkaduma bilang Manamalsa. Kuan na Apocalipsis 4:11: “Sika so manepeg, Katawan mi tan Dios mi, a mangawat na gloria tan dayew tan pakayari: ta sika pinalsam so lapag a bengatla, tan lapu ed linawam wala ra tan sikara so apalsa.” Sarayan matalonggaring a salita so ag-onaplika ed arum a pinalsa. Amin a bengatla ed uniberso et otang day kiwawala ra ed si Jehova! Peteg, si Jehova so makanepegan na  galang, pakayari, tan gloria lapud sikatoy Soberanon Katawan tan Manamalsa ed amin a bengatla.

15. Akin a natatawag si Jehova ya “Ari ya andi angga”?

¹⁵ Say sananey nin titulo ya onaplika lambengat ed si Jehova et “Ari ya andi angga.” (1 Timoteo 1:17; Apocalipsis 15:3, NW) Anto so kabaliksan na saya? Ag-itan narandan na limitadon kanonotan tayo, balet si Jehova so magnayon ed namparan pamaakaran​—apalabas tan ed arapen. Ibabaga na Salmo 90:2: “Manlapu ed andi-anggaan ya angga ed andi-anggaan, Dios ka la.” Kanian anggapon balot so gapoan nen Jehova; sikatoy lawas a wala. Sikatoy makanepegan a natawag a “say Kadaanan na Ag-agew”​—magnayon lay kiwawala to antis nin apalsa so siopaman odino antokaman ed uniberso! (Daniel 7:9, 13, 22, NW) Siopa so makatunongan a makasuppiat ed kanepegan to bilang Soberanon Katawan?

16, 17. (a) Akin ya agtayo nanengneng si Jehova, tan akin ya agtayo pankelawan itan? (b) Diad anton pantalos a si Jehova so nagkalalon petepeteg nen say antokaman a nanengneng odino nadiwit tayo?

¹⁶ Ingen, talagan walaray manusuppiat ed satan a kanepegan, a singa ginawa nen Faraon. Say sakey a problema et lapud manmamatalek a maong iray ag-ayadyarin totoo ed nanengneng na kamataan da. Agtayo nanengneng so Soberanon Katawan. Sikatoy espiritu, agnanengneng na kamataan na too. (Juan 4:24) Niarum ni, no say walaan na laman tan dala a too so ontalindeg ed arapan a mismo nen Jehova a Dios, sikatoy managmak na ipapatey. Inkuan nen Jehova a mismo ed si Moises: “Agmo nayarian a nengnengen so lupak; ta say too agtoak naani nanengneng et manbilay.”​—Exodo 33:20; Juan 1:18.

¹⁷ Agtayo pankelawan itan. Anengneng nen Moises so kabiangan labat na gloria nen Jehova, mapatnag et diad panamegley na manangilaman ya anghel. Antoy resulta? Say lupa nen Moises “so sinminag” ya agano kayari na saman. Saray Israelita so tinmakot ya onnengneng a direkta ed lupa nen Moises. (Exodo 33:21-23; 34:5-7, 29, 30, NW) Kanian anggapo so makasarag ya onnengneng ed Soberanon Katawan a mismo ed amin a gloria to! Kabaliksan kasi na saya a sikatoy aliwan peteg  lapud agtayo nanengneng tan nadiwit? Andi, dakel iray bengatlan agtayo nanengneng balet ta panisiaan tayon wala iratan​—alimbawa, say dagem, saray radio wave, tan kanonotan. Sakey ni, si Jehova et permanente, ag-apektado ed ilalabas na panaon, anggan binilbilyon ni ingen a taon! Diad satan a pantalos, sikatoy nagkalalon petepeteg nen say antokaman a nadiwit odino nanengneng tayo, lapud say pisikal ya ayaman et ondaan tan nabulok. (Mateo 6:19) Balet, nepeg kasin sikatoy ipasen tayo bilang masuliwet, agmililiknan puersa odino walaan na makilot a Gapoan? Imanoen tayo.

18. Anto so nipasingawey ed si Ezequiel, tan antoy isisimbolo na apatiran lupa na ‘mabilay a pinalsa’ ed abay nen Jehova?

¹⁸ Anggaman agtayo nanengneng so Dios, walaray makapasagyat a teksto ed Biblia a managyat ed sikatayon onnengneng ed tawen a mismo. Sakey ya alimbawa et say unonan kapitulo na Ezequiel. Nipanengneng ed si Ezequiel so sakey a pasingawey na mangatatawen ya organisasyon nen Jehova, ya anengneng to ditan so abalbaleg a mangatatawen a karwahe. Say nagkalalo lan makapasagyat et say impaneskribe ed saray makapanyarin espiritun pinalsa ya akapaliber ed si Jehova. (Ezequiel 1:4-10) Sarayan ‘mabilay a pinalsa’ so maapit a misiglaotan ed si Jehova, tan say itsura da so mangibabaga ed sikatayo na bengatlan importante nipaakar ed Dios a panlilingkoran da. Balang sakey so walaan na apatiran lupa​—salanti baka, leon, agila, tan too. Saraya so mapatnag a mangisisimbolo ed apatiran manunan kalidades na personalidad nen Jehova.​—Apocalipsis 4:6-8, 10.

19. Anton kalidad so irerepresenta na (a) lupa na baka? (b) lupa na leon? (c) lupa na agila? (d) lupa na too?

¹⁹ Diad Biblia say baka so mabetbet a mangirerepresenta ed biskeg, tan matukotukoy ya ontan, lapud satan so mabisbiskeg ya ayep. Diad biek a dapag, say leon so mabetbet a mangireretrato ed inkahustisya, ta say tuan inkahustisya so mankakaukolan na inkakpel, kabkabat a kalidad na saray leon. Kabkabat met iray agila lapud matudion pakanengneng da, a nanengneng  da anggan ankekelag iran bengatla anggano piga-pigaran kilometro ed kaarawi. Kanian say lupa na agila so malinew a mangiretrato ed inkatudio na kakabatan na Dios. Anto met so lupa na too? Bueno, say too, a ginawa ed indengan na Dios, so nikadkaduma ed abilidad ton mangipatnag na matalonggaring a kalidad na Dios​—say aro. (Genesis 1:26) Sarayan aspekto na personalidad nen Jehova​—pakapanyari, inkahustisya, kakabatan, tan aro​—so mabetbet a nipapabitar ed Kasulatan a saratan so nayarin natukoy bilang manuna iran atributos na Dios.

20. Nepeg kasin napagaan itayo ompan anguman la so personalidad nen Jehova, tan akin ya ontan so ebat mo?

²⁰ Nepeg kasin napagaan itayo ompan anguman la so Dios ed loob na nilibon taon nanlapula’d inkadeskribe to diad Biblia? Andi, agmanguman so personalidad na Dios. Ibabaga to ed sikatayo: “Siak, si Jehova, agak manguman.” (Malaquias 3:6) Imbes a biglabiglan umanen toy nonot to, papaneknekan nen Jehova so inkasikato bilang naspot ya Ama diad paraan ya ikikiwas to ed kada situasyon. Ipapatnag to iratan ya aspekto na personalidad to a matukotukoy. Diad saratan ya apatiran kalidades to, say manunaan et say aro. Satan so napatnagan ed amin a bengatlan gagawaen na Dios. Aagamilen toy pakapanyari, inkahustisya, tan kakabatan to diad maaron dalan. Diad  tua, ibabaga na Biblia so bengatlan nikadkaduma nipaakar ed Dios tan ed sayan kalidad. Inkuanto: “Say Dios sikato so aro.” (1 Juan 4:8) Imanoen ya agto ibabaga a say Dios so walaan na aro odino say Dios so maaro. Imbes, ibabaga ton say Dios so aro. Say aro, say manunan kalidad to, so mamapakiwas ed sikato ed amin a gagawaen to.

21. Anto so liknaan tayo no nagkalalon naaamtaan tayo iray kalidad nen Jehova?

²¹ Akanengneng ka ta la na melag nin ugaw ya ituturo toy ama to ed saray kaaro to insan masimoon ton ikikinon, “Tatay ko itan”? Saray managdayew ed Dios so walaan na amin a rason pian ontan met so nalikna ra nipaakar ed si Jehova. Ipapasakbay na Biblia so panaon sano saray matoor a totoo so mangikelyaw: “Nia! Saya so Dios tayo.” (Isaias 25:8, 9, NW) Diad iyaaralem na pakatalos mo nipaakar ed kalidades nen Jehova, lalon naliknam a walaan ka na sankaabigan ya Ama.

22, 23. Panon so pangireretrato na Biblia ed mangatatawen ya Ama tayo, tan panon so pikabat tayo a kaliktan to itayon onapit ed sikato?

²² Sayan Ama et mililikna tan aliwan mabinbinta​—anggaman ed ibabangat na pigaran mapeget a relihyonista tan pilosopo. Agtayo naliknan onapit itayo ed agmililikna a Dios, tan aliwan ontan so pangireretrato na Biblia ed mangatatawen ya Ama tayo. Diad kasunian, sikatoy tatawagen na Biblia a “say maliket a Dios.” (1 Timoteo 1:11, NW) Sikatoy walaan na mabiskeg tan matamoy a liknaan. Sikatoy “nasakitan ed puso to” sano sumlangen na saray intelihentin pinalsa to iray giya ya intarya to parad pankaabigan da. (Genesis 6:6, NW; Salmo 78:41) Balet no onkiwas itayon sikakabat unong ed Salita to, ‘napaliket [tayo] so puso to.’​—Uliran 27:11.

²³ Kaliktan na Ama tayo ya onapit itayo ed sikato. Papasesegen itayo na Salita to a ‘mankarkarapas ed sikato tan sikatoy naromog, anggan wala ed ag-arawi ed sinansakey ed sikatayo.’ (Gawa 17:27) Balet, panon a posiblin makaapit ed Soberanon Katawan ed uniberso iray totoo lambengat?