1, 2. Unsang panan-awon ang nakita ni propetang Isaias, ug unsay gitudlo niini kanato bahin kang Jehova?

 SI Isaias nahingangha sa iyang nakita—usa ka panan-awon gikan sa Diyos. Kadto tinuod kaayo! Si Isaias sa ulahi misulat nga iyang ‘nakita si Jehova’ diha sa Iyang halangdong trono. Ang sidsid sa besti ni Jehova mipuno sa dako kaayong templo sa Jerusalem.—Isaias 6:1, 2.

² Si Isaias nahingangha sab sa iyang nadungog—kusog kaayong pag-awit maong ang templo nauyog abot sa mga pundasyon niini. Ang awit maoy gikan sa mga serapin, mga espiritung linalang nga taas kaayog ranggo. Ang simpleng mga pulong sa ilang awit naay dakong kahulogan: “Balaan, balaan, balaan si Jehova sa mga panon. Ang tibuok yuta napuno sa iyang himaya.” (Isaias 6:3, 4) Ang tulo ka beses nga paggamit sa pulong “balaan” diha sa awit naghatag nianag linaing pasiugda, ug angayan lang kay walay makalabaw sa pagkabalaan ni Jehova. (Pinadayag 4:8) Ang pagkabalaan ni Jehova gipasiugda sa tibuok Bibliya. Ginatos ka bersikulo naglangkit sa iyang ngalan uban sa mga pulong nga “balaan” ug “pagkabalaan.”

3. Nganong daghan ang nagpalayo sa Diyos imbes makigsuod niya?

³ Klaro nga ang usa sa pangunang mga butang nga buot ni Jehova nga atong masabtan bahin kaniya mao nga siya balaan. Pero daghan karon ang negatibog panglantaw sa pagkabalaan. Para sa uban, ang tawong balaan nagtuo nga mas matarong siya kay sa uban  o nagpakaaron-ingnon nga nag-alagad sa Diyos. Ang mga tawo nga negatibog panghunahuna bahin sa ilang kaugalingon magpalayo na hinuon sa Diyos imbes madani sa iyang pagkabalaan. Mahadlok tingali sila nga dili gyod sila angayan nga makigsuod sa balaang Diyos. Busa daghan ang nagpalayo sa Diyos tungod sa iyang pagkabalaan. Makapasubo gyod na, kay ang pagkabalaan sa Diyos maoy lig-ong rason sa pagpakigsuod kaniya. Ngano? Sa dili pa nato tubagon kanang pangutanaha, atong hisgotan kon unsa gyod ang pagkabalaan.

4, 5. (a) Unsa ang “pagkabalaan,” ug unsay wala ipasabot niini? (b) Sa unsang duha ka hinungdanong paagi nga si Jehova “nabulag”?

⁴ Ang pagkabalaan sa Diyos wala magpasabot nga siya mapahitas-on, o ubos ug panglantaw sa uban. Sa kasukwahi, siya nagdumot sa maong mga kinaiya. (Proverbio 16:5; Santiago 4:6) Busa unsa gyod ang kahulogan sa pulong “balaan”? Ang Hebreohanong pulong para sa “balaan” nga gigamit sa Bibliya nagkahulogang “nabulag.” Kini nga pulong nagpasabot nga ang usa ka tawo o butang gilain para sa pag-alagad sa Diyos. Ang pagkabalaan nagpasabot sab sa pagkahinlo ug pagkaputli. Sa unsang paagi kining pulonga mapadapat kang Jehova? Nagpasabot ba na nga siya “nabulag” gikan sa dili hingpit nga mga tawo, nga siya layo kanato?

⁵ Dili. Ingong “ang Balaang Usa sa Israel,” gipasaligan ni Jehova ang iyang katawhan nga siya nagpuyo sa ilang taliwala, bisan pag sila makasasala. (Isaias 12:6; Oseas 11:9) Busa bisag balaan siya, dili siya layo sa mga nagsimba kaniya. Pero sa unsang paagi siya “nabulag”? Sa duha ka hinungdanong paagi. Una, siya nabulag gikan sa tanang kalalangan kay siya lang ang Labing  Hataas. Ang iyang pagkaputli ug pagkahinlo maoy kinalabwan ug walay kinutoban. (Salmo 40:5; 83:18) Ikaduha, si Jehova dili gyod makasala, ug makapahupay na. Ngano?

6. Nganong makapahupay nga si Jehova dili gyod makasala?

⁶ Nagkinabuhi ta sa kalibotan diin panagsa rang makita ang tinuod nga pagkabalaan. Ang tanang butang niini nga kalibotan nga nahilayo sa Diyos nahugawan tungod sa sala ug pagkadili-hingpit. Kitang tanan kinahanglang makigbisog sa atong pagkamakasasala. Kon dili ta magbantay, madaog ta sa sala. (Roma 7:15-25; 1 Corinto 10:12) Dili gyod na mahitabo kang Jehova kay siya dili makasala ug dili mohimog daotan. Kini maoy dugang rason kon nganong makaseguro ta nga si Jehova ang kinamaayohang Amahan ug nga makasalig gyod ta niya. Lahi si Jehova sa dili hingpit nga tawhanong amahan kay siya matinud-anon, matarong, ug dili moabusar sa iyang gahom. Tungod sa iyang pagkabalaan, imposible gyod nga mohimo siyag daotan. Kay ang pagkabalaan ni Jehova maoy pinakalig-ong rason nga mosalig ta niya, naay mga panahon nga gigamit niya ang iyang pagkabalaan ingong basehanan sa paghimog mga panaad. (Amos 4:2) Makapahupay gyod na!

7. Nganong makaingon ta nga ang pagkabalaan bahin gyod sa personalidad ni Jehova?

⁷ Ang pagkabalaan bahin gyod sa personalidad ni Jehova. Unsay gipasabot niana? Pananglitan, kon maghisgot tag tawo, mahunahunaan dayon nato ang pagkadili-hingpit. Ang pagkadili-hingpit makaapektar sa tanan natong ginabuhat. Pero kon maghisgot ta kang Jehova, mahunahunaan dayon nato ang pagkabalaan.  Ang tanan niyang himoon hinlo, putli, ug matarong. Dili gyod nato mailhan si Jehova kon dili nato masabtan ang pulong nga “balaan.”

8, 9. Unsay nagpakita nga motabang si Jehova sa mga tawo aron mahimo silang balaan bisag dili sila hingpit?

⁸ Kay balaan kaayo si Jehova, makaingon gyod ta nga siya ang Tinubdan sa tanang pagkabalaan. Dili siya hakog ug wala niya ni itago aron siya ray makabaton niini nga hiyas; gitugotan niya nga mabatonan ni sa uban ug malipay siya sa paghimo niini. Hunahunaa ni: Dihang ang Diyos nakigsulti kang Moises pinaagig anghel diha sa nagdilaab nga tanom, bisan ang yuta sa duol nahimong balaan tungod sa presensiya ni Jehova!—Exodo 3:5.

⁹ Posible ba nga mahimong balaan ang dili hingpit nga mga tawo sa tabang ni Jehova? Oo, sa limitadong paagi. Ang Diyos mihatag sa iyang katawhang Israel ug kahigayonan nga mahimong usa ka “balaang nasod.” (Exodo 19:6) Iyang gipanalanginan ang maong nasod pinaagi sa kahikayan sa pagsimba nga balaan, hinlo, ug putli. Busa ang pagkabalaan kadaghan gihisgotan sa Moisesnong Balaod. Gani, ang hataas nga saserdote nagsul-ob ug bulawang plaka atubangan sa iyang turban, diin ang tanan makakita niini dihang mahayagan kini sa adlaw. Gikulit niana ang mga pulong: “Ang pagkabalaan iya ni Jehova.” (Exodo 28:36) Busa ang taas nga sukdanan sa kahinlo ug kaputli kinahanglan nilang ipakita sa ilang pagsimba ug sa paagi sa ilang pagkinabuhi. Giingnan sila ni Jehova: “Kinahanglan nga balaan mo, kay ako, si Jehova nga inyong Diyos, balaan.” (Levitico 19:2) Dihang ang mga Israelinhon  naningkamot nga sundon ang mga sugo sa Diyos, sila giisip niya nga balaan bisag dili sila hingpit.

10. Kon bahin sa pagkabalaan, nganong lahi ang karaang Israel kon itandi sa ilang silingang mga nasod?

¹⁰ Ang balaang pagsimba sa mga Israelinhon lahi kaayo sa pagsimba sa ilang silingang mga nasod. Ang maong paganong mga nasod nagsimbag mga diyos nga wala gani maglungtad, mga diyos nga gihulagway ingong bayolente, hakog, ug imoral. Dili gyod sila balaan. Ang mga tawo nga nagsimba sa maong mga diyos nahimong dili balaan. Busa si Jehova nagpasidaan sa iyang mga alagad nga magpabiling bulag gikan sa paganong mga magsisimba ug sa ilang hugaw nga relihiyosong mga buhat.—Levitico 18:24-28; 1 Hari 11:1, 2.

11. Sa unsang paagi ang pagkabalaan sa langitnong bahin sa organisasyon ni Jehova makita diha (a) sa mga anghel? (b) sa mga serapin? (c) kang Jesus?

¹¹ Bisag ang mga Israelinhon naningkamot nga mahimong balaan, dili gyod sila mahimong sama ka balaan sa langitnong bahin sa organisasyon sa Diyos. Ang minilyong espiritung mga linalang nga maunongong nag-alagad sa Diyos gitawag nga iyang “balaang mga panon.” (Deuteronomio 33:2; Judas 14) Nasundog nila pag-ayo ang pagkabalaan sa Diyos. Ug hinumdomi ang mga serapin nga nakita ni Isaias sa iyang panan-awon. Ang awit niining gamhanang espiritung mga linalang nagpakita nga naa silay importanteng papel sa pagpahibalo sa pagkabalaan ni Jehova sa tibuok uniberso. Pero naay usa ka espiritung linalang nga labaw nilang tanan—ang bugtong Anak sa Diyos. Si Jesus ang kinalabwang nagsundog sa pagkabalaan ni Jehova maong nailhan siya ingong “ang Balaang Usa sa Diyos.”—Juan 6:68, 69.

12, 13. (a) Nganong angayan lang nga ang ngalan sa Diyos isipong balaan? (b) Nganong kinahanglang hinloan ni Jehova ang iyang ngalan gikan sa tanang pagbutangbutang?

¹² Komosta ang ngalan sa Diyos? Sumala sa atong nasabtan sa Kapitulo 1, ang maong ngalan dili lang titulo. Kini nagrepresentar kang Jehova nga Diyos, apil ang tanan niyang hiyas. Busa ang Bibliya nag-ingon nga ang iyang “ngalan balaan.” (Isaias 57:15) Sa Moisesnong Balaod, ang pagpasipala sa ngalan sa Diyos usa ka sala nga ang silot maoy kamatayon. (Levitico 24:16) Ug matikdi kon unsay giuna ni Jesus diha sa pag-ampo: “Amahan namo nga anaa sa mga langit, balaanon unta ang imong ngalan.” (Mateo 6:9) Ang pagbalaan sa usa ka butang nagpasabot nga tahoron kini ug isipong sagrado. Kon ang ngalan sa Diyos balaan na, nganong kinahanglan pa man ning balaanon?

¹³ Ang balaang ngalan sa Diyos gidaot ug gipakaulawan pinaagi sa mga bakak ug pagbutangbutang. Sa Eden, si Satanas namakak bahin kang Jehova ug gipatuo niya ang unang mga tawo nga si Jehova dili maayong Magmamando. (Genesis 3:1-5) Sukad niadto, gipaneguro ni Satanas—ang magmamando niining dili balaang kalibotan—nga mokaylap ang mga bakak bahin sa Diyos. (Juan 8:44; 12:31; Pinadayag 12:9) Ang mga relihiyon nagtudlo nga ang Diyos mapihigon, walay pagtagad nato, ug pintas. Sila nag-ingon nga gisuportahan sa Diyos ang ilang pintas nga mga gubat. Imbes dayegon ang Diyos sa iyang nindot nga kalalangan, daghan ang nagtuo nga resulta ni sa ebolusyon o sulagma lang ni nga mitungha. Oo, ang ngalan sa Diyos grabeng gidaot. Kinahanglan kining balaanon;  kinahanglang ipasig-uli ang pagtahod nga nahiangay niini. Naghinamhinam ta sa panahon nga hinloan na ni Jehova ang iyang ngalan gikan sa tanang pagbutangbutang. Iya ning himoon pinaagi sa Gingharian nga gimandoan sa iyang Anak. Nalipay ta nga himoon ang atong maarangan sa pagbalaan sa ngalan sa Diyos.

14. Nganong ang espiritu sa Diyos gitawag nga balaan, ug nganong ang pagpasipala batok sa balaang espiritu seryoso kaayong sala?

¹⁴ Duna pay laing butang nga nalangkit kang Jehova nga halos sa tanang panahon gitawag nga balaan—ang iyang espiritu, o aktibong puwersa. (Genesis 1:2) Gamiton ni Jehova ang maong gamhanang puwersa sa pagtuman sa iyang katuyoan. Ang tanang ginahimo sa Diyos balaan, putli, ug hinlo, busa ang iyang aktibong puwersa gitawag nga balaang espiritu. (Lucas 11:13; Roma 1:4) Ang pagpasipala batok sa balaang espiritu, nga naglakip sa tinuyong pagsupak sa katuyoan ni Jehova, maoy sala nga dili mapasaylo.—Marcos 3:29.

15. Unsay angay natong bation tungod sa pagkabalaan ni Jehova?

¹⁵ Dili lisod sabton kon nganong ang mga tawo mahingangha sa pagkabalaan sa Diyos. Pananglitan, ang Salmo 99:3 nag-ingon: “Ipadayeg kanila ang imong mahimayaong ngalan, kay kini makapahingangha ug balaan.” Kini nga kahingangha naglakip sa dakong pagtahod kaniya ug sa iyang ngalan. Angay lang nga mobati ta ana kay labaw kaayo ang pagkabalaan sa Diyos. Kini putli, hinlo, ug mahimayaon. Pero dili ni angayng makapalayo nato kaniya. Hinuon, makapasuod ni nato kaniya. Ngano?

16. (a) Sa unsang paagi ang pagkabalaan konektado sa himaya, o katahom? Paghatag ug pananglitan. (b) Unsay giingon sa Bibliya bahin sa katahom sa atong balaang Diyos?

 ¹⁶ Gipakita sa Bibliya nga ang pagkabalaan konektado pod sa katahom. Sa Isaias 63:15, ang langit gitawag nga “halangdong puloy-anan sa pagkabalaan ug himaya [o, “katahom,” footnote].” Ang himaya o katahom makapadani kanato. Pananglitan, tan-awa ang hulagway sa panid 39. Dili ba ka madani sa maong talan-awon? Nganong ganahan ka ani? Matikdi kon unsa ka limpiyo ang tubig. Hinlo ang hangin kay asul ang langit ug nagsidlak ang kahayag. Pero kon ang maong kahimtang usbon—ang sapa punog basura, ang kakahoyan ug kabatoan gisulatsulatan, ang hangin hugaw tungod sa polusyon—dili na ta ganahan niini. Sagad, nindot, o matahom, para nato ang usa ka butang kon kini hinlo ug hayag. Kining mga pulonga puwede pong gamiton sa paghulagway sa pagkabalaan ni Jehova. Dili ikatingala nga ganahan tang magbasa bahin sa katahom ni Jehova. Pananglitan, ang Bibliya naghisgot nga ang atong balaang Diyos naglingkod sa iyang trono sa langit ug siya nagsidlak sa kahayag, naggilakgilak samag mahalong mga bato, ug nagdan-ag sama sa kalayo o bililhong mga metal.—Ezequiel 1:25-28; Pinadayag 4:2, 3.

17, 18. (a) Unsay gibati ni Isaias sa primero dihang iyang nakita ang panan-awon? (b) Giunsa paggamit ni Jehova ang usa ka serapin sa paghupay kang Isaias, ug unsa ang kahulogan sa gibuhat sa serapin?

¹⁷ Pero angay ba tang mobating ubos kay balaan kaayo ang Diyos? Siyempre. Ang tinuod, gamay kaayo ta kon itandi kang Jehova. Pero nagpasabot ba ni nga dili na ta puwedeng masuod kaniya? Matikdi ang reaksiyon ni Isaias pagkadungog niya sa gisulti sa mga serapin bahin sa pagkabalaan ni Jehova. “Unya ako miingon:  ‘Alaot ko! Daw mora na kog patay, kay usa ko ka tawong hugaw ug mga ngabil, ug nagpuyo ko taliwala sa katawhan nga hugaw ug mga ngabil; kay nakita sa akong mga mata ang Hari, si Jehova sa mga panon!’” (Isaias 6:5) Busa dihang nakita ni Isaias ang pagkabalaan ni Jehova, nahinumdoman niya nga siya makasasala ug dili hingpit. Sa primero, naguol kaayo siya. Pero naay gihimo si Jehova.

¹⁸ Nagpadala dayon si Jehova ug usa ka serapin sa paghupay sa propeta. Sa unsang paagi? Ang gamhanang serapin milupad paingon sa halaran, nagkuhag usa ka nagbagang uling gikan niana, ug gidapat kini sa mga ngabil ni Isaias. Morag sakit na imbes makahupay. Pero hinumdomi nga usa to ka panan-awon nga punog simbolikong kahulogan. Si Isaias nga matinumanong Hudiyo, nahibalo nga ang mga halad gitanyag kada adlaw diha sa halaran sa templo alang sa pagtabon sa sala. Ug ang serapin mahigugmaong nagpahinumdom sa propeta nga bisan pag siya dili hingpit, “nga hugaw ug mga ngabil,” puwede gihapon siyang makabaton ug hinlong baroganan atubangan sa Diyos. a Si Jehova andam mag-isip sa dili hingpit nga tawo ingong balaan—sa limitadong paagi.—Isaias 6:6, 7.

19. Sa unsang paagi puwede gihapon tang mahimong balaan sa limitadong paagi bisag dili ta hingpit?

¹⁹ Mao pod nay gihimo ni Jehova karon. Ang mga halad nga gitanyag diha sa halaran sa Jerusalem dunay mas dakong kahulogan—ang hingpit nga halad nga  gitanyag ni Jesu-Kristo niadtong 33 C.E. (Hebreohanon 9:11-14) Kon tinuod tang naghinulsol sa atong mga sala, magtul-id sa atong mga sayop, ug magpakitag pagtuo sa maong halad, kita mapasaylo. (1 Juan 2:2) Kita sab makabaton ug hinlong baroganan atubangan sa Diyos. Busa si apostol Pedro nagpahinumdom kanato: “[Kini] nasulat: ‘Magmabalaan mo, kay ako balaan.’” (1 Pedro 1:16) Matikdi nga wala mag-ingon si Jehova nga kinahanglang sama ta ka balaan niya. Dili gyod siya magdahom ug labaw sa atong mahimo. (Salmo 103:13, 14) Hinuon, si Jehova nagsugo kanato nga magmabalaan kay siya balaan. “Ingong minahal nga mga anak,” maningkamot ta nga sundogon siya kutob sa maarangan bisag dili ta hingpit. (Efeso 5:1) Busa ang pagkahimong balaan maoy padayon nga proseso. Samtang mohamtong ta sa espirituwal, maningkamot ta nga mahimong “mas balaan” kada adlaw.—2 Corinto 7:1.

20. (a) Nganong importante nga masabtan nato nga puwede tang mahimong balaan sa panan-aw sa atong balaang Diyos? (b) Unsay reaksiyon ni Isaias dihang nahibaloan niya nga ang iyang mga sala napasaylo na?

 ²⁰ Si Jehova nahigugma sa kon unsay matarong ug putli. Gidumtan niya ang sala. (Habacuc 1:13) Apan wala siya magdumot nato. Kon sundogon nato ang iyang panglantaw sa sala—dumtan ang daotan, ug higugmaon ang maayo—ug maningkamot nga sundon pag-ayo ang mga tunob ni Jesus, pasayloon ta ni Jehova. (Amos 5:15; 1 Pedro 2:21) Dihang masabtan nato nga puwede tang mahimong hinlo sa panan-aw sa atong balaang Diyos, dako nig epekto kanato. Hinumdomi, ang pagkabalaan ni Jehova sa primero nagpahinumdom kang Isaias nga dili siya hingpit. Siya miingon: “Alaot ko!” Pero dihang nasabtan niya nga ang iyang mga sala gipasaylo na, nausab ang iyang reaksiyon. Dihang nangita si Jehova ug boluntaryo aron himoon ang usa ka asaynment, si Isaias misanong dayon bisan pag wala siya mahibalo kon unsay nalangkit niini. Siya miingon: “Ania ko! Ipadala ko!”—Isaias 6:5-8.

21. Nganong makaseguro ta nga maugmad nato ang pagkabalaan?

²¹ Gibuhat ta sumala sa larawan sa balaang Diyos, maong naa tay katakos nga makasundog sa iyang mga hiyas ug makabatog suod nga relasyon kaniya. (Genesis 1:26) Kitang tanan naay katakos nga mahimong balaan. Samtang maningkamot ta nga mahimong balaan, malipay si Jehova nga motabang nato. Ingong resulta, mas masuod ta sa atong balaang Diyos. Dugang pa, samtang atong hisgotan ang mga hiyas ni Jehova sa mosunod nga mga kapitulo, makita nato nga naay daghang maayong rason nga makigsuod ta niya!