1, 2. (a) O ā ni fesili e te ono fai atu ai i le Atua? (e) O le ā le fesili a Mose i le Atua?

 O LE Ā sou manatu pe afai o lea lua te talanoa ma le Atua? Ma‘eu sou faagaeetia—ua talanoa mai le Pule Silisili Ese iā te oe! Atonu i le amataga e te tau faalētonu, peita‘i ua i‘u ina mafai ona e tautala atu. O loo faafofoga mai, ma o loo tali mai fo‘i o ia. Ma o ana gaoioiga na ua e lē toe fefe ai loa e fesili atu. O ā nei la au fesili o le a fai atu?

² O le faafitauli tonu lenā sa fesaga‘i ma se tasi tamālii anamua. O lona igoa o Mose. Atonu e te ofo i le fesili na ia fesiligia ai le Atua. Na te le‘i fesiligia se mea e uiga iā te ia lava, po o lona lumana‘i, po o se mea e faatatau i mafatiaga sa iai o tagata. Na i lo lea, na ia fia iloa le suafa o le Atua. Atonu e te ofo i lenā fesili, auā ua leva ona iloa e Mose le suafa moni o le Atua. O le mea moni, e iai se isi uiga e loloto atu o lana fesili. O se fesili aupito sili lea ona tāua sa fesiligia e Mose ma e aafia ai i tatou uma lava i le tali o lenā fesili. E aogā iā te oe i le faia o se gaoioiga e tāua tele mo lou faalatalata atu i le Atua. Ae e faapefea ona fai? Se‘i o tatou ua‘i atu la i lenā talanoaga mata‘ina.

3, 4. O ā mea sa tutupu na māfua ai ona talanoa Mose ma le Atua, ma o le ā le manatu autū o lenā talanoaga?

³ Ua 80 tausaga o Mose i le taimi lea. E fāsefulu tausaga o nofo ese mai i ona tagata, le fanauga a Isaraelu o ē sa faapologaina i Aikupito. A o ia leoleoina lafumanu a le tamā o lana avā, na ia vaaia ai se mea uigaese. O le afi o loo sasao a‘e i se laau, ae e lē o mū ai le laau. E na o le sasao lava o le afi, ma susulu mai lona malamalama e pei o se molī o le ava i luga o se atumauga. Sa taumafai loa Mose e faalatalata atu se‘i vaai. Na matuā faate‘ia o ia ina ua tautala ane se leo mai i le afi! O inā loa na talanoa māe‘ae‘a ai le Atua ma Mose, e ala i se agelu sa avea ma fofoga fetalai. Na faatonuina e le Atua Mose, o lē sa fefe ma tau faatalatū, ina ia tuua lona olaga filemu,  ae toe fo‘i atu i Aikupito e lavea‘i le fanauga a Isaraelu mai le faapologaina.—Esoto 3:1-12.

⁴ Sa ono mafai e Mose i lenā taimi ona fai atu so o sana fesili lava i le Atua. Peita‘i se‘i mātau mai lana fesili: “Faauta, pe a a‘u alu i le fanauga a Isaraelu, ma a‘u fai atu iā i latou, Ua auina mai a‘u iā te outou e le Atua o outou tamā; ona latou fai mai lea iā te a‘u, O ai ea lona suafa? Se ā ea sa‘u e fai atu ai iā te i latou?”—Esoto 3:13.

5, 6. (a) O le ā le manatu moni e tāua tele ua tatou iloa mai le fesili a Mose? (e) O le ā le mea e matuā sesē lava ua faia e faatatau i le suafa o le Atua? (i) Aiseā ua mata‘ina ai le faailoa mai e le Atua o lona suafa i tagata?

⁵ O le mea muamua lava e tatou te iloa mai i lenā fesili, e iai le suafa o le Atua. E lē tatau ona tatou manatu māmā i lenei manatu moni. Peita‘i, o le uiga lenā o loo iai i le to‘atele o isi. Ua aveesea le suafa moni o le Atua mai le tele o faaliliuga o le Tusi Paia, ae sui i ta‘u e pei o le “Alii” ma le “Atua.” O se mea lenei e sili ona faanoanoa ai ma matuā sesē, ua faia ona o uuna‘iga a lotu. Auā, o le ā lau mea muamua lava e fai pe a lua feiloa‘i ma se tasi? Pe e te lē fesili atu ea i ai i lona suafa? E faapena fo‘i le iloaina o le Atua. E iai lona suafa ma ona uiga māfana. E mafai ona tatou iloa ma malamalama iā te ia. E ui ina lē vaaia o ia, ae o loo soifua moni lava, ma e iai lona suafa—o Ieova.

⁶ E lē gata i lea, pe a faailoa mai e le Atua lona lava suafa, o lona uiga e iai se mea mata‘ina o le a tupu. O loo ia valaauliaina i tatou ina ia taumafai e iloa o ia. O lona finagalo ina ia tatou faia le filifiliga e sili ona lelei i le olaga—o le faalatalata atu lea iā te ia. Ae tele atu isi mea ua faia e Ieova na i lo le tau ina faailoa mai o lona suafa. Ua ia a‘oa‘oina fo‘i i tatou e faatatau i le ituaiga o Atua e ona lenā suafa.

7. (a) E tusa ai ma sa‘ili‘iliga, o le ā le uiga o le suafa o le Atua? (e) O le ā le mea na fia iloa moni e Mose ina ua fesili atu i le Atua e na te fia iloa Lona suafa?

⁷ Na filifilia e Ieova lona lava suafa, o le suafa ua matuā saunia  lelei lona uiga. E tusa ai ma sa‘ili‘iliga, ua talafeagai ona faapea atu o le uiga o le suafa o “Ieova,” “E Gaoioi o Ia e Tusa ai ma Tulaga Mana‘omia.” E tutasi o ia i le aoao o mea, auā sa ia foafoaina mea uma. E na te gaoioi foʻi e faataunuuina mea uma e finagalo i ai, ma e mafai ona ia faapogaia ana auauna lē lelei atoatoa e faia so o se mea e finagalo i ai. E tatou te maofa i na mea moni. Ae pe e iai se isi vala o le uiga o le suafa o le Atua? E mautinoa sa fia iloa atili e Mose nisi mea e faatatau i le suafa o le Atua. Sa iloa lelei e Mose o Ieova o Lē na foafoaina mea, ma sa ia iloa fo‘i le suafa o le Atua. Ua loa ona iloa e tagata lenā suafa. E mautinoa la, o le fesili atu o Mose e na te fia iloa le suafa o le Atua, o lona uiga sa ia fia iloa Lē e ona lenā suafa. E tai pei sa ia faapea atu: ‘O le ā sa‘u tala e fai atu i lou nuu e uiga iā te oe, ina ia latou faatuatua mai ai, ma talitonu o oe lava o le a lavea‘iina i latou?’

8, 9. (a) Na faapefea ona tali mai Ieova i le fesili a Mose, ma o le ā le auala sesē lea ua masani ona faaliliuina ai Lana tali mai? (e) O le ā le uiga o le faaupuga, “E Avea A‘u ma Lē Ou te Loto i Ai”?

⁸ I le tali a Ieova, na ia faailoa atu ai se vala mata‘ina o ona uiga, lea e fesoota‘i atu i le uiga o lona suafa. Na ia fetalai mai iā Mose: “E Avea A‘u ma Lē Ou te Loto i Ai.” (Esoto 3:14, NWT) O le faitauina lenei o le tele o faaliliuga o le Tusi Paia: “O a‘u o lē ola, o loo ola lava.” Peita‘i, ua faaalia i faaliliuga na faia māe‘ae‘a, e le‘i tau ina faamautinoa mai e le Atua e faapea o loo soifua o ia. Nai lo o lea, sa a‘oa‘oina e Ieova Mose ma i tatou uma e faapea, o le a “avea” o Ia pe filifili e avea ma Lē e loto i ai i so o se tulaga e mana‘omia, ina ia faataunuu ai Ana folafolaga. E manino le faaliliuga a J. B. Rotherham i lenei fuaiupu e faapea: “O le a Faapogaia A‘u e avea ma so o se mea Ou te loto i ai.” O le faamatalaina lenei o lea fuaiupu e se alii atamai i tusitusiga Eperu o le Tusi Paia: “Po o le ā lava le tulaga po o le mana‘oga o iai . . . , o le a ‘faapogaia’ lava e le Atua lona avea ma vaifofō mo lenā mana‘oga.”

⁹ O le ā se uiga moni o lenā mea i le fanauga a Isaraelu? O lona uiga, po o le ā lava se to‘atugā latou te fetaia‘i, po o se faafitauli faigatā e oo mai, ae o le a faapogaia lava e Ieova lona  avea ma so o se mea e mana‘omia, ina ia lavea‘iina ai i latou mai le faapologaina, ma ta‘ita‘iina atu ai i le Nuu Folafolaina. O le mea moni lava, o le suafa lenā na uuna‘ia ai le talitonuga mautinoa i le Atua. E mafai fo‘i ona tupu le mea lava lenā iā i tatou i aso nei. (Salamo 9:10) E faapefea?

10, 11. Ona o lona suafa o Ieova, aiseā ua mafai ai ona tatou mafaufau iā te ia o le Tamā ua sili ona lelei ma agavaa? Se‘i faata‘ita‘i mai.

¹⁰ Se‘i fai se tala faata‘ita‘i: Ua iloa lelei e mātua e tatau ona latou agavaa ma mafai ona faia so o se mea mo le tausiaina o le fanau. A o faagasolo se aso se tasi, e mafai e se matua ona galue e pei o se tausima‘i, se kuka, se faia‘oga, sē e avatuina a‘oa‘iga, se faamasino, ma isi lava tulaga e tele. Ua iloa e le to‘atele o mātua, e matuā faigatā le anoanoa‘i o matafaioi e tatau ona latou faatinoina. Latou te iloa le matuā faatuatuaina o i latou e a latou fanau, o ē e lē taitai ona masalosalo i le tomai o Tamā ma Tinā e togafitia ai se manu‘a o le tino, faato‘afilemu ni maseiga, toe faapipii se meataalo ua malepe, ma taliina so o se fesili e oso a‘e. I nisi taimi ua lagona e mātua le lē fiafia ma le lotovaivai ona o lo latou lē taulau. Latou te manatu faapea, e lē taitai mafai ona latou faataunuuina le tele o nei matafaioi.

¹¹ O Ieova, o ia fo‘i o se matua e alofa. E leai se mea e lē mafai ona ia faia ina ia tausia ai i se tulaga e sili ona lelei lana fanau i le lalolagi, ae aunoa ma le solia ai o ana tulafono lelei atoatoa. Ona o lona suafa o Ieova, e mafai ai ona tatou mafaufau iā te ia o le Tamā e sili ona lelei. (Iakopo 1:17) Na vave ona iloa e Mose ma isi tagata faamaoni o Isaraelu e faapea, o loo faamaoni Ieova e tusa ai o le uiga o lona suafa. Sa latou vaai atu ma le maofa a o avea e Ieova o ia lava o se Ta‘ita‘i‘au sili, ma o Lē e puleaina le lalolagi. O ia fo‘i o le Faitulafono sili, o le Faamasino, o le Mata‘isau poto, o Lē na Saunia mea‘ai ma vai, ma tausia lelei lavalava ma seevae—ma isi lava tulaga uma.

12. O le ā le eseesega o uiga sa faaalia e Farao iā Ieova, ma uiga na faaalia e Mose?

¹² O lea, o le faailoaina mai e le Atua o lona suafa i nei auala, ua faaalia mai ai mea mata‘ina e faatatau i Lē e ona lenā suafa. Ua ia faamautinoa mai ai fo‘i, e moni mea uma ua ia fetalai  ai e faatatau iā te ia lava. E mautinoa lava la, o loo finagalo le Atua ina ia tatou iloa o ia. O ā mea ua tatou fai i ai? Sa fia iloa e Mose le Atua. O le faanaunauga malosi lea o Mose na ta‘ita‘ia ai lona soifuaga atoa, ma na mafai ai ona ia matuā faalatalata atu i lona Tamā faalelagi. (Numera 12:6-8; Eperu 11:27) O se mea e faanoanoa ai, ona e to‘aitiiti nisi o le tupulaga a Mose, sa iā i latou lenā faanaunauga. Ina ua ta‘u atu e Mose le suafa o Ieova iā Farao, na tali mai ma le lotoa lenā tupu faamaualuga o Aikupito: “O ai ea Ieova?” (Esoto 5:2) E le‘i fia iloa e Farao nisi mea e uiga iā Ieova. Na i lo lea, sa ia manatu faatauvaa i le Atua o Isaraelu. O loo matuā taatele lenā manatu i aso nei. Ua lē mafai ai e tagata ona latou iloa le mea moni e sili ona tāua—o Ieova o ia o le Alii Pule Silisili Ese.

13, 14. (a) Aiseā ua tele ai ta‘u po o tulaga mamalu o loo iai i le Tusi Paia ua faaee atu iā Ieova, ma o ā nisi o na ta‘u? (Taga‘i i le  pusa i le itulau 14.) (e) Aiseā e tutasi ai lava Ieova i le avea o ia ma ‘Alii Pule Silisili Ese’?

¹³ Talu ai ua matuā agavaa Ieova ma mafai ona faia so o se mea, ua matuā tonu ai ona faaee atu iā te ia le tele o ta‘u po o tulaga mamalu o loo iai i le Tusi Paia. E lē feteena‘i nei ta‘u ma lona suafa; na i lo lea, ua a‘oa‘oina atili mai ai i tatou i mea o loo faauigaina i ai lona suafa. Mo se faaa‘oa‘oga, ua ta‘ua o ia o le “Atua silisili ese.” (Salamo 57:2) O lenā tofiga maualuga, lea o loo ta‘ua soo i le Tusi Paia, ua faaali mai ai iā i tatou le tulaga o Ieova. Ua na o ia lava e iai le aiā e avea ai ma Pule i le aoao o mea. Se‘i tatou talanoa i le māfuaaga o lea mea.

¹⁴ E tutasi Ieova i lona avea ma Lē na Foafoaina Mea. Ua ta‘ua i le Faaaliga 4:11 e faapea: “Lo matou Alii e, ma lo matou Atua, e tatau lava oe ina ia tuuina atu iā te oe le viiga, ma le faaneeneega, ma le mana; auā na e faia mea uma lava, ona o lou finagalo fo‘i e i ai i latou ma ua faia.” E leai lava se isi e mafai ona faatatau atu i ai nei faaupuga malualii. O Ieova e to‘atasi na foafoaina le aoao o mea uma! E mautinoa la, ua tatau ma onomea iā Ieova le viiga, le mana, ma le mamalu ona o ia o le Alii Pule Silisili Ese, ma o Lē na Foafoaina mea uma lava.

15. Aiseā ua ta‘ua ai Ieova o le “Tupu o le vavau”?

 ¹⁵ O le isi ta‘u e na o Ieova lava e faatatau i ai, o le “Tupu o le vavau.” (1 Timoteo 1:17) O le ā le uiga o lenei ta‘u? E faigatā tele i o tatou mafaufau vaivai ona malamalama atoatoa i ai, peita‘i e faavavau Ieova i itu uma e lua—i taimi ua te‘a ma i le lumana‘i. Ua faapea mai le Salamo 90:2: “O le Atua oe mai le vavau e oo i le faavavau.” O lea la, e le‘i iai se amataga o Ieova, ma e soifua pea o ia. Ua tonu ai la le ta‘ua o ia o “Lē ua mai anamuā ona aso”—sa soifua Ieova mai le vavau a o le‘i oo ina iai mea uma lava o loo i le aoao o mea i aso nei! (Tanielu 7:9, 13, 22) O ai se tasi na te mafaia ona lu‘ia le aiā a Ieova e avea ai ma Alii Pule Silisili Ese?

16, 17. (a) Aiseā e lē mafai ai ona tatou vaai iā Ieova, ma aiseā e lē tatau ai ona faate‘ia i tatou i lenā mea? (e) I le ā le itu ua sili atu ai ona moni Ieova na i lo so o se mea o loo mafai ona tatou vāai ma pa‘i i ai?

¹⁶ Peita‘i, e iai lava nisi ua latou fia lu‘ia lenā aiā, e pei ona sa faia e Farao. O se tasi o māfuaaga, ua faalagolago tele tagata lē lelei atoatoa i mea o loo mafai ona vaaia e o latou mata. E lē mafai ona tatou vaaia le Alii Pule Silisili Ese. O ia o se agaga e lē vaaia e mata o tagata. (Ioane 4:24) E lē gata i lea, pe afai e tula‘i atu i luma o Ieova le Atua se tasi e iai ona aano ma le toto, o le a oti lava lenā tagata. O Ieova lava ia na fetalai mai iā Mose: “E te lē mafaia ona vaai mai i o‘u mata; auā e lē mafai ona vaai mai lava se tagata iā te a‘u, ma ola pea ia.”—Esoto 33:20; Ioane 1:18.

¹⁷ E lē tatau ona faate‘ia i tatou i lenā mea. Sa mafai e Mose ona vaaia na o se vaega o le mamalu o Ieova, lea na ala mai i se agelu. O le ā le i‘uga? Na “pupula le pa‘u” o fofoga o Mose mo se taimi ina ua mavae lenā mea. Ona o lea, sa matata‘u ai le fanauga a Isaraelu e vaavaai sa‘o atu i foliga o Mose. (Esoto 33:21-23; 34:5-7, 29, 30) E mautinoa la, e leai se tagata e mafai ona vaai sa‘o atu i le mamalu atoatoa o le Alii Pule Silisili Ese! Po o le uiga ea la, e lē o moni a‘ia‘i o ia, auā e lē mafai ona tatou vāai ma pa‘i atu iā te ia? E leai, e tatou te talitonu i le iai moni o le tele o mea ia e lē o mafai ona tatou vaaia—e pei o  le matagi, le ‘ea, ma mafaufauga. E lē gata i lea, e tumau pea Ieova, e lē suia o ia i le faagasologa o taimi, po o le ā lava le umi e oo i ai! O lona uiga, ua sili atu ona moni o ia na i lo o se mea e mafai ona tatou pa‘i ma vāai i ai, auā o le lalolagi lea o loo vaaia, e oo ina tuai ma faaleagaina. (Mataio 6:19) Ae pe tatau ea ona tatou mafaufau faapea, o ia o se malosi po o le Puna o mea uma e lē mafai ona tatou malamalama i ai, ma e leai ni ona uiga māfana? Se‘i o tatou iloiloina la.

18. O le ā le faaaliga na faaali ane iā Esekielu, ma o le ā ua faaata mai e foliga e fā o “mea ola” o loo i tafatafa o Ieova?

¹⁸ E ui ina lē mafai ona tatou vaai i le Atua, ae o loo iai ni faamatalaga lelei i le Tusi Paia e uiga i mea o loo i le lagi. E pei o le mataupu muamua o le Esekielu. Na faaali ane iā Esekielu se faaaliga o le vaega faalelagi o le faalapotopotoga a Ieova i le aoao o mea, lea sa ia vaaia ai se kariota tele faalelagi. Ae o loo sili ona mata‘ina le faamatalaina mai o meaola agaga malolosi o loo latou si‘osi‘omiaina Ieova. (Esekielu 1:4-10) O loo latalata atu nei “mea ola” iā Ieova, ma o o latou foliga e ta‘u mai ai iā i tatou se mea tāua e faatatau i le Atua lea o loo latou auauna atu i ai. E tofu meaola ta‘itasi ma o latou foliga e fā—o foliga o se povi po‘a, se leona, se aeto, ma se tagata. O nei foliga e fā ua faaata mai ai uiga e fā lea e fai ma faavae o uiga ofoofogia o Ieova.—Faaaliga 4:6-8, 10.

19. O le ā le uiga o loo faaata mai i foliga o (a) le povi po‘a? (e) le leona? (i) le aeto? (o) le tagata?

¹⁹ E faaaogā i le Tusi Paia le povi po‘a e faatusa i ai le malosi, ma ua fetaui lelei lenā, auā o se manu e matuā mata‘utia lona malosi. Ae i le isi itu, o le leona ua masani ona faaata mai ai le faamasinotonu, auā o le faia ma le tonu o se faamasinoga e mana‘omia ai le lototele, o se uiga lea ua lauiloa ai leona. Ua lauiloa aeto i le masau o la latou vaai, e mafai ona latou iloa atu ai e oo lava i ni mea ninii o loo matuā mamao ese. E faaatagia lelei mai ai e foliga o le aeto le atamai, ma le tofā mamao o le Atua. Ae faapefea foliga o le tagata? Manatua, talu ai na  faia le tagata i le faatusa o le Atua, ua na o le tagata la e mafai ona faaalia maia le uiga autū o le Atua—o le alofa. (Kenese 1:26) Talu ai ua faamatilatila soo mai i le Tusi Paia nei vala eseese o uiga o Ieova—le mana po o le malosi, le faamasinotonu, le atamai, ma le alofa—e mafai la ona ta‘ua o uiga autū na o le Atua.

20. Pe tatau ea ona tatou popole faapea atonu ua suia uiga o Ieova, ma aiseā ua e tali mai ai faapena?

²⁰ Pe tatau ea ona tatou popole faapea atonu ua suia le Atua i le faitau afe o tausaga, talu mai le taimi lea sa faamatalaina ai o ia i le Tusi Paia? E leai, e lē fesuia‘ia uiga o le Atua. Ua ia fetalai mai iā i tatou: “O a‘u o Ieova, ou te lē liliu.” (Malaki 3:6) Na i lo le faafuase‘i la ona suia lona finagalo, ua faamaonia mai e Ieova le avea o ia o se Tamā sili ona lelei i le faafoeina o tulaga ta‘itasi. Ua masani ona ia faaali mai vala o ona uiga e sili ona talafeagai. Mai uiga uma o le Atua, e silisili lava le uiga o le alofa. O loo faaalia mai i mea uma lava e faia e le Atua. E na te faaalia i se auala alofa lona mana po o le malosi, lona faamasinotonu ma lona atamai. O loo ta‘ua e le Tusi Paia se mea uigaese e faatatau i lenei uiga o le Atua. O loo faapea mai: “O le Atua, o le alofa lava ia.” (1 Ioane 4:8) Se‘i mātau, e lē o faapea mai ua iai i le Atua le alofa, pe faapea fo‘i e alofa le Atua.  Na i lo lea, o loo faapea mai, o le Atua, o le alofa lava ia. O loo uuna‘ia o ia e le alofa i mea uma na te faia auā o ia lava o le alofa.

21. O ā o tatou faalogona o le a iai a o faasolo ina tatou iloa lelei uiga o Ieova?

²¹ Po ua e vaai i se tamaitiiti a o tusi lona lima e faasino atu lona tamā i ana uō, ona faapea ane lea i sona leo fiafia ma le mitamita, “Vaai, o lo‘u tamā lale”? Ua iai i tagata tapua‘i o le Atua māfuaaga uma e latou te lagonaina ai na faalogona e faatatau iā Ieova. Ua valoia mai e le Tusi Paia le taimi o le a alalaga ai tagata faamaoni e faapea: “Faauta, o lo tatou Atua lenei.” (Isaia 25:8, 9) O le tele lava o lou malamalama i uiga o Ieova, o le atili fo‘i lenā ona e lagona lou mauaina o se Tamā e sili ona lelei.

22, 23. Ua faapefea ona faamatalaina e le Tusi Paia lo tatou Tamā faalelagi, ma e faapefea ona tatou iloa o loo finagalo o ia ina ia tatou faalatalata atu iā te ia?

²² E lē o taumamao lenei Tamā ma i tatou, ua iā te ia uiga faaleuō, ma e māfana mai—e ui lava e ese faamatalaga ua a‘oa‘o atu e nisi tagata lotu ma le ‘aufaifilosofia. O le a faigatā lava ona tatou māfana vavalalata atu i le Atua pe ana faapea e leai ni ona uiga faaleuō. E lē o le faamatalaga lenā a le Tusi Paia e faatatau i lo tatou Tamā faalelagi. Na i lo lea, o loo ta‘ua o ia o ‘le Atua fiafia.’ (1 Timoteo 1:11) E lē gata e malolosi ona faalogona, ae alofa naunau fo‘i. O loo taʻua ai foʻi ‘na tigā lona finagalo’ ina ua solia e ana foafoaga atamamai ta‘iala na ia saunia mai mo lo latou lelei. (Kenese 6:6; Salamo 78:41) Peita‘i pe afai tatou te amioa‘i ma le atamai e tusa ai o lana Afioga, ona tatou ‘faafiafiaina ai lea o lona finagalo.’—Faataoto 27:11.

²³ E finagalo lo tatou Tamā ina ia tatou faalatalata atu iā te ia. Ua faalaeiau mai lana Afioga ina ia tatou “tautāgotago ma . . . iloa o ia; [auā] e lē mamao o ia ma i tatou ta‘ito‘atasi.” (Galuega 17:27) Peita‘i, e faapefea ona mafai e tagata ona faalatalata atu i le Alii Pule Silisili Ese aoao?