1, 2. (a) Yu yet i laik givim wanem ol askim long God? (b) Moses i mekim wanem askim long God?

 YU INAP piksaim long tingting olsem yu toktok wantaim God? Ating yu kirap nogut tru long dispela samting—King bilong heven na graun i toktok wantaim yu! Pastaim yu hatwok long toktok, tasol bihain yu inap mekim sampela tok long em. Em i putim yau, em i bekim tok, na pasin bilong em i mekim na yu pilim olsem yu ken kamapim wanem wanem askim yu laikim. Orait, bai yu kamapim wanem kain askim?

² Long bipo tru, wanpela man i gat rot long mekim olsem. Nem bilong em Moses. Tasol ating bai yu kirap nogut long askim em i givim long God. Em i no askim long ol samting bilong em yet, o long ol samting bai painim em long bihain, o long i stap bilong ol lain man. Nogat. Em i laik save long nem bilong God. Yu inap ting askim bilong Moses i narakain liklik, long wanem, em i save pinis long nem bilong God. Olsem na askim bilong em i mas i gat bikpela insait bilong en. Tru tumas, dispela askim em i nambawan bikpela askim Moses inap mekim. Bekim bilong en i mekim sampela samting long yumi olgeta. Em inap helpim yu long mekim samting bilong i go klostu long God. Olsem wanem em inap helpim yu? Nau yumi ken skelim toktok bilong God na Moses.

3, 4. Wanem samting i kamap na Moses i kirap toktok wantaim God? Ol i toktok long wanem samting?

³ Moses i gat 80 krismas. Inap 40 yia em i no bin stap wantaim lain bilong em, lain Israel, em ol i stap olsem wokboi nating long Isip. Long wanpela de, taim em i lukautim ol sipsip na meme bilong tambu papa bilong em, em i lukim narakain samting. Wanpela liklik nil diwai i paia, tasol paia i no kukim dispela nil diwai. Paia i stap tasol long en, na i stap olsem lait long  sait bilong maunten. Moses i go klostu bilong lukim gut dispela samting. Em i mas kirap nogut tru taim em i harim wanpela nek i kamap long paia na i toktok long em! Long rot bilong wanpela ensel i stap olsem mausman, God na Moses i toktok gut wantaim. Na ating yu save pinis long ol samting i bin kamap, Moses i pret liklik taim God i tokim em long lusim gutpela sindaun bilong em na go bek long Isip bilong helpim lain Israel long lusim wok kalabus.​—Kisim Bek 3:1-12.

⁴ Moses inap kamapim askim long wanem wanem samting em i laikim. Tasol tingim askim em i kamapim. Em i tok: “Sapos mi go long ol Israel na mi tokim ol olsem, ‘God bilong ol tumbuna bilong yupela i salim mi na mi kam long yupela,’ na ol i askim mi olsem, ‘Wanem nem bilong em?’ Orait bai mi bekim wanem tok long ol?”​—Kisim Bek 3:13.

5, 6. (a) Askim bilong Moses i lainim yumi long wanem bikpela tok i tru? (b) Ol i bin mekim wanem samting nogut long dispela nem bilong God? (c) God i bin kamapim klia nem bilong em long ol man, bilong wanem dispela i bikpela samting?

⁵ Dispela askim i lainim yumi olsem God i gat wanpela nem. Yumi no ken ting dispela tok i tru em i samting nating. Tasol planti man i save ting olsem. Ol i bin rausim nem bilong God long planti Baibel na putim ol biknem olsem “Bikpela” na “God” long ples bilong en. Dispela em i wanpela samting nogut tru ol lotu i bin mekim. I stret yumi tok olsem, long wanem, taim yu bungim wanpela man long namba wan taim, pastaim yu save mekim wanem samting? Yu laik save long nem bilong em, a? Na i wankain taim man i laik kisim save long God. Em i no wanpela samting i no gat nem na i laik stap longwe long yumi, na yumi no inap kisim save long em, nogat. Maski yumi no inap lukim em, em i wanpela Man tru na em i gat nem—Jehova.

⁶ Na tu, taim God i kamapim klia nem bilong em, dispela i makim olsem sampela gutpela na bikpela samting i laik kamap. Em i singautim yumi long kisim save long em. Em i laik bai yumi mekim nambawan gutpela samting yumi inap mekim long laip bilong yumi—go klostu long em. Tasol Jehova i no tokim  yumi long nem bilong em tasol. Nogat. Em i tokim yumi tu long em i wanem kain God.

7. (a) Nem bilong God i makim wanem samting? (b) )Moses i laik save long wanem samting tru taim em i askim God long nem bilong Em?

⁷ Jehova i makim nem bilong em yet, em wanpela nem i gat bikpela insait bilong en. Dispela nem “Jehova” i makim “Em i Mekim i Kamap.” I no gat narapela long yunives i wankain olsem Jehova, bikos em i bin wokim olgeta samting. Em i inapim olgeta samting em i tingting pinis long mekim, na em inap stiaim ol manmeri bilong em long kamap wanem wanem kain em i laikim. Dispela i kirapim yumi long soim bikpela rispek long em. Tasol yu ting i gat sampela mining moa bilong dispela nem bilong God? I luk olsem Moses i laik kisim sampela save moa. Em i save Jehova em i Krieta, na em i save long nem bilong God. Dispela nem i no nupela samting long em. Ol man i bin mekim wok long en inap planti handret yia pinis. Olsem na taim Moses i askim long nem bilong God, em i laik save long dispela Man em nem i makim. I olsem em i tok: ‘Bai mi stori olsem wanem long yu long lain Israel na bai ol i bilip long yu olsem yu bai helpim tru ol long lusim wok kalabus?’

8, 9. (a) Jehova i tok wanem bilong bekim askim bilong Moses? Olsem wanem sampela Baibel i tanim kranki bekim bilong Em? (b) Wanem mining bilong tok “Mi Bai Kamap Wanem Wanem Kain Mi Laikim”?

⁸ Bilong bekim dispela askim, Jehova i kamapim wanpela bikpela pasin bilong em i stret wantaim mining bilong nem bilong en. Em i tokim Moses: “Mi Bai Kamap Wanem Wanem Kain Mi Laikim.” (Kisim Bek 3:14) Planti Baibel i tanim dispela tok olsem: “Mi Yet Mi Stap Olsem.” Tasol sampela Baibel i tanim gut tru dispela tok na i soim olsem God i no laik kamapim tasol olsem em i stap tru. Nogat. Jehova i lainim Moses—na yumi tu—olsem Em bai “kamap wanem wanem kain em i laikim” bilong truim ol tok promis bilong em. Baibel bilong J. B. Rotherham i tanim dispela ves olsem: “Bai Mi Kamap wanem wanem kain mi yet mi laikim.” Wanpela saveman bilong tok Hibru em ol i raitim Baibel long en, em i tok mining bilong dispela ves  i olsem: “Maski wanem samting i kamap o ol man i sot long wanem samting . . . , God bai ‘kamap’ rot bilong stretim ol samting.”

⁹ Dispela i mekim wanem long lain Israel? Maski wanem samting i laik pasim rot bilong ol, o ol hevi i painim ol i bikpela tru, Jehova bai kamap wanem wanem kain em i mas kamap bilong helpim ol long lusim wok kalabus na bringim ol i kam long Graun Bilong Promis. Dispela nem i mas kirapim ol long bilip tru long God. Na em inap mekim wankain samting long yumi long nau tu.​—Buk Song 9:10.

10, 11. Olsem wanem nem bilong Jehova i kirapim yumi long tingim em olsem nambawan gutpela Papa inap mekim kain kain wok? Stori long dispela.

¹⁰ Yumi ken tok piksa olsem: Ol papamama i save ol i mas redi long mekim kain kain wok bilong lukautim ol pikinini. Insait long wanpela de tasol, papa o mama i mas mekim wok olsem nes, kuk, tisa, jas, man bilong stretim pikinini na planti narapela wok. Planti ol i pilim olsem ol dispela kain kain wok ol i mas mekim i bikpela tumas. Ol i save olsem ol pikinini bilong ol i bilip tru long ol, olsem papa o mama inap daunim pen bilong ol, stretim olgeta tok pait, stretim olgeta toi i bruk, na bekim olgeta kain askim pikinini i gat. Sampela papamama i pilim olsem save bilong ol i sot na sampela taim ol i bel hevi long ol samting ol i no inap long mekim. Ol i ting ol i no inap tru long mekim planti bilong ol dispela wok ol i mas mekim.

¹¹ Jehova tu em i wanpela Papa i laikim tru ol pikinini bilong em. Em i save bihainim ol stretpela lo bilong em, na i no gat wanpela samting Jehova i no inap kamap na bai em i ken lukautim gut tru ol pikinini bilong em long graun. Olsem na nem bilong em, Jehova, i kirapim yumi long tingim em olsem nambawan gutpela Papa. (Jems 1:17) I no longtaim na Moses na olgeta narapela Israel i stap gut long Jehova, ol i kisim save olsem Jehova em i mekim tru ol samting nem bilong em i makim. Ol i kirap nogut long lukim em i mekim em yet i kamap wanpela Komanda Bilong Ami ol narapela i no inap daunim, Bos bilong olgeta strong bilong graun, Man Bilong Givim Lo,  Jas, Man Bilong Wokim Plen Bilong Haus samting, Man Bilong Givim kaikai na wara, Man Bilong Lukautim ol klos na su—na planti samting moa.

12. Olsem wanem tingting bilong Fero long Jehova i narapela kain long tingting bilong Moses?

¹² God i tokim ol man long nem bilong em, na em i stori long sampela bikpela pasin bilong Man em dispela nem i makim. Na tu, em i soim olsem em i bin tok tru taim em i stori long ol samting i makim em yet. Tru tumas, God i laik bai yumi save long em. Bai yumi mekim wanem? Moses i laik tru long save long God. Dispela bikpela laik i stiaim laip bilong Moses na i mekim em i go klostu tru long Papa bilong em long heven. (Namba 12:6-8; Hibru 11:27) Tasol sori tru, wan wan man tasol long taim bilong Moses i gat wankain laik. Taim Moses i kamapim nem bilong Jehova long Fero, dispela hambak king bilong Isip i tok: “Jehova em i husat?” (Kisim Bek 5:2) Fero i no laik kisim sampela save moa long Jehova. Nogat. Em i tok bilas long God bilong Israel olsem Em i samting nating tasol. Planti man long nau i gat wankain tingting. Dispela tingting i mekim na ol man i no luksave long wanpela bikpela tok i tru—Jehova em i Nambawan Bikpela.

13, 14. (a) Bilong wanem Jehova i gat planti biknem long Baibel? Kolim sampela bilong ol. (Lukim  blok long pes 14.) (b) Bilong wanem Jehova wanpela tasol i gat nem “Nambawan Bikpela”?

¹³ Jehova inap mekim narapela narapela wok, olsem na i stret em i gat planti biknem long Baibel. Ol dispela biknem i no winim nem tru bilong em, nogat; ol i lainim yumi long sampela samting moa nem bilong em i makim. Olsem: Wanpela biknem em “Nambawan Bikpela Jehova.” (2 Samuel 7:22) Dispela biknem i stap planti handret taim long Baibel ol i bin raitim long namba wan taim, na dispela biknem i soim bikpela namba bilong Jehova. Em wanpela tasol i gat rait long i stap Bos bilong heven na graun. Tingim as na i olsem.

¹⁴ Jehova wanpela tasol em i Man Bilong Wokim olgeta samting. Revelesen 4:11 i tok: “Jehova, yu God bilong mipela, i stret  tru long yu kisim glori na ona na strong, long wanem, yu bin wokim olgeta samting. Na long laik bilong yu yet yu bin wokim ol na ol i stap.” Ol dispela gutpela tok i no inap makim narapela man. Jehova i bin givim laip long olgeta samting i stap long heven na graun! I stret Jehova i kisim biknem, strong, na glori olsem Nambawan Bikpela na Man Bilong Wokim olgeta samting.

15. Bilong wanem Baibel i tok Jehova em i “King bilong oltaim oltaim”?

¹⁵ Narapela biknem i stret long Jehova tasol em “King bilong oltaim oltaim.” (1 Timoti 1:17; Revelesen 15:3) Wanem mining bilong dispela? Tingting bilong yumi i sot na yumi hatwok long kisim gut insait bilong dispela tok, tasol long pastaim tru na bihain tru Jehova i stap oltaim. Buk Song 90:2 i tok: “Oltaim oltaim yu stap God.” Olsem na i stap bilong Jehova i no gat kirap bilong en; em i bin stap oltaim oltaim. I stret Baibel i kolim em “Man Bilong Bipo Bipo Yet”—em i bin stap longpela taim tru paslain long wanpela man o wanpela samting long heven na graun i kamap! (Daniel 7:9, 13, 22) Husat inap tok i no stret long God i stap Nambawan Bikpela?

16, 17. (a) Bilong wanem yumi no inap lukim Jehova? Bilong wanem yumi no ken kirap nogut long dispela? (b) Olsem wanem Jehova em i man i stap tru winim ol samting yumi inap lukim o holim?

¹⁶ Tasol sampela man, olsem Fero, ol i tok i no stret God i stap King. Wanpela as bilong dispela em ol man bilong graun i save bilip tumas long ol samting ol inap lukim long ai. Yumi no inap lukim Nambawan Bikpela Jehova. Em i wanpela spirit ol man i no inap lukim. (Jon 4:24) Na sapos man bilong graun i sanap long ai bilong Jehova God, em bai dai. Jehova yet i tokim Moses: “Yu no inap lukim pes bilong mi, long wanem, sapos wanpela man i lukim pes bilong mi, em bai dai.”​—Kisim Bek 33:20; Jon 1:18.

¹⁷ Yumi no ken kirap nogut long dispela. Moses i bin lukim liklik hap tasol bilong glori bilong Jehova, ating long rot bilong wanpela ensel i mausman bilong God. Dispela i mekim wanem long em? Inap liklik haptaim pes bilong Moses i “lait moa yet.” Dispela i mekim na ol Israel i pret long lukim pes bilong Moses. (Kisim Bek 33:21-23; 34:5-7, 29, 30) Olsem na man i no inap tru long lukim Nambawan Bikpela Jehova wantaim bikpela glori  bilong em! Tasol olsem wanem? Dispela i makim olsem em i no samting tru olsem ol samting yumi inap lukim na holim? Nogat, yumi save bilip long planti samting yumi no inap lukim, olsem win, strong i karim tok bilong redio, na ol tok i kamap long tingting bilong man. Na tu, Jehova i stap olsem tasol, maski planti bilion yia i lus, dispela i no mekim wanpela samting long em! Olsem na yumi ken tok Jehova em wanpela man i stap tru, winim olgeta samting yumi ken holim o lukim, long wanem, ol samting bilong graun bai kamap olpela na ol bai bagarap. (Matyu 6:19) Tasol i stret yumi ting God i wanpela kain strong tasol em yumi no inap lukim we i stap longwe, na i no save tingim yumi? Orait nau yumi ken skelim dispela samting.

18. Long driman Esekiel i lukim wanem samting? Fopela pes bilong “4-pela samting i gat laip” i stap klostu long Jehova, i makim wanem samting?

¹⁸ Maski yumi no inap lukim God, i gat planti hap bilong Baibel i helpim yumi long save liklik long ol samting i stap long heven. Namba wan sapta bilong Buk Esekiel i wanpela hap olsem. Long driman Esekiel i lukim hap bilong oganaisesen bilong Jehova long heven. Em i olsem wanpela traipela karis. Yumi kirap nogut long stori bilong ol strongpela spirit i sanap klostu long Jehova. (Esekiel 1:4-10) Ol dispela “4-pela samting i gat laip” i stap klostu long Jehova, na lukluk bilong ol i helpim yumi long save long sampela bikpela samting bilong dispela God ol i lotuim. Olgeta wan wan i gat 4-pela pes—pes bilong bulmakau man, laion, tarangau, na man. Ol dispela pes i makim 4-pela pasin bilong Jehova na i kamapim klia em i wanem kain Man.​—Revelesen 4:6-8, 10.

19. (a) Pes bilong bulmakau man i makim wanem pasin? (b) pes bilong laion? (c) pes bilong tarangau? (d) pes bilong man?

¹⁹ Planti taim long Baibel bulmakau man i makim strong, na dispela i stret, long wanem, em i wanpela strongpela animal. Tasol laion i makim stretpela pasin—bilong mekim stretpela pasin tru man i mas i gat strongpela bel, na dispela em i wanpela pasin ol laion i gat nem long en. Ol tarangau i gat nem olsem ol inap lukluk i go longwe, ol inap lukim tu ol liklik samting i  stap longwe inap planti kilomita. Olsem na pes bilong tarangau inap makim stret savetingting bilong God, olsem em inap skelim gut tru ol samting. Na olsem wanem long pes bilong man? God i wokim man i kamap olsem em yet, na man tasol inap kamapim nambawan bikpela pasin bilong God—em pasin laikim. (Stat 1:26) Planti taim Baibel i kamapim ol dispela pasin bilong Jehova—strong, stretpela pasin, savetingting, na pasin laikim—olsem na yumi ken tok em ol bikpela pasin bilong God.

20. Yu ting yumi mas tingting planti nogut pasin bilong Jehova i bin senis? I gat wanem as na yu bekim olsem?

²⁰ Ol i bin raitim ol tok bilong Baibel i stori long God inap sampela tausen yia i go pinis. Olsem wanem? Yumi mas tingting planti, nogut pasin bilong God i bin senis insait long dispela haptaim? Nogat, pasin bilong God i no save senis. Em i tokim yumi: “Mi Jehova; mi no save senis.” (Malakai 3:6) Jehova i no save senisim nating tingting bilong em, nogat; ol pasin em i bihainim taim sampela samting i kamap i soim olsem em i gutpela Papa tru. Em i save kamapim ol pasin bilong em i stret tru long dispela samting i kamap. Long olgeta pasin bilong God, pasin laikim i nambawan. Pasin laikim i stap ples klia long olgeta samting God i mekim. God i mekim wok long strong, stretpela pasin, na savetingting bilong em long pasin i soim olsem  em i laikim tru ol narapela. Baibel i mekim narapela kain tok long God na long dispela pasin bilong em. Em i tok: “God em i pasin laikim.” (1 Jon 4:8) Em i no tok God i gat pasin laikim o God i save laikim ol narapela. Nogat. Skripsa hia i tok God em i pasin laikim. Pasin laikim, em pasin tru bilong em, na i bosim olgeta samting em i mekim.

21. Bai yumi pilim olsem wanem taim yumi kisim bikpela save moa long ol pasin bilong Jehova?

²¹ Olsem wanem? Yu bin lukim wanpela liklik pikinini i poin long papa bilong em na amamas wantaim na tokim ol pren bilong em olsem, “Em papa bilong mi”? I gat as tru na ol man i lotuim God i mas i gat wankain tingting long Jehova. Baibel i tok profet long wanpela taim bai kamap we ol man i stap gut long God ol bai tokaut olsem: “Lukim! Dispela em God bilong mipela!” (Aisaia 25:8, 9) Taim yu kisim bikpela save moa long ol pasin bilong Jehova, bai yu pilim moa yet olsem yu gat nambawan gutpela Papa.

22, 23. Baibel i stori olsem wanem long Papa bilong yumi long heven? Olsem wanem yumi save em i laik bai yumi stap klostu long em?

²² Dispela Papa i no wanpela God i no save laikim o tingim ol man o i no stap longwe—maski sampela man bilong lotu na ol saveman i bin tok olsem. Ating yumi no laik i go klostu long God i no gat bel sori, na Baibel i no tok Papa bilong yumi long heven i dispela kain God. Nogat. Baibel i tok, em i “God bilong amamas.” (1 Timoti 1:11) Em i save pilim ol samting, na tu, em i save bel hevi. Wanpela taim ol man i brukim ol lo Em i bin kamapim bilong lukautim ol, Baibel i tok: “Bel bilong em i hevi tru.” (Stat 6:6; Buk Song 78:41) Tasol taim yumi bihainim gutpela tingting olsem Tok bilong em i kamapim, yumi mekim ‘bel bilong em i amamas.’​—Provep 27:11.

²³ Papa bilong yumi i laik bai yumi stap klostu long em. Tok bilong em i kirapim yumi long “wok strong tru long . . . painim em tru. Tasol tru tru em i no stap longwe long yumi olgeta wan wan.” (Aposel 17:27) Tasol olsem wanem ol man nating inap i go klostu long Nambawan Bikpela bilong heven na graun?