1, 2. (a) Vishinganyeka muka vatwama navyo vatu vavavulu, oloze vyuma muka yatufwelelesa Mbimbiliya? (b) Uno Yehova avulukile Apalahama ngwenyi apwile iya, kaha mwomwo ika?

 NAWIVWA ngachilihi nge Tengi wamelu namavu mwakwinyika ngwenyi, “Ou hisepa lyami”? Vatu vavavulu vanahase kushinganyeka ngwavo chuma kana kacheshi kusolokako. Veji kwambanga ngwavo mutu keshi kuhasa kutunga usepa naYehova Kalungako. Oloze Mbimbiliya yatufwelelesa ngwayo tunahase kupandama kuli ikiye.

² Kushikulu Apalahama apwile mutu uze apandamine kuli Kalunga, kaha Yehova amuvulukile ngwenyi “sepa lyami.” (Isaya 41:8) Chikupu vene, Yehova amwene Apalahama kupwa hisepa lyenyi. Apalahama apwile nausepa kanou mwomwo “afwelelele Yehova.” (WaYakova 2:23) Namakumbi ano, Yehova ali nakusaka kutunga usepa navaze veji kumuzachilanga “nakuvazanga.” (Lushimbi lwamuchivali 10:15) Mazu enyi atukolezeza ngwawo: “Pandamenu kuli Kalunga, kaha mwapandama kuli enu.” (WaYakova 4:8) Uno awa mazu alumbununa ika?

3. Uno Yehova atulweza tulinge ika, kaha lushiko muka atushika?

³ Yehova atulweza tupandame kuli ikiye. Alizanga kutwitavila kupwa tumasepa jenyi. Kaha nawa atushika ngwenyi kachi nge natupandama kuli ikiye, kaha naikiye mwapandama kuli yetu. Ngocho tunahase kupwa nausepa wamwaza naYehova, usepa uze wapwa wakulipwila. (Samu 25:14) Kupwa “nausepa wakukola” chasakiwa  kupwa namutu uze naushimutwila nenyi vyuma vyakusweka.

4. Uno usepa wakukola wapwa ngachilihi, kaha mujila muka Yehova eji kulisolwelangamo kupwa sepa wamwenemwene kuli vaze veji kupandamanga kuli ikiye?

⁴ Uno uli nasepa wamwenemwene uze unahase kushimutwila nenyi vihande vyakusweka tahi? Sepa wangana napu hisepa uze akuzakama chikupu. Mutu kana wamufwelela mwomwo apwa wakushishika kuli yove. Weji kwivwanga kuwaha chikuma hakumulweza vyuma vize vyeji kukwivwisanga kuwaha. Kaha nge uli nakumulweza vyuma vize vinakwivwisa kupihya, eji kwivwililanga kanawa nakwivwishisa omwo uli nakwivwa. Sepa lyove nahase kukwivwishisa kanawa numba tuhu kakweshi mutu mwakwivwishisa kanawako. Chochimwe nawa, kachi nge naupandama kuli Kalunga kaha naupwa nasepa wamwenemwene uze akumona kupwa uwamulemu nakukuzakama nakukwivwishisa. (Samu 103:14; WaPetulu 1, 5:7) Ngocho naumufwelela namuchima wove wosena mwomwo unatachikiza ngwove apwa wakushishika kuli vaze vapwa vakushishika kuli ikiye. (Samu 18:25) Shikaho tunahase kutunga usepa naKalunga mwomwo asaka tupandame kuli ikiye.

5. Vyuma muka alingile Yehova mangana tuchiwane kupwa chachashi kupandama kuli ikiye?

⁵ Hakuwana nge twapwa tuvaka-shili, ngocho katweshi kuhasa kupandama kuli Kalunga nge keshi kutukafwako. (Samu 5:4) Paulu asonekele ngwenyi: “Kalunga asolola lyehi zangi yenyi kuli etu, mwomwo shimbu twapwilenga tuvaka-shili, Kulishitu atufwilile.” (Wavaka-Loma 5:8) Chikupu vene, Yehova atumine Yesu hano hamavu mangana ahane “mwono wenyi  kupwa ndando yakusokola vavavulu.” (Mateu 20:28) Shikaho kufwelela ndando yakusokola mwachimuna wakuvatula, chinahase kutulingisa tupandame kuli Kalunga. Hakuwana nge Kalunga “ikiye alivangile kutuzanga etu” ngocho chapwa chachashi kupwa tumasepa jenyi.—WaYowano 1, 4:19.

6, 7. (a) Uno tunatachikiza ngachilihi ngwetu Yehova kalisweka kuli yetuko? (b) Uno Yehova alisolola ngachilihi kuli yetu?

⁶ Yehova natulingila nawa chuma chikwavo chize chatulingisa tupwenga tumasepa jenyi. Natunangula vyavivulu vyakutalisa kuli ikiye. Hakusaka tupandame chikuma kuli mutu, chasakiwa kuzanga vilinga vyenyi najila eji kulingilangamo vyuma. Shikaho nge Yehova aliswekele kuli yetu nakuhona kutunangula, kachi chapwa chachikalu kupandama kuli ikiye. Ngocho muchishishisa chakulisweka, alisolola hatoma mwomwo asaka tumutachikize. (Isaya 45:19) Kaha nawa alisolola kuli vatu vosena nakuli vaze vamona mukaye ngwavo vapwa vamokomoko.—Mateu 11:25.

⁷ Uno Yehova alisolola ngachilihi kuli yetu? Alisolola kuhichila muvyuma atenga mwomwo vyasolola vilinga vyenyi. Vilinga kana shina ngolo, namangana, nazangi yenyi. (Wavaka-Loma 1:20) Kaha nawa Yehova atulweza vyavivulu hali ivene muMazu enyi, Mbimbiliya.

8. Mwomwo ika natwambila ngwetu Mbimbiliya yasolola hatoma nge Yehova atuzanga?

⁸ Jila vasonekelamo Mbimbiliya yasolola zangi atwama nayo Yehova hali yetu. Alisolola kuli yetu mujila yayashi kuhichila Mazu enyi. Kaha echi chasolola nge atuzanga, kaha nawa asaka nayetu tumutachikize nakumuzanga. Vyuma tweji kutanganga mumukanda kanou waulemu  vyeji kutukafwanga tupandame kuli Kalunga. (Samu 1:1-3) Tuchishimutwileko jijila jimwe jamwaza jize Yehova alisolwelamo kuhichila muMazu enyi.

9. Mazu muka amwe amuMbimbiliya aze asolola vilinga vyaKalunga?

⁹ MuVisoneka mwatwama mazu aze asolola vilinga vyaKalunga. Tuchitale havyakutalilaho vimwe. Mbimbiliya ngwayo, “Yehova azanga chiyulo.” (Samu 37:28) “Atwama nangolo jajinene.” (Yopa 37:23) “HiKalunga wakushishika.” (Lushimbi lwamuchivali 7:9) “Apwa wamangana.” (Yopa 9:4) Apwa “Kalunga wakeke nakutetela, wakushipwokela kukwata utenu, wazangi yakwilila, wamuchano.” (Kulovoka 34:6) “Ove Yehova wapwa uwamwaza, kaha weji kukonekelanga.” (Samu 86:5) Kaha nawa ngana muze twavulukanga mukapetulu nafumuho, zangi yikiko yapwa yayilemu chikuma havilinga vyosena mwomwo “Kalunga Ikiye zangi.” (WaYowano 1, 4:8) Kachi nge natushinganyekanga hakuwaha chaYehova Kalunga, kaha natupandama kuli ikiye.

10, 11. (a) Uno vyuma muka vize Yehova ahaka muMazu enyi, kaha mwomwo ika? (b) Chakutalilaho muka chamuMbimbiliya chize chasolola nge Kalunga atwama nangolo?

¹⁰ Hakuwana nge Yehova natulweze vilinga vyenyi, ngocho natusolwela nawa vyakutalilaho mumazu enyi vize vyasolola mujila nasolwelangamo vilinga kana. Vyakutalilaho kana vinahase kutukafwa tutachikize  kanawa omwo apwa. Echi nachitukafwa tupandame kuli ikiye. Achishinganyeke hachakutalilaho chino.

¹¹ Mbimbiliya yatulweza ngwayo, Kalunga “atwama nangolo jajinene jakukomwesa.” (Isaya 40:26) Nge natutanga mujimbu wakusolola omwo Yehova ayowele vaIsalele haKalungalwiji Uchila nakuvazakama mupambo hamyaka 40, kaha natulikomokela hakumona omwo Yehova azachishile ngolo jenyi. Achishinganyeke uli nakumona omwo meya ali nakulipangununa oku ali nakunganjanga. Jino shinganyeka havatu kafwe 3,000,000 navatambuka mukachi kakalungalwiji hamavu aumu, oku meya anemana nge jimbango jajinene kusali nasali. (Kulovoka 14:21; 15:8) Shinganyeka nawa omwo Kalunga akingile vatu jenyi nakuvazakama kanawa mupambo. Meya apwilenga nakulovoka mulilolwa. Valilenga kulya chize chasolokelenga nge mbuto jitoma, chize vanonelenga hamavu. (Kulovoka 16:31; Kulava 20:11) Yehova alisolwele ngwenyi akwechi ngolo kaha nawa eji kujizachisanga akafwe vatu jenyi. Echi cheji kutwivwisanga kuwaha mwomwo twatachikiza ngwetu kulomba chetu cheji kuyanga kuli Kalunga wangolo chikuma uze apwa “uchinyino wetu, [kaha nawa] ngolo jetu, [uze] alizanga kutukafwa mulwola lwaluyando.”—Samu 46:1.

12. Uno Yehova eji kutukafwanga ngachilihi mangana ‘tumumone’ mujila yize natwivwishisa kanawa?

¹² Yehova, uze apwa Shipilitu, nalingi vyuma vyavivulu vyakutukafwa mangana tumutachikize. Hakuwana nge yetu vatu tweji kumonanga kaha vyuma twamona nameso, ngocho katweshi kuhasa kumona Kalungako mwomwo apwa Shipilitu. Chipwe ngocho, Yehova eji kutukafwanga ‘tumumone’ mujila yize natwivwishisa kanawa. Shimbu jimwe, eji kuzachisanga vifwanyisa, nakulifwanyisa ivene kuvyuma vize twatachikiza. Kaha  alilumbununa kwijiva nge atwama navilyo vimwe vyamujimba vize atwama navyo mutu. a

13. Uno chisoneka chaIsaya 40:11 chalumbununa ngachilihi omu apwa Yehova, kahechi chakulingisa ufwile kulinga ika?

¹³ Achitale omu Yehova vamulumbununa hali Isaya 40:11 ngwavo: “Mwakazakamanga utanga wenyi nge muze eji kulinganga kafunga. Mwakakungulula vana vamikoko nalivoko lyenyi, kaha mwakavambachila hatulo yenyi.” Hano Yehova vamufwanyisa kukafunga uze eji kukungululanga vana vamikoko “nalivoko lyenyi.” Echi chili nakusolola nge Kalunga atwama nauhashi wakukinga vatu jenyi nakuvazakama, kuhakilako vene navaze vanakalikiza chikuma. Tunahase kupwa tuvakukingiwa mumavoko enyi angolo, mwomwo keshi kukatusezako kachi nge natutwalaho lika kupwa vakushishika kuli ikiye. (Wavaka-Loma 8:38, 39) Ou Kafunga Wamunene eji kuvelekanga vana vamikoko “hatulo yenyi.” Lizu “hatulo” lyatalisa kulihina lyahelu lyauvwalo wakafunga lize shimbu jimwe kafunga nahase kuzachisa kupwa ngoji yakumbachilamo mwanamukoko uze nasemuka. Ngocho Yehova atufwelelesa ngwenyi atuzanga, kaha nawa atuzakama. Echi chatulingisa tufwile kupandama kuli ikiye.

14. Mwomwo ika natwambila ngwetu Yehova alisolola hatoma kuhichila muli Yesu?

¹⁴ Yehova alisolola hatoma muMazu enyi kuhichila  muli Mwanenyi Yesu, uze azanga chikuma. Naumwe wauchi nahase kulondezeza kanawa vishinganyeka vyaKalunga nomwo eji kwivwanga, chipwe kumulumbununa kanawa omwo apwa, ngana muze alingile Yesuko. Chakutamo ou MwanaKalunga watwatwa kulinga ngocho, mwomwo kwapwile shimbu kanda vatenge vangelo chipwe vyuma vyakutenga vyosena. (Wavaka-Kolose 1:15) Yesu atachikijile kanawa Yehova. Shikaho ahanjikile ngwenyi: “Kakweshi mutu amutachikiza Mwanako, shina Tata kaha. Kaha nawa kakweshi mutu amutachikiza Tatako, shina Mwana kaha, naweshowo nawa navazanga kumusolwelayo kuli Mwana.” (Luka 10:22) Omu Yesu apwile hano hamavu, asolwele omwo apwa Ise. Alingile ngocho mujijila jivali jajilemu.

15, 16. Mujijila muka jivali jize Yesu asolwelelemo Ise?

¹⁵ Jila yatete shina, kunangula chaYesu chatukafwa tutachikize Ise. Yesu alumbununa Yehova mujila yize yatuheta kumichima. Chakutalilaho, hakusaka alumbunune muchima wakeke atwama nawo Kalunga uze eji kwitavilanga vaka-shili vaze navapihilila nakwalumuka, Yesu afwanyishile Yehova kuchisemi muka-kukonekela uze asambililile mwanenyi uze apitukile, nakumupakata mukasamba nakumusweswenya. (Luka 15:11-24) Yesu asolola nawa Yehova kupwa hiKalunga uze eji ‘kukokanga’ vatu vamichima yamwaza mwomwo avazanga mutu himutu. (Yowano 6:44) Yehova atachikiza nakajilili wamundende uze naholoka hamavu. Yesu alumbunwine ngwenyi: “Kanda namwivwa womako. Enu mwapwa muvavalemu kuhambakana tujilili vavavulu.” (Mateu 10:29, 31) Chikupu vene, twafwila kupandama kuli ou Kalunga wamuchima wakuzakama.

¹⁶ Jila yamuchivali shina, chakutalilaho chaYesu chatukafwa  tutachikize omwo apwa Yehova. Yesu asolwele kanawa omwo apwa Ise, kahechi chamulingishile ambenga ngwenyi: “Weshowo nangumono ami namono naTata nawa.” (Yowano 14:9) Shikaho, omu tweji kutanganga mijimbu yaYesu muMikanda yaMujimbu Wamwaza, tweji kutachikizanga vilinga asolwele nomwo amwenenenengamo vatu. Kahechi cheji kutulingisa tumone omwo apwa Ise. Eyi hijila yamwenemwene yize Yehova alisolwelamo omwo apwa. Mwomwo ika tunambila ngocho?

17. Hana chakutalilaho chasolola vyuma nalingi Yehova mangana atukafwe twivwishise kanawa omwo apwa.

¹⁷ Chakutalilaho: Achishinganyeke uli nakusaka kulumbununa lizu likoji. Pamo unahase kulumbununa kuzachisa mazu. Oloze nge nawinyika mutu uze ali nakusolola likoji nakwamba ngwove, “Talenu mutu uze ali nakusolola likoji,” kaha echi nachilingisa mutu evwishise kanawa ulumbunwiso walizu “likoji.” Omu mukiko nalingi Yehova mangana atukafwe  twivwishise kanawa omwo apwa. Muchishishisa chakutulumbunwina kaha mumazu omwo apwa, oloze nalilumbununa nawa kuli yetu kuhichila muli Mwanenyi. Vyuma alingilenga Yesu vyasolwelenga vilinga vyaKalunga. Echi chasolola kwijiva nge Yehova ali nakutulweza kuhichila muMikanda yaMujimbu Wamwaza, ngwenyi: “Omu mukiko ngwapwa.” Uno mijimbu vahwima yalumbununa ngachilihi Yesu omu apwile hano hamavu?

18. Uno Yesu asolwele ngachilihi ngolo, nachiyulo namangana?

¹⁸ Yesu asolola vilinga viwana vyakulipwila vyaKalunga mujila yamwenemwene. Apwile nangolo jakuka vatu, nakulisa vatu, nakusangula vafu. Yesu alihandununa navatu vaze veji kuzachisanga ngolo javo mujila yakuhenga, mwomwo ikiye kalingilenga vyuma vyakukomwesa mangana alinganyalise ivene chipwe akaluhwise chiyoyelo chavakwavoko. (Mateu 4:2-4) Azangile chiyulo. Apihililile chikuma omu amwene vaka-kusekasana vali nakulanjisa vyuma mutembele handando yayinene chikuma. (Mateu 21:12, 13) Azakaminenga vaka-kukalikiza navaze vanahombo, nakuvakafwa ‘vapwenga vakuhizumuka.’ (Mateu 11:4, 5, 28-30) Yesu uze “ahambakana Solomone” anangwilenga vyuma vyamangana chikuma. (Mateu 12:42) Oloze Yesu kapwilenga nakulitukwojola mwomwo yakupwa namanganako. Vyuma ahanjikilenga vyahetelenga kumichima yavatu vosena, mwomwo anangwilenga mujila yayashi, yakwivwakana, kaha nawa yakuvanganyalisa.

19, 20. (a) Mwomwo ika Yesu apwila chakutalilaho chamwaza hakusolola zangi? (b) Vyuma muka twatela kwanuka omu natutanganga chakutalilaho chaYesu nakushinganyekangaho?

¹⁹ Yesu asolwele chakutalilaho chamwaza hakusolola zangi. Omu azachilenga mulimo wakwambulula, asolwelenga zangi mujijila jajivulu. Chakutalilaho, nge namono  vatu vali nakuyanda, avevwilililenga keke. Kaha muchima kanou wakeke wamulingishilenga alingeko vyuma vimwe mangana avakafwe. (Mateu 14:14) Numba tuhu Yesu okilenga vaveji nakuhana vatu vyakulya, oloze asolwelenga muchima wakeke mujila yeka yayilemu chikuma. Anangwilenga vatu vatachikize Wangana waKalunga nakuwitavila nakuuzanga, mwomwo ou Wangana ukiko naukafumisako kuyanda chosena. (Mako 6:34; Luka 4:43) Chuma chachilemu chikuma alingile Yesu shina, kulisuula kuhana kuyoya chenyi mangana ayovole vatu.—Yowano 15:13.

²⁰ Yesu azangile chikuma vatu nakuvevwila keke, kaha echi chikiko chalingisa vatu vakulisezaseza vafwile kupandama kuli ikiye. (Mako 10:13-16) Shikaho, omu natutanganga chakutalilaho chaYesu nakushinganyekangaho, twatela kwanuka ngwetu tuli nakumona Yehova kuhichila muli Mwanenyi.—WavaHepeleu 1:3.

21, 22. Uno kutondatonda Yehova chasakiwa kulinga ika, kaha vyuma muka vili muno mumukanda vize navitukafwa tulinge ngocho?

²¹ Hakuwana nge Yehova asaka tupandame kuli ikiye, ngocho alisolola hatoma kuhichila muMazu enyi. Chipwe ngocho, katushinjila tupandame kuli ikiyeko. Chili kuli yetu vavene kulisakwila kutondatonda Yehova ‘shimbu tunahase kumuwana.’ (Isaya 55:6) Kutondatonda Yehova chasakiwa kutachikiza vilinga vyenyi najijila jenyi, vize vasolola muMbimbiliya. Ou mukanda uli nakutanga, naukukafwa ulinge ngocho.

²² Tachikiza ngwove uno mukanda uli muvihanda viwana vize navishimutwila vilinga vyaYehova vyavilemu. Vilinga kana shina ngolo, nachiyulo, namangana nazangi. Chihanda hichihanda chinaputukila  namazu akulumbununa vilinga navashimutwila muchihanda kana. Kaha tupetulu vanakavangizaho navashimutwila jino omu Yehova eji kusololanga vilinga kana mujijila jakulisezaseza. Chihanda hichihanda nachipwa nawa nakapetulu uze mwasolola omwo Yesu asolwele vilinga vize navashimutwila muchihanda kana, kaha namupwa nawa kapetulu uze mwatukafwa omwo nayetu tunahase kusolola vilinga kana mukuyoya chetu.

23, 24. (a) Lumbununa lipwata lyakwamba ngwavo “Vihula Vyakuhunananaho.” (b) Uno kushinganyeka havyuma tunatange nachitukafwa ngachilihi tupandame chikuma kuli Kalunga?

²³ Kuputuka nakapetulu uno, mukapetulu hikapetulu muli lipwata lyakwamba ngwavo “Vihula Vyakuhunananaho.” Chakutalilaho, tala  lipwata lili halifwo 28. Visoneka navihula vilimo kavyeshi vyakuhituluka kapetuluko. Oloze eli lipwata vanalihakeko mangana likukafwe ushinganyeke chikuma hakapetulu kana. Uno unahase kuzachisa ngachilihi lipwata kana mujila yambwende? Tanga kanawa visoneka vyosena vanenyikilako. Kufumaho, tanga chihula chili kuchisoneka vanenyikilako, nakushinganyeka havyuma naukumbulula. Unahase nakuhehwojola  mumikanda yetu. Lihulise ngwove: ‘Uno mujimbu kana uli nakungulweza vyuma muka hali Yehova? Uno nanguzachisa ngachilihi mujimbu kana mukuyoya chami? Nanguuzachisa ngachilihi mangana ngukafweko vakwetu?’

²⁴ Kushinganyeka mujila kana chinahase kutukafwa tupandame chikuma kuli Yehova. Mwomwo ika? Mwomwo Mbimbiliya yasolola ngwayo kushinganyeka mujila kana cheji kutusololanga omwo twapwa mumuchima. (Samu 19:14) Nge natushinganyekanga havyuma tuli nakulinangula hali Kalunga, kaha vyuma kana navikwata kumichima yetu yachifwanyisa yize yeji kutulingisanga tushinganyeke, nakusangumuna pwipwi yetu yakulinga vyuma nakutukunyula tulinge vyuma kana. Kaha nawa cheji kutulingisanga tuzange chikuma Kalunga, kaha zangi kana yikiko yeji kutukunyulanga tufwile kwivwisa kuwaha ou Sepa lyetu wamwenemwene. (WaYowano 1, 5:3) Shikaho, hakusaka tutunge usepa kanou wamwaza, twatela kutachikiza vilinga vyaYehova najila eji kulingilangamo vyuma. Oloze tuvangilenu kushimutwila hakujila chaYehova, nakumona nawa ovyo chuma kana cheji kutukunyulanga tufwile kupandama kuli ikiye.