Ibuot 3

“Edisana, Edisana, Edisana, Jehovah”

1, 2. Nso n̄kukụt ke prọfet Isaiah okokụt, ndien nso ke enye ekpep nnyịn aban̄a Jehovah?

 UTEN̄E ama odoro Isaiah ke se enye okokụtde—n̄kukụt otode Abasi. Ekenen̄ede etie nte ata idem n̄kpọ! Isaiah ekewet ke ukperedem ete ke imọ ima inen̄ede ‘ikụt Jehovah’ etiede ke edikon̄ ebekpo Esie. Akwa ekụra Jehovah ama ọyọhọ akwa temple Jerusalem.—Isaiah 6:1, 2.

² Uten̄e ama odoro Isaiah ke se enye okokopde n̄ko—ikwọ oro ekenen̄erede ọsọn̄ tutu temple enyen̄e esịm ata itiat idakisọn̄. Mme seraphim, ẹdide mme edibotn̄kpọ eke spirit oro ẹdude ke ata edikon̄ idaha ẹkekwọ ikwọ emi. Mmọ ẹketan̄a ọkpọsọn̄ inem inem ikwọ mmọ ke mme mfefere ikọ ubọn̄ emi: “Edisana, edisana, edisana, Jehovah mme udịm: ubọn̄ esie ke ọyọhọ ke ofụri ererimbot.” (Isaiah 6:3, 4) Ndida ikọ oro “edisana” utịm ikata n̄kwọ ikwọ ọnọ enye san̄asan̄a nsọn̄uyo, ndien oro etịm odot, koro Jehovah edide edisana ke akakan udomo. (Ediyarade 4:8) Ẹsọn̄ọ ẹtịn̄ ẹban̄a edisana idaha Jehovah ke ofụri Bible. Ediwak ufan̄ikọ ẹbuan enyịn̄ esie ye ikọ oro, “edisana” ye “edisana n̄kpọ.”

3. Didie ke mme ukwan̄ ekikere ẹban̄ade edisana idaha Jehovah ẹwọn̄ọde mme owo ẹkpọn̄ Abasi utu ke ndidụri mmọ n̄kpere enye?

³ Do, nte an̄wan̄ade, kiet ke otu akpan n̄kpọ oro Jehovah oyomde nnyịn idiọn̄ọ iban̄a imọ edi nte ke imọ idi edisana. Edi, ekikere emi iyakke ediwak owo mfịn ẹsan̄a ẹkpere Abasi. Ndusụk owo ke ndudue ẹbuan edisana idaha ye edikụt idem ke edinen m̀mê edinyene nsunsu uten̄e Abasi. Mbon oro mîdaha idemmọ ke n̄kpọ ẹkeme ndinen̄ede n̄kop ndịk utu ke ndikop inem mban̄a edisana idaha Abasi. Mmọ ẹkeme ndikop ndịk nte ke tutu amama mmimọ ididotke ndisan̄a n̄kpere edisana Abasi emi. Ntem, ediwak owo ẹwọn̄ọde ẹkpọn̄ Abasi ke  ntak edisana idaha esie. Emi edi ata n̄kpọ mfụhọ, koro edisana idaha Abasi akam edi okopodudu ntak ndisan̄a n̄kpere enye. Ntak-a? Mbemiso ibọrọde mbụme oro, ẹyak nnyịn ineme iban̄a se ata edisana idaha edide.

Nso Idi Edisana Idaha?

4, 5. (a) Nso ke edisana idaha ọwọrọ, ndien nso ke enye mîwọrọke? (b) Ke nso akpan usụn̄ iba ke Jehovah ‘ada san̄asan̄a’?

⁴ Abasi ndidi edisana iwọrọke ite ke enye enyene ebeubọk idaha, atan̄ idem, m̀mê edi owo oro esịnde mbon efen ke ndek. Ke edide isio, enye asasua mme utọ edu oro. (Mme N̄ke 16:5; James 4:6) Ntre, nso ke ikọ oro “edisana” enen̄ede ọwọrọ? Ke Bible eke usem Hebrew, ẹda ikọ oro ẹto ikọ emi ọwọrọde “da san̄asan̄a.” Ke utuakibuot, “edisana” aban̄a n̄kpọ oro ẹsiode ẹnịm san̄asan̄a man ẹkûda ẹnam n̄kpọ ke ọsọ usụn̄, m̀mê n̄kpọ oro ẹten̄ede. Edisana idaha n̄ko enen̄ede ọnọ ekikere aban̄a n̄kpọ oro asanade onyụn̄ edide ediden̄i. Didie ke ikọ emi abuana Jehovah? Nte emi ọwọrọ ke enye ‘ada san̄asan̄a’ ọkpọn̄ mme anana-mfọnmma owo, enen̄erede odu oyom usụn̄ ọkpọn̄ nnyịn?

⁵ N̄wan̄ansa-o. Nte “Edisana Abasi Israel,” Jehovah eketịn̄ aban̄a idemesie nte idude “ke ufọt” ikọt imọ, okposụkedi mmọ ẹkedide mme anamidiọk. (Isaiah 12:6; Hosea 11:9) Ntre edisana idaha esie inamke enye ada nsannsan. Didie ndien, ke enye ‘ada san̄asan̄a’? Ke akpan usụn̄ iba. Akpa kan̄a, enye ada san̄asan̄a ọkpọn̄ kpukpru edibotn̄kpọ koro enye ikpọn̄ edide Ata Edikon̄. Ediden̄i ye edisana idaha esie inyeneke adan̄a. (Psalm 40:5; 83:18) Udiana, Jehovah ada ata san̄asan̄a ọkpọn̄ kpukpru idiọkn̄kpọ, ndien oro edi n̄kpọ oro akamade ndọn̄esịt. Ntak-a?

6. Ntak emi nnyịn ikemede ndibọ ndọn̄esịt nto Jehovah ndida ata san̄asan̄a n̄kpọn̄ idiọkn̄kpọ?

⁶ Nnyịn idu uwem ke ererimbot oro ọsọn̄de ndinyene ata edisana idaha. Kpukpru se iban̄ade n̄kaowo oro adian̄arede ọkpọn̄ Abasi ẹbiara ke ndusụk usụn̄ oto idiọkn̄kpọ ye unana mfọnmma. Kpukpru nnyịn inyene ndin̄wana mbiọn̄ọ  idiọkn̄kpọ oro odude nnyịn ke idem. Ndien kpukpru nnyịn idu ke itiendịk edidi se idiọkn̄kpọ akande ubọk edieke nnyịn mîdụhe ke ukpeme. (Rome 7:15-25; 1 Corinth 10:12) Jehovah idụhe ke utọ idaha oro. Sia adade san̄asan̄a ọkpọn̄ idiọkn̄kpọ ofụri ofụri, tutu amama ntọi idiọkn̄kpọ ndomokiet iditụkke enye. Emi ọsọn̄ọ ekikere oro nnyịn inyenede iban̄a Jehovah nte mfọnn̄kan Ete, koro emi ọwọrọ ke enye edi se ẹberide edem ọyọhọ ọyọhọ. Sia mîbietke mme ete eke owo emi ẹdide mme anamidiọk, tutu amama Jehovah idibiarake, idinyụn̄ idụhe uwem unana ukpan, m̀mê ndinam se inọde owo unan. Edisana idaha esie iyakke utọ n̄kpọ oro ndomokiet ekeme ndidu. Ke ndusụk idaha Jehovah esikam otomo edisana idaha esie, anamde un̄wọn̄ọ esie edi se ẹkemede ndinen̄ede mberi edem. (Amos 4:2) Nte oro inọhọ ndọn̄esịt?

7. Didie ke ẹkeme ndidọhọ ke Jehovah ke idemesie edi edisana?

⁷ Jehovah ke idemesie edi edisana. Nso ke oro ọwọrọ? Ke ndinam an̄wan̄a: Kere ban̄a ikọ oro “owo” ye “unana mfọnmma.” Afo ukemeke nditịn̄ mban̄a owo ye unana edikere mban̄a unana mfọnmma. Unana mfọnmma ọyọyọhọ nnyịn idem onyụn̄ akara kpukpru n̄kpọ oro inamde. Idahaemi kere ban̄a ikọ iba oro ẹdide ata isio isio—“Jehovah” ye “edisana.” Jehovah ọyọhọ ye edisana idaha. Kpukpru se iban̄ade enye ẹdi edisana, ediden̄i, ye edinen. Nnyịn ikemeke ndinen̄ede mfiọk Jehovah ye unana editịm n̄kere nnyụn̄ ntịm ndiọn̄o ikọ oro—“edisana.”

“Edisana Idaha Enyene Jehovah”

8, 9. Nso iwụt nte ke Jehovah an̄wam mme anana-mfọnmma owo ẹkabade ẹdi edisana ke ndusụk udomo?

⁸ Sia Jehovah ke idemesie edide edisana, enen ndidọhọ ke enye edi ntọn̄ọ ofụri edisana idaha. Enye idaha ibụk imụm ọsọn̄urua edu emi inịm inọ idemesie kpọt; enye ayak enye ọnọ mbon efen, onyụn̄ anam ntre ke ata ntatubọk. Kamse, ke ini Abasi eketịn̄de ikọ ọnọ Moses ebe ke angel ke ikan̄ oro akasakde ke eto, idem n̄kann̄kụk oro ama akabade edi edisana ke ntak oro Jehovah okodude do!—Exodus 3:5.

 ⁹ Nte mme anana-mfọnmma owo ẹkeme ndikabade ndi edisana ye un̄wam Jehovah? Ih, ke ndusụk udomo. Abasi ama ọnọ ikọt esie Israel ifet edikabade ndi “edisana idụt.” (Exodus 19:6) Enye ama ọnọ idụt oro ndutịm utuakibuot oro ekedide edisana, ananade ndo, onyụn̄ edide ediden̄i. Edisana edi ikọ oro odude ndien ndien ke Ibet Moses. Ke akpanikọ, akwa oku ekesiyara uyaraibuot oro enyenede ubak eti gold ke iso, oro kpukpru owo ẹkekemede ndikụt nte enye esemde ke un̄wana. Ẹma ẹnyụn̄ ẹkap mme ikọ emi: “Edisana idaha enyene Jehovah.” (Exodus 28:36, NW) Ntre edikon̄ idaha oro edide edisana ye ediden̄i ekenyene ndinam utuakibuot ye usụn̄ uwem mmọ ẹdi isio. Jehovah ọkọdọhọ mmọ ete: “Mbufo ẹdi edisana: koro ami Jehovah Abasi mbufo ndide edisana.” (Leviticus 19:2) Adan̄a nte nditọ Israel ẹkedude uwem ẹkekem ye item Abasi ke usụn̄ oro mmọ ẹkekemede nte mme anana-mfọnmma owo, mmọ ẹkedi edisana ke ndusụk udomo.

10. Kaban̄a edisana idaha, nso ukpụhọde ikodu ke ufọt Israel eset ye mme idụt oro ẹkekande mmọ ẹkụk?

¹⁰ Edida edisana idaha ke akpan n̄kpọ ntem ekedi ata isio isio n̄kpọ ye utuakibuot mme idụt oro ẹkekande Israel ẹkụk. Mme idụt ukpono ndem oro ẹketuak ibuot ẹnọ mme anana-uwem ye abian̄a abian̄a abasi, mme abasi oro ẹkewụtde nte ẹtiede afai afai, ẹdiọkde itọn̄, ẹnyụn̄ ẹdude etịme etịme uwem. Mmọ ikasanake ke usụn̄ ndomokiet. Edituak ibuot nnọ mme utọ abasi oro ikayakke mme owo ẹsana. Ntem, Jehovah ama odụri mme asan̄autom esie utọn̄ ete ẹda san̄asan̄a ẹkpọn̄ mme okpono ndem ye mme ndedehe edinam ido ukpono mmọ.—Leviticus 18:24-28; 1 Ndidem 11:1, 2.

11. Didie ke ẹkụt edisana idaha esop Jehovah eke heaven ke (a) mme angel? (b) mme seraphim? (c) Jesus?

¹¹ Ke mfọnn̄kan idaha, idụt Israel eset oro Jehovah ekemekde ekekeme ndiwụt sụk mbukpọn̄ mbukpọn̄ mbiet edisana idaha esop Abasi eke heaven. Ẹkot ediwak miliọn mme edibotn̄kpọ eke spirit oro ẹsọn̄ọde ẹda ẹnam n̄kpọ ẹnọ Abasi “edisana ikọt” Esie. (Deuteronomy 33:2; Jude 14) Mmọ ẹwụt uyama ye uyai edisana idaha Abasi ke mfọnmma usụn̄. Ti n̄ko mme  seraphim oro Isaiah okokụtde ke n̄kukụt esie. Mme ikọ ikwọ mmọ ẹnọ ekikere nte ke mme okopodudu edibotn̄kpọ eke spirit emi ẹnyene akamba udeme ke ndinam ẹdiọn̄ọ edisana idaha Jehovah ke ofụri ekondo. Nte ededi, edibotn̄kpọ eke spirit kiet okon̄ akan kpukpru mmọ—oro edi ikpọn̄-ikpọn̄ edibon Eyen Abasi. Jesus edi owo emi owụtde edisana idaha Jehovah ke mfọnn̄kan usụn̄. Nte enende, ẹdiọn̄ọ enye nte “Edisana Eyen Abasi.”—John 6:68, 69.

Edisana Enyịn̄, Edisana Spirit

12, 13. (a) Ntak emi ẹkotde enyịn̄ Abasi edisana? (b) Ntak anade ẹnam enyịn̄ Abasi asana?

¹² Nso kaban̄a enyịn̄ Abasi? Nte nnyịn ikokụtke ke Ibuot 1, enyịn̄ oro idịghe ikpîkpu idiọn̄ọ m̀mê udorienyịn̄. Enye ada aban̄a Jehovah Abasi, onyụn̄ esịne kpukpru edu esie. Ntem, Bible asian nnyịn ete ke ‘enyịn̄ esie edi Edisana.’ (Isaiah 57:15) Ibet Moses akanam edibiat enyịn̄ Abasi edi idiọkn̄kpọ n̄kpa. (Leviticus 24:16) Nyụn̄ tịm fiọk se Jesus ekebemde iso asiak ke akam: “Ete nnyịn emi odude ke heaven: Yak [inam enyịn̄ fo asana, NW].” (Matthew 6:9) Ndinam n̄kpọ asana ọwọrọ ndisio n̄kpọ nnịm san̄asan̄a nte edisana nnyụn̄ n̄kpono enye, nnyụn̄ nda enye ke edisana. Edi ntak emi oyomde ẹnam n̄kpọ oro edide edisana nte enyịn̄ Abasi asana?

¹³ Ẹda nsu ye edidọk ẹsabade ẹnyụn̄ ẹsịn edisana enyịn̄ Abasi ke ndek. Ke Eden, Satan ama osu nsu adian Jehovah onyụn̄ ọnọ ekikere ete ke Enye edi idiọk Andikara. (Genesis 3:1-5) Tọn̄ọ ke ini oro, Satan—andikara ererimbot emi mîsanake mi—okụt ete ke nsu aban̄ade Abasi atara asuana. (John 8:44; 12:31; Ediyarade 12:9) Ediwak ido ukpono ẹwụt Abasi nte owo oro etiede ufịk ufịk, odude nsannsan, m̀mê etiede ibak ibak. Mmọ ẹdọhọ ke enye ọnọ mmimọ ibetedem ke mme ekọn̄ uduọkiyịp mmimọ. Ẹsiwak ndimen itoro oro ẹkpenọde Abasi ke utịbe utịbe utom obot esie nnọ nnan nnan mbuari, m̀mê edito ke unam mforo owo. Ih, ẹbiat enyịn̄ Abasi idiọk idiọk. Ana ẹnam enye asana; ẹfiak ẹnọ enye nnennen ubọn̄ esie. Ọdọn̄ nnyịn ndikụt ẹnamde enyịn̄ esie asana ẹnyụn̄ ẹwụtde unen  itie edikara esie, ndien nnyịn imadara nditịp n̄kpọ nsịn ke usụn̄ ekededi ke utịbe utịbe uduak emi.

14. Ntak emi ẹkotde spirit Abasi edisana, ndien ntak emi edisụn̄i edisana spirit edide akwa idiọkn̄kpọ ntre?

¹⁴ Odu n̄kpọ efen oro etịmde enyene ebuana ye Jehovah oro ẹsiwakde ndikot edisana kpukpru ini—kpa spirit, m̀mê anamutom odudu esie. (Genesis 1:2) Jehovah ada ọkpọsọn̄ odudu emi ndinam mme uduak esie. Kpukpru se Abasi anamde, enye anam enye ke edisana usụn̄ oro mîdeheke, ntre odot ẹkot anamutom odudu esie edisana spirit, m̀mê spirit emi edide ata edisana. (Luke 11:13; Rome 1:4) Ndisụn̄i edisana spirit, emi abuanade ndikokoi nnam n̄kpọ mbiọn̄ọ mme uduak Jehovah, edi idiọkn̄kpọ oro edifen mîdụhe.—Mark 3:29.

Ntak Emi Edisana Idaha Jehovah Odụride Nnyịn Ekpere Enye

15. Ntak emi edinyene ndịk Abasi edide nnennen usụn̄ edinam n̄kpọ mban̄a edisana idaha Jehovah, ndien nso ke utọ ndịk oro abuana?

¹⁵ Do, isọn̄ke ndikụt ntak emi Bible emende edisana idaha Abasi ekeyịri ye owo ndinyene ndịk Abasi. Ke uwụtn̄kpọ, Psalm 99:3 okot ete: “Mmọ ẹyetoro akwa enyịn̄ ndịk fo: enye edi edisana.” Nte ededi, ndịk emi idịghe idiọk ndịk. Utu ke oro, enye edi ndinyene ntotụn̄ọ ukpono ye uten̄e, ukpono asan̄ade ye akamba uku. Odot ndinyene utọ edu emi, sia edisana idaha Abasi enen̄ede okon̄ akan nnyịn. Enye asana ke n̄wọrọnda usụn̄, etie ubọn̄ ubọn̄. Kpa ye oro, enye ikpenyeneke ndinam nnyịn ida nsannsan ikpọn̄ enye. Ke edide isio, ndise edisana idaha Abasi ke nnennen usụn̄ oyodụri nnyịn itịm ikpere enye. Ntak-a?

16. (a) Didie ke edisana idaha enyene ebuana ye uyai? Nọ uwụtn̄kpọ. (b) Didie ke se ẹtịn̄de ẹban̄a Jehovah ke n̄kukụt enen̄ede owụt edisana idaha, ediden̄i, ye uyama?

¹⁶ N̄kpọ kiet edi-o, Bible abuan edisana idaha ye uyai. Ke Isaiah 63:15, ẹtịn̄ ẹban̄a heaven nte “edisana [ye ediye, NW] ebiet idụn̄” Abasi. Nnyịn imesima n̄kpọ oro eyede. Ke uwụtn̄kpọ, se ndise oro odude ke page 33. Nte afo umaha ndise oro? Nso inam enye enen̄ede eye ndise ntre? Tịm se nte  mmọn̄ oro asanade. Anaedi idem ofụm odude mi ideheke, koro ikpaenyọn̄ etiede blu blu, un̄wana onyụn̄ ayamade. Idahaemi, edieke ukem ebiet oro okpokpụhọrede—mbio ọyọhọde idịm oro, ẹwetde ufiet ẹyọhọ mme eto ye mme itiat oro ẹdude, ofụm ọyọhọde ye idiọk ufịk—nnyịn idimaha enye aba; nnyịn idisan̄ake ikpere do. Nnyịn ke ndammana usụn̄ isibuan uyai ye se isanade, se iden̄ide, ye un̄wana. Ẹkeme ndida mme ukem ikọ emi ntịn̄ mban̄a edisana idaha Jehovah. Eyịghe idụhe nnyịn isikopde nduaidem iban̄a n̄kukụt ẹwụtde nte Jehovah etiede! Ọyọhọ ye un̄wana, esem nte nsemnsem itiat, ayama nte ikan̄, m̀mê eden̄i onyụn̄ ayama akan ọsọn̄urua ukwak—oro edi uyai edisana Abasi nnyịn.—Ezekiel 1:25-28; Ediyarade 4:2, 3.

17, 18. (a) Didie ke n̄kukụt Isaiah okotụk enye ke akpa? (b) Didie ke Jehovah akada seraphim ọdọn̄ Isaiah esịt, ndien nso ke edinam seraphim oro ọkọwọrọ?

¹⁷ Nte ededi, nte edisana idaha Abasi ekpenyene ndinam nnyịn ikere ke idi usụhọde owo ke ẹmende ẹdomo ye enye? Nte ededi, ibọrọ edi ih. Kamse, nnyịn imosụhọde ikan Jehovah—ndien nditịn̄ ntre edi n̄kponinua oro akam emenerede nnyịn itie. Nte ndifiọk emi ekpenyene ndidian̄ade nnyịn n̄kpọn̄ enye? Kere nte Isaiah akanamde n̄kpọ ke ini enye okokopde nte mme seraphim ẹtan̄ade edisana idaha Jehovah. “Ndien ami ndọhọ, nte, Mbọm mi! koro mmakpa: koro ami ndide owo edidehe n̄kpọk-inua, nnyụn̄ ndụn̄ ke otu mbon edidehe n̄kpọk-inua: koro enyịn mi okụtde edidem, Jehovah mme udịm.” (Isaiah 6:5) Ih, anana-mbiet edisana idaha Jehovah ama eti Isaiah adan̄a nte enye edide anana-mfọnmma ye anamidiọk. Ke akpa, anam-akpanikọ prọfet emi ama okop editịmede esịt. Edi Jehovah ikọkpọn̄ke enye ke idaha oro.

¹⁸ Seraphim kiet ama ọsọsọp ọdọn̄ prọfet emi esịt. Didie? Okopodudu spirit emi ama efe aka itieuwa, okosio mbubek ikan̄ do ada otụk Isaiah ke n̄kpọkinua. Oro akam ekeme nditie nte se ikamade ubiak akan ndidọn̄ esịt. Nte ededi, ti ete ke oro ekedi n̄kukụt oro ekenyenede ediwak n̄kpọ oro enye adade aban̄a. Isaiah, anam-akpanikọ Jew oro ama etịm ọfiọk ete  ke ẹkesiwa uwa ke usen ke usen ke itieuwa ke temple ndida nsio isop mme idiọkn̄kpọ. Ndien seraphim oro ke ima ama eti prọfet oro ete ke okposụkedi enye ekedide anana-mfọnmma owo, “owo edidehe n̄kpọk-inua,” enye ekeme ndisụk nnyene edisana idaha ke iso Abasi. a Jehovah ama enyịme ndida anana-mfọnmma, anamidiọk owo nte edisana—ke nsụhọde n̄kaha, ke ndusụk udomo.—Isaiah 6:6, 7.

19. Didie ke nnyịn ikeme ndisana ke ndusụk udomo, kpa ye oro idide mme anana-mfọnmma?

¹⁹ Ukem oro ke edi mfịn. Kpukpru uwa oro ẹkesiwade ke itieuwa ke Jerusalem ẹkedi sụk mbukpọn̄ n̄kpọ oro okponde akan—kpa mfọnmma uwa kiet, oro Jesus Christ akawade ke isua 33 E.N. (Mme Hebrew 9:11-14) Edieke nnyịn inen̄erede ikabade esịt, ikpụhọrede ukwan̄ usụn̄ uwem nnyịn, inyụn̄ ibuọtde idem ke uwa oro, ẹyefen nnyịn. (1 John 2:2) Nnyịn n̄ko imekeme ndinyene edisana idaha ke iso Abasi. Ntem, apostle Peter eti nnyịn ete: “Ẹwet ẹte, Mbufo ẹdisana, koro Ami ndide edisana.” (1 Peter 1:16) Tịm fiọk ete ke Jehovah ikọdọhọke  ite ke ana nnyịn isana nte imọ isanade. Enye iyomke se nnyịn mîkemeke ndinam ito nnyịn. (Psalm 103:13, 14) Utu ke oro, Jehovah ọdọhọ nnyịn isana koro imọ idide edisana. “Nte ndima nditọ,” nnyịn idomo ndikpebe enye ke ofụri ukeme nnyịn nte mme anana-mfọnmma owo. (Ephesus 5:1) Ntre ndinyene edisana idaha edi edinam emi akade-ka iso. Nte nnyịn ikọride ke n̄kan̄ eke spirit, nnyịn ke inam “[edisana, NW] ido nnyịn ẹfọn ẹma” ke usen ke usen.—2 Corinth 7:1.

20. (a) Ntak emi edide akpan n̄kpọ ndidiọn̄ọ nte ke nnyịn imekeme ndisana ke enyịn edisana Abasi nnyịn? (b) Didie ke eketie Isaiah ke idem ke ini enye ọkọfiọkde ete ke ẹma ẹsio isop mme idiọkn̄kpọ imọ?

²⁰ Jehovah ama se idide edinen ye ediden̄i. Enye asasua idiọkn̄kpọ. (Habakkuk 1:13) Edi enye isuaha nnyịn. Adan̄a nte nnyịn isede idiọkn̄kpọ nte enye esede—isuade se idiọkde, imade se ifọnde—inyụn̄ idomode nditiene mfọnmma nde ikpat Christ Jesus, Jehovah eyefen mme idiọkn̄kpọ nnyịn. (Amos 5:15; 1 Peter 2:21) Ke ini nnyịn ifiọkde ite ke nnyịn imekeme ndisana ke enyịn edisana Abasi nnyịn, oro enen̄ede otụk nnyịn. Ti ete ke edisana idaha Jehovah ke akpa ama eti Isaiah aban̄a edidehe idaha esie. Enye ama ofiori ete: “Mbọm mi!” Edi ke ndondo oro enye ọkọfiọkde ete ke ẹsio isop idiọkn̄kpọ imọ, idaha ekikere esie ama okpụhọde. Ke ini Jehovah okoyomde owo oro edinọde idem unyịme unyịme ndika utom oro ẹdidọn̄de, Isaiah ama enyịme inikiet inikiet okposụkedi enye mîkọfiọkke se utom oro edibuanade. Enye ama ọbọrọ ete: “Se mi, dọn̄ mi utom.”—Isaiah 6:5-8.

21. Nso isọn̄ ke nnyịn inyene ndidori enyịn nte ke nnyịn imekeme ndinyene edisana idaha?

²¹ Ẹkenam nnyịn ke mbiet edisana Abasi, ẹnọ nnyịn nti edu uwem ye ukeme ndifiọk mme n̄kpọ eke spirit. (Genesis 1:26) Kpukpru nnyịn imenyene ukeme ndikọri edisana idaha. Nte nnyịn ikade iso ndikọri edisana idaha, Jehovah adara ndisịn un̄wam. Ke ndinam ntre, nnyịn iyetịm isan̄a ikpere edisana Abasi nnyịn. Ke adianade do, nte nnyịn ikerede iban̄a mme edu Jehovah ke mme ibuot oro ẹditienede, nnyịn iyokụt ke ediwak nti ntak ẹdu nnyịn ndisan̄a n̄kpere enye!

[Ikọ idakisọn̄]

Mme Mbụme Nditie N̄kere

Leviticus 19:1-18 Edieke anade edu uwem nnyịn edi edisana, mme edumbet ewe ke ana nnyịn ida isịn ke edinam?

Deuteronomy 23:9-14 Didie ke ọkpọkpọ usanaidem enyene ebuana ye edisana idaha? Didie ke emi okpotụk usịnen̄kpọ, ukamaidem, ye ebietidụn̄ nnyịn?

Rome 6:12-23; 12:1-3 Nte nnyịn idomode ndisana, didie ke nnyịn inyene ndise idiọkn̄kpọ ye mme odudu ererimbot emi?

Mme Hebrew 12:12-17 Didie ke nnyịn ikpebịne edisana ido, m̀mê edisana idaha?

[Mme Mbụme Ukpepn̄kpọ]

 [Ndise ke page 33]

Nte nnyịn imade n̄kpọ oro eyede, kpa ntre ke ikpama edisana idaha