2-تاراۋ
ٴبىز شىنىندا دا قۇدايعا جاقىنداي الامىز با؟
1، 2. ا) كوپ ادامعا نە نارسە مۇمكىن ەمەستەي كورىنەدى، ٴبىراق كيەلى كىتاپ ٴبىزدى نەگە سەندىرەدى؟ ٵ) ىبىرايىم قانداي مارتەبەگە يە بولعان جانە نەگە؟
ەگەر كوك پەن جەردىڭ جاراتۋشىسى سەن تۋرالى: «بۇل مەنىڭ دوسىم»،— دەسە، قانداي سەزىمدە بولار ەدىڭ؟ كوپ ادام ٷشىن بۇلاي بولۋى مۇمكىن ەمەستەي كورىنەدى. راسىندا دا، قالايشا قاراپايىم پەندە ەحوبا قۇدايدىڭ دوسى بولا الماق؟ سويتسە دە كيەلى كىتاپ ٴبىزدى قۇدايعا شىنىمەن دە جاقىنداي الاتىنىمىزعا سەندىرەدى.
2 ەرتە زاماندا ٶمىر سۇرگەن ىبىرايىم قۇدايمەن وسىنداي تىعىز قارىم-قاتىناستا بولعان. ەحوبا ونى دوسىم دەپ اتاعان (يشايا 41:8، سىلتەمەنى قارا). ٴيا، ەحوبا ىبىرايىمدى دوسىم دەپ ەسەپتەگەن. ىبىرايىم مۇنداي مارتەبەگە ‹قۇدايعا سەنگەندىكتەن› يە بولعان (جاقىپ 2:23). بۇگىنگى كۇنى دە ەحوبا وزىنە قىزمەت ەتەتىندەرمەن دوستىعىن نىعايتۋدىڭ ٵرى ولارعا «سۇيىسپەنشىلىك تانىتۋدىڭ» مۇمكىندىكتەرىن ىزدەيدى (زاڭدى قايتالاۋ 10:15). ونىڭ ٴسوزى ٴبىزدى: «قۇدايعا جاقىنداڭدار، سوندا ول دا سەندەرگە جاقىندايدى»،— دەپ شاقىرادى (جاقىپ 4:8). بۇل سوزدەردەن شاقىرۋدى دا، ۋادەنى دە بايقاۋعا بولادى.
3. ەحوبا ٴبىزدى نە ىستەۋگە شاقىرادى جانە مۇنىڭ قانداي ۋادەمەن بايلانىسى بار؟
3 ەحوبا ٴبىزدى وزىنە جاقىنداۋعا شاقىرادى. ول ٴبىزدى دوسى رەتىندە قابىلداۋعا دايىن، ٵرى سولاي ەتۋدى قالايدى دا. سونىمەن قاتار ەگەر ٴبىز وعان جاقىنداۋعا قادامدار جاسار بولساق، ول ٶزى دە سولاي ەتۋدى ۋادە ەتەدى. ٴيا، ول دا بىزگە جاقىندايدى. وسىلايشا ناعىز قۇندى نارسەگە — «ەحوبامەن تىعىز قارىم-قاتىناسقا» a — يە بولامىز (ٴزابۋر 25:14، جد؛ [24:14]).
4. جان دوستى قالاي سۋرەتتەر ەدىڭ جانە ەحوبا دا وزىنە جاقىنداعىسى كەلەتىندەرمەن وسىنداي دوس بولاتىنىن قالاي كورسەتەدى؟
4 سەنىم ارتا الاتىن جان دوسىڭ بار ما؟ مۇنداي دوس سەنىڭ قامىڭدى ويلايدى. ادال ەكەنىن دالەلدەگەندىكتەن، سەن دە وعان سەنەسىڭ. ونىمەن قۋانىشىڭمەن بولىسسەڭ، قۋانىشىڭا قۋانىش قوسىلادى. ال مۇڭىڭدى شاقساڭ، جاناشىرلىقپەن تىڭداعانى قاسىرەتىڭدى جەڭىلدەتەدى. سەنى ەشكىم تۇسىنبەيتىندەي بولىپ كورىنسە دە، ول تۇسىنەدى. تاپ سول سياقتى قۇدايعا جاقىنداعاندا، ٶزىڭدى شىنىمەن باعالايتىن، شىن كوڭىلدەن قامىڭدى ويلايتىن ٵرى سەنى تولىعىمەن تۇسىنەتىن تۇلعانىڭ جان دوسى بولاسىڭ (ٴزابۋر 102:14؛ پەتىردىڭ 1-حاتى 5:7). ونىڭ ادال ادامعا ادالدىق تانىتاتىنىن بىلەسىڭ، سوندىقتان وعان جان دۇنيەڭدەگى بار سەزىمىڭدى سەنىپ تاپسىرا الاسىڭ (ٴزابۋر 18:25، جد). الايدا قۇدايدىڭ ٶزى جول اشپاسا، ونىمەن مۇنداي دوستىق قارىم-قاتىناس دامىتۋ مارتەبەسىنە يە بولۋ مۇمكىن ەمەس.
ەحوبا جول اشتى
5. ەحوبا وزىنە جاقىنداۋىمىزعا مۇمكىندىك بەرۋ ٷشىن نە ىستەدى؟
5 كۇناكار بولعاندىقتان، قۇدايعا ەشقاشان وزدىگىمىزدەن جاقىنداي الماس ەدىك (ٴزابۋر 5:5). ەلشى پاۋىل: «دەگەنمەن، ٵلى دە كۇناكار بولىپ جۇرگەن كەزىمىزدە ٴبىز ٷشىن ٴماسىح ٶمىرىن قۇربان ەتتى! وسى ارقىلى قۇداي بىزگە ٶزىنىڭ زور سۇيىسپەنشىلىگىن دالەلدەدى»،— دەپ جازدى (ريمدىكتەرگە 5:8). ٴبىراق ەحوبا يسانى «كوپتەگەن ادامداردىڭ ازاتتىق تولەمىن وتەۋ ٷشىن» جىبەرگەن (ماتاي 20:28). قۇدايعا جاقىنداۋىمىزعا مۇمكىندىك بەرىپ وتىرعان — ٴبىزدىڭ وسى تولەم قۇرباندىعىنا دەگەن سەنىمىمىز. قۇداي «ٴبىزدى الدىمەن ٴسۇيدى»، وسىلايشا وزىمەن دوستاسۋىمىزعا نەگىز قالادى (جوحاننىڭ 1-حاتى 4:19).
6، 7. ا) ەحوبانىڭ جاسىرىن، تانىپ-بىلۋگە بولمايتىن قۇداي ەمەس ەكەنىن قايدان بىلەمىز؟ ٵ) ول ٶزىن قانداي جولدارمەن تانىتادى؟
6 ەحوبا تاعى ٴبىر قادام جاسادى. ول بىزگە ٶزىن تانىتتى. كەز كەلگەن اينىماس دوستىقتىڭ نەگىزى ادامدى جاقسى ٴبىلىپ، ونىڭ قاسيەتتەرى مەن ٸس-ارەكەتتەرىن باعالاۋ بولىپ تابىلادى. سوندىقتان ەحوبا جاسىرىن، تانىپ-بىلۋگە بولمايتىن قۇداي بولسا، وعان ەشقاشان جاقىنداي الماس ەدىك. ٴبىراق ول ٶزىن جاسىرمايدى، قايتا، بىلگەنىمىزدى قالايدى (يشايا 45:19). وعان قوسا، ەحوبا ٶزىن ٴبارى، ٴتىپتى وسى دۇنيەنىڭ تالابى بويىنشا قاراپايىم بولىپ ەسەپتەلەتىندەر دە، بىلە الاتىنداي ەتىپ تانىتادى (ماتاي 11:25).
ەحوبا ٶزىن جاراتىلىستارى جانە جازباشا ٴسوزى ارقىلى تانىتادى
7 سوندا ەحوبا ٶزىن قالاي تانىتادى؟ جاراتىلىستارى ارقىلى ونىڭ بولمىسىنىڭ بەلگىلى ٴبىر قىرلارىن بىلۋگە بولادى. ول — وراسان زور كۇش يەسى، ونىڭ دانالىعى ٴتۇپسىز، ال سۇيىسپەنشىلىگى شەكسىز (ريمدىكتەرگە 1:20). ٴبىراق ول ٶزىن جاراتىلىستارى ارقىلى عانا تانىتىپ قويمايدى. ەحوبا كيەلى كىتاپ ارقىلى ٶزى جايلى جازباشا تۇردە دە اشقان.
ەحوبا ٶزىنىڭ قانداي ەكەنىن ٴسوزى ارقىلى اشادى
8. نەگە كيەلى كىتاپتى ەحوبانىڭ بىزگە دەگەن سۇيىسپەنشىلىگىنىڭ دالەلى دەۋگە بولادى؟
8 كيەلى كىتاپ — ەحوبانىڭ بىزگە دەگەن سۇيىسپەنشىلىگىنىڭ دالەلى. كيەلى كىتاپتا ول ٶزى تۋرالى ايتقاندا، ٴبىز تۇسىنە الاتىن سوزدەردى قولدانادى. وسىلايشا بىزگە دەگەن سۇيىسپەنشىلىگىن عانا ەمەس، ٶزىن تانىپ-بىلگەنىمىزدى ٵرى سۇيگەنىمىزدى قالايتىنىن دا كورسەتەدى. وسى باعالى كىتاپ ەحوباعا جاقىنداۋىمىزعا مۇمكىندىك بەرەدى (ٴزابۋر 1:1—3 جد). ەحوبانىڭ ٶزىن جۇرەككە جىلى سوزدەرمەن قالاي سۋرەتتەگەنىن كەيبىر مىسالداردان قاراستىرىپ كورەيىك.
9. كيەلى كىتاپتا قۇدايدىڭ قاسيەتتەرى جايلى جازىلعان قانداي تارماقتار بار؟
9 جازبالاردا ەحوبانىڭ قاسيەتتەرى كورسەتىلگەن تارماقتار كوپ. سولاردىڭ كەيبىرىنە كوڭىل ٴبولىپ كورەيىك: «ەحوبا ادىلەتتىلىكتى سۇيەدى» (ٴزابۋر 37:28، جد؛ [36:28]). «ٴتاڭىردىڭ قۇدىرەتى سونشا زور» (يشايا 40:26). «مەن شەكسىز بەرىلگەنمىن،— دەيدى ەحوبا» (ەرەميا 3:12، جد). «و، نەتكەن باي قۇدايدىڭ دانالىعى» (ريمدىكتەرگە 11:33). «راقىمدى دا قايىرىمدى قۇداي! قاھارلانۋعا اسىقپايدى، سۇيىسپەنشىلىگى بەرىك، ٵردايىم سوزىندە تۇرادى» (مىسىردان شىعۋ 34:6). «ۋا، كەشىرۋگە دايىنسىڭ» (ٴزابۋر 86:5، جد؛ [85:5]). الايدا، الدىڭعى تاراۋدا ايتىلىپ وتكەندەي، قۇدايدىڭ ەڭ نەگىزگى قاسيەتى بار: «قۇداي — سۇيىسپەنشىلىك» (جوحاننىڭ 1-حاتى 4:8). وسى كەرەمەت قاسيەتتەردىڭ ۇستىنەن وي جۇگىرتكەنىڭ سەنى ەشكىم تەڭ كەلمەيتىن قۇدايىمىزعا جاقىنداۋعا تالپىندىرادى ەمەس پە؟
10، 11. ا) ەحوبا ٶز سوزىندە بولمىسىن انىعىراق ٴتۇسىنۋىمىز ٷشىن نە جايىندا جازدىرعان؟ ٵ) قانداي مىسال قۇدايدىڭ ٶز كۇشىن ٸس جۇزىندە كورسەتكەنىن ەلەستەتۋىمىزگە كومەكتەسەدى؟
10 قاسيەتتەرى جايىندا ايتۋىمەن قاتار ەحوبا سۇيىسپەنشىلىكپەن ٶز سوزىندە سول قاسيەتتەرىن ٸس جۇزىندە قالاي كورسەتكەنى جونىندە دە جازدىرعان. بۇل ٴبىزدىڭ سانامىزدا ونىڭ بولمىسىنىڭ سان-الۋان قىرلارىن اناعۇرلىم انىق تۇسىنۋىمىزگە كومەكتەسەتىن ايقىن بەينەلەر تۋدىرادى. ال بۇل وعان جاقىنداي تۇسۋىمىزگە ىقپال ەتەدى. وسىنداي ٴبىر مىسالدى قاراستىرىپ كورەيىك.
كيەلى كىتاپ ەحوباعا جاقىنداۋىمىزعا كومەكتەسەدى
11 قۇدايدىڭ «قۇدىرەتى سونشا زور» ەكەنى جايىندا وقۋ ٴبىر بولەك (يشايا 40:26). ال ونىڭ يسرايلدىكتەردى قىزىل تەڭىز ارقىلى ازات ەتىپ، سوسىن 40 جىل بويى ٴشول دالادا قامقورلاپ جۇرگەنى جايىندا وقۋ ٴبىر بولەك. كوز الدىڭا ەلەستەتشى: تاۋداي تولقىندار بارعان سايىن بيىكتەپ، كوتەرىلىپ قاق ايىرىلىپ بارا جاتىر. 3000000 داي حالىق زور قابىرعاداي ٴتىپ-تىك بولىپ قاتىپ قالعان سۋدىڭ اراسىنداعى تەڭىزدىڭ قۇرعاق تۇبىمەن ٶتىپ جاتىر (مىسىردان شىعۋ 14:21؛ 15:8). سونداي-اق قۇدايدىڭ ٴشول دالادا قانداي قامقورشى بولعانىن دا ەلەستەتۋىڭە بولادى: ول جارتاستان سۋ اعىزدى؛ جەردە پايدا بولاتىن اق دانگە ۇقسايتىن اسپەن قامتاماسىز ەتتى (مىسىردان شىعۋ 16:31، 17:6). وسىلاي ەحوبا زور كۇشى بار ەكەنىن عانا ەمەس، ونى ٶز حالقىنىڭ يگىلىگى ٷشىن قولداناتىنىن دا كورسەتكەن. بۇل ‹پانامىز دا كۇشىمىز، قيىن كەزدە سەنىمدى كومەكشىمىزدىڭ›، قۇدىرەتتى قۇدايدىڭ، قۇلاعىنا دۇعالارىمىزدىڭ جەتەتىنىنە سەندىرە تۇسەدى ەمەس پە؟ (ٴزابۋر 45:2)
12. قالاي ەحوبا ٶزىن «كورە الۋىمىز» ٷشىن ٴبىز تۇسىنەتىن سوزدەردى قولدانادى؟
12 رۋح بولىپ تابىلاتىن ەحوبا ٶزىن تانىپ-بىلۋىمىزگە كومەكتەسۋ ٷشىن بۇدان دا كوپ نارسە ىستەدى. ادام بولعان سوڭ ٴبىز تەك كوزگە كورىنەتىن زاتتاردى عانا كورىپ، رۋحاني الەمگە ۇڭىلە المايمىز. قۇداي ٶزىن رۋحاني سوزدەرمەن سۋرەتتەر بولسا، بۇل ىشتەن سوقىر بولىپ تۋعان ادامعا كوزىڭنىڭ ٴتۇسى نە بەتىڭدەگى سەپكىل سياقتى ەرەكشەلىكتەردى تۇسىندىرۋگە تىرىسۋمەن تەڭ بولار ەدى. ٴبىراق ەحوبا ٴبىز تۇسىنەتىن سوزدەردى قولدانىپ، ٶزىن «كورە الۋىمىز» ٷشىن سۇيىسپەنشىلىكپەن قول ۇشىن بەرۋدە. كەيدە ول مەتافورالار مەن مىسالداردى قولدانىپ، ٶزىن ٴبىز بىلەتىن نارسەلەرگە تەڭەيدى. ول ٴتىپتى ٶزىن ادامعا ٴتان ەرەكشەلىكتەرمەن سۋرەتتەيدى b.
13. يشايا 40:11 ٴدى وقىعاندا، ساناڭدا قانداي بەينە پايدا بولادى جانە بۇل ساعان قالاي اسەر ەتتى؟
13 يشايا 40:11 دە ەحوبانىڭ قالاي بەينەلەنگەنىنە كوڭىل اۋدارشى: «ٴتاڭىر يە ولاردى ىزگى شوپانداي باعادى: «قوزىلارىن» قولىنا الىپ، كەۋدەسىنە باسىپ كوتەرىپ... جۇرەدى». ەحوبا مۇندا قوزىلارىن «قولىنا الىپ» جۇرەتىن باقتاشىعا تەڭەلگەن. بۇل قۇدايدىڭ ٶز حالقىن، اسىرەسە جانى نازىك ادامداردى، قورعاپ، قولداي الاتىندىعىنا نۇسقايدى. ادال بولساق، ٴبىز ٶزىمىزدى ونىڭ قۇدىرەتتى قولىندا قاۋىپسىز سەزىنەمىز، ول ٴبىزدى ەشقاشان تاستامايدى (ريمدىكتەرگە 8:38، 39). ۇلى باقتاشى قوزىلارىن «كەۋدەسىنە باسىپ جۇرەدى»، بۇل تىركەس باقتاشىنىڭ كەيدە جاڭا تۋعان قوزىلاردى سىرت كيىمىنىڭ كەڭ قاتپارلارىنا وراپ الىپ جۇرەتىنىنە نۇسقايدى. ٴيا، ەحوبا ٴبىزدى ايالاپ، ماپەلەپ قامقورلايدى. وسىنى بىلە تۇرا، وعان جاقىنداي تۇسكىڭ كەلەرى ٴسوزسىز.
‹ۇلى اكەسىن بىلدىرگىسى كەلەدى›
14. نەگە ەحوبا يسا ارقىلى ٶزىن ەڭ كەرەمەت تۇردە تانىتادى دەۋگە بولادى؟
14 ەحوبا كيەلى كىتاپتا سۇيىكتى ۇلى يسا ارقىلى ٶزىن ەڭ كەرەمەت تۇردە تانىتادى. ەشكىم دە قۇدايدىڭ ويى مەن سەزىمىن يسا سياقتى اينىتپاي كورسەتە دە، نەمەسە سونشاما ايقىن تۇسىندىرە دە الماس ەدى. ونىڭ ۇستىنە، رۋحاني تىرشىلىك يەلەرى دە، فيزيكالىق الەم دە جاراتىلماس بۇرىن ول اكەسىنىڭ قاسىندا بىرگە بولعان (قولوستىقتارعا 1:15، سىلتەمەگە قارا). يسا ەحوبامەن تىعىز قارىم-قاتىناستا بولعان. سول سەبەپتى: «رۋحاني ۇلىنىڭ شىنىمەن كىم ەكەنىن اكەسىنەن وزگە ەشكىم دە بىلمەيدى. اكەنىڭ كىم ەكەنىن دە جالعىز رۋحاني ۇلى عانا بىلەدى، ٵرى ول اكەسىن كىمدەرگە بىلدىرگىسى كەلسە، سولار دا ونى جاقىننان تانيدى»،— دەپ ايتا العان (لۇقا 10:22). ادام رەتىندە جەردە بولعان كەزىندە، يسا اكەسىن ەكى جولمەن تانىتتى.
15، 16. يسا قانداي ەكى جولمەن اكەسىن جاقىننان تانىتتى؟
15 بىرىنشىدەن، يسانىڭ ٴتالىمى ەحوبانى جاقىننان تانۋىمىزعا كومەكتەسەدى. يسا اكەسىن ٴبىزدىڭ جۇرەگىمىزگە جەتەتىن سوزدەرمەن سۋرەتتەگەن. مىسالى، قۇداي كۇناسىنە وكىنگەندەردى مەيىرىمدىلىكپەن قابىلدايتىنىن ٴتۇسىندىرۋ ٷشىن يسا ەحوبانى ىسىراپشىل اداسقان ۇلىن كورگەندە، جۇرەگى ەلجىرەپ، الدىنان جۇگىرىپ شىعىپ، باۋىرىنا باسىپ، ايالاپ ۇلىنىڭ بەتىنەن سۇيگەن كەشىرىمشىل اكەگە تەڭەگەن (لۇقا 15:11—24). سونىمەن قاتار ەحوبا ٵربىر ادامدى جەكە جاقسى كورگەندىكتەن، يسا ونى ٵدىل جانداردى وزىنە «جاقىنداتىپ تارتاتىن» قۇداي رەتىندە بەينەلەگەن (جوحان 6:44). ٴتىپتى تيتتەي تورعاي ەكەش تورعايدىڭ دا جەرگە قۇلاعانى وعان ٴمالىم. «قورىقپاڭدار،— دەپ ٴتۇسىندىردى يسا،— سەندەر كوپتەگەن تورعايلاردان الدەقايدا قىمباتسىڭدار!» (ماتاي 10:29، 31) مۇنداي قامقور قۇدايعا كىم جاقىنداعىسى كەلمەيدى!؟
16 ەكىنشىدەن، يسا ەحوبانىڭ قانداي ەكەنىن ٸس جۇزىندە كورسەتتى. اكەسىنىڭ بولمىسىن اينىتپاي كورسەتكەنى سونشالىق، ول: «كىم مەنى كورسە، سونىڭ اكەنى دە كورگەنى»،— دەي الدى (جوحان 14:9). سوندىقتان ىنجىلدەن يسا تۋرالى، ياعني ونىڭ سەزىمدەرى مەن وزگەلەرگە قالاي قاراعانى تۋرالى وقىعاندا، ونىڭ اكەسىن كورگەندەي سەزىم تۋادى. ٴسوزسىز، ەحوبا وزىنە ٴتان قاسيەتتەردى باسقاشا جولمەن مۇنشالىقتى انىق ەتىپ كورسەتە الماس ەدى. نەگە بۇلاي دەۋگە بولادى؟
17. ٶزىنىڭ قانداي ەكەنىن تۇسىنۋىمىزگە كومەكتەسۋ ٷشىن ەحوبانىڭ نە ىستەگەنىن مىسال ارقىلى كورسەت.
17 مىناداي مىسالدى قاراستىرىپ كورەلىك: بىرەۋگە قايىرىمدىلىق دەگەننىڭ نە ەكەنىن تۇسىندىرۋگە تىرىسىپ جاتىرسىڭ دەلىك. ارينە، سەن مۇنى سوزبەن دە ٴتۇسىندىرىپ بەرە الاسىڭ. ٴبىراق شىنىمەن قايىرىمدى ارەكەت ەتىپ جاتقان ادامدى كورسەتىپ: «قايىرىمدىلىق دەگەن، مىنە، وسى»،— دەسەڭ، قايىرىمدىلىق ٴسوزىنىڭ ماعىناسى تەرەڭدەي ٴتۇسىپ، ٴتۇسىنۋ دە وڭاي بولادى. ٶزىنىڭ قانداي ەكەنىن تۇسىنۋىمىزگە كومەكتەسۋ ٷشىن ەحوبا دا وسىلاي ەتكەن. ول ٶزىن سوزبەن عانا سۋرەتتەپ قويماي، قانداي ەكەنىن ۇلىنىڭ ۇلگىسى ارقىلى دا كورسەتتى. يسا قۇدايدىڭ قاسيەتتەرىن ٸس جۇزىندە تانىتتى. ەحوبا يسانىڭ ىنجىلدەگى بەينەسى ارقىلى، بىلايشا ايتقاندا: «مىنە، مەن وسىندايمىن»،— دەيدى. الايدا كيەلى كىتاپتا جەر بەتىندە بولعان يسانىڭ بەينەسى قالاي سۋرەتتەلەدى؟
18. قالاي يسا كۇش، ادىلەتتىلىك جانە دانالىق تانىتقان؟
18 يسا قۇدايدىڭ ٴتورت نەگىزگى قاسيەتىن كەرەمەت تۇردە كورسەتكەن. ونىڭ اۋرۋ-سىرقاۋعا، اشتىققا، ٴتىپتى ولىمگە ۇستەمدىك ەتەتىن كۇشى بولعان. ٴبىراق كۇشىن تەرىس قولداناتىن ٶزىمشىل ادامدار سياقتى ەمەس، ول ەشقاشان كەرەمەت جاسايتىن كۇشىن ٶز پايداسىنا نە وزگەلەرگە قيانات جاساۋ ٷشىن قولدانباعان (ماتاي 4:2—4). ول ادىلدىكتى سۇيگەن. ادامداردى قاناپ جاتقان ارامزا ساۋداگەرلەردى كورگەندە، ونى ادىلەتتى اشۋ بيلەگەن (ماتاي 21:12، 13). ەشكىمدى الالاماي، جارلى-جاقىبايلار مەن ەڭسەسى باسىلعاندارعا قامقورلىق كورسەتىپ، ‹جاندارىنىڭ راقاتقا بولەنۋىنە› كومەكتەسكەن (ماتاي 11:4، 5، 28—30). «سۇلەيمەن پاتشادان دا مارتەبەسى زور» يسانىڭ تالىمىنەن وراسان مول دانالىق بايقالىپ تۇراتىن (ماتاي 12:42). سويتسە دە ول ەشقاشان دانالىعىن ەلدىڭ كوزىنە ٴتۇسۋ ٷشىن قولدانباعان. ونىڭ ٴتالىمى انىق، تۇسىنۋگە جەڭىل ٵرى پايدالى بولعاندىقتان، قاراپايىم ادامداردىڭ جۇرەگىنە جەتكەن.
19، 20. ا) قالاي يسا سۇيىسپەنشىلىك تانىتۋدىڭ كەرەمەت ۇلگىسى بولعان؟ ٵ) يسانىڭ ٶمىرى جايىندا وقىپ، وي جۇگىرتكەندە نەنى ەستە ۇستاعانىمىز ٴجون؟
19 يسا سۇيىسپەنشىلىك تانىتۋدىڭ كەرەمەت ۇلگىسى بولعان. قىزمەتىنىڭ بارىسىندا ول، جاناشىرلىق پەن اياۋشىلىقتى قوسا العاندا، سۇيىسپەنشىلىكتىڭ كوپتەگەن قىرلارىن تانىتقان. وزگەلەردىڭ قايعىسىن كورگەندە، ونىڭ جانى اۋىرماي تۇرمايتىن. ولاردىڭ مۇقتاجدىقتارىنا دەگەن سەزىمتالدىعى ونى ارقاشان ارەكەتكە تالپىندىرىپ وتىرعان (ماتاي 14:14). يسا اۋرۋلاردى جازىپ، اشىققانداردى تاماقتاندىرعانمەن، ونىڭ جاناشىرلىعى الدەقايدا ماڭىزدى نارسەدە دە تانىلعان. ول وزگەلەرگە ادامزاتتى ماڭگىلىك باتالارعا جەتكىزەتىن قۇداي پاتشالىعى تۋرالى شىندىقتى اشىپ، ونى قابىلداۋعا ٵرى سۇيۋگە كومەكتەسكەن (مارقا 6:34؛ لۇقا 4:43). ونىڭ ۇستىنە، يسا ادامزات ٷشىن دايارلىقپەن ٶز جانىن قيۋ ارقىلى جانقيارلىق سۇيىسپەنشىلىك كورسەتتى (جوحان 15:13).
20 كورىپ وتىرعانىمىزداي، يسا بويىنان جىلۋلىق سەزىلىپ تۇراتىن، سەزىمتال كىسى بولعان. سوندىقتان وسىنداي كىسىگە ٵر ٴتۇرلى جاستاعى، ٵر ٴتۇرلى ورتادان شىققان ادامداردىڭ جاقىنداۋعا ىقىلاستى بولعانىنا تاڭعالۋعا بولا ما؟ (مارقا 10:13—16) الايدا يسانىڭ ٶمىرى جايىندا وقىپ، وي جۇگىرتكەندە، ۇلى اكەسىنىڭ بولمىسىنىڭ دالمە-ٴدال سيپاتى ەكەنىن ەستە ۇستالىق (ەۆرەيلەرگە 1:3).
زەرتتەۋگە ارنالعان قۇرالدىڭ كومەگى
21، 22. ەحوبانى ىزدەۋ نەنى بىلدىرەدى جانە زەرتتەۋگە ارنالعان وسى قۇرال بىزگە قالاي كومەكتەسەدى؟
21 كيەلى كىتاپ ارقىلى ٶزىن سونشالىقتى انىق ەتىپ تانىتۋىمەن ەحوبا ٴبىزدىڭ وزىنە جاقىنداعانىمىزدى قالايتىندىعىنا ەش كۇمان قالدىرمايدى. سويتە تۇرا، ول وزىمەن جىلى قارىم-قاتىناستا بولۋعا ماجبۇرلەمەيدى. «ٵلى كەش بولماي تۇرعاندا» ەحوبانى ىزدەۋ — ٶز جاۋاپكەرشىلىگىمىز (يشايا 55:6). ەحوبانى ىزدەۋ كيەلى كىتاپتا ايتىلعان ونىڭ قاسيەتتەرى مەن جولدارىن بىلۋدەن تۇرادى. قازىر ٶزىڭ وقىپ وتىرعان زەرتتەۋگە ارنالعان قۇرال سەن ٷشىن جاقسى كومەك بولادى.
22 سەن بۇل كىتاپتىڭ ٴتورت بولىمنەن تۇرىپ، ەحوبانىڭ باستى ٴتورت قاسيەتىنە — كۇش، ادىلەتتىلىك، دانالىق جانە سۇيىسپەنشىلىككە — جەكە-جەكە كوڭىل اۋداراتىنىن كورەسىڭ. ٵربىر ٴبولىم تالقىلاناتىن قاسيەتكە شولۋ جاساۋمەن باستالادى دا، كەيىنگى بىرنەشە تاراۋدا ەحوبانىڭ سول قاسيەتتى قالاي جان-جاقتى تانىتاتىنى قاراستىرىلادى. سونداي-اق ٵر بولىمدە ونى يسانىڭ قالاي تانىتقاندىعىن كورسەتەتىن تاراۋ، سونىمەن قاتار ٴبىزدىڭ قالاي تانىتۋىمىزعا بولاتىندىعى تالقىلاناتىن تاراۋ دا بولادى.
23، 24. ا) «وي جۇگىرتۋگە ارنالعان سۇراقتار» ايدارىنىڭ ەرەكشەلىگىن ٴتۇسىندىر. ٵ) قالاي وي جۇگىرتۋ قۇدايعا جاقىنداۋعا كومەكتەسەدى؟
23 وسى تاراۋدان باستاپ ٴبىر ەرەكشەلىك بار: «وي جۇگىرتۋگە ارنالعان سۇراقتار». 24-بەتتەگى قورشاۋعا قاراشى. ونداعى جازبا ورىندارى مەن سۇراقتار تاراۋدى قايتالاۋعا ارنالماعان. ولاردىڭ ماقساتى — تالقىلانعان تاقىرىپتىڭ وزگە جاقتارى جونىندە وي جۇگىرتۋىڭە كومەكتەسۋ. ونى قالاي ٴتيىمدى قولدانۋىڭا بولادى؟ جازبا ورىندارىنىڭ ٴارقايسىسىن اشىپ، مۇقيات وقى. سوسىن، ولارعا بەرىلگەن سۇراقتى وقىپ، جاۋابىنىڭ ۇستىنەن وي جۇگىرت. قوسىمشا زەرتتەۋ جۇرگىزۋىڭە دە بولادى. وزىڭە قوسىمشا سۇراقتار قوي: «بۇدان ەحوبا تۋرالى نە ٴبىلدىم؟ بۇل مەنىڭ ومىرىمە قالاي اسەر ەتەدى؟ وزگەلەرگە كومەكتەسۋ ٷشىن مۇنى قالاي قولدانۋىما بولادى؟»
24 وسىلاي وي جۇگىرتكەنىمىز ەحوباعا جاقىنداي تۇسۋىمىزگە كومەكتەسەدى. نەگە بۇلاي دەۋگە بولادى؟ كيەلى كىتاپتا وي جۇگىرتۋ جۇرەكپەن، نەمەسە ادامنىڭ جان دۇنيەسىمەن، بايلانىستىرىلادى (ٴزابۋر 18:15). قۇداي تۋرالى العان ٴبىلىمىمىزدىڭ ۇستىنەن ريزاشىلىقپەن وي جۇگىرتكەندە، ول بەينەلى جۇرەگىمىزگە جەتىپ، كوڭىلىمىزگە ۇيالايدى دا، وي-قالپىمىزعا اسەر ەتىپ، سەزىمىمىزدى وياتادى، ال اقىر اياعىندا ارەكەتكە تالپىندىرادى. وسىلايشا قۇدايعا دەگەن سۇيىسپەنشىلىگىمىز تەرەڭدەپ، ال بۇل ٶز كەزەگىندە، اياۋلى دوسىمىز رەتىندە قۇدايعا ۇنامدى بولۋعا تالپىندىرادى (جوحاننىڭ 1-حاتى 5:3). مۇنداي قارىم-قاتىناستا بولۋ ەحوبانىڭ قاسيەتتەرى مەن جولدارىن ٴبىلۋدى تالاپ ەتەدى. سوندىقتان، ەڭ الدىمەن، قۇدايعا جاقىنداۋىمىزعا كەلەلى نەگىز بولاتىن ونىڭ بولمىسىنىڭ ٴبىر قىرىن، كيەلىلىگىن، قاراستىرايىق.
a «تىعىز قارىم-قاتىناس» دەگەننىڭ استارىندا جان دوسپەن سىرلاسۋ دەگەن وي جاتىر.
b مىسالى، كيەلى كىتاپتا قۇدايدىڭ كوزى، قۇلاعى، اۋزى، قولى، تابانى بار ەكەندىگى ايتىلعان (مىسىردان شىعۋ 13:14؛ يشايا 66:1؛ ماتاي 4:4؛ پەتىردىڭ 1-حاتى 3:12). ەحوبا ‹قورعانىمىز› نە ‹قالقانىمىز› دەگەندى تۋرا ماعىنادا تۇسىنبەيتىنىمىز سياقتى، بۇل بەينەلى سوزدەردى دە تىكەلەي تۇسىنبەۋ كەرەك (زاڭدى قايتالاۋ 32:4؛ ٴزابۋر 118:114).
