KAPÍTULO 1
“Mira, Esaki Ta Nos Dios”
1, 2. (a) Kiko lo bo tin gana di puntra Dios? (b) Kiko Moisés a puntra Dios?
BO POR imaginá bo ta kòmbersá ku Dios? E idea so kaba ta lanta un rèspèt profundo—e Soberano di universo papiando ku bo! Na prinsipio bo ta duda, pero despues bo ta logra kontestá. E ta skucha bo, e ta respondé bo i asta e ta duna bo e konfiansa pa hasié kualkier pregunta ku bo ta deseá. Kiko bo ta bai puntr’é awor?
2 Hopi tempu pasá, tabatin un hòmber ku a hañ’é den nèt un situashon asina. Su nòmber ta Moisés. Pero kisas e pregunta ku el a skohe pa hasi Dios ta sorprendé bo. E no a puntra tokante su mes, ni di su futuro, ni sikiera di e miseria di humanidat. Mas bien, el a puntra Dios kon ta su nòmber. Podisé bo ta haña esei straño, pasobra Moisés tabata sa e nòmber di Dios kaba. Su pregunta lo mester tabatin un nifikashon mas profundo anto. Eigenlijk, esei tabata e pregunta mas importante ku Moisés por a hasi. E kontesta tin di haber ku nos tur. E por yuda bo dal un paso vital pa hala serka Dios. Kon asina? Laga nos repasá e kòmbersashon memorabel ei.
3, 4. Ki susesonan a hiba na e kòmbersashon ku Moisés tabatin ku Dios, i kiko tabata e esensia di loke nan a papia ku otro?
3 Moisés tabatin 80 aña di edat. El a pasa kuater dékada den eksilio, leu for di su pueblo, esta, e israelitanan ku tabata esklabo na Egipto. Riba un dia, miéntras e tabata kana ku e tou di bestia di su suegro, el a mira un fenómeno straño: un mata tur na kandela, pero ku no a kaba na nada. El a sigui kima i bria kla riba e seru. Moisés a bai un tiki mas serka pa studi’é. Lo e mester a spanta mes ora un bos a kuminsá papia kuné for di meimei dje kandela! Pa medio di un angel ku a sirbi komo bosero, Dios i Moisés a kòmbersá basta ratu ku otro. I manera lo bo sa, ei ta kaminda Dios a manda Moisés, kende a duda un tiki, pa bandoná su bida trankil i bolbe bèk Egipto pa libra e israelitanan for di sklabitut.—Eksodo 3:1-12.
4 N’e momentu ei Moisés lo por a hasi Dios kualkier pregunta. Pero ripará kiko el a opta pa puntra: “Mira, mi ta bai serka e yunan di Israel i lo mi bisa nan: ‘E Dios di boso tatanan a manda mi serka boso.’ I si nan puntra mi: ‘Kon ta su nòmber?’ kiko lo mi kontestá nan?”—Eksodo 3:13.
5, 6. (a) Ki bèrdat simpel pero vital e pregunta di Moisés ta siña nos? (b) Ki kos reprochabel nan a hasi ku e nòmber di Dios? (c) Pakiko ta asina importante ku Dios a revelá su nòmber na hende?
5 E pregunta ei ta siña nos na promé lugá ku Dios tin un nòmber. Esaki ta un bèrdat masha simpel, pero di gran importansia. I tòg hopi hende no ta mir’é asina. Nan a saka e nòmber di Dios for di masha hopi tradukshon di Beibel i remplas’é ku títulonan manera “Señor” i “Dios.” Esaki ta un di e kosnan mas lamentabel i reprochabel ku hende a hasi pa motibunan religioso. Al fin i al kabo, kiko ta e promé kos ku bo ta puntra un persona ora bo sera konosí kuné? No ta su nòmber? Meskos ta konta ora nos kier konosé Dios. E no ta un ser misterioso, sin nòmber, ku nos no por konosé ni komprondé. Ounke e ta invisibel, e ta un persona i e tin un nòmber: Yehova.
6 Ademas, dor di revelá su nòmber, Dios ta habri perspektivanan maravioso i emoshonante pa nos. E ta invitá nos pa konos’é i e kier pa nos tuma e mihó desishon den bida: hala serka dje. Pero Yehova a hasi mas ku djis revelá su nòmber. Tambe el a siña nos tokante e persona ku e nòmber ei ta representá.
Nifikashon di e Nòmber di Dios
7. (a) Por lo general, kiko hende ta komprondé ku e nòmber di Dios ta nifiká? (b) En realidat kiko Moisés kier a haña sa ora el a puntra Dios pa Su nòmber?
7 Ta Yehova mes a skohe su nòmber, unu ku tin hopi nifikashon. Por lo general, hende ta komprondé ku “Yehova” ta nifiká “E Ta Kousa pa Bira.” Yehova ta úniko den henter universo, pasobra ta é a pone tur kos kuminsá eksistí, i e ta sòru pa henter su propósito bira realidat. E pensamentu ei ta inspirá un rèspèt profundo. Pero ta esei so ta loke e nòmber di Dios mester duna nos di komprondé, òf su nifikashon tin un otro faseta mas? Evidentemente, Moisés tabata kier sa mas, ya ku e tabata sa Dios su nòmber kaba, i e tabata sa ku Yehova ta e Kreadó. E nòmber divino no tabata algu nobo. Hende tabata us’é pa siglonan kaba. Realmente, ora Moisés a puntra Dios pa su nòmber, e kier a haña sa algu di e persona ku e nòmber ei ta representá. Ku otro palabra, e tabata bisando: ‘Kiko mi por konta bo pueblo Israel tokante bo, pa fortalesé nan fe den bo i konvensé nan ku di bèrdat bo ta bai libra nan?’
8, 9. (a) Kon Yehova a kontestá e pregunta di Moisés, i dikon e manera ku nan ta tradusié hopi bes ta inkorekto? (b) Kiko e deklarashon “lo mi resultá di ta loke lo mi resultá di ta” ta nifiká?
8 Komo kontesta, Yehova a revelá un aspekto fasinante di su personalidat, algu ku tabata konektá ku e nifikashon di su nòmber. El a bisa Moisés: “Lo mi resultá di ta loke lo mi resultá di ta.” (Eksodo 3:14, NW) Hopi tradukshon di Beibel ta bisa aki: “Ami ta esun ku mi ta.” Pero tradukshonnan mas kuidadoso di e palabranan ei ta mustra ku Dios no a djis konfirmá ku e ta eksistí. Mas bien, Yehova a siña Moisés—i via dje, nos tur—ku lo El a “resultá di ta,” òf skohe pa bira, tur loke tabata nesesario pa kumpli ku Su promesanan. E vershon ingles di J. B. Rotherham ta duna un tradukshon hopi kla di e versíkulo aki: “Mi Ta Bira loke mi kier.” Un eksperto riba e idioma hebreo di Beibel ta splika e frase den e manera aki: “Sea kual sea e situashon òf nesesidat . . . , Dios lo ‘bira’ e solushon pa e nesesidat ei.”
9 Kiko esei a nifiká p’e israelitanan? Maske ki opstákulo nan por a enfrentá, òf ki difikultat nan por a haña nan mes kuné, Yehova lo a bira tur loke tabata nesesario pa libra nan for di sklabitut i trese nan den e Tera Primintí. E nòmber ei sigur a inspirá konfiansa den Dios. E por tin e mesun efekto riba nos awe. (Salmo 9:10) Pakiko?
10, 11. Kon Yehova su nòmber ta invitá nos pa mir’é komo e Tata mas fleksibel i mas ideal ku nos por imaginá? Ilustrá.
10 Pa ilustrá: Mayornan sa kon fleksibel i adaptabel nan mester ta den nan trabou di kria yu. Riba e mesun dia, un mayor lo tin ku aktua komo enfermera, kòki, maestro, dunadó di disiplina, hues i vários otro kos. Pa hopi mayor, e variedat amplio di papel ku nan tin ku kumpli kuné ta parse demasiado. Nan sa ku nan yunan chikitu tin fe total den nan. E chikitinnan aki no ta duda mes ku papi òf mami ta kapas di fria kualkier doló, resolvé tur desakuerdo, drecha kualkier ko’i hunga kibrá i kontestá tur pregunta ku ta surgi konstantemente den nan mente kurioso. Algun mayor no ta haña ku nan meresé e konfiansa ei, i de bes en kuando nan ta sinti nan frustrá pa motibu di nan limitashonnan. Nan no ta sinti nan kapas mes pa kumpli ku hopi dje papelnan aki.
11 Yehova tambe ta un mayor amoroso. Pero den e kuadro di su mes normanan perfekto, no tin nada ku e no por bira pa perkurá pa su yunan riba tera den e mihó manera posibel. Pues, su nòmber, Yehova, ta invitá nos pa mir’é komo e Tata di mas ideal ku nos por imaginá. (Santiago 1:17) Masha lihé tantu Moisés komo tur otro israelita fiel a bin mira ku Yehova ta duna onor na su nòmber. Nan a mira ku asombro kon el a kousa su mes pa bira un Komandante Militar invensibel, Señor di tur elemento físiko, Legislador sublime, Hues, Arkitekto, Dunadó di kuminda i awa, Konserbadó di paña i ko’i bisti na pia, i hopi mas.
12. Ki diferensia tin entre e aktitut di Fárao pa ku Yehova i esun di Moisés?
12 Den e manera aki Dios a hasi su nòmber konosí, el a revelá kosnan fasinante tokante e persona ku e nòmber ei a representá, i el a asta demostrá ku loke e ta bisa tokante su mes ta bèrdat. Sin duda, Dios kier pa nos konos’é. Kon nos ta reakshoná? Moisés kier a konosé Dios. E deseo intenso ei a forma e bida di Moisés i a permitié hala masha serka di su Tata selestial. (Numbernan 12:6-8; Hebreonan 11:27) Lamentablemente, masha poko hende ku a biba den tempu di Moisés tabatin e deseo ei. Ora Moisés a menshoná e nòmber di Yehova na Fárao, e monarka egipsio orguyoso ei a kontest’é bèk: “Ken ta Yehova?” (Eksodo 5:2, NW) Fárao no kier a siña konosé Yehova, i ku un aire di despresio el a rechasá e Dios di Israel i a hasi komo si fuera e no ta importante i ku e no ta konta mes. E aktitut ei ta masha komun awe. E ta siega hende i stroba nan di siña un dje bèrdatnan di mas importante, esta, ku Yehova ta e Señor Soberano.
E Señor Soberano Yehova
13, 14. (a) Pakiko Beibel ta duna Yehova hopi título, i kua ta algun di nan? (Mira e kuadro na página 14.) (b) Pakiko Yehova ta e úniko persona ku ta digno di e título “Señor Soberano”?
13 Yehova ta asina fleksibel i adaptabel ku e ta meresé e variedat amplio di título duná na dje den e Skritura. Pero e títulonan aki no ta mas haltu ku su nòmber mes; mas bien, for di nan nos ta siña mas kosnan ku su nòmber ta representá. Por ehèmpel, e teksto original di Beibel ta yam’é mas ku shen biaha “Señor Soberano Yehova.” E título haltu ei ta duna nos un idea di e posishon ku Yehova ta okupá. E so tin e derecho di ta Gobernante di henter universo. Laga nos wak dikon.
14 Yehova ta e úniko Kreadó. Revelashon 4:11 ta bisa: “Digno bo ta, nos Señor i nos Dios, pa risibí gloria i onor i poder; pasobra abo a krea tur kos, i pa motibu di bo boluntat nan tabata eksistí, i a wòrdu kreá.” E palabranan solèm aki no por apliká na ningun otro ser. Tur loke tin den universo ta debe nan eksistensia na Yehova! Sin duda, Yehova ta digno di e onor, poder i gloria ku komo Señor Soberano i Kreadó di tur kos e ta meresé.
15. Pakiko Yehova ta ser yamá “Rei eterno”?
15 Un otro título ku ta apliká eksklusivamente na Yehova ta “Rei eterno.” (1 Timoteo 1:17) Kiko esaki ta nifiká? Ta difísil pa nos mente limitá kapta esei, pero Yehova ta eterno tantu den pasado komo den futuro. Salmo 90:2 ta bisa: “For di eternidat te na eternidat, abo ta Dios.” Pues Yehova no tabatin un kuminsamentu; semper el a eksistí. E ta ser yamá korektamente “e Ansiano di Dianan.” El a eksistí pa un eternidat promé ku kualkier persona òf kos den universo a kuminsá eksistí! (Daniel 7:9, 13, 22) Ken tin motibu válido pa kuestioná su derecho di ta e Señor Soberano?
16, 17. (a) Pakiko nos no por mira Yehova, i pakiko esei no mester sorprendé nos? (b) Den ki sentido Yehova ta mas real ku kualkier kos ku nos por mira òf fula?
16 Tòg, algun hende ta kuestioná e derecho ei, manera Fárao a hasi. Parti di e problema ta ku hende imperfekto ta dependé muchu riba loke nan por mira ku nan wowonan. Nos no por mira e Señor Soberano. E ta un ser spiritual, invisibel pa wowo humano. (Juan 4:24) Ademas, si un persona di karni i sanger para direktamente dilanti Yehova Dios, esei lo ta fatal p’e. Yehova mes a bisa Moisés: “Bo no por mira mi kara, pasobra ningun hende no por mira mi i keda na bida!”—Eksodo 33:20; Juan 1:18.
17 Esei no mester sorprendé nos. Moisés a mira apénas un pida di e gloria di Yehova, i tur kos ta mustra ku esei tabata pa medio di un angel ku a representá Yehova. Ku ki efekto? Moisés su kara a keda “bria” pa un sierto tempu despues. E israelitanan tabatin asta miedu di wak Moisés dirèkt den su kara. (Eksodo 33:21-23; 34:5-7, 29, 30) Ta mas ku klaru anto ku niun simpel ser humano no por wak e Señor Soberano mes den e plenitut di su gloria! Esaki ta nifiká ku Dios no ta mes real ku un kos ku nos por mira i fula? Nò, pasobra tin hopi kos ku nos no por mira pero ku nos ta aseptá mesora ku nan ta eksistí, manera por ehèmpel bientu, onda di radio i pensamentu di hende. Ademas, Yehova ta permanente i no ta kambia den transkurso di tempu, ni sikiera den míles di miónes di aña! Den e sentido ei, e ta muchu mas real ku kualkier kos ku nos por mira òf fula, pasobra tur kos físiko ta bira bieu i ta bai atras. (Mateo 6:19) Pero nos mester mira Dios simplemente komo un forsa sin personalidat òf un Promé Kousa vago? Laga nos mira.
Un Dios Ku Tin Personalidat
18. Ki vishon Ezekiel a haña, i kiko e kuater karanan di e ‘sernan bibu’ banda di Yehova ta simbolisá?
18 Ounke nos no por mira Dios, Beibel ta kontené pasashinan emoshonante ku ta permití nos haña un idea di kiko tin den shelu. Un ehèmpel di esei ta Ezekiel kapítulo un. Ezekiel a haña un vishon di e organisashon selestial di Yehova, ku el a mira komo un garoshi selestial inmenso. Loke ta spesialmente impreshonante ta e deskripshon di e kriaturanan spiritual poderoso rònt di Yehova. (Ezekiel 1:4-10) E ‘sernan bibu’ aki tin un relashon estrecho ku Yehova, i nan aparensia ta bisa nos algu importante tokante e Dios ku nan ta sirbi. Kada un tin kuater kara: kara di toro, di leon, di águila i di hende. Evidentemente nan ta simbolisá e kuater kualidatnan prinsipal di e personalidat di Yehova.—Revelashon 4:6-8, 10.
19. Ki kualidat ta ser simbolisá pa (a) e kara di toro? (b) e kara di leon? (c) e kara di águila? (d) e kara di hende?
19 Den Beibel, hopi bes un toro ta representá poder. Esei ta lógiko tambe pasobra e ta un animal masha fuerte mes. En kambio, un leon ta simbolisá hustisia, pasobra berdadero hustisia ta rekerí kurashi, un kualidat ku leon ta famoso p’e. Águila ta konosí pa su bista skèrpi. E por mira òf distinguí ophetonan chikitu for di un distansia di vários shen meter. Pues kara di un águila ta un símbolo apropiá di e sabiduria penetrante di Dios. I kiko kara di hende ta para p’e? Wèl, ya ku hende a ser kreá den e imágen di Dios, e ta sobresalí den su kapasidat pa reflehá Dios su kualidat dominante, esta, amor. (Génesis 1:26) E fasetanan aki di Yehova su personalidat—su poder, su hustisia, su sabiduria i su amor—ta resaltá asina tantu biaha den e Skritura ku nos por referí na nan komo Dios su kualidatnan prinsipal òf kardinal.
20. Nos tin ku preokupá ku Yehova su personalidat lo por a kambia, i pakiko nos ta kontestá asina?
20 Nos tin ku preokupá ku Dios por a kambia durante e míles di añanan desde ku Beibel a deskribí su personalidat? Nò, su personalidat no ta kambia. Dios ta bisa nos: “Ami, SEÑOR, no ta kambia.” (Malakias 3:6) En bes di kambia ki ora ku e haña ta bon, Yehova ta demostrá ku e ta un Tata ideal den e manera ku e ta respondé na kada situashon. E ta ekspresá e aspektonan di su personalidat ku ta mas adekuá. Di e kuater kualidatnan, esun ku ta predominá ta amor. Tur loke Dios hasi ta manifestá amor. E ta ehersé su poder, hustisia i sabiduria den un manera amoroso. De echo, Beibel ta bisa algu ekstraordinario di Dios i dje kualidat aki. E ta bisa: “Dios ta amor.” (1 Juan 4:8) Ripará ku e no ta bisa ku Dios tin amor òf ku Dios ta amoroso. E ta bisa mas bien ku Dios ta amor. Amor, e esensia di Yehova su karakter, ta motiv’é den tur loke e ta hasi.
“Mira, Esaki Ta Nos Dios”
21. Kiko nos lo sinti segun ku nos ta konosé Yehova su kualidatnan mihó?
21 Bo no a yega di mira un mucha chikitu mustra su amiguitunan ken ta su tata anto bisa kontentu i orguyoso di dje: “Esei ta mi papi”? Dios su sirbidónan tin tur motibu pa sinti meskos tokante Yehova. Beibel ta bisa ku lo yega e dia ku hende fiel lo sklama: “Mira, esaki ta nos Dios.” (Isaias 25:8, 9) Mas bo konosé Yehova su kualidatnan, mas lo bo sinti ku bo tin e mihó Tata ku bo por imaginá.
22, 23. Kon Beibel ta pinta nos Tata selestial, i kon nos por sa ku e kier pa nos hala serka dje?
22 Esaki no ta un Tata indiferente, seku ni leu for di nos, ounke algun filósofo i lider religioso severo a pint’é asina. Nos lo no sinti nos atraí na un Dios indiferente, i Beibel no ta representá nos Tata selestial den e manera ei tampoko. Al kontrario, e ta yam’é “e Dios felis.” (1 Timoteo 1:11, NW) E tin sintimentunan fuerte pero tambe tierno. Ora su kriaturanan inteligente kibra e leinan ku el a duna nan pa nan mes bon, esei ta “duel” e. (Génesis 6:6; Salmo 78:41) Pero ora nos aktua sabí segun su Palabra, nos ta “hasi [su] kurason kontentu.”—Proverbionan 27:11.
23 Nos Tata kier pa nos hala serka dje. Su Palabra ta animá nos pa “buska Dios, si di algun manera, fulando, [nos] por hañ’é, maske e no ta leu di kada un di nos.” (Echonan 17:27) Awor, ta posibel pa un simpel ser humano hala serka e Señor Soberano di universo?
