ບົດທີ 2
ເຈົ້າຈະ “ໃກ້ຊິດກັບພະເຈົ້າ” ໄດ້ແທ້ໆບໍ?
1, 2. (ກ) ຫຼາຍຄົນອາດຄິດວ່າເລື່ອງໃດເປັນໄປບໍ່ໄດ້? ແຕ່ຄຳພີໄບເບິນເຮັດໃຫ້ເຮົາໝັ້ນໃຈໃນເລື່ອງໃດ? (ຂ) ພະເຢໂຫວາເອີ້ນອັບຣາຮາມວ່າແນວໃດ ແລະຍ້ອນຫຍັງ?
ເຈົ້າຈະຮູ້ສຶກແນວໃດຖ້າຜູ້ທີ່ສ້າງຟ້າແລະໂລກເວົ້າເຖິງເຈົ້າວ່າ: “ນີ້ແມ່ນໝູ່ຂອງເຮົາເດີ້”? ຫຼາຍຄົນອາດຈະຄິດວ່າເປັນໄປບໍ່ໄດ້ດອກ. ມະນຸດຈະເປັນໝູ່ກັບພະເຢໂຫວາພະເຈົ້າໄດ້ຈັ່ງໃດ? ແຕ່ຄຳພີໄບເບິນເຮັດໃຫ້ເຮົາໝັ້ນໃຈວ່າເຮົາຈະໃກ້ຊິດກັບພະເຈົ້າໄດ້ແທ້ໆ.
2 ອັບຣາຮາມມີຊີວິດຕັ້ງແຕ່ສະໄໝບູຮານ ລາວເປັນຄົນໜຶ່ງທີ່ໃກ້ຊິດກັບພະເຢໂຫວາຫຼາຍ ແລະເພິ່ນເອີ້ນລາວວ່າ: “ໝູ່ຂອງເຮົາ.” (ເອຊາຢາ 41:8) ພະເຢໂຫວາຖືວ່າອັບຣາຮາມເປັນໝູ່ສະໜິດຂອງເພິ່ນ. ອັບຣາຮາມມີສາຍສຳພັນທີ່ໃກ້ຊິດແບບນີ້ຍ້ອນລາວ “ເຊື່ອໃນພະເຢໂຫວາ.” (ຢາໂກໂບ 2:23) ທຸກມື້ນີ້ກໍຄືກັນ ພະເຢໂຫວາຫາໂອກາດເພື່ອຈະເປັນໝູ່ກັບຜູ້ທີ່ຮັບໃຊ້ເພິ່ນແລະເພື່ອຈະສະແດງຄວາມຮັກຕໍ່ເຂົາເຈົ້າ. (ພະບັນຍັດ 10:15) ຄຳພີໄບເບິນເຊີນເຮົາ ‘ໃຫ້ໃກ້ຊິດກັບພະເຈົ້າ ແລ້ວເພິ່ນຈະໃກ້ຊິດກັບເຮົາ.’ (ຢາໂກໂບ 4:8) ໃນຄຳເວົ້ານີ້ເປັນທັງຄຳເຊີນແລະຄຳສັນຍາ.
3. ພະເຢໂຫວາເຊີນເຮົາໃຫ້ເຮັດຫຍັງ ແລະເພິ່ນສັນຍາຫຍັງກັບເຮົາ?
3 ພະເຢໂຫວາເຊີນເຮົາໃຫ້ເຂົ້າໃກ້ຊິດກັບເພິ່ນ. ເພິ່ນຢາກໃຫ້ເຮົາມາເປັນໝູ່ກັບເພິ່ນ. ໃນເວລາດຽວກັນ ເພິ່ນສັນຍາວ່າຖ້າເຮົາພະຍາຍາມ ຈະໃກ້ຊິດກັບເພິ່ນ ເພິ່ນກໍຈະໃກ້ຊິດກັບເຮົາ. ແລ້ວເຮົາຈະ ‘ໄດ້ເປັນໝູ່ສະໜິດຂອງພະເຢໂຫວາ’ ເຊິ່ງເປັນສິ່ງທີ່ມີຄ່າຫຼາຍ. (ເພງສັນລະເສີນ 25:14) “ໝູ່ສະໜິດ” ແມ່ນຜູ້ທີ່ເຮົາເວົ້າເລື່ອງທີ່ເປັນຄວາມລັບນຳໄດ້.
4. ໝູ່ສະໜິດເປັນແນວໃດ ແລະພະເຢໂຫວາເປັນໝູ່ແບບນັ້ນແນວໃດກັບຄົນທີ່ໃກ້ຊິດກັບເພິ່ນ?
4 ເຈົ້າມີໝູ່ສະໜິດທີ່ໄວ້ໃຈໄດ້ບໍ? ໝູ່ແບບນີ້ເປັນຫ່ວງເຈົ້າ. ເຈົ້າໄວ້ໃຈລາວໄດ້ຍ້ອນລາວສັດຊື່ຕໍ່ເຈົ້າສະເໝີ. ຕອນທີ່ເຈົ້າມີເລື່ອງດີໆແລ້ວເລົ່າໃຫ້ລາວຟັງ ເຈົ້າກໍມີຄວາມສຸກຫຼາຍຂຶ້ນ. ຕອນທີ່ເຈົ້າມີຄວາມທຸກ ລາວຟັງເຈົ້າແບບເຫັນອົກເຫັນໃຈ ແລະລາວກໍເຂົ້າໃຈເຈົ້າສະເໝີເຖິງວ່າຈະບໍ່ມີໃຜເຂົ້າໃຈເຈົ້າ ນີ້ຈຶ່ງເຮັດໃຫ້ເຈົ້າຮູ້ສຶກດີຂຶ້ນ. ຄ້າຍຄືກັນ ເມື່ອເຈົ້າໃກ້ຊິດກັບພະເຈົ້າ ເຈົ້າກໍຈະມີໝູ່ສະໜິດທີ່ພິເສດຫຼາຍເຊິ່ງເພິ່ນຖືວ່າເຈົ້າມີຄ່າຫຼາຍ ເປັນຫ່ວງເຈົ້າແທ້ໆ ແລະເຂົ້າໃຈເຈົ້າໃນທຸກໆເລື່ອງ. (ເພງສັນລະເສີນ 103:14; 1 ເປໂຕ 5:7) ເຈົ້າໝັ້ນໃຈວ່າເຈົ້າສາມາດເວົ້າກັບເພິ່ນໄດ້ທຸກເລື່ອງ ຍ້ອນເຈົ້າຮູ້ວ່າເພິ່ນສັດຊື່ຕໍ່ຜູ້ທີ່ສັດຊື່ຕໍ່ເພິ່ນ. (ເພງສັນລະເສີນ 18:25) ເຮົາມີສິດທິພິເສດທີ່ຈະເປັນໝູ່ກັບພະເຈົ້າໄດ້ກໍຍ້ອນເພິ່ນເຮັດໃຫ້ເລື່ອງນີ້ເປັນໄປໄດ້.
ພະເຢໂຫວາເຮັດໃຫ້ເຮົາເປັນໝູ່ກັບເພິ່ນໄດ້
5. ພະເຢໂຫວາເຮັດຫຍັງເພື່ອໃຫ້ເຮົາໃກ້ຊິດກັບເພິ່ນໄດ້?
5 ຖ້າພະເຢໂຫວາບໍ່ຊ່ວຍ ເຮົາກໍຈະໃກ້ຊິດກັບເພິ່ນບໍ່ໄດ້ ຍ້ອນເຮົາເປັນຄົນບໍ່ສົມບູນແບບ. (ເພງສັນລະເສີນ 5:4) ອັກຄະສາວົກໂປໂລຂຽນວ່າ: “ພະເຈົ້າສະແດງຄວາມຮັກຕໍ່ພວກເຮົາ ໂດຍໃຫ້ພະຄລິດມາຕາຍແທນພວກເຮົາທັງໆທີ່ພວກເຮົາຍັງເປັນຄົນບາບຢູ່.” (ໂຣມ 5:8) ພະເຢໂຫວາສົ່ງພະເຢຊູມາຢູ່ໂລກ “ເພື່ອຮັບໃຊ້ຄົນອື່ນ ແລະສະລະຊີວິດເປັນຄ່າໄຖ່ໃຫ້ຄົນຈຳນວນຫຼາຍ.” (ມັດທາຍ 20:28) ຖ້າເຮົາເຊື່ອໃນຄ່າໄຖ່ ເຮົາກໍຈະໃກ້ຊິດກັບພະເຈົ້າໄດ້ ແລະຍ້ອນພະເຈົ້າ “ຮັກພວກເຮົາກ່ອນ” ເພິ່ນຈຶ່ງປູທາງໄວ້ໃຫ້ເຮົາມາເປັນໝູ່ກັບເພິ່ນໄດ້.—1 ໂຢຮັນ 4:19
6, 7. (ກ) ເປັນຫຍັງພະເຢໂຫວາບອກເຮົາໃຫ້ຮູ້ກ່ຽວກັບເພິ່ນ? (ຂ) ພະເຢໂຫວາໃຫ້ເຮົາຮູ້ຈັກເພິ່ນໂດຍທາງໃດແດ່?
6 ພະເຢໂຫວາໄດ້ເຮັດບາງຢ່າງເພື່ອໃຫ້ເຮົາເປັນໝູ່ກັບເພິ່ນໄດ້. ເພິ່ນສອນໃຫ້ເຮົາຮູ້ກ່ຽວກັບເພິ່ນ. ກ່ອນທີ່ຈະສະໜິດກັບຜູ້ໃດຜູ້ໜຶ່ງ ເຮົາຕ້ອງຮູ້ຈັກຜູ້ນັ້ນດີໆ. ເຮົາຕ້ອງມັກນິດໄສກັບການປະພຶດຂອງລາວ. ຖ້າພະເຢໂຫວາບໍ່ໄດ້ບອກໃຫ້ເຮົາ ຮູ້ຫຍັງກ່ຽວກັບເພິ່ນ ເຮົາກໍຈະບໍ່ມີທາງຮູ້ຈັກເພິ່ນເລີຍ. ແຕ່ພະເຢໂຫວາຢາກໃຫ້ເຮົາຮູ້ຈັກເພິ່ນ. (ເອຊາຢາ 45:19) ພະເຢໂຫວາຢາກໃຫ້ທຸກຄົນໄດ້ຮຽນຮູ້ເລື່ອງເພິ່ນ ແມ່ນແຕ່ຄົນທີ່ຄົນທົ່ວໄປເບິ່ງວ່າບໍ່ມີຄ່າ.—ມັດທາຍ 11:25
ພະເຢໂຫວາບອກໃຫ້ເຮົາຮູ້ກ່ຽວກັບເພິ່ນໂດຍທາງສິ່ງເພິ່ນສ້າງແລະໂດຍທາງຄຳພີໄບເບິນ
7 ພະເຢໂຫວາບອກເຮົາໃຫ້ຮູ້ກ່ຽວກັບເພິ່ນໂດຍທາງໃດແດ່? ໂດຍເບິ່ງສິ່ງຕ່າງໆທີ່ເພິ່ນສ້າງ ເຮົາກໍຈະຮູ້ຈັກເພິ່ນຫຼາຍຂຶ້ນ ເຊັ່ນ ເຮົາຈະຮູ້ວ່າເພິ່ນມີລິດເດດຫຼາຍແທ້ໆ ເພິ່ນມີສະຕິປັນຍາທີ່ຫຼັກແຫຼມຫຼາຍອີ່ຫຼີ ແລະເພິ່ນມີຄວາມຮັກຫຼາຍແທ້ຫຼາຍວ່າ. (ໂຣມ 1:20) ພະເຢໂຫວາບໍ່ພຽງແຕ່ໃຊ້ສິ່ງທີ່ເພິ່ນສ້າງຊ່ວຍເຮົາໃຫ້ຮູ້ຈັກເພິ່ນເທົ່ານັ້ນ ແຕ່ເພິ່ນຍັງໃຊ້ຄຳພີໄບເບິນຊ່ວຍເຮົາໃຫ້ຮູ້ຈັກເພິ່ນນຳ.
ພະເຢໂຫວາບອກໃຫ້ເຮົາຮູ້ຫຍັງກ່ຽວກັບເພິ່ນໂດຍທາງຄຳພີໄບເບິນ?
8. ເປັນຫຍັງຈຶ່ງເວົ້າໄດ້ວ່າຄຳພີໄບເບິນເປັນຫຼັກຖານທີ່ສະແດງວ່າພະເຢໂຫວາຮັກເຮົາ?
8 ຄຳພີໄບເບິນເປັນຫຼັກຖານທີ່ສະແດງວ່າພະເຢໂຫວາຮັກເຮົາຫຼາຍ. ຄຳພີໄບເບິນບອກໃຫ້ເຮົາຮູ້ກ່ຽວກັບເພິ່ນດ້ວຍຄຳເວົ້າທີ່ເຮົາເຂົ້າໃຈໄດ້. ນີ້ສະແດງວ່າເພິ່ນບໍ່ພຽງແຕ່ຮັກເຮົາ ແຕ່ຢາກໃຫ້ເຮົາຮູ້ຈັກແລະຮັກເພິ່ນນຳ. ເມື່ອເຮົາອ່ານປຶ້ມທີ່ມີຄ່ານີ້ ເຮົາກໍຈະໃກ້ຊິດກັບເພິ່ນໄດ້. (ເພງສັນລະເສີນ 1:1-3) ຂໍໃຫ້ມາເບິ່ງບາງເລື່ອງທີ່ພະເຢໂຫວາຊ່ວຍເຮົາໃຫ້ຮູ້ຈັກເພິ່ນໂດຍທາງຄຳພີໄບເບິນເຊິ່ງເຮັດໃຫ້ເຮົາປະທັບໃຈຫຼາຍ.
9. ມີຂໍ້ຄຳພີໃດແດ່ທີ່ບອກໃຫ້ເຮົາຮູ້ກ່ຽວກັບຄຸນລັກສະນະຂອງພະເຈົ້າ?
9 ຄຳພີໄບເບິນບອກໃຫ້ເຮົາຮູ້ກ່ຽວກັບຄຸນລັກສະນະຫຼາຍຢ່າງຂອງພະເຢໂຫວາ. ຕົວຢ່າງເຊັ່ນ: “ພະເຢໂຫວາຮັກຄວາມຍຸຕິທຳ.” (ເພງສັນລະເສີນ 37:28) ພະເຈົ້າ “ມີລິດເດດທີ່ຍິ່ງໃຫຍ່.” (ໂຢບ 37:23) “‘ເຮົາສັດຊື່ຕໍ່ເຈົ້າ’ ພະເຢໂຫວາເວົ້າໄວ້ແນວນີ້.” (ເຢເຣມີຢາ 3:12) “ເພິ່ນມີສະຕິປັນຍາ.” (ໂຢບ 9:4) ເພິ່ນເປັນ “ພະເຈົ້າທີ່ມີຄວາມເມດຕາ ໃຈດີ ບໍ່ໃຈຮ້າຍງ່າຍ ມີຄວາມຮັກທີ່ໝັ້ນຄົງຫຼາຍທີ່ສຸດ ແລະເວົ້າແຕ່ຄວາມຈິງ.” (ອົບພະຍົບ 34:6) “ພະເຢໂຫວາ ພະອົງດີແທ້ໆແລະພ້ອມທີ່ຈະໃຫ້ອະໄພ.” (ເພງສັນລະເສີນ 86:5) ຄືກັບທີ່ບົດແລ້ວນີ້ບອກວ່າ: “ພະເຈົ້າເປັນຄວາມຮັກ.” ຄວາມຮັກກໍເລີຍເປັນຄຸນລັກສະນະທີ່ເດັ່ນທີ່ສຸດຂອງເພິ່ນ. (1 ໂຢຮັນ 4:8) ເມື່ອຄິດເຖິງຄຸນລັກສະນະທີ່ໜ້າປະທັບໃຈເຫຼົ່ານີ້ຂອງພະເຢໂຫວາ ເຮົາກໍຢາກຈະໃກ້ຊິດກັບເພິ່ນຫຼາຍຂຶ້ນ.
10, 11. (ກ) ພະເຢໂຫວາໃຫ້ມີຕົວຢ່າງຫຍັງໃນຄຳພີໄບເບິນ ແລະຍ້ອນຫຍັງ? (ຂ) ໃນຄຳພີໄບເບິນມີຕົວຢ່າງຫຍັງທີ່ຊ່ວຍເຮົາໃຫ້ເຫັນວິທີທີ່ພະເຈົ້າໃຊ້ລິດເດດຂອງເພິ່ນ?
10 ໃນຄຳພີໄບເບິນ ພະເຢໂຫວາບໍ່ພຽງແຕ່ບອກໃຫ້ເຮົາຮູ້ວ່າເພິ່ນມີຄຸນລັກສະນະຫຍັງແດ່ ແຕ່ເພິ່ນຍັງໃຫ້ມີຕົວຢ່າງທີ່ເດັ່ນໆທີ່ເຮັດໃຫ້ເຮົາເຫັນຄຸນລັກສະນະຕ່າງໆຂອງເພິ່ນນຳ. ເມື່ອເຮົາອ່ານເລື່ອງເຫຼົ່ານັ້ນ ເຮົາກໍຈະຮູ້ວ່າພະເຢໂຫວາເປັນພະເຈົ້າແບບໃດ ເພິ່ນເຮັດຫຍັງແດ່ ແລະນີ້ກໍຈະຊ່ວຍເຮົາໃຫ້ໃກ້ຊິດກັບເພິ່ນຫຼາຍຂຶ້ນ. ໃຫ້ເຮົາມາເບິ່ງຕົວຢ່າງໜຶ່ງນຳກັນ.
ຄຳພີໄບເບິນຊ່ວຍເຮົາໃຫ້ໃກ້ຊິດກັບພະເຢໂຫວາ
11 ຄຳພີໄບເບິນບອກເຮົາວ່າພະເຈົ້າ “ມີລິດເດດຫຼາຍ.” (ເອຊາຢາ 40:26) ແຕ່ເມື່ອເຮົາອ່ານກ່ຽວກັບວິທີທີ່ພະເຢໂຫວາຊ່ວຍພວກອິດສະຣາເອນຂ້າມທະເລແດງ ແລະວິທີທີ່ເພິ່ນເບິ່ງແຍງເຂົາເຈົ້າໃຫ້ມີສິ່ງຈຳເປັນຕະຫຼອດ 40 ປີທີ່ຢູ່ບ່ອນກັນດານ ເຮົາກໍຮູ້ສຶກປະທັບໃຈຫຼາຍແທ້ໆໃນວິທີທີ່ເພິ່ນໃຊ້ລິດເດດຂອງເພິ່ນ. ລອງນຶກພາບເບິ່ງຕອນທີ່ນ້ຳທະເລແດງແຍກອອກຈາກກັນແລະຕັ້ງຂຶ້ນຄືກັບກຳແພງໃຫຍ່ທັງສອງຂ້າງ ແລ້ວມີປະມານ 3 ລ້ານຄົນກໍຍ່າງຢຽບດິນແຫ້ງໄປ. (ອົບພະຍົບ 14:21; 15:8) ນອກຈາກນັ້ນ ເຈົ້າຍັງໄດ້ເຫັນວິທີທີ່ພະເຈົ້າປົກປ້ອງແລະເບິ່ງແຍງຄົນຂອງເພິ່ນຢູ່ບ່ອນກັນດານ. ເພິ່ນເຮັດໃຫ້ນ້ຳໄຫຼອອກຈາກຫີນແລະໃຫ້ມີແນວກິນທີ່ເປັນເມັດຂາວໆຢູ່ຕາມໜ້າດິນຄ້າຍຄືເມັດຫອມປ້ອມ. (ອົບພະຍົບ 16:31; ຈົດເຊັນບັນຊີ 20:11) ເຫດການເຫຼົ່ານີ້ຊ່ວຍເຮົາໃຫ້ຮູ້ວ່າພະເຢໂຫວາບໍ່ພຽງແຕ່ມີລິດເດດ ແຕ່ເພິ່ນຍັງໃຊ້ລິດເດດນັ້ນເພື່ອຊ່ວຍຄົນຂອງເພິ່ນນຳ. ເຮົາໄດ້ກຳລັງໃຈຫຼາຍແທ້ໆທີ່ຮູ້ວ່າພະເຈົ້າທີ່ເຮົາອະທິດຖານຫາເປັນພະເຈົ້າທີ່ມີລິດເດດທີ່ຈະຊ່ວຍເຮົາ ແລະເພິ່ນ “ເປັນບ່ອນລີ້ໄພແລະເປັນກຳລັງຂອງພວກເຮົາ. ເພິ່ນຊ່ວຍພວກເຮົາສະເໝີຕອນທີ່ພວກເຮົາທຸກຍາກລຳບາກ.”—ເພງສັນລະເສີນ 46:1
12. ພະເຢໂຫວາຊ່ວຍເຮົາແນວໃດໃຫ້ “ເຫັນ” ເພິ່ນດ້ວຍຄຳເວົ້າທີ່ເຮົາເຂົ້າໃຈໄດ້?
12 ເຖິງວ່າພະເຢໂຫວາເປັນຜູ້ທີ່ເຮົາເບິ່ງບໍ່ເຫັນ ແຕ່ເພິ່ນກໍຊ່ວຍເຮົາໃຫ້ຮູ້ຈັກເພິ່ນ. ເຮົາເປັນມະນຸດ ເຮົາຈຶ່ງເຫັນໄດ້ແຕ່ສິ່ງທີ່ເປັນວັດຖຸເທົ່ານັ້ນ ແຕ່ເຮົາບໍ່ສາມາດເຫັນພະເຢໂຫວາພະເຈົ້າແລະສິ່ງທີ່ຢູ່ໃນສະຫວັນໄດ້. ຖ້າໃຫ້ພະເຈົ້າອະທິບາຍຮູບຮ່າງໜ້າຕາຂອງເພິ່ນໃຫ້ເຮົາຟັງວ່າເພິ່ນເປັນແບບໃດທັງໆທີ່ເຮົາເບິ່ງເພິ່ນບໍ່ເຫັນ ກໍຄືກັບວ່າເຮົາກຳລັງພະຍາຍາມຈະອະທິບາຍລາຍລະອຽດຮູບຮ່າງໜ້າຕາຂອງເຮົາເລື່ອງສີຕາ ຫຼືຈຸດດ່າງທີ່ຢູ່ໜ້າຂອງເຮົາໃຫ້ຄົນຕາບອດຕັ້ງແຕ່ເກີດຟັງ. ແຕ່ພະເຢໂຫວາກໍໃຈດີຫຼາຍ ເພິ່ນອະທິບາຍໃຫ້ເຮົາ “ເຫັນ” ວ່າເພິ່ນເປັນແນວໃດໃນແບບທີ່ເຮົາເຂົ້າໃຈໄດ້. ບາງເທື່ອ ເພິ່ນໃຊ້ຕົວຢ່າງປຽບທຽບເພິ່ນກັບສິ່ງທີ່ເຮົາຮູ້ຈັກ ແລະເພິ່ນຍັງອະທິບາຍກ່ຽວກັບໂຕເພິ່ນວ່າມີລັກສະນະບາງຢ່າງຄືກັບມະນຸດ. a
13. ໃນເອຊາຢາ 40:11 ເວົ້າເຖິງພະເຢໂຫວາແນວໃດ ແລະເລື່ອງນີ້ເຮັດໃຫ້ເຈົ້າຮູ້ສຶກແນວໃດ?
13 ຂໍໃຫ້ສັງເກດໃນເອຊາຢາ 40:11 ບອກກ່ຽວກັບພະເຢໂຫວາວ່າ: “ເພິ່ນຈະເບິ່ງແຍງແກະຂອງເພິ່ນຄືກັບຄົນລ້ຽງແກະເຮັດ. ເພິ່ນຈະຕ້ອນແກະຂອງເພິ່ນໃຫ້ມາຢູ່ນຳກັນ. ເພິ່ນຈະອູ້ມພວກມັນແລະກອດໄວ້ຢູ່ເອິກ.” ຂໍ້ນີ້ປຽບທຽບພະເຢໂຫວາຄືກັບຜູ້ລ້ຽງແກະທີ່ “ເອົາແຂນ, ໄຂເງື່ອນ” ອູ້ມແກະນ້ອຍຂຶ້ນມາ. ນີ້ສະແດງວ່າເພິ່ນຈະປົກປ້ອງແລະຊ່ວຍເຫຼືອຄົນຂອງເພິ່ນ ລວມທັງຄົນທີ່ຕ້ອງໄດ້ເບິ່ງແຍງເປັນພິເສດ. ເຮົາຈະຮູ້ສຶກປອດໄພໃນອ້ອມແຂນທີ່ແຂງແຮງຂອງພະເຢໂຫວາ ຍ້ອນວ່າຖ້າເຮົາສັດຊື່ຕໍ່ເພິ່ນ ເພິ່ນກໍຈະບໍ່ປະບໍ່ຖິ້ມເຮົາເລີຍ. (ໂຣມ 8:38, 39) ຜູ້ລ້ຽງແກະທີ່ຍິ່ງໃຫຍ່ອູ້ມແກະນ້ອຍ “ໄວ້ຢູ່ເອິກ.” ຄຳເວົ້ານີ້ເວົ້າເຖິງເສື້ອຄຸມໂຕຫຼົມໆທີ່ໃສ່ທາງນອກ. ບາງເທື່ອຜູ້ລ້ຽງແກະກໍຈະເອົາເສື້ອຄຸມນີ້ຫໍ່ແລະອູ້ມແກະນ້ອຍທີ່ຫາກໍເກີດໃໝ່. ດັ່ງນັ້ນ ເຮົາໝັ້ນໃຈໄດ້ວ່າພະເຢໂຫວາຈະເບິ່ງແຍງແລະທະນຸຖະໜອມເຮົາ. ນີ້ເລີຍເຮັດໃຫ້ເຮົາຢາກໃກ້ຊິດກັບເພິ່ນ.
ລູກຂອງພະເຈົ້າຢາກບອກໃຫ້ຮູ້ກ່ຽວກັບພໍ່
14. ພະເຢໂຫວາບອກເຮົາໃຫ້ຮູ້ຈັກເພິ່ນຢ່າງຈະແຈ້ງໂດຍທາງຜູ້ໃດ?
14 ໃນຄຳພີໄບເບິນ ພະເຢໂຫວາບອກເຮົາໃຫ້ຮູ້ຈັກເພິ່ນຢ່າງຈະແຈ້ງໂດຍທາງພະເຢຊູລູກຊາຍຜູ້ທີ່ເພິ່ນຮັກຫຼາຍ. ນອກຈາກພະເຢຊູ ແລ້ວບໍ່ມີໃຜຈະຮຽນແບບຄວາມຄິດແລະຄວາມຮູ້ສຶກຂອງພະເຈົ້າໄດ້ດີກວ່າພະເຢຊູ. ຍ້ອນຫຍັງ? ຍ້ອນເພິ່ນເປັນຜູ້ທຳອິດທີ່ຖືກສ້າງກ່ອນທຸກສິ່ງແລະຢູ່ໃນສະຫວັນກັບພໍ່ຂອງເພິ່ນບັກດົນໆກ່ອນຈະມີພວກທູດສະຫວັນແລະທຸກສິ່ງໃນເອກະພົບ. (ໂກໂລຊາຍ 1:15) ພະເຢຊູຮູ້ຈັກພະເຢໂຫວາດີທີ່ສຸດ. ດັ່ງນັ້ນ ເພິ່ນຈຶ່ງເວົ້າໄດ້ວ່າ: “ບໍ່ມີຜູ້ໃດຮູ້ຈັກລູກຂອງພະເຈົ້າ ນອກຈາກພະເຈົ້າຜູ້ເປັນພໍ່ ແລະບໍ່ມີຜູ້ໃດຮູ້ຈັກພະເຈົ້າຜູ້ເປັນພໍ່ ນອກຈາກລູກຂອງເພິ່ນແລະຜູ້ທີ່ລູກຂອງເພິ່ນຢາກບອກໃຫ້ຮູ້.” (ລູກາ 10:22) ຕອນທີ່ພະເຢຊູຢູ່ໃນໂລກນີ້ ເພິ່ນບອກໃຫ້ຮູ້ກ່ຽວກັບພໍ່ຂອງເພິ່ນໃນ 2 ວິທີທີ່ສຳຄັນ.
15, 16. ມີ 2 ວິທີຫຍັງແດ່ທີ່ພະເຢຊູບອກໃຫ້ຮູ້ກ່ຽວກັບພໍ່ຂອງເພິ່ນ?
15 ວິທີທຳອິດ ຄຳສອນຂອງພະເຢຊູຊ່ວຍເຮົາໃຫ້ຮູ້ຈັກພໍ່ຂອງເພິ່ນ. ພະເຢຊູເວົ້າເຖິງພະເຢໂຫວາດ້ວຍຄຳເວົ້າທີ່ກິນໃຈເຮົາ. ຕົວຢ່າງເຊັ່ນ: ເພິ່ນຊ່ວຍເຮົາໃຫ້ເຫັນວ່າພະເຢໂຫວາຮັກແລະເມດຕາຄົນເຮັດຜິດທີ່ກັບໃຈແລະມາຫາເພິ່ນຫຼາຍແທ້ໆ. ພະເຢຊູປຽບທຽບພະເຢໂຫວາວ່າເປັນຄືກັບພໍ່ທີ່ໃຫ້ອະໄພລູກ. ຕອນທີ່ລູກຊາຍກັບມາ ພໍ່ຮູ້ສຶກດີໃຈຫຼາຍຈົນແລ່ນເຂົ້າໄປຫາ ທັງກອດທັງຈູບລູກ. (ລູກາ 15:11-24) ນອກຈາກນັ້ນ ພະເຢຊູຍັງສອນວ່າພະເຢໂຫວາເປັນພະເຈົ້າທີ່ “ຊັກນຳ” ເອົາຄົນທີ່ມີຫົວໃຈດີຍ້ອນເພິ່ນຮັກເຂົາເຈົ້າແຕ່ລະຄົນເປັນສ່ວນໂຕ. (ໂຢຮັນ 6:44) ຂະໜາດວ່ານົກກະຈອກໂຕນ້ອຍໆໂຕໜຶ່ງຈະຕົກລົງດິນຕອນໃດເພິ່ນກໍຍັງຮູ້. ພະເຢຊູບອກວ່າ: “ບໍ່ຕ້ອງຢ້ານ ຍ້ອນພວກເຈົ້າມີຄ່າຫຼາຍກວ່ານົກກະຈອກຫຼາຍໂຕລວມກັນ.” (ມັດທາຍ 10:29, 31) ນີ້ຈຶ່ງເຮັດໃຫ້ເຮົາຢາກໃກ້ຊິດກັບພະເຈົ້າຜູ້ທີ່ເປັນຫ່ວງເຮົາແທ້ໆ.
16 ວິທີທີ 2 ຕົວຢ່າງຂອງພະເຢຊູສະແດງໃຫ້ເຫັນວ່າພະເຢໂຫວາເປັນພະເຈົ້າແບບໃດ. ພະເຢຊູຮຽນແບບພໍ່ຂອງເພິ່ນໄດ້ຢ່າງສົມບູນແບບ ເພິ່ນຈຶ່ງເວົ້າວ່າ: “ຜູ້ທີ່ໄດ້ເຫັນຂ້ອຍກໍໄດ້ເຫັນພະເຈົ້າຜູ້ເປັນພໍ່.” (ໂຢຮັນ 14:9) ດັ່ງນັ້ນ ເມື່ອເຮົາອ່ານໃນຄຳພີໄບເບິນວ່າພະເຢຊູຮູ້ສຶກແລະເຮັດຕໍ່ຄົນອື່ນແນວໃດ ກໍຄືກັບວ່າເຮົາໄດ້ເຫັນພະເຢໂຫວາເປັນແບບນັ້ນແຫຼະ. ນີ້ເປັນວິທີທີ່ດີທີ່ສຸດທີ່ພະເຢໂຫວາຊ່ວຍເຮົາໃຫ້ຮູ້ວ່າເພິ່ນເປັນພະເຈົ້າແບບໃດ. ເປັນຫຍັງຈຶ່ງເວົ້າແນວນັ້ນ?
17. ຂໍໃຫ້ຍົກຕົວຢ່າງສິ່ງທີ່ພະເຢໂຫວາເຮັດເພື່ອຊ່ວຍເຮົາໃຫ້ເຂົ້າໃຈວ່າເພິ່ນເປັນພະເຈົ້າແບບໃດ.
17 ເພື່ອເປັນຕົວຢ່າງ ຖ້າມີຄົນຖາມເຈົ້າວ່າຄວາມເມດຕາເປັນແນວໃດ ເຈົ້າອາດຈະອະທິບາຍກັບລາວເປັນຄຳເວົ້າກໍໄດ້. ແຕ່ຖ້າເຈົ້າຊີ້ໃຫ້ລາວເຫັນຄົນທີ່ສະແດງຄວາມເມດຕາແລະບອກວ່າ “ຄວາມເມດຕາເປັນແບບນັ້ນແຫຼະ.” ລາວກໍຈະເຂົ້າໃຈຄວາມໝາຍຂອງ “ຄວາມເມດຕາ” ງ່າຍຂຶ້ນແລະແຈ້ງຂຶ້ນ. ພະເຢໂຫວາເຮັດແບບນັ້ນເພື່ອຊ່ວຍເຮົາໃຫ້ເຂົ້າໃຈວ່າເພິ່ນເປັນພະເຈົ້າແບບໃດ. ເພິ່ນບໍ່ພຽງແຕ່ບອກໃຫ້ເຮົາຮູ້ຈັກເພິ່ນໂດຍທາງຄຳເວົ້າເທົ່ານັ້ນ ແຕ່ເພິ່ນຍັງອະທິບາຍໂດຍໃຊ້ຕົວຢ່າງຂອງພະເຢຊູລູກຊາຍຂອງເພິ່ນທີ່ບັນທຶກໄວ້ໃນປຶ້ມຂ່າວດີທັງສີ່ຫົວ. ພະເຢຊູຊ່ວຍເຮົາໃຫ້ຮູ້ຄຸນລັກສະນະຂອງພະເຈົ້າໄດ້ຈາກສິ່ງທີ່ພະເຢຊູເຮັດ. ເມື່ອເຮົາອ່ານເລື່ອງເຫຼົ່ານັ້ນກໍຄືກັບພະເຢໂຫວາກຳລັງບອກເຮົາວ່າ: “ເຮົາເປັນແບບນັ້ນແຫຼະ.” ຄຳພີໄບເບິນບອກໃຫ້ເຮົາຮູ້ຫຍັງແດ່ກ່ຽວກັບພະເຢຊູຕອນທີ່ເພິ່ນຢູ່ໃນໂລກ?
18. ພະເຢຊູສະແດງໃຫ້ເຫັນແນວໃດວ່າມີລິດເດດ ຄວາມຍຸຕິທຳ ແລະສະຕິປັນຍາ?
18 ພະເຢຊູສະແດງໃຫ້ເຫັນຄຸນລັກສະນະເດັ່ນ 4 ຢ່າງຂອງພະເຈົ້າໃນແບບທີ່ໜ້າປະທັບໃຈ. ພະເຢຊູມີລິດເດດທີ່ຈະເຮັດການອັດສະຈັນເພື່ອປົວຄົນເຈັບປ່ວຍ ລ້ຽງຄົນທີ່ຫິວ ແລະປຸກຄົນທີ່ຕາຍໃຫ້ຄືນມາມີຊີວິດ. ບໍ່ຄືກັບມະນຸດທີ່ເຫັນແກ່ໂຕເຊິ່ງໃຊ້ອຳນາດໃນທາງທີ່ຜິດ ພະເຢຊູບໍ່ເຄີຍໃຊ້ລິດເດດເຮັດການອັດສະຈັນເພື່ອໂຕເອງຫຼືທຳຮ້າຍຜູ້ອື່ນ. (ມັດທາຍ 4:2-4) ເພິ່ນຮັກຄວາມຍຸຕິທຳ. ເມື່ອເຫັນພວກພໍ່ຄ້າຂີ້ໂລບຂູດຮີດເອົາເງິນປະຊາຊົນຢູ່ວິຫານ ເພິ່ນກໍໃຈຮ້າຍໃນແບບທີ່ເໝາະສົມ. (ມັດທາຍ 21:12, 13) ເພິ່ນປະຕິບັດກັບຄົນທຸກແລະຄົນທີ່ຖືກດູຖູກແບບບໍ່ລຳອຽງ ແລະຊ່ວຍເຂົາເຈົ້າໃຫ້ “ສົດຊື່ນ.” (ມັດທາຍ 11:4, 5, 28-30) ບໍ່ມີຄົນໃດສອນແບບມີສະຕິປັນຍາຄືກັບພະເຢຊູແມ່ນແຕ່ໂຊໂລໂມນກໍຍັງທຽບເພິ່ນບໍ່ໄດ້. (ມັດທາຍ 12:42) ແຕ່ພະເຢຊູບໍ່ເຄີຍອວດສະຕິປັນຍາຂອງເພິ່ນ. ຄຳສອນຂອງເພິ່ນເຂົ້າເຖິງຫົວໃຈຄົນທົ່ວໄປ ຍ້ອນເພິ່ນສອນຈະແຈ້ງ ເຂົ້າໃຈງ່າຍ ແລະເອົາໄປໃຊ້ໄດ້ແທ້ໆ.
19, 20. (ກ) ພະເຢຊູເປັນຕົວຢ່າງທີ່ດີແນວໃດໃນການສະແດງຄວາມຮັກ? (ຂ) ຕອນທີ່ອ່ານແລະຄິດເຖິງວິທີທີ່ພະເຢຊູເຮັດດີຕໍ່ຄົນອື່ນ ເຮົາຄວນຈື່ຫຍັງໄວ້ສະເໝີ?
19 ພະເຢຊູເປັນຕົວຢ່າງທີ່ດີໃນການສະແດງຄວາມຮັກ. ຕອນທີ່ເຮັດວຽກຮັບໃຊ້ ເພິ່ນສະແດງຄວາມຮັກໃນຫຼາຍວິທີ. ເພິ່ນເຫັນອົກເຫັນໃຈແລະອີ່ຕົນຄົນອື່ນ. ເມື່ອເຫັນຄົນທີ່ເຈັບປວດ ເພິ່ນກໍອີ່ຕົນເຂົາເຈົ້າຫຼາຍ. ເພິ່ນບໍ່ໄດ້ມີແຕ່ອີ່ຕົນຊື່ໆ ແຕ່ເພິ່ນໄດ້ເຮັດບາງຢ່າງເພື່ອຊ່ວຍເຂົາເຈົ້ານຳ. (ມັດທາຍ 14:14) ພະເຢຊູບໍ່ໄດ້ມີແຕ່ປົວຄົນປ່ວຍແລະລ້ຽງຄົນທີ່ຫິວ ແຕ່ເພິ່ນຍັງຊ່ວຍເຂົາເຈົ້າໃນເລື່ອງທີ່ສຳຄັນກວ່ານັ້ນ. ເພິ່ນໄດ້ຊ່ວຍເຂົາເຈົ້າໃຫ້ຮູ້ຈັກ ຍອມຮັບ ແລະຮັກຄວາມຈິງເລື່ອງການປົກຄອງຂອງພະເຈົ້າທີ່ຈະເຮັດໃຫ້ມະນຸດໄດ້ຮັບພອນແທ້ໆ. (ມາຣະໂກ 6:34; ລູກາ 4:43) ສິ່ງທີ່ສຳຄັນທີ່ສຸດ ພະເຢຊູໄດ້ສະແດງຄວາມຮັກໂດຍຕາຍເພື່ອເປັນຄ່າໄຖ່ໃຫ້ເຮົາ.—ໂຢຮັນ 15:13
20 ພະເຢຊູເປັນຄົນທີ່ສະແດງຄວາມຮັກແບບອົບອຸ່ນແລະເຫັນອົກເຫັນໃຈຄົນອື່ນ ບໍ່ແປກທີ່ຄົນທຸກເພດທຸກໄວແລະທຸກພູມຫຼັງຢາກເຂົ້າມາໃກ້ຊິດກັບເພິ່ນ. (ມາຣະໂກ 10:13-16) ຕອນທີ່ເຮົາອ່ານແລະຄິດເຖິງວິທີທີ່ພະເຢຊູເຮັດດີຕໍ່ຄົນອື່ນ ຂໍໃຫ້ຈື່ໄວ້ສະເໝີວ່າພະເຢຊູກຳລັງຊ່ວຍເຮົາໃຫ້ເຫັນວ່າພະເຢໂຫວາເປັນພະເຈົ້າແບບໃດ.—ເຮັບເຣີ 1:3
ປຶ້ມນີ້ຈະຊ່ວຍເຮົາແນວໃດ?
21, 22. ການຊອກຫາພະເຢໂຫວາໝາຍຄວາມວ່າແນວໃດ ແລະປຶ້ມນີ້ຈະຊ່ວຍເຮົາແນວໃດ?
21 ໃນຄຳພີໄບເບິນ ພະເຢໂຫວາບອກໃຫ້ເຮົາຮູ້ກ່ຽວກັບໂຕເພິ່ນຢ່າງຈະແຈ້ງ ນີ້ເຮັດໃຫ້ເຮົາໝັ້ນໃຈວ່າເພິ່ນຢາກໃຫ້ເຮົາໃກ້ຊິດກັບເພິ່ນແທ້ໆ. ແຕ່ພະເຢໂຫວາກໍບໍ່ໄດ້ບັງຄັບເຮົາໃຫ້ມາເປັນໝູ່ກັບເພິ່ນ. ເຮົາສາມາດເລືອກໄດ້ເອງວ່າຢາກຈະຊອກຫາພະເຢໂຫວາບໍ່ “ຕອນທີ່ຍັງຊອກຫາເພິ່ນເຫັນຢູ່.” (ເອຊາຢາ 55:6) ການຊອກຫາພະເຢໂຫວາໝາຍຄວາມວ່າເຮົາຕ້ອງຮຽນຮູ້ຕໍ່ໆໄປກ່ຽວກັບຄຸນລັກສະນະແລະແນວທາງຂອງເພິ່ນຕາມທີ່ບອກໄວ້ໃນຄຳພີໄບເບິນ. ປຶ້ມທີ່ເຈົ້າກຳລັງອ່ານຢູ່ນີ້ຈະຊ່ວຍເຈົ້າໃຫ້ເຮັດແບບນັ້ນໄດ້.
22 ເຈົ້າຈະເຫັນວ່າປຶ້ມນີ້ແບ່ງອອກເປັນ 4 ຕອນຕາມຄຸນລັກສະນະເດັ່ນ 4 ຢ່າງຂອງພະເຢໂຫວາເຊິ່ງມີລິດເດດ ຄວາມຍຸຕິທຳ ສະຕິປັນຍາ ແລະຄວາມຮັກ. ແຕ່ລະຕອນເລີ່ມຈາກການເວົ້າເຖິງຄຸນລັກສະນະນັ້ນແບບລວມໆ ແລະບົດຕໍ່ໆໄປຈະບອກໃຫ້ຮູ້ວ່າພະເຢໂຫວາສະແດງຄຸນລັກສະນະນັ້ນແນວໃດໃນແງ່ມຸມຕ່າງໆ. ນອກຈາກນັ້ນ ໃນແຕ່ລະຕອນຈະມີບົດໜຶ່ງທີ່ຊ່ວຍເຮົາໃຫ້ເຫັນວ່າພະເຢຊູສະແດງຄຸນລັກສະນະນັ້ນແນວໃດ ແລະຍັງຈະມີອີກບົດໜຶ່ງທີ່ຊ່ວຍເຮົາໃຫ້ຮູ້ວ່າເຮົາຈະຮຽນແບບຄຸນລັກສະນະນັ້ນແນວໃດ.
23, 24. (ກ) ຂໍໃຫ້ອະທິບາຍກ່ຽວກັບຂອບທີ່ຊື່ “ຄຳຖາມເພື່ອຄິດຕຶກຕອງ.” (ຂ) ການຄິດຕຶກຕອງຊ່ວຍເຮົາໃຫ້ໃກ້ຊິດພະເຢໂຫວາຫຼາຍຂຶ້ນແນວໃດ?
23 ເລີ່ມກັບບົດນີ້ມີຂອບທີ່ຊື່ວ່າ “ຄຳຖາມເພື່ອຄິດຕຶກຕອງ.” ຕົວຢ່າງເຊັ່ນ ໃນ ຂອບໜ້າ 24 ມີຂໍ້ຄຳພີແລະຄຳຖາມຕ່າງໆເພື່ອຊ່ວຍເຈົ້າໃຫ້ຄິດເລິກເຊິ່ງຫຼາຍຂຶ້ນກ່ຽວກັບສິ່ງທີ່ໄດ້ຮຽນ. ເຈົ້າຈະໄດ້ປະໂຫຍດຈາກຂອບນີ້ແນວໃດ? ໃຫ້ອ່ານຂໍ້ຄຳພີແຕ່ລະຂໍ້ ເບິ່ງຄຳຖາມທີ່ຢູ່ກັບຂໍ້ເຫຼົ່ານັ້ນ ແລ້ວຄິດຄັກໆກ່ຽວກັບຄຳຕອບ. ເຈົ້າອາດຈະຕ້ອງໄດ້ຄົ້ນຄວ້າແລະຖາມໂຕເອງຕື່ມວ່າ ‘ເລື່ອງທີ່ຂ້ອຍອ່ານບອກຫຍັງກ່ຽວກັບພະເຢໂຫວາ? ຂ້ອຍຈະເອົາຂໍ້ນີ້ໄປໃຊ້ໃນຊີວິດແນວໃດ? ຂ້ອຍຈະໃຊ້ຄວາມຮູ້ນີ້ເພື່ອຊ່ວຍຄົນອື່ນໄດ້ແນວໃດ?’
24 ການຄິດຕຶກຕອງແບບນີ້ຈະຊ່ວຍເຮົາໃຫ້ໃກ້ຊິດກັບພະເຢໂຫວາຫຼາຍຂຶ້ນອີກ. ຍ້ອນຫຍັງ? ຄຳພີໄບເບິນສະແດງໃຫ້ເຫັນວ່າການຄິດຕຶກຕອງກ່ຽວຂ້ອງກັບຫົວໃຈ. (ເພງສັນລະເສີນ 19:14) ເມື່ອເຮົາຄິດຕຶກຕອງໃນສິ່ງທີ່ເຮົາໄດ້ຮຽນຮູ້ກ່ຽວກັບພະເຢໂຫວາ ເຮົາຈະເລີ່ມຄິດຄືກັບເພິ່ນ ແລະຄວາມຮູ້ນັ້ນຈະກະຕຸ້ນເຮົາໃຫ້ລົງມືເຮັດ. ເຮົາຈະຮັກເພິ່ນຫຼາຍຂຶ້ນ ແລະເຮົາຈະຖືກກະຕຸ້ນໃຫ້ເຮັດໃນສິ່ງທີ່ເພິ່ນພໍໃຈຍ້ອນເພິ່ນເປັນໝູ່ທີ່ເຮົາຮັກຫຼາຍ. (1 ໂຢຮັນ 5:3) ເພື່ອຈະເປັນໝູ່ສະໜິດກັບພະເຢໂຫວາ ເຮົາຕ້ອງຮູ້ວ່າເພິ່ນເປັນພະເຈົ້າແບບໃດແລະເພິ່ນເຮັດຫຍັງແດ່. ທຳອິດ ໃຫ້ເຮົາມາຮຽນຮູ້ກ່ຽວກັບຄວາມບໍລິສຸດຂອງພະເຢໂຫວາເຊິ່ງກະຕຸ້ນເຮົາໃຫ້ຢາກໃກ້ຊິດກັບເພິ່ນ.
a ຕົວຢ່າງຄຳພີໄບເບິນເວົ້າເຖິງໜ້າ ຕາ ຫູ ຮູດັງ ປາກ ແຂນ ແລະຕີນຂອງພະເຈົ້າ. (ເພງສັນລະເສີນ 18:15; 27:8, ໄຂເງື່ອນ; 44:3; ເອຊາຢາ 60:13; ມັດທາຍ 4:4; 1 ເປໂຕ 3:12) ແຕ່ບໍ່ຄວນເຂົ້າໃຈວ່າພະເຢໂຫວາມີໜ້າ ຕາ ຫູ ຮູດັງ ປາກ ແຂນ ແລະຕີນແທ້ໆຄືກັບທີ່ເພິ່ນບໍ່ໄດ້ເປັນ “ຫີນຜາ” ຫຼື “ໂລ້” ຕາມໂຕ.—ພະບັນຍັດ 32:4; ເພງສັນລະເສີນ 84:11
