3-تاراۋ
«ەحوبا كيەلى، كيەلى، كيەلى»
1، 2. يشايا پايعامبار قانداي ايان كورگەن جانە ودان ەحوبا جونىندە نە بىلۋگە بولادى؟
كوز الدىندا پايدا بولعان كورىنىستى كورگەندە، ياعني قۇدايدان ايان العاندا، يشايا تاڭ-تاماشا قالىپ، وكپەسى اۋزىنا تىعىلادى. ٴبارى وڭىندە بولىپ جاتقانداي بولعانى سونشالىق، كەيىنىرەك يشايا زاڭعار بيىك تاعىندا وتىرعان ‹ەحوبانى كوردىم› دەپ جازعان. ەحوبانىڭ سالتاناتتى شاپانىنىڭ ەتەگى يەرۋساليمدەگى ٴزاۋلىم عيباداتحانانىڭ ٸشىن الىپ جاتتى (يشايا 6:1، 2، جد).
2 عيباداتحانانىڭ ىرگەتاسىن شايقالتا، زور داۋىسپەن ايتىلىپ جاتقان ٵندى ەستىگەندە دە، يشايانىڭ بويىن ەرەكشە سەزىم بيلەيدى. شىرقاپ جاتقان وتە جوعارى دارەجەلى رۋحاني تىرشىلىك يەلەرى سەرافيمدەر ەدى. ولار سازدى، زور داۋىستارىمەن: «الەمنىڭ يەسى [«ەحوبا»، جد] كيەلى، كيەلى، كيەلى! بۇكىل دۇنيە ونىڭ سالتاناتتى ۇلىلىعىنا كەنەلگەن!»— دەپ جار سالىپ جاتتى (يشايا 6:3، 4، سىلتەمەگە قارا). «كيەلى» ٴسوزىنىڭ ٷش رەت قايتالانۋى وعان ەرەكشە ەكپىن تۇسىرەدى، بۇل ورىندى دا، ويتكەنى ەحوبا شەكسىز كيەلى (ايان 4:8). كيەلى كىتاپتىڭ باسىنان اياعىنا دەيىن ەحوبانىڭ كيەلىلىگىنە ەرەكشە نازار اۋدارىلادى. ونىڭ ەسىمىنە قاتىستى كوپتەگەن تارماقتاردا «كيەلى»، «كيەلىلىك» نەمەسە «قاسيەتتى» دەگەن سوزدەر قولدانىلادى.
3. ەحوبانىڭ كيەلىلىگىنە قاتىستى قانداي جاڭساق ويلاردىڭ كەسىرىنەن كوپشىلىك قۇدايعا جاقىنداۋدىڭ ورنىنا، ودان باس تارتۋدا؟
3 وسىنى ەسكەرەر بولساق، ەحوبا ٴبىزدىڭ ٶزى جايلى تۇسىنگەنىمىزدى قالايتىن باستى جايتتاردىڭ ٴبىرى — ونىڭ كيەلىلىگى. ٴبىراق بۇگىنگى كۇنى كوپ ادامدا وسى ٴسوزدىڭ ٶزى جاعىمسىز سەزىم تۋدىرادى. كەيبىرەۋلەر جاڭىلىسىپ، كيەلى بولۋدى پاڭدانۋمەن نەمەسە قۇدايشىل بولعانسۋمەن بايلانىستىرادى. ال وزدەرىن ۇنەمى تومەن سانايتىن ادامدار ٷشىن قۇدايدىڭ كيەلىلىگى تارتىمدى ەمەس، قايتا، ۇرەي تۋدىرۋى مۇمكىن. ولار وزدەرىن كيەلى قۇدايعا جاقىنداۋعا ەشقاشان لايىقتى بولا المايتىنداي سەزىنۋى ىقتيمال. سوندىقتان كوپتەگەن ادام كيەلىلىگىنە بولا قۇدايعا تەرىس قاراۋى ىقتيمال. وكىنىشتى-اق، ويتكەنى قۇدايدىڭ كيەلىلىگى وعان جاقىنداۋ كەرەك ەكەندىگىمىزدىڭ كەلەلى سەبەبى بولىپ تابىلادى. نەگە؟ بۇل سۇراققا جاۋاپ بەرمەس بۇرىن، ناعىز كيەلىلىكتىڭ نە ەكەنىن قاراستىرىپ كورەلىك.
كيەلىلىك دەگەن نە؟
4، 5. ا) «كيەلىلىك» دەگەن نەنى بىلدىرەدى جانە نەنى بىلدىرمەيدى؟ ٵ) قانداي ماڭىزدى ەكى ماعىنادا ەحوبا «بولىنگەن»؟
4 قۇدايدىڭ كيەلى ەكەندىگى ول ٶز-وزىنە ريزا، تاكاپپار نەمەسە وزگەلەرگە جوعارىدان قارايدى دەگەندى بىلدىرمەيدى. كەرىسىنشە، ول مۇنداي قاسيەتتەردى جەك كورەدى (ناقىل سوزدەر 16:5؛ جاقىپ 4:6). ولاي بولسا، «كيەلى» ٴسوزىنىڭ ناعىز ماعىناسى قانداي؟ كونە ەۆرەي تىلىنەن «كيەلى» دەپ اۋدارىلاتىن ٴسوز «ٴبولىنۋ» دەگەندى بىلدىرەتىن ٴسوزدىڭ تۇبىرىنەن شىققان. ال عيباداتقا بايلانىستى «كيەلى» دەگەن ٴسوز كادىمگى قولدانىستان ٴبولىنىپ الىنىپ، قاسيەتتى بولۋ ماعىناسىندا قولدانىلادى. سونىمەن قاتار كيەلىلىكتەن پاك تازالىق پەن كىرشىكسىزدىك دەگەن وي انىق كورىنەدى. بۇل ٴسوز ەحوباعا قاتىستى قالاي قولدانىلادى؟ ول كەمەلسىز ادامداردان «بولىنگەن»، ياعني بىزدەن وتە الشاق، دەگەندى بىلدىرە مە؟
5 جوق. «يسرايل سيىنعان كيەلى» ەحوبا حالقىنا، كۇناكار بولعاندارىنا قاراماستان، ولاردىڭ ‹اراسىندا› مەكەندەيتىن قۇداي ەكەنىن ايتتى (يشايا 12:6؛ وشيا 11:9). دەمەك، كيەلىلىگى ونى بىزدەن الشاق ەتپەيدى. وندا قالايشا ول «بولىنگەن»؟ ماڭىزدى ەكى ماعىنادا: بىرىنشىدەن، ول — ەڭ جوعارعى ٵرى وسى ماعىنادا بارلىق جاراتىلىستان بولىنگەن. ونىڭ تازالىعى مەن كىرشىكسىزدىگى تولىق ٵرى ٴمىنسىز (ٴزابۋر 40:5 [39:6]؛ مارقا 5:7، سىلتەمەگە قارا). ەكىنشىدەن، ەحوبا كۇنا اتاۋلىدان مۇلدەم «بولىنگەن». ال بۇل بولسا بىزگە جۇبانىش بەرەدى. نەگە؟
6. نەلىكتەن ەحوبانىڭ كۇنادان مۇلدەم بولەك ەكەندىگى بىزگە جۇبانىش بەرەدى؟
6 ٴبىز ناعىز كيەلىلىك سيرەك كەزدەسەتىن دۇنيەدە ٶمىر ٴسۇرىپ جاتىرمىز. قۇدايدان بەزگەن ادامزات قوعامىمەن بايلانىستاعى نارسەلەردىڭ ٴبارىن كۇنا مەن كەمەلسىزدىك ازدى-كوپتى بىلعاعان، ياكي ارامداعان. ٴبارىمىز دە بويىمىزداعى كۇنامەن كۇرەسۋىمىز كەرەك. ساق بولماساق، ٴبارىمىز ٷشىن دە كۇنانىڭ شىرماۋىندا قالۋ قاۋپى ٴتونىپ تۇر (ريمدىكتەرگە 7:15—25؛ قورىنتتىقتارعا 1-حات 10:12). ال ەحوبا ٷشىن مۇنداي قاۋىپ جوق. ول كۇنا اتاۋلىدان مۇلدەم الشاق، ونىڭ بولمىسىندا ەشقاشان كۇنانىڭ تيتتەي داعى دا بولمايدى. بۇل ەحوبانىڭ ەڭ كەرەمەت اكە ەكەندىگىنە تاعى دا ٴبىزدىڭ كوزىمىزدى جەتكىزە تۇسەدى، ويتكەنى بۇل وعان تولىق سەنىم ارتۋعا بولادى دەگەندى بىلدىرەدى. كۇناكار اكەلەردەن ەرەكشەلىگى ەحوبا ەشقاشان بۇزىلىپ، ونەگەسىز نە زالىم بولىپ كەتپەيدى. ونىڭ كيەلىلىگى مۇنداي نارسەلەرگە مۇلدەم جول بەرمەيدى. بىردە ەحوبا كيەلىلىگىنەن ارتىق ەش نارسە ادامعا تولىق سەنىمدىلىك بەرە المايتىنىن كورسەتىپ، ٴتىپتى ٶز كيەلىلىگىمەن انت ەتكەن (اموس 4:2). بۇل ٴبىز ٷشىن جۇبانىش ەمەس پە؟
7. نەگە كيەلىلىك ەحوبانىڭ بولمىسىنىڭ اجىراماس بولىگى دەۋگە بولادى؟
7 كيەلىلىك — ەحوبانىڭ بولمىسىنىڭ اجىراماس بولىگى. بۇل نەنى بىلدىرەدى؟ مىسالى، «پەندە» جانە «كەمەلسىزدىك» دەگەن سوزدەردى قاراستىرىپ كورەيىك. اتالمىش ەكى ٴسوزدى ٴبىر-بىرىنەن دەربەس تۇسىندىرە المايسىڭ. كەمەلسىزدىك ٴبىزدىڭ بويىمىزعا ابدەن سىڭگەن، ٵرى ٵربىر ىسىمىزدە ونىڭ اسەرى بايقالىپ تۇرادى. ال ەندى «ەحوبا» جانە «كيەلى» دەگەن ەكى ٴتۇرلى ٴسوزدى قاراستىرايىق. ەحوبانىڭ بولمىسى تۇنعان كيەلىلىك. ونىمەن بايلانىسى باردىڭ ٴبارى تازا دا ٵدىل. «كيەلى» دەگەن ٴسوزدىڭ ماعىناسىن ٴتۇسىنىپ المايىنشا، ٴبىز ەحوبانىڭ شىن مانىندە قانداي ەكەنىن بىلە المايمىز.
«كيەلىلىك ەحوباعا تيەسىلى»
8، 9. ەحوبا ادامزاتتىڭ قانداي دا ٴبىر شامادا كيەلى بولۋىنا كومەكتەسەتىنى نەدەن كورىنەدى؟
8 ەحوبا كيەلىلىك قاسيەتىنىڭ بەينەسى بولعاندىقتان، ونى ورىندى تۇردە كيەلىلىكتىڭ قاينار كوزى دەۋگە بولادى. ول بۇل باعالى قاسيەتتى ٶزى عانا يەمدەنىپ قويماي، وزگەلەرگە دە دارىتادى، ٵرى مۇنى جومارتتىقپەن ىستەيدى. مىسالى، قۇداي مۇسامەن جانىپ تۇرعان بۇتانىڭ جانىندا پەرىشتە ارقىلى سويلەسكەندە، ەحوبامەن بايلانىسى بولعاندىقتان، ٴتىپتى بۇتانىڭ اينالاسى دا كيەلى بولىپ كەتەدى! (مىسىردان شىعۋ 3:5)
9 كەمەلسىز ادامدار ەحوبانىڭ كومەگىمەن كيەلى بولا الا ما؟ ٴيا، بەلگىلى ٴبىر شامادا بولا الادى. مىسالى، قۇداي يسرايل حالقىنا ‹قاسيەتتى حالىق› بولۋ مۇمكىندىگىن بەرگەن (مىسىردان ). ول سول حالىققا باتاسىن توگىپ، كيەلى، تازا دا كىرشىكسىز عيبادات ەتۋ قۇرىلىمىن ورناتتى. كيەلىلىك — نەمەسە قاسيەتتىلىك — مۇسانىڭ زاڭىندا وقتىن-وقتىن قايتالانىپ وتىراتىن تاقىرىپ. باس ٴدىني قىزمەتكەر شالماسىنىڭ ماڭداي تۇسىنا جارىققا شاعىلىسىپ جالت-جۇلت ەتكەنىن ٴبارى كورە الاتىنداي ەتىپ التىن تاقتاشا تاعىپ جۇرەتىن. تاقتاشاعا: «كيەلىلىك ەحوباعا تيەسىلى»،— دەگەن سوزدەر ويىپ جازىلاتىن ( شىعۋ 19:6مىسىردان شىعۋ 28:36، جد). وسىلايشا ولاردىڭ عيباداتتارىن، سونداي-اق، ارينە، ٶمىر سالتتارىن دا، تازالىق پەن كىرشىكسىزدىك ەرەكشەلەندىرگەن. ەحوبا ولارعا: «قاسيەتتى بولىڭدار، سەبەبى جاراتۋشى، سەندەردىڭ قۇدايلارىڭ، مىنا مەن كيەلىمىن»،— دەگەن (لەۋىلىكتەر 19:2). يسرايلدىكتەر قۇدايدىڭ كەڭەسىن ۇستانعاندا، كەمەلسىز ادامعا مۇمكىن شامادا، قانداي دا ٴبىر ماعىنادا كيەلى بولعان.
10. ەجەلگى يسرايل مەن ونىڭ اينالاسىنداعى وزگە حالىقتاردىڭ اراسىندا كيەلىلىككە قاتىستى قانداي ايىرماشىلىق بولعان؟
10 بۇل وزگە حالىقتاردىڭ عيباداتىنان قاتتى ەرەكشەلەنەتىن. زۇلىم، اشكوز، ازعىن قۇدايلار رەتىندە بەينەلەنەتىن سول پۇتقا تابىنۋشى حالىقتار قۇلشىلىق ەتكەن تاڭىرلەر، شىندىعىنا كەلگەندە، تىرشىلىك ەتپەيتىن ٵرى جالعان بولاتىن. ولار كيەلىلىكتەن جۇرداي ەدى. مۇنداي تاڭىرلەرگە قۇلشىلىق ەتۋ كيەلى ەتپەيتىن، قايتا، ارامدايتىن. سوندىقتان ەحوبا ٶز حالقىنا پۇتقا تابىنۋشىلار مەن ولاردىڭ لاس ٴدىني جورالارىنان اۋلاق ٴجۇرۋدى ەسكەرتكەن (لەۋىلىكتەر 18:24—28؛ پاتشالىقتار 3-جازبا 11:1، 2).
11. ەحوبانىڭ ۇيىمىنىڭ كوكتەگى بولىگىنىڭ كيەلىلىگىن ا) پەرىشتەلەر، ٵ) سەرافيمدەر، ب) يسا قالاي كورسەتەدى؟
11 سويتكەنمەن دە ەجەلگى يسرايل حالقى، ارى كەتكەندە، ەحوبانىڭ ۇيىمىنىڭ كوكتەگى بولىگىنىڭ كيەلىلىگىنىڭ تەك مۇنارتقان ەلەسىن عانا كورسەتە العان بولار ەدى. قۇدايعا ادال قىزمەت ەتىپ جۇرگەن ميلليونداعان پەرىشتەلەر قاسيەتتىلەر دەپ اتالادى (زاڭدى قايتالاۋ 33:2؛ ياھۋدا 14). ولار قۇدايدىڭ كيەلىلىگىنىڭ نۇرلى دا تازا سۇلۋلىعىن كەمەلدى تۇردە كورسەتەدى. يشايا اياندا كورگەن سەرافيمدەردى ەسىڭە ٴتۇسىرشى. ولار شىرقاعان ٵننىڭ سوزدەرىنەن ەحوبانىڭ كيەلىلىگى بۇكىل الەمگە بەلگىلى بولۋ ٷشىن سول قۋاتتى رۋحاني جاراتىلىستاردىڭ ماڭىزدى ٴرول اتقاراتىنى كورىنەدى. ٴبىراق ولاردىڭ بارىنەن جوعارى تاعى ٴبىر رۋحاني جاراتىلىس بار، ول — قۇدايدىڭ جالعىز ۇلى. يسا — ەحوبانىڭ كيەلىلىگىنىڭ ەڭ اسقاق بەينەسى. سوندىقتان ول ورىندى تۇردە «قۇدايدىڭ كيەلىسى» دەپ اتالادى (جوحان 6:68، 69، سىلتەمەگە قارا).
كيەلى ەسىم جانە كيەلى رۋح
12، 13. ا) نەگە قۇدايدىڭ ەسىمى ورىندى تۇردە كيەلى دەپ اتالادى؟ ٵ) نەگە قۇدايدىڭ ەسىمى بارلىق جالادان تازارۋى ٴتيىس؟
12 قۇدايدىڭ ٶز ەسىمى جونىندە نە دەۋگە بولادى؟ ٴبىرىنشى تاراۋدان كورگەنىمىزدەي، ونىڭ ەسىمى جاي عانا لاۋازىم نە ەپيتەت ەمەس. ول، بارلىق قاسيەتتەرىن قوسا العاندا، ەحوبا قۇدايدىڭ بولمىسىن بىلدىرەدى. سوندىقتان جازبالاردا ونىڭ «ەسىمى كيەلى» دەلىنگەن (لۇقا 1:49). مۇسانىڭ زاڭى بويىنشا، قۇداي اتىن قورلاعان ادام ٶلىم جازاسىنا كەسىلەتىن (لەۋىلىكتەر 24:16). ال يسا دۇعاسىندا نەنى ٴبىرىنشى ورىنعا قويعانىن قاراشى: «كوكتەگى اكەمىز! سەنىڭ كيەلى ەسىمىڭ قاستەرلەنە بەرسىن» (ماتاي 6:9). بىردەڭەنى قاستەرلەۋ دەگەن ونى قادىر تۇتىپ، قاسيەتتى دە كيەلى ساناۋدى بىلدىرەدى. ٴبىراق قۇدايدىڭ ەسىمى سياقتى ونسىز دا تازا نارسەنى قاستەرلەۋدىڭ قاجەتى نە؟
13 قۇدايدىڭ كيەلى ەسىمى قارالاندى؛ وتىرىك پەن جالعان وعان داق سالدى. شايتان ەدەم باعىندا ەحوباعا جالا جاۋىپ، ونىڭ بيلىگى ادىلەتسىز دەگەنگە مەڭزەدى (جاراتىلىس 3:1—5). سودان بەرى شايتان — كيەلىلىكتەن جۇرداي قازىرگى دۇنيەنىڭ ٵمىرشىسى — قۇداي تۋرالى سول وتىرىكتىڭ تارالا بەرۋى ٷشىن قولىنان كەلگەننىڭ ٴبارىن ىستەپ كەلەدى (جوحان 8:44؛ 12:31؛ ايان 12:9). دىندەر قۇدايدى وزبىر، سەزىمسىز دە قاتىگەز ەتىپ بەينەلەيدى. ولار وزدەرىنىڭ قان سۋداي اعاتىن سوعىستارىن قۇداي قولداپ وتىر دەيدى. قۇدايدىڭ كەرەمەت جاراتىلىسىنا تيەسىلى قۇرمەت ٴجيى سوقىر كەزدەيسوقتىققا نەمەسە ەۆوليۋسياعا كورسەتىلىپ جاتادى. ٴيا، قۇدايدىڭ ەسىمىنە كۇيە جاعىلىپ، جالا جابىلۋدا. راسىندا دا، ول قاستەرلەنىپ، وزىنە تيەسىلى داڭقتى قايتا يەلەنۋى ٴتيىس. ٴبىز ەحوبا ٶز ەسىمىن بارلىق جالادان ٴبىرجولاتا تازارتاتىن كۇندى اڭسايمىز. ول مۇنى ۇلى بيلىك ەتەتىن پاتشالىق ارقىلى جاسايدى. وسى ۇلى نيەت جۇزەگە اسۋ ٷشىن قۋانا-قۋانا ٶز ۇلەسىمىزدى قوسقىمىز كەلەدى.
14. قۇدايدىڭ رۋحى نەگە كيەلى دەپ اتالادى جانە كيەلى رۋحتى قورلاۋ نەگە اۋىر كۇنا بولىپ ەسەپتەلەدى؟
14 ەحوبامەن تىعىز بايلانىستاعى ٵرى ارقاشان دەرلىك كيەلى اتالاتىن تاعى ٴبىر نارسە بار. بۇل — ونىڭ كيەلى رۋحى، نەمەسە «ارەكەت ەتۋشى كۇشى» (جاراتىلىس 1:2، جد). ەحوبا ەشتەڭە تەڭ كەلمەيتىن وسى كۇشىن ٶز نيەتتەرىن جۇزەگە اسىرۋ ٷشىن قولدانادى. ەحوبانىڭ بارلىق ٸسى كيەلى، تازا دا كىرشىكسىز، سوندىقتان ونىڭ ارەكەت ەتۋشى كۇشى ورىندى تۇردە كيەلى رۋح، نەمەسە قاسيەتتىلىك رۋحى، دەپ اتالادى (لۇقا 11:13؛ ريمدىكتەرگە 1:4، سىلتەمەگە قارا). كيەلى رۋحتى قورلاۋ، بۇعان سانالى تۇردە ەحوبانىڭ ەركىنە قارسى شىعۋ دا كىرەدى، كەشىرىلمەيتىن كۇنا بولىپ ەسەپتەلەدى (مارقا 3:29).
ەحوبانىڭ كيەلىلىگى ٴبىزدى وعان جاقىنداتادى
15. ەحوبا كيەلى بولعاندىقتان، نەگە وعان ۇنامدى، قاستەرلى قورقىنىش سەزىنگەنىمىز ورىندى جانە مۇنداي قورقىنىش نەنى بىلدىرەدى؟
15 كيەلى كىتاپتا نەلىكتەن قۇدايدىڭ كيەلىلىگى وعان ۇنامدى، قاستەرلى قورقىنىشپەن بايلانىستىرىلاتىنىن ٴتۇسىنۋ قيىن ەمەس. مىسالى، ايان 15:4 تە كەلەسى سوزدەر جازىلعان: «جاراتقان يە، كىم سەنەن قورىقپاس؟ سەنىڭ اتىڭنىڭ ۇلىلىعىن جاريالاۋدان كىم باس تارتپاق؟ جالعىز سەن عانا تولىقتاي قاسيەتتىسىڭ!» بۇل قورقىنىش — تەرەڭ قاستەرلەۋ سەزىمىنە بولەنىپ، بارىنشا قادىر تۇتۋ. قۇدايدىڭ كيەلىلىگى بىزدەن سونشا جوعارى بولعاندىقتان، مۇنداي سەزىمدە بولۋ ورىندى دا. كيەلىلىك كىرشىكسىز تازا ٵرى عاجاپ. سويتسە دە بۇل ٴبىزدى قۇدايدان الشاقتاتپاۋى كەرەك، كەرىسىنشە، ونىڭ كيەلىلىگىنە دەگەن دۇرىس كوزقاراس وعان جاقىنداتا تۇسەدى. نەگە بۇلاي دەۋگە بولادى؟
16. ا) كيەلىلىكتىڭ سۇلۋلىقپەن نەمەسە سالتاناتپەن قانداي بايلانىسى بار؟ مىسال كەلتىر. ٵ) پايعامبارلار العان ايانداردا ەحوبانىڭ قالاي سۋرەتتەلگەنى كيەلىلىك، تازالىق پەن جارىققا قالايشا ەرەكشە نازار اۋدارىلادى؟
16 كيەلى كىتاپتا كيەلىلىك سونىمەن قاتار سالتاناتتىلىقپەن، نەمەسە سۇلۋلىقپەن، بايلانىستىرىلادى. يشايا 63:15 تە كوك قۇدايدىڭ ‹قاسيەتتى، سالتاناتتى مەكەنى› رەتىندە سۋرەتتەلگەن. سۇلۋلىق پەن سالتاناتتىلىق ادامدى وزىنە باۋراپ تۇرادى. مىسالى، 33-بەتتەگى سۋرەتكە قاراشى. وعان قاراي بەرگىڭ كەلىپ تۇرادى ەمەس پە؟ ونى سونشا تارتىمدى ەتىپ تۇرعان نە؟ سۋدىڭ قانداي ٴمولدىر ەكەنىنە كوڭىل اۋدارشى. اسپان كوكپەڭبەك، كۇن نۇر شاشىپ تۇر، سوعان قاراعاندا، اۋا دا تازا بولۋ كەرەك. ەگەر تاپ وسى سۋرەتتە بۇلاق قوقىسقا تولعان، اعاشتار مەن تاستارعا سۋرەت سالىنىپ تاستالعان، ال اۋادا كوك ٴتۇتىن تۇرسا، ول ساعان تارتىمدى كورىنبەك تۇگىل، وعان قايتادان قاراعىڭ دا كەلمەيتىن بولسا كەرەك. ٴبىز كيەلىلىكتى بىردەن تازالىق، كىرشىكسىزدىك جانە جارىقپەن بايلانىستىرامىز. ەحوبانىڭ كيەلىلىگىن سۋرەتتەۋ ٷشىن دە وسى سوزدەردى قولدانۋعا بولادى. سوندىقتان اياندا ەحوبانىڭ بەينەسىن كورگەن پايعامبارلاردىڭ ونى قالاي سۋرەتتەيتىنى ٴبىزدى تاڭ-تاماشا قالدىراتىندىعى تۇسىنىكتى. كيەلى قۇدايىمىزدىڭ ٴسان-سالتاناتتى سۇلۋلىعى بىلاي سۋرەتتەلەدى: كوز شاعىلىستىراتىن جارىق نۇر توككەن، اسىل تاستارداي ساۋلە شاشقان، الاۋلاعان وتتاي نەمەسە ەڭ تازا ٵرى باعالى مەتالداي جالتىراعان (ەزەكيەل 1:25—28؛ ايان 4:2، 3).
سۇلۋلىق تارتىمدى، تاپ سولاي كيەلىلىك تە وزىنە تارتىپ تۇرادى
17، 18. ا) يشايا ايان كورگەندە، الدىمەن قانداي سەزىمدە بولعان؟ ٵ) ەحوبا يشايانى جۇباتۋ ٷشىن سەرافيمدى قالاي قولدانعان جانە ونىڭ ارەكەتىندە نە نارسە ەرەكشە كوڭىل قويۋعا تۇرارلىق؟
17 الايدا قۇدايدىڭ كيەلىلىگىمەن سالىستىرعاندا ٶزىمىزدى تومەن سەزىنۋىمىز كەرەك پە؟ ارينە. نەگىزىندە، ٴبىز ەحوبادان شىن مانىندە تومەنبىز، ٴبىزدىڭ ارامىزداعى ايىرماشىلىقتى سوزبەن ايتىپ جەتكىزە دە المايسىڭ. مۇنى بىلگەنىمىز ەحوبادان الشاقتاتۋى كەرەك پە؟ سەرافيمدەردىڭ ەحوبانىڭ كيەلىلىگىن جاريالاپ جاتقانىن ەستىگەندە، مۇنىڭ يشاياعا قالاي اسەر ەتكەنىن قاراشى. «سوندا مەن: — قاسىرەتكە قالدىم-اۋ، ەندى قۇريتىن بولدىم! سەبەبى مەن كۇناكارمىن، اۋزىمنان شىققان سوزدەرىم ارام. جانە سويلەگەن سوزدەرى ارام حالىقتىڭ اراسىندا تۇرىپ جاتىرمىن. سوندا دا مەن پاتشانى، الەمنىڭ يەسىن، ٶز كوزىممەن كوردىم!— دەدىم» (يشايا 6:5). ٴيا، ەحوبانىڭ شەكسىز كيەلى ەكەندىگى يشايانىڭ ٶزى قانشالىقتى كۇنالى دە كەمەلسىز ەكەنىن ەسىنە سالعان. العاشقىدا، سول ادال كىسىنىڭ ۇنجىرعاسى ٴتۇسىپ كەتەدى. ٴبىراق ەحوبا ونى مۇنداي كۇيدە قالدىرمايدى.
18 ٴبىر سەرافيم لەزدە پايعامباردى جۇباتادى. قالاي؟ زور كۇشى بار سول رۋح قۇرباندىق شالاتىن ۇستەلگە ۇشىپ بارىپ، شوق الىپ، يشايانىڭ اۋزىنا تيگىزەدى. بۇل جۇباتۋدان گورى، جانىنا باتىرىپ اۋىرتقانداي كورىنەر. الايدا مۇنىڭ بەينەلى ماعىناعا تولى ايان ەكەندىگى ەسىڭدە بولار. ادال ياھۋدي يشايا عيباداتحاناداعى قۇرباندىق ۇستەلىندە شالىناتىن مال كۇنانى وتەيتىندىگىن جاقسى بىلگەن. سەرافيم يشايا كەمەلسىز، «اۋزىنان شىققان سوزدەرى ارام» بولسا دا، قۇداي الدىندا تازا بولا الاتىنىن سۇيىسپەنشىلىكپەن ونىڭ ەسىنە سالعان a. ەحوبا كەمەلسىز، كۇناكار ادامدى، مەيلى بەلگىلى ٴبىر شامادا بولسىن، كيەلى دەپ قاراستىرۋعا دايار بولعان (يشايا 6:6، 7).
19. كەمەلسىز بولعانىمىزعا قاراماي، قالايشا بەلگىلى ٴبىر شامادا كيەلى بولۋىمىز مۇمكىن؟
19 بۇگىنگى كۇنى دە تاپ سولاي. يەرۋساليم عيباداتحاناسىندا شالىناتىن بۇكىل قۇرباندىقتار الدەقايدا زور نارسەنىڭ، ياعني ب. ز. 33-جىلى يسا ٴماسىح ۇسىنعان كەمەلدى قۇرباندىقتىڭ، نىشانى عانا بولعان (ەۆرەيلەرگە 9:11—14). ەگەر ٴبىز كۇنالارىمىزعا شىنىمەن وكىنەتىن، تەرىس جولدان قايتاتىن جانە يسانىڭ قۇرباندىعىنا سەنىم كورسەتەتىن بولساق، كەشىرىلەمىز (جوحاننىڭ 1-حاتى 2:2). سونداي-اق قۇداي الدىندا تازا بولامىز. سوندىقتان ەلشى پەتىر: «كيەلى جازبادا ونىڭ «قاسيەتتى بولىڭدار، سەبەبى مەن قاسيەتتىمىن!» دەگەنى بار عوي»،— دەپ ەسىمىزگە سالادى (پەتىردىڭ 1-حاتى 1:16). كوڭىل ٴبولشى، ەحوبا ٶزى قالاي كيەلى بولسا، ٴبىز دە تاپ سولاي كيەلى بولۋعا ٴتيىس ەكەنىمىزدى ايتپاعان. ول ەشقاشان قولىمىزدان كەلمەيتىندى تالاپ ەتپەيدى (ٴزابۋر 103:13، 14 [102:13، 14]). قايتا، ول كيەلى، نەمەسە قاسيەتتى، بولىڭدار، سەبەبى مەن كيەلىمىن دەگەن. «سۇيىكتى رۋحاني بالاسى» رەتىندە، كەمەلسىز ادامدارعا مۇمكىن شامادا، ٴبىز قولىمىزدان كەلگەنشە وعان ەلىكتەۋگە تىرىسامىز (ەفەستىكتەرگە 5:1). سونىمەن، كيەلىلىككە جەتۋ — توقتامايتىن پروسەسس. رۋحاني وسكەن سايىن، ‹كيەلىلىكتى جەتىلدىرە› ٴتۇسۋ ٷشىن كۇندەلىكتى كۇش سالامىز (قورىنتتىقتارعا 2-حات 7:1، جد).
20. ا) نەلىكتەن كيەلى قۇدايىمىزدىڭ كوز الدىندا تازا بولا الاتىنىمىزدى تۇسىنگەنىمىز ماڭىزدى؟ ٵ) يشاياعا كۇنالارىنان تازارعانىن بىلگەنى قالاي اسەر ەتكەن؟
20 ەحوبا ٵدىل ٵرى تازا نارسەنى جاقسى كورەدى، ال كۇنانى جەك كورەدى (ابباقۇق 1:13). ٴبىراق ول ٴبىزدى جەك كورمەيدى. ەگەر ٴبىز كۇناعا ونىڭ كوزىمەن قارايتىن، ياعني جاماندىقتى جەك كورىپ، جاقسىلىقتى سۇيەتىن، سونداي-اق ٴماسىح يسانىڭ كەمەلدى ۇلگىسىنە ەلىكتەۋگە تىرىساتىن بولساق، ەحوبا كۇنالارىمىزدى كەشىرەدى (اموس 5:15؛ پەتىردىڭ 1-حاتى 2:21). كيەلى قۇدايىمىزدىڭ كوز الدىندا تازا بولا الاتىنىمىزدى تۇسىنگەنىمىزدىڭ اسەرى وتە زور بولادى. ەسىڭدە مە، ەحوبانىڭ كيەلىلىگى يشاياعا ەڭ الدىمەن ٶزىنىڭ تازا ەمەستىگىن ەسىنە سالعان ەدى عوي. ول: «قاسىرەتكە قالدىم-اۋ»،— دەگەن. ٴبىراق كۇنالارىنان تازارعانىن تۇسىنە سالا، ونىڭ كوزقاراسى وزگەردى. ەحوبا بەلگىلى ٴبىر تاپسىرمانى ٶز ەركىمەن كىم ورىندايتىنىن سۇراعاندا، ونىڭ نە قىلعان تاپسىرما ەكەنىن بىلمەسە دە، يشايا بىردەن جاۋاپ بەرگەن. ول: «مەن بارمىن، يەم. مەنى جىبەرە گور»،— دەپ داۋىستايدى (يشايا 6:5—8).
21. كيەلىلىك دامىتا الاتىنىمىزعا سەنىمدى بولۋعا قانداي نەگىز بار؟
21 ٴبىز كيەلى قۇدايىمىزعا ۇقساس بولىپ جاراتىلعانبىز، ٵرى بىزدە مورالدىق قاسيەتتەر مەن رۋحاني نارسەلەردى ٴتۇسىنۋ قابىلەتى بار (جاراتىلىس 1:26). ٴبارىمىز دە بويىمىزدا كيەلىلىك دامىتا الامىز. ونى ٵردايىم جەتىلدىرە بەرەر بولساق، ەحوبا قۋانا قول ۇشىن بەرەدى. ال بۇلاي ەتكەنىمىز كيەلى قۇدايىمىزعا بارىنشا جاقىنداتا تۇسەدى. سونىمەن قاتار كەيىنگى تاراۋلاردا تالقىلاناتىن ەحوبانىڭ قاسيەتتەرىنە تەرەڭىرەك ۇڭىلگەن سايىن، وعان جاقىنداۋدىڭ اناعۇرلىم سالماقتى سەبەپتەرى بار ەكەنىن كورەمىز!
a كەمەلسىز ادامداردىڭ جاساعان كۇنالارىنىڭ كوبىسى سويلەۋ قابىلەتتەرىن قالاي قولدانعاندارىنىڭ ناتيجەسىندە بولىپ جاتادى (ناقىل سوزدەر 10:19؛ جاقىپ 3:2، 6).