1, 2. (a) Ko e hā ʻa e ngaahi fehuʻi te ke saiʻia ke ʻeke ki he ʻOtuá? (e) Ko e hā naʻe ʻeke ʻe Mōsese ki he ʻOtuá?

 ʻE LAVA ke ke sioloto atu ki hano fai ha fetalanoaʻaki mo e ʻOtuá? Ko e foʻi fakakaukau tofu pē ko ia ʻokú ne langaʻi ʻa e ongoʻi māluʻiá​—ko e Hau ʻo e ʻunivēsí ʻoku lea atu kiate koe! ʻOkú ke ʻuluaki toumoua, ka ʻi he hili iá ʻokú ke malava ke tali. ʻOkú ne fanongo mai, ʻokú ne fai mai ha tali, pea naʻa mo ʻene ʻai koe ke ke ongoʻi tauʻatāina ke ʻeke kiate ia ha faʻahinga fehuʻi pē ʻokú ke loto ki ai. Sai, ko e hā ʻa e fehuʻi te ke ʻeké?

² ʻI he taimi fuoloa kuo maliu atú, naʻe ʻi ai ha tangata naʻe ʻi ha tuʻunga pehē tofu pē. Ko hono hingoá ko Mōsese. Ka, ko e fehuʻi naʻá ne fili ke ʻeke ki he ʻOtuá, te ke ʻohovale nai ai. Naʻe ʻikai te ne ʻeke fekauʻaki mo ia, ko hono kahaʻú, pe naʻa mo e faingataʻaʻia ʻa e faʻahinga ʻo e tangatá. Kae kehe, naʻá ne ʻeke ʻa e huafa ʻo e ʻOtuá. Te ke fakakaukau nai ʻoku faikehe ia, he naʻe ʻosi ʻiloʻi ʻe Mōsese ʻa e huafa fakafoʻituitui ʻo e ʻOtuá. Ko ia, kuo pau pē naʻe maʻu ʻe heʻene fehuʻí ha ʻuhinga loloto ange. Ko hono moʻoní, ko e fehuʻi mahuʻinga taha ia naʻe malava ʻe Mōsese ke ne ʻeké. ʻOku ʻi ai ʻa e kaunga ʻa e talí kiate kitautolu kotoa. ʻOku malava ke tokoni ia kiate koe ke ke laka ai ʻi ha sitepu mātuʻaki mahuʻinga ʻi he ʻunuʻunu ofi ki he ʻOtuá. Anga-fēfē? Tau vakai angé ki he fetalanoaʻaki fakaofo ko iá.

3, 4. Ko e hā ʻa e ngaahi meʻa naʻe hoko naʻe taki atu ai ki he fetalanoaʻaki ʻa Mōsese mo e ʻOtuá, pea ko e hā ʻa e poini tefito ʻo e fetalanoaʻaki ko iá?

³ Naʻe taʻu 80 ʻa Mōsese. Naʻe feʻunga mo e hongofuluʻi taʻu ʻe fā ʻa ʻene mavahe mei hono kakaí, ʻa e kau ʻIsilelí, ʻa ia naʻa nau hoko ko e kau pōpula ʻi ʻIsipite. ʻI he ʻaho ʻe taha, lolotonga hono tokangaʻi ʻa e tākanga ʻa ʻene tamai-ʻi-he-fonó, naʻá ne sio ai ki ha meʻa ngalikehe. Ko ha fuʻu ʻakau talatala naʻe ulo ka naʻe ʻikai ke vela ia. Naʻe hokohoko ulo pē, ʻo maama hangē ha maama fakaʻilongá ʻi he veʻe moʻungá. Naʻe fakaofiofi atu ʻa Mōsese ke vakaiʻi. Ko ha ʻohovale lahi ē kuo pau naʻe hoko kiate ia ʻi he taimi naʻe lea mai ai kiate ia ha leʻo mei he lotolotonga ʻo e afí! Fakafou ʻi ha tangata-lea fakaeʻāngelo, naʻe fetalanoaʻaki kakato ai ʻa e ʻOtuá mo Mōsese. Pea, hangē ko ia ʻokú ke ʻilo nai ki aí, naʻe fekau ai ʻe he ʻOtuá ʻa e tokotaha toumoua ko Mōsesé ke ne mavahe mei  heʻene moʻui nongá pea toe foki ki ʻIsipite ke fakahaofi ʻa e kau ʻIsilelí mei he nofo pōpulá.​—Ekisoto 3:1-12.

⁴ ʻI he mōmeniti ko iá, naʻe mei malava pē ʻe Mōsese ke ne ʻeke ki he ʻOtuá ha faʻahinga fehuʻi pē. Kae kehe, fakatokangaʻi ʻa e fehuʻi naʻá ne fili ke ne ʻeké: “Ko eni, kau ka ʻalu ki haʻa Isileli pea u lea kiate kinautolu ʻo pehe, Ko e ʻOtua ʻo hoʻomou ngaahi kui kuo ne fekau au kiate kimoutolu; pea te nau pehe mai kiate au, Ko hai hono huafa? pea ko e ha ai haʻaku lea ʻe fai kiate kinautolu?”​—Ekisoto 3:13.

5, 6. (a) Ko e hā ʻa e moʻoni faingofua mātuʻaki mahuʻinga, ʻoku akoʻi mai kiate kitautolu ʻe he fehuʻi ʻa Mōsesé? (e) Ko e hā ʻa e meʻa ʻoku ala valokiʻi kuo fai ki he huafa fakafoʻituitui ʻo e ʻOtuá? (f) Ko e hā ʻoku mātuʻaki mahuʻinga ai ʻa hono ʻosi fakahā mai ʻe he ʻOtuá hono huafá ki he faʻahinga ʻo e tangatá?

⁵ ʻOku ʻuluaki akoʻi mai ʻe he fehuʻi ko iá kiate kitautolu ko e ʻOtuá ʻoku ʻi ai hono huafa. Kuo pau ke ʻoua te tau fakamaʻamaʻaʻi ʻa e foʻi moʻoni faingofua ko iá. Neongo ia, ʻoku fai pehē ʻa e tokolahi. Kuo toʻo ʻa e huafa fakafoʻituitui ia ʻo e ʻOtuá mei he ngaahi liliu Tohitapu taʻefaʻalaua pea fetongiʻaki ia ʻa e ngaahi hingoa fakalakanga, hangē ko e “ʻEiki” mo e “ʻOtua.” Ko e taha ʻeni ʻo e ngaahi meʻa fakamamahi taha mo ala valokiʻi lahi taha kuo fai ʻi he hingoa ʻo e lotú. He ʻoku ʻosi angé, ko e hā ʻa e ʻuluaki meʻa ʻokú ke fai ʻi hoʻo feʻiloaki mo ha taha? ʻIkai ʻokú ke ʻeke ange hono hingoá? ʻOku meimei tatau pē ia mo e feinga ke ʻiloʻi ʻa e ʻOtuá. ʻOku ʻikai ko ha tokotaha taʻehingoa ia, fakamāmāhuʻi, ʻo mahulu atu mei hono ʻiloʻí pe mahinoʻí. Neongo ʻene taʻehāmaí, ko ha Tokotaha moʻoni ia, pea ʻoku ʻi ai hono huafa​—ko Sihova.

⁶ ʻIkai ngata aí, ʻi hono fakahaaʻi ʻe he ʻOtuá hono huafa fakafoʻituituí, ʻoku hā ofi mai ai ʻa e meʻa fisifisimuʻa mo fakalotofiefia. ʻOkú ne fakaafeʻi mai kitautolu ke tau hoko ʻo ʻiloʻi ia. ʻOkú ne fiemaʻu mai kitautolu ke tau fai ʻa e fili lelei taha ʻoku malava ke fai ʻi he moʻuí​—ke ʻunuʻunu ofi kiate ia. Ka kuo fai ʻe Sihova ʻa e meʻa lahi ange ia ʻi hono tala mai pē kiate kitautolu hono huafá. Kuó ne toe akoʻi mai kiate kitautolu fekauʻaki mo e Tokotaha ʻokú ne fakafofongaʻi ʻa e huafa ko iá.

7. (a) ʻOku hā mahino, ko e hā ʻa e ʻuhinga ʻo e huafa fakafoʻituitui ʻo e ʻOtuá? (e) Ko e hā naʻe fiemaʻu moʻoni ʻe Mōsese ke ne ʻiló ʻi heʻene ʻeke ki he ʻOtuá Hono huafá?

⁷ Naʻe fili ʻe Sihova hono huafa ʻoʻoná, ko e huafa ʻoku mohu  ʻuhinga. ʻOku hā mahino, ko e huafa “Sihova” ʻoku ʻuhingá ko e “ʻOkú Ne Fakatupunga ke Hoko.” ʻOkú ne laulōtaha ʻi he ʻunivēsí kotoa, he naʻá ne fakahoko mai ʻa e meʻa kotoa ke nau ʻi ai. ʻOkú ne toe fakatupunga foki ke hoko kotoa ʻene ngaahi taumuʻá, pea ʻoku toe lava ke ne fakatupunga ʻene kau sevāniti taʻehaohaoa ʻo e tangatá ke nau hoko ki ha meʻa pē ʻokú ne fili ki ai. ʻOku fokotuʻu mai ʻe he ngaahi meʻa ko iá ʻa e ongoʻi māluʻia. Ka ʻoku toe ʻi ai ha tafaʻaki ʻe taha ki he ʻuhinga ʻo e huafa ʻo e ʻOtuá? Naʻe fiemaʻu moʻoni ʻe Mōsese ke ne ako lahi ange. Ko hono moʻoní, naʻá ne ʻiloʻi ko Sihova ʻa e Tokotaha-Fakatupú pea naʻá ne ʻiloʻi ʻa e hufa ʻo e ʻOtuá. Naʻe ʻikai ke foʻou ʻa e huafa fakaʻotuá ia. Kuo ngāueʻaki ia ʻe he kakaí ʻi he laui senituli. ʻOku ʻikai ke toe fehuʻia, ʻi hono ʻeke ʻa e huafa ʻo e ʻOtuá, naʻe ʻeke ʻa Mōsesé ʻo fekauʻaki mo e Tokotaha ʻoku fakafofongaʻi ʻe he huafá. Naʻe hangē naʻá ne pehē: ‘Ko e hā ʻe lava ke u tala ki ho kakai ʻIsilelí ʻo fekauʻaki mo koe ʻa ia ʻe langa hake ai ʻenau tui kiate koé, ʻe fakatuipauʻi ai kinautolu te ke fakahaofi moʻoni kinautolu?’

8, 9. (a) Naʻe anga-fēfē hono tali ʻe Sihova ʻa e fehuʻi ʻa Mōsesé, pea ko e hā ʻa e fehālaaki ʻi he founga hono faʻa liliu ʻEne talí? (e) Ko e hā ʻa e ʻuhinga ʻo e foʻi lea “Te U Hoko ki ha Meʻa ʻOku Ou Fili ke Hoko ki Aí”?

⁸ ʻI he tali ki aí naʻe fakahaaʻi ʻe Sihova ha tafaʻaki fakaueʻiloto ʻo hono ʻulungaangá, ko ha meʻa meʻa ʻoku felāveʻi mo e ʻuhinga ʻo hono huafá. Naʻá ne pehē kia Mōsese: “Te U Hoko ki ha Meʻa ʻOku Ou Fili ke Hoko ki Aí.” (Ekisoto 3:14, NW) Ko e lau ʻeni ia ʻa e ngaahi liliu Tohitapu lahi: “Ko au ko au ai pe.” Ka ko hono fakalea fakaleleí ʻoku fakahaaʻi ai naʻe ʻikai ko hano fakapapauʻi mai pē ʻe he ʻOtuá ia ʻa ʻene ʻi aí tonu. Ka, naʻe akoʻi ʻe Sihova ʻa Mōsese​—pea ʻi hono fakaaʻu mai kiate kitautolu hono kotoa​—ʻa ia te Ne “fili ke hoko” ki ha meʻa pē naʻe fiemaʻu koeʻuhi ke fakahoko ʻEne ngaahi talaʻofá. ʻOku fakalea fakahangatonu ʻe he liliu ʻa J. B. Rotherham ʻa e veesi ko ʻení: “Te U Hoko ki ha meʻa pē ʻoku ou hōhōʻia ai.” ʻOku fakamatalaʻi ʻe ha mataotao ʻe taha ʻi he lea faka-Hepelū faka-Tohitapú ʻa e kupuʻi leá ʻi he foungá ni: “Pe ko e hā pē ʻa e tuʻungá pe fiemaʻú . . . , ko e ʻOtuá ʻe ‘hoko’ ko e fakaleleiʻanga ki he fiemaʻu ko iá.”

⁹ Naʻe ʻuhinga ia ki he hā ki he kau ʻIsilelí? Tatau ai pē pe ko e hā ʻa e fakafaingataʻaʻiaʻanga naʻe maluʻaki kiate kinautolú, tatau ai pē pe ko e hā ʻa hono lahi ʻo e faingataʻa te nau hokosiá, ʻe hoko ʻa Sihova ki ha meʻa pē naʻe fiemaʻu ki ai koeʻuhi ke fakahaofi ai  kinautolu mei he nofo pōpulá pea ʻomai kinautolu ki he Fonua ʻo e Talaʻofá. Ko hono moʻoní, naʻe fakaʻaiʻai ʻe he huafa ko iá ʻa e loto-falala ki he ʻOtuá. ʻOku malava ke ne fai ʻa e meʻa tatau maʻatautolu ʻi he ʻahó ni. (Sāme 9:10) Ko e hā hono ʻuhingá?

10, 11. ʻOku anga-fēfē hono fakaafeʻi kitautolu ʻe he huafa ʻo Sihová ke tau fakakaukau kiate ia ko e Tamai ngaofengofua lahi taha mo lelei taha ia ʻoku ala fakaʻuta atu ki aí? Fakatātaaʻi.

¹⁰ Ke fakatātaaʻi: ʻOku ʻiloʻi ʻe he ngaahi mātuʻá ʻa e tuʻunga ngaofengofua mo maliliungofua kuo pau ke nau ʻi ai ʻi hono tokangaʻi ʻenau fānaú. ʻI he lolotonga ʻo ha foʻi ʻaho ʻe taha, ʻe fiemaʻu nai ai ki ha taha ʻo e ongo mātuʻá ke ngāue ko ha neesi, ko ha tokotaha feimeʻatokoni, ko ha faiako, ko ha tokotaha akonaki, ko ha fakamaau, mo e toe ngaahi meʻa lahi ange. ʻOku ongoʻi lōmekina ʻa e tokolahi ʻi he lahi fau ʻo e ngaahi ngafa ʻoku ʻamanekina ke nau fakahokó. ʻOku nau fakatokangaʻi ʻa e tui fakaʻaufuli ʻoku fai ange kiate kinautolu ʻe heʻenau fānaú, ʻa ia ʻoku ʻikai ʻaupito haʻanau veiveiua ki he malava ʻe he tangataʻeikí mo e fineʻeikí ke na fakafiemālieʻi ʻa e loto-laveá, fakaleleiʻi ʻa e ngaahi fakakikihi kotoa, ngaohi ha meʻa-vaʻinga pē kuo maumau, pea tali ha faʻahinga fehuʻi pē ʻe mapuna hake ʻi honau fanga kiʻi ʻatamai fieʻilo taʻefakangatangatá. ʻOku ʻi ai ʻa e ngaahi mātuʻa ʻe niʻihi ʻoku nau anga-fakatōkilalo pea ʻoku nau faʻa ongoʻi feifeitamaki tupu mei honau ngaahi tuʻunga fakangatangatá. ʻOku nau ongoʻi lahi ke fakahoko ʻa e konga lahi ʻo e ngaahi ngafa ko ʻení.

¹¹ Ko Sihová foki ko ha tamai ʻofa. Neongo ia, ʻi loto ʻi he faʻunga ʻo ʻene ngaahi tuʻunga haohaoá, ʻoku ʻikai ha meʻa te ne taʻemalava ke hoko ki ai koeʻuhi ke tokangaʻi ʻa ʻene fānau fakaemāmaní ʻi he founga lelei taha ʻe ala lavá. Ko ia ko hono huafá, ʻa e Sihová, ʻokú ne fakaafeʻi mai kitautolu ke tau fakakaukau kiate ia ko e Tamai lelei taha ia ʻe ala fakaʻuta atu ki aí. (Sēmisi 1:17) Naʻe vave hono ʻiloʻi ʻe Mōsese mo e kau ʻIsileli loto-tōnunga kehé ʻoku fai moʻoni ʻa Sihova ki hono huafá. Naʻa nau mātā ʻi he māluʻia ʻa ʻene fakatupunga ʻa ia tonu ke ne hoko ko ha Taki Fakakautau taʻealaikuʻi, ko e Pule ʻo e ngaahi ʻelemēniti fakanatula kotoa pē, ko ha Tokotaha Foaki-Lao taʻefakatataua, Fakamaau, Tokotaha Tāmape, Tokotaha-Tokonaki ʻo e meʻakai mo e vai, Tokotaha-Fakatolonga ʻo e valá mo e senitoló​—mo e meʻa lahi ange.

12. Naʻe anga-fēfē ʻa e faikehekehe ʻa e fakakaukau atu ʻa Felo kia Sihová mei he fakakaukau ʻa Mōsesé?

¹² Kuo ʻai ʻe he ʻOtuá ʻi he foungá ni ʻa hono huafa fakafoʻituituí  ke ʻiloa, kuó ne fakahaaʻi ʻa e ngaahi meʻa fakaueʻiloto fekauʻaki mo e Tokotaha ʻokú ne fakafofongaʻi ʻa e huafa ko iá, pea kuo aʻu ʻo ne fakahāhaaʻi ko e meʻa ʻokú ne leaʻaki fekauʻaki mo iá tonu ʻoku moʻoni. ʻOku ʻikai toe fehuʻia, ʻoku fiemaʻu kitautolu ʻe he ʻOtuá ke tau ʻiloʻi ia. ʻOku anga-fēfē ʻetau tali ki aí? Naʻe fiemaʻu ʻe Mōsese ke ne ʻiloʻi ʻa e ʻOtuá. Naʻe hanga ʻe he holi lahi ko iá ʻo tataki ʻa e ʻalunga ʻo e moʻui ʻa Mōsesé pea taki atu ai ia ke ne ʻunuʻunu ofi ʻaupito ki heʻene Tamai fakahēvaní. (Nōmipa 12:6-8; Hepelū 11:27) Ko hono pangó, ko e tokosiʻi pē ʻo e toʻumeʻa ʻo Mōsesé naʻa nau maʻu ʻa e holi tatau. ʻI he taimi naʻe fakahā ai ʻe Mōsese kia Felo ʻa e huafa ʻo Sihová, naʻe tali ʻita ange ʻa e tuʻi ʻIsipite loto-hīkisia ko iá: “Ko hai ʻa Sihova?” (Ekisoto 5:2) Naʻe ʻikai loto ʻa Felo ia ke ako lahi ange fekauʻaki mo Sihova. Kae kehe, naʻá ne siʻaki anga-manuki ʻa e ʻOtua ʻo ʻIsilelí ʻo hangē ko ha tokotaha ʻikai mahuʻinga pe ʻikai hano kaunga maí. ʻOku toe lahi ʻaupito ʻa e fakakaukau ko iá ʻi he ʻahó ni. ʻOkú ne fakakuihi ʻa e kakaí mei he taha ʻo e ngaahi moʻoni mahuʻinga lahi tahá​—ko Sihova ʻa e ʻEiki Haú.

13, 14. (a) Ko e hā ʻoku foaki ai kia Sihova ʻa e ngaahi hingoa fakalakanga lahi ʻi he Tohitapú, pea ko e hā ʻa e niʻihi ʻo kinautolú? (Sio ki he  puha ʻi he peesi 14.) (e) Ko e hā ʻoku taau tāfataha ai ʻa Sihova ke ui ko e “ʻEiki Hau”?

¹³ Ko Sihová ʻoku mātuʻaki ngaofengofua, mātuʻaki maliliungofua, ʻo ne maʻu totonu ai ʻa e ngaahi hingoa fakalakanga lahi ʻi he Tohitapú. ʻOku ʻikai ke feʻauhi ʻa e ngaahi hingoá ni mo hono huafa fakafoʻituituí, ka, ʻoku nau akoʻi mai kiate kitautolu ʻa e meʻa lahi ange fekauʻaki mo e meʻa ʻoku fakafofongaʻi ʻe hono huafá. Ko e fakatātaá, ʻoku ui ia ko e “ʻEiki Hau ko Sihova.” (2 Sāmiuela 7:22, NW) Ko e hingoa fakalakanga māʻolunga ko iá, ʻa ia ʻoku hā tuʻo laui teau ʻi he Tohitapú, ʻokú ne tala mai kiate kitautolu ʻa e tuʻunga ʻo Sihová. Ko ia toko taha pē ʻokú ne maʻu ʻa e totonu ke hoko ko e Pule ʻo e kotoa ʻo e ʻunivēsí. Fakakaukau ange ki hono ʻuhingá.

¹⁴ ʻOku laulōtaha ʻa Sihova ʻi he tuʻunga ko e Tokotaha-Fakatupú. ʻOku pehē ʻe he Fakahā 4:11: “Tāu pē Koe, ʻa e ʻAfiona ko homau ʻOtua, ke lau ki ai ʻa e kololia, mo e fakaʻapaʻapa, mo e mafai: he ko koe ia naʻa ke ngaohi ʻa e meʻa kotoa pē, pea naʻa nau ʻi ai, pea naʻe ngaohi kinautolu, koeʻuhi pē ko ho finangalo ia.” Ko e ngaahi  foʻi lea fakangeingeiá ni heʻikai malava ke ngāueʻaki ia ki ha toe taha kehe. Ko e meʻa kotoa pē ʻi he ʻunivēsí ʻoku nau moʻuaʻaki ʻenau ʻi aí kia Sihova! ʻOku ʻikai toe fehuʻia, ʻoku taau ʻa Sihova mo e fakaʻapaʻapa, mafai, mo e kolōlia ko ia ʻoku haʻu fakataha mo ʻene hoko ko e ʻEiki Hau mo e Tokotaha-Fakatupu ʻo e meʻa kotoa pē.

15. Ko e hā ʻoku ui ai ʻa Sihova ko e “Tuʻi ʻo ʻitānití”?

¹⁵ Ko e toe hingoa fakalakanga ʻe taha ʻoku ngāueʻaki maʻataʻatā kia Sihová ko e “Tuʻi ʻo ʻitānití.” ( 1 Tīmote 1:17, NW; Fakahā 15:3, NW) ʻOku ʻuhinga ʻeni ki he hā? ʻOku faingataʻa ki hotau ʻatamai fakangatangatá ke makupusi, ka ko Sihová ʻoku taʻengata ʻi he ongo tafaʻakí fakatouʻosi​—kuohilí mo e kahaʻú. ʻOku pehē ʻe he Sāme 90:2: “Talu mei muʻa ʻo lauikuonga ko e ʻOtua pe ʻa e ʻAfiona.” Ko ia naʻe ʻikai ʻaupito ha kamataʻanga ʻo Sihova; kuó ne ʻi ai maʻu ai pē. ʻOku totonu hono ui ia ko “Talumeimuʻa”​—naʻá ne ʻi ai ia ʻo laui ʻitāniti ki muʻa ʻi ha taha pē pe ko ha meʻa kehe pē ne hoko mai ki he ʻunivēsí! (Taniela 7:9, 13, 22) Ko hai ʻe lava ke ne fehuʻia moʻoni ʻa ʻene totonu ke hoko ko e ʻEiki Haú?

16, 17. (a) Ko e hā ʻoku ʻikai malava ai ke tau sio kia Sihová, pea ko e hā ʻoku ʻikai totonu ai ke tau ʻohovale ʻi he meʻa ko iá? (e) ʻI he ʻuhinga fē ʻoku moʻoni ange ai ʻa Sihova ia ʻi ha meʻa pē ʻoku malava ke tau sio pe ala ki ai?

¹⁶ Neongo ia, ʻoku fehuʻia ʻe he niʻihi ʻa e totonu ko iá, ʻo hangē ko ia naʻe fai ʻe Feló. Ko e konga ʻo e palopalemá ko hono fai ʻe he kau tangata taʻehaohaoá ʻa e fuʻu falala lahi ki he meʻa ʻoku nau malava ke sio ki ai ʻaki honau matá. ʻOku ʻikai malava ke tau sio ki he ʻEiki Haú. Ko ha tokotaha laumālie ia, ʻo taʻehāmai ki he mata fakaetangatá. (Sione 4:24) Tuku kehe ia, kapau ʻe tuʻu ha tangata kakano mo e toto ʻi he ʻao tonu ʻo Sihova ko e ʻOtuá, ʻoku fakamoʻoniʻi ʻe hoko ai ʻo mate. Naʻe tala ʻe Sihova tonu kia Mōsese: “ʻE ʻikai te ke lava ke sio ki hoku mata; he ʻoku ʻikai ha tangata te ne sio ki hoku mata, pea moʻui.”​—Ekisoto 33:20; Sione 1:18.

¹⁷ ʻOku ʻikai totonu ke tau ʻohovale ʻi he meʻa ko iá. Naʻe hoko ʻa Mōsese ʻo ne sio ki ha konga pē ʻo e kolōlia ʻo Sihová, ʻoku fakamoʻoniʻi ne fakafou ʻi ha fakafofonga fakaeʻāngelo. Ko e hā hono olá? Naʻe “tapa” ʻa e fofonga ʻo Mōsesé ʻi ha taimi ʻi he hili iá. Naʻe aʻu ʻo ilifia ʻa e kau ʻIsilelí ke sio hangatonu ki he fofonga ʻo Mōsesé. (Ekisoto 33:21-23; 34:5-7, 29, 30) ʻOku pau leva mei ai, ʻe ʻikai  malava ha tangata ke sio ki he ʻEiki Haú tonu ʻi he kotoa ʻo hono kolōliá! ʻOku ʻuhinga ʻení ʻoku ʻikai ko ha tokotaha moʻoni ia koeʻuhi ko e ʻikai malava ke tau sio mo ala ki aí? ʻIkai, ʻoku tau tali lelei ʻa e moʻoni ʻo e ngaahi meʻa lahi ʻoku ʻikai malava ke tau sio ki ai​—ko e fakatātaá ko e matangí, ngaahi peau fakaletioó, mo e ngaahi fakakaukaú. ʻIkai ngata aí, ʻoku tuʻuloa ʻa Sihova, ʻo ʻikai ke uesia ʻe he ʻalu ʻa e taimí, naʻa mo e ʻi he ngaahi taʻu taʻefaʻalaua ʻe laui piliona! ʻI he ʻuhinga ko iá, ʻokú ne moʻoni mamaʻo ange ia ʻi ha meʻa pē ʻoku malava ke tau ala pe sio ki ai, he ko e meʻa fakamatelié ʻoku moʻulaloa ia ki he taʻumotuʻa mo e ʻauʻauha. (Mātiu 6:19) Kae kehe, ʻoku totonu ke tau fakakaukau kiate ia ko ha foʻi mālohi noaʻia, taʻefakaetangata pē, pe ko ha Muʻaki Tupuʻanga taʻemahino? Tau sio angé.

18. Ko e hā ʻa e vīsone naʻe ʻoange kia ʻIsikelí, pea ʻoku ʻuhinga ki he hā ʻa e ngaahi mata ʻe fā ʻo e ngaahi “meʻa moʻui” ʻoku ofi kia Sihová?

¹⁸ Neongo ʻoku ʻikai malava ke tau sio ki he ʻOtuá, ʻoku ʻi ai ʻa e ngaahi kupu fakatupu-fiefia ʻi he Tohitapú ʻoku ʻomai ai kia kitautolu ʻa e maʻalifekina ki hēvani tonu. Ko e ʻuluaki vahe ʻo e ʻIsikelí ko e fakatātā ia ʻe taha. Naʻe ʻoange kia ʻIsikeli ha vīsone fekauʻaki mo e konga fakahēvani ʻo e kautaha fakaeʻuniveesi ʻa Sihová, ʻa ia naʻá ne sio ai ki ha fuʻu saliote fakalangi kāfakafa. Ko e meʻa naʻe maongo tautefitó ko hono fakamatalaʻi ʻo e ngaahi meʻa moʻui laumālie māfimafi ʻoku takatakai kia Sihová. (Isikeli 1:4-10) Ko e ngaahi “meʻa moʻui” ko ʻení ʻoku fakafekauʻaki vāofi ia mo Sihova, pea ko honau fōtungá ʻokú ne tala mai kiate kitautolu ʻa e meʻa mahuʻinga fekauʻaki mo e ʻOtua ʻoku nau tauhí. ʻOku maʻu ʻe he meʻa moʻui taki taha ʻa e ngaahi mata ʻe fā​—ko ha mata ʻo ha pulu, ʻo ha laione, ʻo ha ʻīkale, pea mo ha tangata. ʻOku ngalingali ʻoku ʻuhinga eni ki he ngaahi anga ʻe fā ʻoku makatuʻunga ai ʻa e ʻulungaanga fakaofo ʻo Sihová.​—Fakahā 4:6-8, 10.

19. Ko e hā ʻa e anga ʻoku fakafofongaʻi ʻe he (a) mata ʻo e pulú? (e) mata ʻo e laioné? (f) mata ʻo e ʻīkalé? (h) mata ʻo e tangatá?

¹⁹ ʻI he Tohitapú, ʻoku faʻa fakafofongaʻi ʻe ha pulu ʻa e mālohí, pea ʻoku mātuʻaki feʻungamālie ia, he ko ha manu mālohi fakaʻulia ia. Ko ha laione, ʻi he tafaʻaki ʻe tahá, ʻokú ne faʻa fakatātaaʻi ʻa e fakamaau totonú, he ko e fakamaau totonu moʻoní ʻoku fiemaʻu ki ai ʻa e loto-toʻa, ko ha ʻulungaanga ʻa ia ʻoku ongoongoa ai  ʻa e fanga laioné. ʻOku ʻiloa ʻa e fanga ʻīkalé ʻi heʻenau mata ʻiloʻiló, ʻi heʻenau sio ʻo aʻu ki ha fanga kiʻi meʻa valevale ʻoku laui kilomita hono mamaʻó. Ko ia ʻe fakatātaaʻi lelei ʻe he mata ʻo e ʻīkalé ia ʻa e poto langi mamaʻo ʻo e ʻOtuá. Pea ko e hā ʻa e mata ia ʻo e tangatá? Sai, ko e tangatá, naʻe ngaohi ʻi he ʻīmisi ʻo e ʻOtuá, ʻoku laulōtaha ia ʻi heʻene malava ke tapua atu ʻa e anga tuʻu-ki-muʻa ʻo e ʻOtuá​—ko e ʻofá. (Sēnesi 1:26) Ko e ngaahi tafaʻaki ko ʻeni ʻo e ʻulungaanga ʻo Sihová​—ʻa e mālohí, fakamaau totonú, potó, mo e ʻofá​—ʻoku toutou fakaeʻa lahi ia ʻi he Tohitapú ʻo lave nai ki ai ko e ngaahi anga tefito ia ʻo e ʻOtuá.

20. ʻOku fiemaʻu ke tau hohaʻa naʻa kuo liliu ʻa e ʻulungaanga ia ʻo Sihová, pea ko e hā ʻokú ke tali pehē aí?

²⁰ ʻOku totonu ke tau hohaʻa ʻo pehē naʻa kuo liliu nai ʻa e ʻOtuá ia ʻi he ngaahi taʻu ʻe laui afe talu mei hono fakamatalaʻi ia ʻi he Tohitapú? ʻIkai, ʻoku ʻikai ke fetongi ʻa e ʻulungaanga ia ʻo e ʻOtuá. ʻOkú ne tala mai kiate kitautolu: “Ko Sihova au, ʻoku ʻikai te u liliu.” (Malakai 3:6) ʻI he ʻikai ke liliu noaʻiá, ʻoku fakamoʻoniʻi ʻe Sihova ʻa ia tonu ko ha Tamai lelei moʻoni ʻi he founga ʻo ʻene tali ki he tuʻunga taki taha. ʻOkú ne fakahāhā muʻomuʻa ʻa e ngaahi tafaʻaki ʻo hono ʻulungāngá ʻoku feʻungamālie lahi tahá. ʻI he ngaahi anga kotoa ʻo e ʻOtuá, ko e taha ʻoku mahulu angé ko e ʻofá. ʻOku hā ia ʻi he meʻa kotoa pē ʻoku fai ʻe he ʻOtuá. ʻOkú ne ngāueʻaki hono mālohí, fakamaau totonú, mo e potó ʻi ha founga ʻofa. Ko hono moʻoní, ʻoku leaʻaki ʻe he Tohitapú ʻa e meʻa makehe  ʻaupito fekauʻaki mo e ʻOtuá pea mo e anga ko ʻení. ʻOkú ne pehē: “Ko e ʻOtua ko e ʻOfa.” (1 Sione 4:8) Fakatokangaʻi ʻoku ʻikai te ne pehē ʻoku maʻu ʻe he ʻOtuá ʻa e ʻofá pe ko e ʻOtuá ʻoku ʻofa. Ka, ʻokú ne pehē ko e ʻOtuá ko e ʻofa. Ko e ʻofá, ʻa hono natula tefitó, ʻokú ne ueʻi ia ʻi he meʻa kotoa pē ʻokú ne faí.

21. ʻE anga-fēfē ʻetau ongoʻí ʻi heʻetau hoko ʻo ʻilo lelei ange ki he ngaahi anga ʻo Sihová?

²¹ Kuo faifai peá ke sio ki ha kiʻi tama ʻokú ne fakahinohino ʻene tamaí ki hono ngaahi kaumeʻá peá ne toki lea loto-moʻoni fiefia mo laukauʻaki, “Ko ʻeku tangataʻeikí ia”? ʻOku maʻu ʻe he kau lotu ʻa e ʻOtuá ʻa e ʻuhinga kotoa ke nau ongoʻi meimei tatau ai fekauʻaki mo Sihova. ʻOku tomuʻa tala mai ʻe he Tohitapú ha taimi ʻa ia ʻe kalanga ai ʻa e kakai loto-tōnungá: “Vakai, ko hotau ʻOtua eni.” (Aisea 25:8, 9) Ko e lahi ange ʻa e mahino ʻokú ke maʻu ki he ngaahi anga ʻo Sihová, ko e lahi ange ia hoʻo ongoʻi ʻokú ke maʻu ʻa e Tamai lelei taha ʻoku ala fakaʻuta atu ki aí.

22, 23. ʻOku anga-fēfē hono fakamatalaʻi ʻe he Tohitapú ʻetau Tamai fakahēvaní, pea ʻoku anga-fēfē ʻetau ʻiloʻi ʻokú ne fiemaʻu kitautolu ke tau ofi ange kiate ia?

²² Ko e Tamai ko ʻení ʻoku ʻikai ke anga-momoko, fakamāmāhuʻi, pe taʻeongoʻi​—neongo pe ko e hā kuo akoʻi ʻe he niʻihi ʻo e kau lotu mo e kau filōsefa anga-fefeká. ʻE faingataʻa ke tau ongoʻi ʻoku tohoakiʻi kitautolu ki ha ʻOtua anga-momoko, pea ʻoku ʻikai ke fakamatalaʻi mai ʻe he Tohitapú ia ʻetau Tamai fakahēvaní ʻi he founga ko iá. ʻI hono kehé, ʻokú ne ui ia ko e “ʻOtua fiefiá.” (1 Tīmote 1:11, NW) ʻOkú ne maʻu ʻa e ngaahi ongoʻi ʻoku fakatou mālohi mo fakaalaala. ʻI he fekauʻaki mo e taimi naʻe maumauʻi ai ʻe heʻene ngaahi meʻamoʻui ʻatamai potó ʻa e ngaahi tataki naʻá ne tokonaki mai ki heʻenau leleí, ʻoku tau lau: “[Naʻá ne] fakamamahi ʻi hono finangalo.” (Sēnesi 6:6; Sāme 78:41) Ka ʻi he taimi ʻoku tau ngāue fakapotopoto ai ʻo fakatatau ki heʻene Folofolá, ʻoku tau ʻai ai ʻo ʻfiefia hono lotó.’​—Palovepi 27:11.

²³ ʻOku fiemaʻu ʻe heʻetau Tamaí kitautolu ke tau ofi ange kiate ia. ʻOku fakalototoʻaʻi kitautolu ʻe heʻene Folofolá ke tau “fāfā ia ʻo ʻiloʻi, ka talaʻehai ʻoku ne mamaʻo mei hatau toko taha.” (Ngāue 17:27) Neongo ia, ʻe malava fēfē ki he faʻahinga ʻo e tangatá ke nau ʻunuʻunu ofi ki he ʻEiki Hau ʻo e ʻunivēsí?