1, 2. (a) Ana chichi chachikusawoneka kuŵa changakomboleka kwa ŵandu ŵajinji, nambo ana Baibulo jikusatusimichisya ya chichi? (b) Ana Abulahamu ŵaliji paunasi wamtuli ni Yehofa, soni ligongo chichi?

ANA MPAKA apikane uli mumtima naga Mlungu juŵapanganyisye kwinani ni chilambo chapasi ali mkusala ya wawojo kuti, “Aju ali mjangu”? Kwa ŵandu ŵajinji, yeleyi mpaka yiwoneche kuŵa yangakomboleka. Nambosoni, ana mpaka yikomboleche chamtuli kuti mundu jwangali umlama aŵe paunasi ni Yehofa Mlungu? Nambope, Baibulo jikusatusimichisya kuti yili yakomboleka kumŵandichila Mlungu.

² Abulahamu ali jumo mwa ŵandu ŵaŵakwete upile wakuŵa paunasi ni Mlungu kalakalako. Yehofa ŵasasile ya nangolo jwakalaju kuti, “Mjangu.” (Yesaya 41:8) Elo, Yehofa ŵam’weni Abulahamu kuŵa mjakwe jusyesyene. Abulahamu ŵaliji paunasi ni Mlungu myiyi ligongo lyakuti “ŵakulupilile Mlungu.” (Yakobo 2:23) Lelojinosoni, Yehofa ‘akusiŵanonyela’ ŵakusamtumichila jwalakwe mwachinonyelo. (Detulonomo 10:15) Maloŵe gakwe gakusatulimbikasya kuti, “Mwaŵandichile Mlungu, nipo Ŵalakwe tachimŵandichila jemanja.” (Yakobo 4:8) Maloŵega gakutusalila yindu yiŵili. Yindu yakwe yili yakutuŵenda Mlungu kuti tutendeje soni yachachitutendela jwalakwe.

3. Ana Yehofa akutusalila kuti tutende chichi, soni akutusimichisya ya chichi?

³ Yehofa akutuŵenda kuti tumŵandichile. Jwalakwe ali jwakoseka soni jwakusachilila kutupochela kuti tuŵe achimjakwe. Pandaŵi jijojo, jwalakwe akutusimichisya kuti naga tukutanda m’weji kumŵandichila, jwalakwesoni chachituŵandichila. Pambesi pakwe tuchiŵa “m’likuga lya ŵandu ŵakwe ŵakusiŵakulupilila,” chachili chindu chakusosekwa mnope. (Misyungu 3:32) Mjetu jusyesyene ali mundu jwatukusamsalila yindu yamtemela.—Amosi 3:7.

4. Ana mjetu jwapamtima akusaŵa jwamtuli, soni ana Yehofa akusaŵa chamtuli mjetu mpela jweleju?

 ⁴ Ana wawojo akwete mjawo jwapamtima jwampaka amsalile yindu yamtemela? Mjawo jweleju ni jwakusasamala ya wawojo. Ligongo lyakuti ali jwakulupichika, akusamdalila. Kusangalala kwawo kukusakula ligongo lyakuti akusakambilana ni mjawojo yindu yayikwasangalasya. Ligongo lyakuti mjawojo akusiŵapikanila mwachanasa, kulagasika nganisyo kwawo kukusanandipa. Atamose yiwonecheje kuti pangali mundu jwakusiŵapikanichisya wawojo, nambo mjawojo akusiŵapikanichisya. Mwakamulana ni yeleyi, patumŵandichile Mlungu, jwalakwe akusaŵa Mjetu jwapajika jwakusatuŵalanjila mnope, kutuganichisya soni kutupikanichisya. (Salimo 103:14; 1 Petulo 5:7) Tukusamdalila ni mtima wetu wosope ligongo tukusamanyilila kuti Mlungu akusaŵa jwakulupichika kwa ŵandu ŵali ŵakulupichika kwa jwalakwe. (Salimo 18:25) Nambope, upile wakuŵa paunasi ni Mlungu tukusawupata ligongo lyakuti jwalakwe atesile yakuti upilewo uwe wakomboleka.

5. Ana Yehofa jwatesile chichi kuti yiŵe yakomboleka kuŵa najo paunasi?

⁵ Ŵandu ŵakulemwawe, pajika ngamkanitukombola kumŵandichila Mlungu. (Salimo 5:4) Ndumetume Paulo jwalembile kuti, “Nambo Mlungu atulosisye mwakusatunonyelela uwe, yaliji kuti patwaliji ŵakulemwa, Klistu ŵatuwilile.” (Aloma 5:8) Yehofa jwalinganyisye yakuti Yesu ayiche pachilambo chapasi “ni kupeleka umi wakwe kuti ŵawombole ŵandu ŵajinji.” (Mateyu 20:28) Chikulupi chetu mu mbopesi ja Yesuji chikusatukamuchisya kuti yiŵe yakomboleka kumŵandichila Mlungu. Pakuŵa Mlungu “ŵatunonyele uwe pandanda,” jwalakwe ŵatulinganyichisye litala kuti tukombole kuŵa paunasi ni jwalakwe.—1 Yohane 4:19.

6, 7. (a) Ana tukusamanyilila chamtuli kuti Yehofa nganaŵa Mlungu jwakusisika jwakuti nganituŵa tummanyilile? (b) Ana Yehofa alimanyikasisye m’matala gamtuli?

⁶ Yehofa atesilesoni chindu chine. Jwalakwe alimanyikasisye kwa m’weji. Ŵandu ŵaliwose ŵali paujakwe akusasosekwa kumanyigana chenene soni kusiwona ndamo ni katende ka yindu ka mjawo kuŵa kakusosekwa. Myoyo, yikaŵe kuti Yehofa ali Mlungu  jwakusisika soni jwangamanyika, nikuti ngamkanitumŵandichila. Nambo mmalo mwa kulisisa, jwalakwe akusasaka kuti tummanyilile. (Yesaya 45:19) Konjechesya pelepa, Yehofa akusalimanyikasya mwangasawusya atamose kwa ŵandu ŵakusawoneka mpela ŵakutuluka m’chilambochi.—Mateyu 11:25.

⁷ Ana Yehofa alimanyikasisye chamtuli kwa m’weji? Yindu yaŵapanganyisye yikusatumanyisya mbali sine sya ndamo syakwe. Mbali syakwe sili, machili gakwe gakogoya mnope, lunda lwakwe lwakusokoka mnope soni chinonyelo chakwe chekulungwa mnope. (Aloma 1:20) Nambo Yehofa nganalimanyikasya kupitila mu yindu yaŵapanganyisyepe. Jwalakwe akusiŵasalilaga ŵane yindu m’litala lyapajika mnope. Myoyo, atusalile yakwamba jwalakwe kupitila m’Maloŵe gakwe, Baibulo.

8. Ana ligongo chichi mpaka tuŵechete kuti Baibulo pajika uli umboni wakulosya kuti Yehofa akusatunonyela?

⁸ Baibulo pajika jili umboni wakuti Yehofa akusatunonyela. Kupitila m’Maloŵe gakwe, jwalakwe akusalimanyikasya pakamulichisya masengo maloŵe gangasawusya kugapikana. Yeleyi yikulosya kuti ngaŵa akusagamba kutunonyelape, nambo akusasakasoni kuti tummanyilile ni kumnonyela. Yatukusaŵalanga m’buku japajikaji yikusatukamuchisya kuti tukuwoneje ‘kusalala mtima kwa Ambuje.’ Yikusatulimbikasyasoni kuti tusacheje kumŵandichila jwalakwe. (Salimo 90:17) Kwende tukambilane matala gane gakusangalasya gaŵakamulichisye masengo Yehofa pakulimanyikasya m’Maloŵe gakwe.

9. Ana ni yisyasyo yapi ya m’Baibulo yayikusasala mwachindunji ya ndamo sya Mlungu?

⁹ M’Malemba mwana maloŵe gejinji gagakusasala mwangapita mumbali ya ndamo sya Mlungu. Kwende tulole yisyasyo yine. “Ambuje akuchinonyela chilungamo.” (Salimo 37:28) Mlungu akwete ‘machili gakogoya.’ (Yobu 37:23) “Mlungu ali jwalunda.” (Yobu 9:4) Jwalakwe ali “Mlungu jwa chanasa, ni jwambone mtima, jwangatumbila chitema, ŵakugumbala ni chinonyelo changamala, soni jwakulupichika kwa ŵandu ŵakwe.” (Ekisodo 34:6) “Ŵalakwe Ambunje ali ŵambone, ni ŵakululuchila ŵandu ŵawo.” (Salimo 86:5) Soni mpela mwawuŵechetele mtwe wawupite  ula, “Mlungu ali chinonyelo,” jajili ndamo jakwe jekulungwa mnope. (1 Yohane 4:8) Patukuganichisya mwakusokoka ya ndamo syakusangalasyasi, ana ngatukusakumbila kumŵandichila Mlungu jwambone mnopeju?

10, 11. (a) Ana Yehofa apwatichemo chichi m’Maloŵe gakwe, kuti tumanyilile chenene ndamo syakwe? (b) Ana ni chisyasyo chapi cha m’Baibulo chachikusatukamuchisya kuyiwona yakusati Mlungu pakamulichisya masengo machili gakwe?

¹⁰ Kupwatika pakutusalila ya ndamo syakwesi, Yehofa mwachinonyelo ŵapwatichemo m’Maloŵe gakwe yisyasyo yaŵatite pakamulichisya masengo ndamosi. Nganisi sikusatupa chiwulili chambone munganisyo mwetu yayikutukamuchisya kulola chenene mbali syakulekanganalekangana sya ndamo syakwe. Yeleyi yikusatukamuchisya kuti tumŵandichile Mlungu. Kwende tulole chisyasyo.

¹¹ Mpaka tuŵalanje m’Baibulo kuti Mlungu ali jwa ‘machili gekulungwa.’ (Yesaya 40:26) Nambo chiwundo chelechi mpaka tuchipikanichisye chenene patuŵalasile ngani jakusala yaŵatite Yehofa pakwakulupusya Aisalaeli pa Nyasa Jechejewu soni ni kwasamalila mchipululu kwa yaka 40. Munganisyo mwetu mpaka tugawoneje mesi gagajesileje mwamachili gali mkugaŵikangana. Mpaka twawoneje Aisalaeli, mwine chiŵandika 3,000,000 ali mkwenda panyasa nambo pali pejumu, mesi gali gajimi mpela mapupa gamachili mbali syosope siŵili. (Ekisodo 14:21; 15:8) Nambosoni mpaka tuwuwoneje umboni wakuti Mlungu ŵasamalilaga jemanjaji m’chipululu. Mpaka tugawoneje mesi gali mkukopoka palwala. Nambosoni ali mkulokotanya pasi chakulya chachawonekaga mpela mbele syeswela. (Ekisodo 16:31; Numeli 20:11) Pelepa yikulosya kuti ngaŵa kuti Yehofa agambile kola machilipe nambo akusakamulichisya masengo machiligo pakwakamuchisya ŵandu  ŵakwe. Ana nganiyiŵa yakulimbikasya kumanyilila kuti mapopelo getu gakusajawula kwa Mlungu jwamachili mnope jwali “kwakutilila kwetu ni machili getu, ŵakutukamuchisya pa ndaŵi ja yisyawusyo”?—Salimo 46:1.

12. Ana Yehofa akusatukamuchisya chamtuli “kumwona” jwalakwe mu litala lyangasawusya kupikanichisya?

¹² Atamose kuti Yehofa ali msimu, jwalakwe atesile yejinji pakusaka kutukamuchisya kuti tummanyilile. Mpela ŵandu, tukusagamba kuyiwona yindu yayikuwoneka ni meso getu. Myoyo nganituŵa tuyiweni yindu yayili kumalo gamisimu. Yikaŵe kuti Mlungu pakulimanyikasya akamulichisye masengo maloŵe ga misimu, yikaliji mpela mundu jwine akusala ya kawoneche ka meso gakwe kapena chilu chakwe kwa mundu jwangalola chipagwile. Nambope Yehofa atukamuchisye “kumwona” jwalakwe pakamulichisya masengo maloŵe gangasawusya kugapikana. Ndaŵi sine jwalakwe akusaliwanichisya pakamulichisya masengo yindu yatukusayimanyilila. Jwalakwe akusalilondesya mpela kuti akwete yiŵalo ya mundu. *

13. Ana lilemba lya Yesaya 40:11 likusatupa chiwulili chamtuli munganisyo mwetu, soni ana yeleyi yikusatukwaya chamtuli?

¹³ Alole yaŵatite Yesaya pakulondesya ya Yehofa. Jwalakwe jwatite, “Tachisilanga ngondolo syakwe mpela mkuchinga. Tachasonganya ŵanache ŵangondolo ni kwanyakula m’miyala mwakwe.” (Yesaya 40:11) Palilembali Yehofa akumlandanya ni jwakuchinga jwakusanyakula ŵanache ŵa ngondolo “m’miyala mwakwe.” Yeleyi yikulosya kuti jwalakwe ali jwakombola kwachenjela ŵandu ŵakwe, atamose ŵali ŵangali machili. Mpaka tulipikaneje kuti tuli pamalo gambone m’makono gakwe gamachili, ligongo naga tuli ŵakulupichika, jwalakwe ngasatuleka. (Aloma 8:38, 39) Jwakuchinga jwamkulungwaju akusaŵanyakula ŵanace ŵangondolo “m’miyala mwakwe.” Yeleyi yikulandana ni yakusatenda jwakuchinga  ngondolo. Jwalakwe akusakapakata pa chakuwala chakwe kamwanache kangondolo kakagambile kupagwa kwene. Yeleyi yikutusimichisya kuti Yehofa akusatuwona kuŵa ŵakusosekwa mnope soni akusatusamalila mwachinonyelo. Myoyo, yili yachipago kusaka kuŵandikana najo.

14. Ligongo chichi mpaka tujile kuti litala lyekulungwa lyakusalimanyikachisya Yehofa lili kupitila mwa Yesu?

¹⁴ M’Maloŵe gakwe, Yehofa akusalimanyikasya kupitila mwa Mwanache jwakwe jwakunonyelwa jwali Yesu. Pangali mundu jwampaka alosye mwakusaganichisya soni mwakusapikanila Mlungu, kapena kulondesya ya jwalakwe mwakupikanika chenene kupunda muŵatendele Yesu. Nambosoni chakupanganyikwa chilichose mkanichipanganyidwe atamose yakupanganyidwa yausimu, Mwanache jwandanda kupagwaju jwaliji ni Atatigwe kwinani. (Akolose 1:15) Yesu jwammanyililaga chenene Yehofa. Ni ligongo lyakwe jwalakwe jwatite, “Ŵelewo ni ŵakum’manyilila Mwanache. Ŵane soni ŵakwamanyilila Atati ali Mwanache. Nambo mwanache akusaka kwasalila ŵandu ŵane kwambaga ya Atati, kuti nombe  nawo jemanjajo ŵamanyilile ŵelewo.” (Luka 10:22) Yesu ali pachilambo chapasi mpela mundu, jwasasile yakwamba Atatigwe m’matala gaŵili gakusosekwa mnope.

15, 16. Ana Yesu jwasasile yakwamba Atatigwe m’matala gaŵili gapi?

¹⁵ Litala lyandanda lili yaŵajiganyisye Yesu yayikusatukamuchisya kwamanyilila Atatigwe. Yaŵatite Yesu pakumlondesya Yehofa yikusatukamula mtima. Mwachisyasyo, Yesu jwamlandanyisye Yehofa ni mtati jwakululuchila jwele chamkamwile chanasa ali am’weni mwanache jwakwe jwamsokonechele ali mkuwujila kunyumba. Jwatesile yeleyi pakusaka kulondesya kuti Mlungu ali jwachanasa soni akusapochela mundu jwalijose jwapitikwiche mtima. Mtatiju jwamwutuchile mwanachejo ni kumkumbatila soni kumpa kisi. (Luka 15:11-24) Yesu jwalosisyesoni kuti Yehofa ali Mlungu ‘jwakusiŵalongolela [“kwawuta,” NWT]’ ŵandu ŵamitima jambone ligongo lyakuti jwalakwe akusamnonyela jwalijose pajikapajika. (Yohane 6:44) Jwalakwe akusamanyilila atamose chijuni cha timba pachigwile pasi. Yesu jwatite, “Mkajogopaga. Jemanja mli ŵamtengo mnope kupunda yijuni ya timba yejinji.” (Mateyu 10:29, 31) Kusala yisyene, tukusasaka kumŵandichila Mlunguju ligongo akusasamala ya mŵeji.

¹⁶ Litala lyaŵili lili chisyasyo cha Yesu chachikusatulosya mwaŵelele Yehofa. Yesu jwalosisye chenene mwaŵelele Atatigwe mwamti jwatite, “Mundu jwambweni une ŵaweni soni Atati.” (Yohane 14:9) Myoyo, patukuŵalanga yakwamba Yesu kutyochela mu Ngani Syambone, mwaŵapikanilaga mumtima soni mwaŵatendelaga yindu ni ŵane yikusatukamuchisya kwamanyilila chenene Atatigwe. Yehofa ngamkanatusalila ya ndamo syakwe mwakupikanika chenene kupunda pelepa. Ligongo chichi tukuti myoyo?

17. Apeleche chisyasyo chakulosya yatesile Yehofa pakutukamuchisya kuti tupikanichisye mwaŵelele.

¹⁷ Tuwanichisye kuti wawojo akusaka kumsalila mundu jwine ngopolelo ja umbone mtima. Mpaka alinje kumsalila munduju mwakumlondechesya. Nambo naga ali amlanjile mundu jwakulosya ndamo ja umbone mtimajo ni kusala kuti, “Wele ni umbone mtima,” ngopolelo ja umbone mtima jikusapikanika chenene soni mundu jula akusapikanichisya. Yehofa atesile yindu yakulandana ni yeleyi pakusaka kutukamuchisya kumpikanichisya mwaŵelele.  Kupwatika pakulilondesya kupitila m’maloŵe gakwe, jwalakwe atupelesoni chisyasyo cha Mwanache jwakwe. Ndamo sya Mlungu tukusasiwona kupitila mu yindu yaŵatesile Yesu. Kupitila mu Ngani Syambone syakwamba Yesu, Yehofa akusala kuti “Mwelemu ni mwambelele.” Ana ngani syakusalilidwa syakwamba Yesu sikusasala yamtuli yakwamba jwalakwe ali pachilambo chapasi?

18. Ana Yesu jwalosisye chamtuli machili, chilungamo soni lunda?

¹⁸ Yesu jwalosisye chenene ndamo syekulungwakulungwa mcheche sya Mlungu. Jwalakwe jwakwete machili gakuposya yilwele, gakusamasya sala, atamosesoni gakwimusya chiwa. Mwakulekangana ni ŵandu ŵakusakamulichisya masengo machili gawo mwakulemwechekwa, Yesu nganakamulichisya masengo machili gakwe gakutendela yakusimonjesya pakwawulasya ŵane kapena pakusaka kupata yindu. (Mateyu 4:2-4) Jwalakwe jwanonyelaga chilungamo. Paŵaweni ŵamalonda ŵachinyengo ali mkwajiŵila ŵandu, yamnyaleye mnope. (Mateyu 21:12, 13) Yesu jwaliji jwangali lusagu. Chinga ŵakulaga kapena ŵakulagasidwa, ŵakamuchisyaga kuti apate “chipumulisi” kapena jwaŵele mpela malo gakupumulila pa umi wawo. (Mateyu 11:4, 5, 28-30) Yesu, juŵaliji “jwakumpunda Solomoni,” ligongo mu yijiganyo yakwe mwaliji lunda lwejinji. (Mateyu 12:42) Nambo Yesu nganatenda chilichose chakulilochesya pa lunda lwakwelu. Maloŵe gakwe gayikaga pamtima ŵandu wamba, ligongo yijiganyo yakwe yaliji yakupikanika chenene, yangasawusya soni yakamuchisya.

19, 20. (a) Ana Yesu jwalosisye chamtuli chisyasyo chapenani pangani ja kwanonyela ŵane? (b) Ana patukuŵalanga soni kuganichisya ya chisyasyo cha Yesu, tukusosekwa tukumbuchileje chichi?

¹⁹ Yesu jwaliji chisyasyo chambone pangani ja chinonyelo. Pa utumiki wakwe wosope jwalakwe jwalosisye chinonyelo soni chanasa m’matala gakulekanganalekangana. Jwalakwe paŵaweni ŵandu ali mkulaga, chamkamulaga chanasa. Ligongo lya chanasa, jwalakwe ndaŵi ni katema jwatendagapo kandu pa yakusawusya ya ŵanduwo. (Mateyu 14:14) Atamose kuti jwaposyaga ŵakulwala soni kwapa yakulya ŵandu ŵasala, jwalakwe jwalosisye chanasa m’litala line lyapajika mnope. Jwalakwe jwakamuchisye ŵandu kumanyilila, kwitichisya soni kuwunonyela usyesyene wakwamba Uchimwene wa Mlungu, wawuchiyikasya upile wangamala kwa ŵandu. (Maliko 6:34; Luka 4:43) Kupunda pa yosopeyi, Yesu  jwalosisye chinonyelo chekulungwa mwakusachilila kupeleka umi wakwe mmalo mwa ŵane.—Yohane 15:13.

²⁰ Myoyo, yili yangasimonjesya kwawona ŵandu ŵamisingu josope soni ŵandamo syakulekanganalekangana ali mkumŵandichila mundu jwachinonyelo soni jwachanasaju. (Maliko 10:13-16) Nambope, patukuŵalanga soni kuganichisya ya chisyasyo cha Yesuchi, tukusosekwa tukumbuchileje kuti kupitila mwa Mwanacheju tukusapikanichisya chenene mwaŵelele Atatigwe.—Ahebeli 1:3.

21, 22. Ana kumsosasosa Yehofa kukusapwatikapo chichi, soni ana m’buku jakamuchisya kulijiganyaji mwana chichi chakutukamuchisya kutenda yeleyi?

²¹ Mwakulimanyikasya chenene kupitila m’Maloŵe gakwe, Yehofa akutusimichisya kuti akusasaka kuti tumŵandichile. Nambope jwalakwe jwangatukanganichisya kuti tuŵe najo pa unasi. Yili kwetuwe kumsosasosa Yehofa “pa mpaka asimanikwe.” (Yesaya 55:6) Mpela mwajikuŵechetela Baibulo, kumsosasosa Yehofa kukusapwatikapo kumanyilila ndamo syakwe soni katende kakwe ka yindu. Bukuji chijakamuchisye kutenda yeleyi.

²² Chayiwone kuti bukuji jikwete mbali mcheche mwakamulana ni ndamo mcheche sya Yehofa syakusosekwa mnope. Ndamo syakwe sili, machili, chilungamo, lunda soni chinonyelo. Mbali jilijose jikutanda ni kusala mwakata yakwamba ndamojo. Kaneko  mitwe jakuyichisya jikulondesya yakusati Yehofa pakulosya ndamojo m’matala gakulekanganalekangana. Mbali jilijose mwanasoni mtwe wawukulosya yaŵatite Yesu pakulosya ndamojo. Kaneko panasoni mtwe wine wawukusala yampaka tutende pakulosya ndamojo paumi wetu.

23, 24. (a) Alondesye yakwamba libokosi lyapajika lya mtwe wakuti, “Yiwusyo Yakusosekwa Kuyiganichisya.” (b) Ana kuganichisya mwakusokoka mpaka kutukamuchisye chamtuli kumŵandichila mnope Mlungu?

²³ Kutandila mtwe awuno, chipapagweje libokosi lyakuti, “Yiwusyo Yakusosekwa Kuyiganichisya.” Mwachisyasyo, alole libokosi lyalili pa peji 24. Malemba soni yiwusyo yayili mu libokosili chakulinga chakwe chili kutukamuchisya kuganichisya yiwundo yine yakusosekwa ya munganijo, ngaŵa kwamba kuwilisya mtwewo. Ana mpaka tulikamulichisye masengo chamtuli libokosili? Tukusosekwa kuŵalanga lilemba lililyosye lyaŵisile palibokosipo soni kuganichisya mwakufasa. Kaneko tuŵalanje chiwusyo chachili kumbesi kwa lilembalyo ni kuganichisya mwakusokoka kwanga kwakwe. Mpaka tuwungunyesoni yiwundo yine yakonjechesya. Mpaka tuliwusyesoni yiwusyo yine mpela yakuti, ‘Ana nganiji jikusalila chichi pakwamba ya Yehofa? Ana jikukwaya chamtuli umi wangu? Ana mpaka nayikamulichisye masengo chamtuli pakwakamuchisya ŵane?’

²⁴ Kuganichisya mwakusokokaku mpaka kutukamuchisye kuti tumŵandichile mnope Yehofa. Ligongo chichi tukuti myoyo? Ligongo lyakuti tukusaganichisya mwakusokoka kupitila mumtima. Patukuganichisya mwakuyamichila yatukusalijiganya pakwamba ya Yehofa, yatulijiganyisyeyo yikusajinjila mumtima wetu wakuwanichisya. Kaneko yikusakwaya kaganisye ketu, mwatukupikanila mumtima ni kutukamuchisya kutendapo kandu. Chinonyelo chetu pa Mlungu chikusakula, kaneko chinonyelochi chikusatulimbikasya kuti tutendeje yindu yayikusamsangalasya jwalakwe mpela Mjetu jwapamtima. (1 Yohane 5:3) Kuti tuŵe pa unasi welewu, tukusosekwa kumanyilila ndamo sya Yehofa soni katende kakwe ka yindu. Nambo, chandanda kwende tukambilane mbali jine ja ndamo ja Mlungu. Ndamo jakwe jili jakuti jwalakwe ali jwamswela, yayikusapelaka magongo gamachili gakumŵandichilila jwalakwe.