1, 2. Anong bisyon an inako ni propeta Isaias, asin ano an itinutukdo kaiyan sa sato manungod ki Jehova?

 PINANGIBABAWAN si Isaias nin hararom na paggalang huli sa eksenang nahihiling niya—sarong bisyon hali sa Diyos. Garo baga totoong-totoo iyan! Kan huri nagsurat si Isaias na saiyang “nahiling si Jehova” sa Saiyang halangkawon na trono. An ibabang parte kan halabang gubing ni Jehova nakapano sa dakulaon na templo sa Jerusalem.—Isaias 6:1, 2.

² Nakamati man si Isaias nin hararom na paggalang sa saiyang nadangog—makusugon na pagkanta kaya natanyog kaiyan an templo sagkod sa mismong mga pundasyon kaiyan. An kanta hali sa mga serafin, mga espiritung linalang na halangkawon an ranggo. Madadangog sa makusugon na kanta ninda an simpleng mga tataramon pero makahulugan na marhay: “Banal, banal, banal si Jehova na pamayo nin mga hukbo. An bilog na daga pano kan kamurawayan niya.” (Isaias 6:3, 4) An tulong beses na pagsambit sa kanta kan tataramon na “banal” nagtatao nin espesyal na pagduduon, asin tama nanggad iyan, huli ta an pagigin banal ni Jehova nakakalabi sa gabos. (Kapahayagan 4:8) An kabanalan ni Jehova idinuduon sa bilog na Bibliya. Ginatos na bersikulo an nagsasambit kan saiyang pangaran kaiba an mga tataramon na “banal” asin “kabanalan.”

3. Paano an salang mga pagmansay dapit sa kabanalan ni Jehova nagigin dahilan na tumalikod sa Diyos an dakul imbes na rumani sa saiya?

³ Kun siring, malinaw nanggad na an saro sa panginot na mga bagay na gusto ni Jehova na masabutan ta manungod sa saiya iyo na siya banal. Pero, dakul ngunyan an may negatibong pagmansay manungod sa kabanalan. An nagkapira salang ikinokonektar an kabanalan sa pagpakangmatanos  sa sadiri o bakong totoong debosyon. Para sa mga tawong pinaglalabanan an negatibong pagmansay sa saindang sadiri, an kabanalan nin Diyos tibaad mas nakakatakot kisa nakakaakit. Tibaad natatakot sinda na nungka sindang magigin angay na rumani sa banal na Diyos na ini. Kaya dakul an minarayo sa Diyos huli sa saiyang kabanalan. Makamumundo iyan, huling an kabanalan nin Diyos talagang sarong mapuwersang dahilan para rumani sa saiya. Taano? Bago niyato simbagon an hapot na iyan, pag-ulayan ta nguna kun ano an tunay na kabanalan.

4, 5. (a) Ano an kahulugan kan pagigin “banal,” asin ano an bakong kahulugan kaiyan? (b) Sa anong duwang mahalagang paagi “suway” si Jehova?

⁴ An pagigin banal nin Diyos dai nangangahulugan na siya orgulyoso, mapalangkaw, o mapagmenos sa iba. Sa kabaliktaran, ikinakaungis niya an mga kuwalidad na iyan. (Talinhaga 16:5; Santiago 4:6) Kaya, ano man nanggad an kahulugan kan tataramon na “banal”? Sa lengguwaheng Hebreo kan Bibliya, an tataramon na iyan hali sa sarong termino na nangangahulugan “suway.” An tataramon na “banal” nagtatao nin ideya na an sarong tawo o an sarong bagay isinuway para sa pagsamba sa Diyos. Kun an sarong bagay banal, nangangahulugan man iyan na an bagay na iyan malinig asin dalisay. Paano minaaplikar ki Jehova an tataramon na iyan? Nangangahulugan daw iyan na siya “suway” sa bakong perpektong mga tawo, harayuon sa sato?

⁵ Dai nanggad. Bilang “an Banal na Diyos kan Israel,” inasigurar ni Jehova an saiyang banwaan na nag-iirok siya sa tahaw ninda, dawa ngani makasalan sinda. (Isaias 12:6; Oseas 11:9) Kaya dawa ngani siya banal, bako siyang harayo sa mga nagsasamba sa saiya. Kun siring, sa paanong paagi siya “suway”? Sa duwang mahalagang paagi. Inot, suway siya sa gabos na linalang huling siya sana an Kahuruhalangkawi. An  saiyang pagigin dalisay saka malinig, lubos asin daing katapusan. (Salmo 40:5; 83:18) Ikaduwa, si Jehova biyong suway sa gabos na kasalan, asin nakakaranga nanggad iyan na isipon. Taano?

6. Taano ta nakakarangang maaraman na si Jehova lubos na suway sa kasalan?

⁶ Nabubuhay kita sa sarong kinaban na bihira an tunay na kabanalan. An gabos na bagay sa kinaban na ini nin katawuhan na suway sa Diyos maati sa ano man na paagi, huli sa kasalan asin pagigin bakong perpekto. Kaipuhan niyato gabos na makilaban sa kasalan na nasa laog niyato. Asin gabos kita namemeligrong madaog nin kasalan kun magpapabaya kita. (Roma 7:15-25; 1 Corinto 10:12) Dai si Jehova napapaatubang sa arog kaiyan na peligro. Huling biyo siyang harayo sa kasalan, nungka siyang madidigtaan nin minsan kadikit man lamang na kasalan. Kinukumpirmar kaiyan an satong pakamidbid ki Jehova bilang an pinakamarahay na Ama, huling nangangahulugan iyan na lubos siyang masasarigan. Bakong arog nin dakul na makasalan na tawong ama, si Jehova nungkang magigin maraot, biko, o mapang-abuso. Huli sa saiyang kabanalan, imposibleng magin arog siya kaiyan. May pagkakataon na nanumpa pa ngani si Jehova sa ngaran kan saiya mismong kabanalan, huling mayo na nin mas mapagtitiwalaan kisa diyan. (Amos 4:2) Bako daw na nakakapakusog iyan sa buot?

7. Taano ta masasabi na an kabanalan naturalesa na ni Jehova?

⁷ Naturalesa na ni Jehova an kabanalan. Ano an buot sabihon kaiyan? Sa pag-ilustrar: Pag-isipan an mga tataramon na “tawo” asin “bakong perpekto.” Pag naiisip mo an inot na tataramon, awtomatiko na maiisip mo man an ikaduwa. Bako nanggad kitang perpekto asin may epekto iyan sa gabos na ginigibo ta. Ngunyan, pag-isipan an duwang lain na marhay na tataramon—“Jehova” asin “banal.” Si Jehova pano nin kabanalan. An gabos na manungod sa saiya malinig, dalisay, asin matanos. Dai ta mamimidbid kun siisay  man nanggad si Jehova kun dai ta sasabuton an makahulugan na tataramon na “banal.”

8, 9. Ano an nagpapahiling na tinatabangan ni Jehova an bakong perpektong mga tawo na magin banal sa relatibong paagi?

⁸ Huling si Jehova an ladawan kan kuwalidad na kabanalan, tama sanang sabihon na siya an gikanan kan gabos na kabanalan. Dai niya sinasadiri an mahalagang marhay na kuwalidad na iyan; ihinihiras niya iyan sa iba, asin bukas-palad niyang ginigibo iyan. Kan kaulayon ngani nin Diyos si Moises paagi sa sarong anghel sa nagkakalayong palungpong, dawa an daga sa palibot nagin banal huli sa koneksiyon kaiyan ki Jehova!—Exodo 3:5.

⁹ Puwede daw na magin banal an bakong perpektong mga tawo sa tabang ni Jehova? Iyo, sa relatibong paagi. Tinawan nin Diyos an saiyang banwaan na Israel kan oportunidad na magin “banal na nasyon.” (Exodo 19:6) Binendisyunan niya an nasyon na iyan nin sarong paagi nin pagsamba na banal, malinig, asin dalisay. Sa siring an kabanalan sarong pauruutrong tema kan Katugunan ni Moises. Sa katunayan, an halangkaw na saserdote igwa nin bulawan na plaka sa atubangan kan saiyang turbante, kun sain nahihiling iyan kan gabos mantang nagkikilyab iyan sa liwanag. Nakaukit diyan an mga tataramon na: “Ki Jehova an kabanalan.” (Exodo 28:36) Kaya an halangkaw na pamantayan nin kalinigan asin kadalisayan dapat na magpamidbid sa saindang pagsamba asin, sa katunayan, sa saindang paagi nin pamumuhay. Sinabihan sinda ni Jehova: “Magpakabanal kamo, huli ta ako, si Jehova na saindong Diyos, banal.” (Levitico 19:2) Basta namumuhay an mga Israelita uyon sa sadol nin Diyos sagkod sa pinakamakakaya nin bakong perpektong mga tawo, sinda banal sa relatibong paagi.

10. Kun dapit sa kabanalan, ano an pagkakaiba kan suanoy na Israel asin kan mga nasyon sa palibot ninda?

 ¹⁰ Ipinapahiling kan pagduduon na ini sa kabanalan na an pagsamba kan Israel kabaliktaran na marhay kan pagsamba kan mga nasyon sa palibot ninda. An paganong mga nasyon na idto nagsamba sa mga diyos na an mismong pag-eksister sarong kaputikan asin pangloloko, mga diyos na ilinadawan na madahas, mahanab, asin nakikidurog maski kiisay. Bako sindang banal sa gabos na aspekto. An mga tawo na nagsasamba sa siring na mga diyos nagigin bakong banal. Huli kaiyan, pinatanidan ni Jehova an saiyang mga lingkod na magdanay na suway sa paganong mga parasamba asin sa maati na relihiyosong mga gibo ninda.—Levitico 18:24-28; 1 Hadi 11:1, 2.

11. Paano an kabanalan kan langitnon na kabtang kan organisasyon ni Jehova risang-risa (a) sa mga anghel? (b) sa mga serafin? (c) ki Jesus?

¹¹ Dawa kan ginibo kan piniling banwaan ni Jehova, an suanoy na Israel, an pinakamakakaya ninda para magin banal, nungka sindang magigin arog kabanal kan mga kabilang sa langitnon na kabtang kan organisasyon nin Diyos. An minilyon na mga espiritung linalang na maimbod na naglilingkod sa Diyos inaapod na saiyang “manampulong ribong mga banal.” (Deuteronomio 33:2; Judas 14) Perpekto nindang naipapabanaag an kabanalan nin Diyos. Asin girumduma an mga serafin na nahiling ni Isaias sa saiyang bisyon. An sinasabi kan saindang kanta nagpapahiling na an makapangyarihan na mga espiritung linalang na ini may mahalagang papel sa pagpamidbid kan kabanalan ni Jehova sa bilog na uniberso. Pero may sarong espiritung linalang na nakakalabi sa gabos na ini—an Aking bugtong nin Diyos. Si Jesus an pinakanangungurog na repleksiyon kan kabanalan ni Jehova. Angay sana na midbid siya bilang “an Banal na Lingkod nin Diyos.”—Juan 6:68, 69.

12, 13. (a) Taano ta an pangaran nin Diyos angay na iladawan na banal? (b) Taano ta dapat na linigon an pangaran nin Diyos sa gabos na katuyawan?

¹² Kumusta man an mismong pangaran nin Diyos? Siring kan naaraman ta sa Kapitulo 1, an pangaran na iyan bako sanang sarong titulo o tatak. Irinerepresentar kaiyan an Diyos na Jehova, kaiba na an gabos niyang kuwalidad. Huli kaiyan, sinasabi sa sato kan Bibliya na an saiyang “pangaran banal.” (Isaias 57:15) Sinabi sa Katugunan ni Moises na an paglanghad sa pangaran nin Diyos may padusang kagadanan. (Levitico 24:16) Asin mangnuha kun ano an ininot ni Jesus sa pamibi: “Ama niyamo na nasa langit, pakangbanalon an pangaran mo.” (Mateo 6:9) An pagpabanal sa sarong bagay nangangahulugan nin pagsuway kaiyan bilang sagrado asin pagtao nin onra, na sinusuportaran iyan bilang banal. Pero kun dati nang banal an pangaran nin Diyos, taano ta kaipuhan pang pakangbanalon iyan?

¹³ An banal na pangaran nin Diyos linapastangan asin dinigtaan nin mga kaputikan saka pagpakaraot. Sa Eden, nagputik si Satanas manungod ki Jehova asin pinaluwas niya na Siya bakong makatanusan na Soberano. (Genesis 3:1-5) Puon kaidto, sinigurado ni Satanas—an tagapamahala kan bakong banal na kinaban na ini—na marikas na maglakop an mga kaputikan manungod sa Diyos. (Juan 8:44; 12:31; Kapahayagan 12:9) An Diyos ilinaladawan kan mga relihiyon bilang bakong makatanusan, harayo, o maringis. Hinihingako ninda na sinusuportaran niya sinda sa saindang paha sa dugong mga giyera. Imbes na sa Diyos itao an kredito para sa makangangalas na mga gibo nin paglalang, sa parati sinasabi ninda na nagkaigwa nin buhay dahil sa pagkanurungod, o ebolusyon. Iyo, grabeng pagpakaraot an ginibo sa pangaran nin Diyos. Dapat iyan na pakangbanalon; dapat na maibalik an kamurawayan na maninigo diyan.  Hinahalat-halat ta na an aldaw na lilinigon ni Jehova sagkod pa man an saiyang pangaran sa gabos na katuyawan. Gigibuhon niya iyan paagi sa Kahadian na papamahalaan kan saiyang Aki. Nauugma kitang marhay na gibuhon an ano man na kabtang ta sa marahayon na katuyuhan na iyan.

14. Taano ta an espiritu nin Diyos inaapod na banal, asin taano ta seryosong marhay na bagay an paglanghad sa banal na espiritu?

¹⁴ May saro pang bagay na konektadong marhay ki Jehova na pirming inaapod na banal—an saiyang espiritu, o aktibong puwersa. (Genesis 1:2) Ginagamit ni Jehova an dai malalabanan na puwersang ini para magibo an saiyang mga katuyuhan. An gabos na ginigibo nin Diyos ginigibo niya sa banal, dalisay, asin malinig na paagi, kaya an saiyang aktibong puwersa tama sanang inaapod na banal na espiritu, o espiritu nin kabanalan. (Lucas 11:13; Roma 1:4) An paglanghad sa banal na espiritu, na kalabot an tuyong pagkontra sa mga katuyuhan ni Jehova, sarong kasalan na daing kapatawadan.—Marcos 3:29.

15. Taano ta an hararom na paggalang angay na reaksiyon sa kabanalan ni Jehova, asin ano an kalabot sa hararom na paggalang?

¹⁵ Kun siring, huling an Diyos banal, madali tang masasabutan kun taano ta sinasabi kan Bibliya na an mga tawo dapat na makamati nin hararom na paggalang sa saiya. Halimbawa, an Salmo 99:3 nagsasabi: “Umawon ninda an saimong dakulang pangaran, huling kahanga-hanga asin banal iyan.” Kalabot sa hararom na paggalang na ini an halangkawon na paggalang o respeto. Angay sana na makamati nin siring, huling an kabanalan nin Diyos nakakalabi nanggad sa sato. Nagliliwanag iyan sa kalinigan asin kamurawayan. Pero, bako iyan dahilan para rumayo kita. Imbes, an tamang pagmansay sa kabanalan nin Diyos urog na magigin dahilan para rumani kita sa saiya. Taano?

16. (a) Paano konektado an kabanalan sa kamurawayan, o kagayunan? Magtao nin halimbawa. (b) Paano idinuduon kan mga paglaladawan ki Jehova sa bisyon an kalinigan, kadalisayan, asin liwanag?

 ¹⁶ An sarong dahilan, ikinokonektar kan Bibliya an kabanalan sa kagayunan. Sa Isaias 63:15, an langit ilinaladawan bilang an “halangkawon na irukan nin kabanalan asin kamurawayan [o, “kagayunan,” nota sa ibaba]” nin Diyos. Naaakit kita nin kamurawayan asin kagayunan. Halimbawa, hilinga an ritrato sa pahina 39. Dai ka daw nagagayunan sa nahihiling mo? Taano ta nagagayunan ka diyan? Hilinga kun gurano kalinig kan tubig. Maski an duros siguradong malinig, ta an langit kulor asul asin an liwanag garo nagkikinang. Ngunyan, kun mababago an nahihiling mo sa ritrato—an sapa barado na nin basura, an mga kahoy asin gapo makanos na huli sa mga surat-surat, an duros mabata na huli sa aso—dai na kita magagayunan kaiyan; marayo na kita. Natural sanang an kagayunan, o kamurawayan, ikonektar niyato sa kalinigan, kadalisayan, asin liwanag. An mismong mga tataramon na iyan puwedeng gamiton para iladawan an kabanalan ni Jehova. Bakong makangangalas na naaakit kita sa kagayunan kan mga paglaladawan ki Jehova sa bisyon! Nagkikinang sa liwanag, nakakasula siring sa mamahalon na mga bato, nagliliwanag siring sa kalayo o sa pinakadalisay asin pinakamakintab na mamahalon na mga metal—arog kaiyan an kamurawayan, o kagayunan, kan satong banal na Diyos.—Ezekiel 1:25-28; Kapahayagan 4:2, 3.

17, 18. (a) Sa primero, ano an nagin epekto ki Isaias kan saiyang bisyon? (b) Paano ginamit ni Jehova an sarong serafin tanganing rangahon si Isaias, asin ano an kahulugan kan ginibo kan serafin?

¹⁷ Minsan siring, dapat daw na makamati kita na mas hababa kita kun ikukumparar sa Diyos huli sa saiyang kabanalan? Siyempre, iyo. Kun sa bagay, talagang mas hababa kita ki Jehova—asin dai pa ngani igo an siring na mga tataramon para iladawan an pagigin mas hababa niyato. Buot  daw sabihon kaiyan dai kita puwedeng magin harani sa saiya? Isip-isipa an reaksiyon ni Isaias kan madangog niya an mga serafin na ipinapahayag an kabanalan ni Jehova. “Dangan nagsabi ako: ‘Hirak man sa sako! Garo na man sana ako gadan, huling saro akong tawong maati an mga ngabil, asin nag-iistar ako sa kaibanan nin banwaan na maati an mga ngabil; huling nahiling kan mga mata ko an Hadi, si Jehova mismo na pamayo nin mga hukbo!’” (Isaias 6:5) Iyo, an dai masukol na kabanalan ni Jehova nagpagirumdom ki Isaias kan saiyang pagigin makasalan asin pagigin bakong perpekto. Sa primero, pinangluyahan nin buot an maimbod na lalaking iyan. Pero dai siya pinabayaan ni Jehova sa kamugtakan na iyan.

¹⁸ May sarong serafin na tulos-tulos na rinanga an propeta. Paano? An makapangyarihan na espiritung iyan luminupad pasiring sa altar, kuminua duman nin baga, asin idinuta an baga sa ngabil ni Isaias. Tibaad garo baga mas makulog iyan kisa nakakaranga. Pero girumdumon na saro ining bisyon na pano nin simbolikong kahulugan. Aram na marhay ni Isaias, na sarong maimbod na Judio, na aroaldaw na idinudulot sa altar kan templo an mga atang bilang pambayad sa mga kasalan. Asin mamumuton na ipinagirumdom kan serafin sa propeta na minsan ngani talagang bako siyang perpekto, “maati an mga ngabil,” puwede pa man giraray siyang magkaigwa nin malinig na kamugtakan sa atubangan nin Diyos. a Andam si Jehova na mansayon na banal—dawa sa relatibong paagi sana—an sarong bakong perpekto asin makasalan na tawo.—Isaias 6:6, 7.

19. Paano posible para sa sato na magin banal sa relatibong paagi, dawa ngani bako kitang perpekto?

 ¹⁹ Totoo man iyan ngunyan. An gabos na atang kaidto na idinulot sa altar sa Jerusalem anino sana nin sarong bagay na urog na dakula—an sarong perpektong atang, na idinulot ni Jesu-Cristo kan 33 C.E. (Hebreo 9:11-14) Kun talagang nagsusulsol kita sa satong mga kasalan, itinatanos an satong mga salang gibo, asin nagtutubod sa atang na iyan, pinapatawad kita. (1 Juan 2:2) Puwede man kitang magkaigwa nin malinig na kamugtakan sa atubangan nin Diyos. Kaya, pinapagirumdom kita ni apostol Pedro: “Nasusurat: ‘Magpakabanal kamo, huli ta ako banal.’” (1 Pedro 1:16) Mangnuhon na dai sinabi ni Jehova na dapat kitang magin kapareho niya kabanal. Nungka niyang inaasahan an imposible sa sato. (Salmo 103:13, 14) Imbes, sinasabi sa sato ni Jehova na magin banal kita huli ta siya banal. “Bilang mga aking namumutan,” hinihinguwa tang arugon siya sa pinakamakakaya ta bilang bakong perpektong mga tawo. (Efeso 5:1) Kaya para maabot an pagigin banal, kinakaipuhan an padagos na paghihinguwa. Mantang nag-uuswag kita sa espirituwal, nagmamaigot kita  kada aldaw na ‘gibuhon na lubos an kabanalan.’—2 Corinto 7:1.

20. (a) Taano ta mahalagang masabutan niyato na puwede kitang magin malinig sa paghiling kan satong banal na Diyos? (b) Ano an nagin epekto ki Isaias kan maaraman niya na nabayadan na an saiyang mga kasalan?

²⁰ Namumuot si Jehova sa kun ano an matanos asin dalisay. Nauungis siya sa kasalan. (Habakuk 1:13) Pero dai siya nauungis sa sato. Sagkod na an pagmansay niyato sa kasalan kapareho kan pagmansay niya—ikinakaungis an maraot, namumutan an marahay—asin naghihinguwang sundan an perpektong mga lakad ni Cristo Jesus, pinapatawad ni Jehova an satong mga kasalan. (Amos 5:15; 1 Pedro 2:21) Kun nasasabutan niyato na puwede kitang magin malinig sa paghiling kan satong banal na Diyos, dakula an epekto kaiyan. Girumdumon, an kabanalan ni Jehova sa primero nagpagirumdom ki Isaias kan saiya mismong pagigin maati. Sinabi niya: “Hirak man sa sako!” Pero kan masabutan niya na an saiyang mga kasalan nabayadan na, nagbago an saiyang pananaw. Kan maghapot si Jehova kun siisay an maboluntaryo sa sarong asignasyon, tulos-tulos na nagsimbag si Isaias, maski ngani dai niya aram kun ano an magigin kalabot. Nagsabi siya: “Uya ako! Isugo mo ako.”—Isaias 6:5-8.

21. Ano an basehan niyato para magtiwala na puwede kitang magin banal?

²¹ Linalang kita sa ladawan kan banal na Diyos, asin igwa kita nin mga kuwalidad asin nin kakayahan na masabutan an espirituwal na mga bagay. (Genesis 1:26) Gabos kita igwa nin kakayahan na magin banal. Mantang padagos tang hinihinguwang magin banal, nauugmang tumabang si Jehova. Sa paggibo kaiyan, urog kitang mapaparani sa satong banal na Diyos. Dugang pa, mantang pinag-aadalan ta an mga kuwalidad ni Jehova sa masunod na mga kapitulo, mahihiling niyato na kadakul nin mapuwersang mga dahilan para rumani sa saiya!