1, 2. Le i kimonwa’ka kyāpelwe mupolofeto Isaya, ne kino kitufundija bika padi Yehova?

 ISAYA wāzakele pa mwanda wa kintu kyaāmwene—kimonwa kitamba kudi Leza. Kyāmwekele bu kintu kya bine! Isaya wāsonekele mwenda mafuku amba, “namwene Yehova” pa lupona lwandi lulampe. Munkukumba wa Yehova wāyudile tempelo mikatampe ya mu Yelusalema.—Isaya 6:1, 2.

² Kadi Isaya wāzakele pa mwanda wa byobya byawāivwene—ñimbo ya bukomo yajininye tempelo ne byalwilo byayo bine. Bādi bemba ñimbo i baselafimi, bipangwa bya ku mushipiditu bya peulu bininge. Bādi bemba mwa kimo na bino bishima bya bukomo amba: “Ujila, ujila, ujila i Yehova wa bibumbo. Ntanda yonso i miyule ntumbo yandi.” (Isaya 6:3, 4) Kwimba kishima “ujila” misunsa isatu kuleta mulangwe wa kutyityija, i kyendele’mo mwanda Yehova i ujila mu muswelo wa peulu kutabuka. (Kusokwelwa 4:8) Buujila bwa Yehova i butyityijibwe mu Bible mutuntulu. Mavese tutwa na tutwa i mengidije dijina dyandi pamo na kishima “ujila” ne “buujila.”

3. Le mumweno mubi pa buujila bwa Yehova i mulengeje namani bavule banyeme Leza pa kyaba kya kumufwena?

³ Na bubine, kintu kibajinji kisaka Yehova tuyukidije padi i amba aye i ujila. Inoko, bantu bavule kebevwanijangapo uno mulangwe. Bamo badingakanyanga buujila na boloke bwa kwisakila nansha lusa lwa bubela. Bantu bekonda na mumweno mubi wa abo bene babwanya kumona amba buujila bwa Leza buletanga moyo pa kyaba kya kusangela’bo. Padi bemonanga bule pa kufwena kudi uno Leza ujila. Penepa, bavule banyemanga Leza mwanda i ujila. Kino kileta bulanda, mwanda buujila bwa Leza i bubinga bukatampe bwitulengeja tumufwene. Mwanda waka? Kumeso kwa kulondolola kino kipangujo, twisambilei bidi pa mwikadile buujila bwa bine.

4, 5. (a) Lelo “buujila” i bika, ino kebushintululapo bika? (b) Le Yehova i “musansane” na bubi mu miswelo’ka ibidi ya kamweno?

⁴ Kunena’mba Leza i ujila kekushintululapo amba udi na kibengo, wizunzulanga, ne kufutulula bantu, mhm. Mwanda aye ushikilwe ino ngikadila. (Nkindi 16:5; Yakoba 4:6) Penepo, le kishima “ujila” kishintulula bika? Mu Kihebelu kya mu Bible, kino kishima i kitambe ku kishima kishintulula “kusansana.” Mu butōtyi, kishima “ujila” kifunkila pa kyokya kisansene na bikwabo, kimonwa bu kikola. Kadi buujila buletanga mulangwe wa kubulwa disubi ne butōki. Le kino kishima kidi na buluji’ka kudi Yehova? Le kishintulula amba i “musansane” na bantu bakubulwa kubwaninina, wikele netu kulampe bininge?

⁵ Nansha dimo. Byadi “Mwine Ujila wa Isalela,” Yehova wākulupije bantu bandi amba wādi ushikete umbukata mwabo, nansha byobādi bantu ba bubi. (Isaya 12:6; Hosea 11:9) Nanshi buujila bwandi kebumusonsololangapo netu. Le penepo, i “musansane” namani? I mu miswelo ibidi ya kamweno. Dibajinji, i musansane na bipangwa byonso mwanda aye bunka ye Mwine wa Mūlu Mwine. Butōki bwandi, ne kubulwa disubi kwandi i byampikwa mfulo. (Ñimbo ya Mitōto 40:5; 83:18) Muswelo wa bubidi, Yehova i musansane bininge na bubi bonso, kadi uno i mulangwe usenga. Mwanda waka?

6. Mwanda waka kusansana kusansene Yehova na bubi kwituseñanga?

⁶ Tudi mu ntanda kemuvudilepo kumweka buujila. Kintu kyonso kya bantu bapaluke Leza i kyoneke mu muswelo kampanda, kisubijibwe na bubi ne kubulwa kubwaninina. Batwe bonso tulwanga na bubi budi munda mwetu. Kadi batwe bonso tudi mu kyaka kya kunekenibwa na bubi shi ketutadijepo. (Bene Loma 7:15-25; 1 Bene Kodinda 10:12) Ino Yehova aye kadipo mu kino kyaka. Byakadipo na bubi, kakasubijibwapo na kabubi nansha katyetye. Kino kiningijanga kumona kotumona Yehova bu Tata muyampe, mwanda  kishintulula amba i muntu ukulupilwa bya binebine. Yehova, byawishidile na bashabana ba bubi, aye kakasubijibwapo, koneka nansha kubipijibwa. Bino byonso kebibwanyapo kulongeka pa mwanda wa buujila bwandi. Kyaba kimo Yehova wātyipile pa buujila bwandi, mwanda i kutupu kyeya kikulupilwa kutabuka buujila. (Amose 4:2) Mwene kino i kintu kikankamika?

7. Mwanda waka tubwanya kunena amba buujila i bumuntu bwa Yehova?

⁷ Buujila i bumuntu bwa Yehova. Le ko kunena namani? Kimfwa: Tala kishima “muntu” ne “kubulwa kubwaninina.” Shi kotela muntu nabya ubatela ne kubulwa kubwaninina. Mwanda kubulwa kubwaninina i kwitutādile mu byonso. Pano tala bishima bibidi bishile—“Yehova” ne “ujila.” Buujila i butādile Yehova. Bintu byandi byonso i byampikwa disubi, bitōka, byoloke. Ketukokejapo kuyuka Yehova mwaikadile binebine shi ketwaivwanije kino kishima kya mvubu mpata—“ujila.”

8, 9. I bika bilombola amba Yehova ukwashanga bantu bakubulwa kubwaninina bekale bajila mu muswelo kampanda?

⁸ Yehova byadi mwinē buujila, tubwanya kunena amba ye nsulo ya buujila bonso. Ino kadipo na mwino wa uno mwikadilo muyampe; upānanga’o ne ku bakwabo, kadi wibapanga’o na mutyima tō. Tala, kitatyi kyēsambile Leza na Mosesa kupityila kudi mwikeulu mu kimuna kitema, waālamwine enka ne nshi ya kine kifuko’kya ke ijila mwanda wa aye!—Divilu 3:5.

⁹ Le bantu bakubulwa kubwaninina babwanya kwikala bajila na bukwashi bwa Yehova? En-en, babwanya mu buluji kampanda. Leza wāpele Isalela, bantu bandi, dyese dya kwikala “muzo ujila.” (Divilu 19:6) Wāesele uno muzo na butōtyi bujila, bwampikwa disubi, kadi butōka. O mwanda buujila po pādi pemanine Bijila bya Mosesa. Penepa, kitobo mukatampe wādi uvwala kipapo kya nsahabu itōka pangala pa kibango,  pene pādi peñenya shi kitōkeji kibaase’po. Pādi palembe amba: “Buujila i bwa Yehova.” (Divilu 28:36) O mwanda kubulwa disubi ne butōki byādi bifwaninwe kushiañanya mutōtelo wabo ne būmi bwabo bwine. Yehova wēbalombwele amba: “Mufwaninwe kwikala bajila mwanda amiwa, Yehova Leza wenu, ne ujila.” (Bene Levi 19:2) Kitatyi kyonso kyādi kilonda bene Isalela madingi a Leza mungya bukomo bwabo bwa bu bantu bakubulwa kubwaninina, bādi bajila mu muswelo kampanda.

10. Mu myanda itala buujila, i kwishila’ka kwādi pa bukata bwa Isalela wa kala na mizo yādi ibajokolokele?

¹⁰ Kutyityija buujila uno muswelo kwādi kushiañanya mutōtelo wa Isalela na mizo yādi ibajokolokele. Ino mizo yampikwa kuyuka Leza yādi itōta baleza ba bubela, ba kufwatakanya, baleza bādi balombolwa bu bakalabale, ba lwiso, ba busekese. Kebādipo bajila mu byonso. Bano bantu kebādipo bajila mwanda bādi batōta bano baleza. O mwanda Yehova wādyumwine bengidi bandi basansane na batōtyi ba bilezaleza ne na bilongwa byabo bibole bya mitōtelo.— Bene Levi 18:24-28; 1 Balopwe 11:1, 2.

11. Le buujila bwa kipindi kya mūlu kya bulongolodi bwa Yehova i bumweke namani mudi (a) bamwikeulu? (b) baselafimi? (c) Yesu?

¹¹ Bine, Isalela wa kala, muzo mutongwe na Yehova wādi ubwanya kumwekeja’tu bityetye buujila bwa kipindi kya mūlu kya bulongolodi bwa Leza. Midiyo ne midiyo ya bipangwa bya ku mushipiditu bingidila Leza na kikōkeji bitelwanga bu “bajila tununu makumi.” (Kupituluka mu Bijila 33:2; Yude 14) Bimwekejanga mu muswelo mubwaninine kitōkeji, buya bwa buujila bwa Leza. Kadi vuluka baselafimi bāmwene Isaya mu kimonwa. Bishima bya mu lwabo lwimbo bilombola amba bino bipangwa bya ku mushipiditu bingilanga mwingilo wa mvubu mpata pa kuyukija buujila bwa Yehova mūlu ne pano panshi. Inoko, kudi kipangwa kimo kya ku mushipiditu kidi peulu pa byonso—ke Mwana mubutulwe bunka wa Leza kadi. Yesu ye mwine umwekeja buujila bwa Yehova mu  muswelo wa peulu. I kyendele’mo etwe bu “Mwine Ujila wa Leza.”—Yoano 6:68, 69.

12, 13. (a) Mwanda waka i kyendele’mo dijina dya Leza ditelwe bu dijila? (b) Mwanda waka kufutululwa kwa dijina dya Leza kufwaninwe kutalulwa?

¹² Le dijina dya Leza nadyo? Monka motwekimwenine mu Shapita 1, dino dijina ke kitentapo’tu nansha kayukeno. Dyelekejanga Yehova Leza, kubadila’mo ne ngikadila yandi yonso. O mwanda Bible witusapwila amba i “wa dijina dya bu ujila.” (Isaya 57:15) Bijila bya Mosesa byānenene amba kujilula dijina dya Leza i bubi bukatampe. (Bene Levi 24:16) Kadi tala byātelele Yesu dibajinji mu milombelo, amba: “Tata wetu udi mūlu, dijina dyobe dipandulwe.” (Mateo 6:9) Kupandula kintu i kwikitūla pafula ne kwikilēmeka, kwikimona bu kijila. Ino, mwanda waka kintu kijila kala pamo bwa dijina kipandulwe kadi?

¹³ Dijina dya Leza dijila i difutululwe ne kushingwa’dyo tukoba na bubela ne lunsamfwakanwa. Satana wābepele Yehova mu Edena amba i Mwinē Lupusa Lonso mubi. (Ngalwilo 3:1-5) Tamba pene’pa, Satana—mulopwe wa ino ntanda ya disubi—uzambalajanga buno bubela bwaābepēle Leza. (Yoano 8:44; 12:31; Kusokwelwa 12:9) Bipwilo bifundijanga amba Leza udi na kasumalomo, udi kulampe, kadi i ntapañani. Banenanga amba i aye wibakwashanga bamwange mashi bya malwa mu mavita. Ne bintu bipangile Leza, abo amba i bīlupukile abyo bine, nansha amba i bitambe ku kwialamuna. Bine, dijina dya Leza i dishingwe tuto bibibibi. Difwaninwe kupandulwa; ntumbo yadyo ijokejibwe. Tutengele bininge difuku dikapwija Yehova lonso kufutululwa kwa dijina dyandi. Ukalonga kino kupityila ku Bulopwe bukaludikwa na wandi mwana. Kadi tusakanga kulunga kuboko mu uno mwanda.

14. Mwanda waka mushipiditu wa Leza witwanga bu ujila, ne mwanda waka kwiutuka i mwanda mukatampe?

¹⁴ Kudi kintu kikwabo kya Yehova kitwanga divule amba i  kijila—mushipiditu wandi, nansha bukomo bwandi bwingila. (Ngalwilo 1:2) Yehova wingidijanga buno bukomo kebunekenibwapo mwanda wa kufikidija mpango yandi. Byonso bilonga Leza, wibiloñanga mu muswelo ujila, utōka kadi wampikwa disubi, o mwanda bukomo bwandi bwingila bwitwanga bu mushipiditu ujila, nansha amba mushipiditu wa buujila. (Luka 11:13; Bene Loma 1:4) Kutuka mushipiditu ujila, mubadilwa ne kulonga bintu ku kusaka bilwa na mpango ya Yehova, i bubi kebukalekelwapo.—Mako 3:29.

15. Mwanda waka kwakamwa Leza, nansha kumutyina i kwendele’mo pa mwanda wa buujila bwandi, ne kuno kwakamwa kulomba bika ne bika?

¹⁵ Ke bikomopo kumona mwanda waka Bible utyanga buujila bwa Leza na kwakamwa nansha kutyina kumutyina bantu mu muswelo mufwaninwe. Kimfwa, tutanga mu Ñimbo ya Mitōto 99:3 amba: “Batendele dijina dyobe dikatampe, Mwanda dileñanga nzuba kadi i dijila.” Nanshi, kuno kwakamwa kushintulula kulombola bulēme bukatampe, bwine bumumwekeja bu muntu wa mvubu bininge. I kyendele’mo kwiivwana uno muswelo, mwanda buujila bwa Leza budi peulu pa batwe bonso. Butōka tō, bwa ntumbo. Inoko kebufwaninwepo kwitupalula. Mumweno muyampe wa buujila bwa Leza witufwenyanga kwadi. Mwanda waka?

16. (a) Le buujila i bwityange namani na ntumbo, nansha bulumbuluke? Leta kimfwa. (b) Le bimonwa bisambila padi Yehova bityityijanga namani kubulwa disubi, butōki ne kitōkeji?

¹⁶ Kintu kimo bidi, Bible utyanga buujila na bulumbuluke. Mu Isaya 63:15, madiulu i matelwe bu “kīkalo kyobe kizunzulwe kya buujila ne ntumbo [nansha’mba “buya”, kunshi kwa dyani].” Ntumbo ne buya bitukokanga. Kimfwa, tala kifwatulo kidi pa paje 33. Le kino kifwatulo kekikukokelepo? Le i bika bikilengeja kikale kisangaja? Tala bidi mumwekela mema. Nansha ke luvula lwine lufwaninwe kwikala luyampe, mwanda makumbi adi fututu, kadi kitōkeji nakyo  kikelema. Shi kino kyadi kyoneke—munonga mujikakanibwe na busala, mityi ne mabwe mabunde, luvula nalo luyule mwishi—ketwadipo ba kusangela’kyo; kyadi kya kwitupalula. Tutyañanga bulumbuluke, nansha ntumbo, na kubulwa disubi, butōki ne kitōkeji. Bino bishima bimo byonka bibwanya ne kwingidijibwa pa kushintulula buujila bwa Yehova. Ke kya kutulumukapo shi bimonwa bisambila padi Yehova bitusangajanga bininge! Bimonwa byeñenya kitōkeji, byela nsase bwa mabwe, bitēma pamo bwa mudilo nansha kutōka tō ne kukelema bwa byuma bilumbuluke—mo mwikadile ntumbo, nansha bulumbuluke, bwa Leza wetu ujila.—Ezekyele 1:25-28; Kusokwelwa 4:2, 3.

17, 18. (a) Le Isaya wātengelwe namani dibajinji na kimonwa kyaāmwene? (b) Le Yehova wāingidije namani selafimi mwanda wa kusenga Isaya, ne kino kilongwa kyādi na nshintulwilo’ka?

¹⁷ Ino, le buujila bwa Leza bufwaninwe kwitulengeja twimone bu ba munshi? I amo. Mwanda kudi Yehova, batwe twi ba munshi—kadi kino i kimvwanike. Le kuyuka kino kufwaninwe kwitupalula kwadi? Tala byālongele Isaya pa kwivwana baselafimi batela buujila bwa Yehova. “Penepo nanena’mba: ‘Malwa ami! Kendi pamo’nka bwa mufwe, mwanda amiwa ne muntu wa milomo ya disubi, kadi nshikete mu bantu ba milomo ya disubi; mwanda meso ami abamone Mulopwe, Yehova wa bibumbo aye mwine!’” (Isaya 6:5) Bine, buujila bwa Yehova bwāvulwije Isaya mwaikadile muntu wa bubi ne wa kubulwa kubwaninina. Dibajinji, uno muntu wa kikōkeji wāfudilwe ñeni. Ino Yehova kāmulekelepo enka nabya.

¹⁸ Selafimi umo wāsengele mupolofeto ponka na ponka. Namani? Kipangwa kya bukomo kya ku mushipiditu kyāenda dya ku kisōkelo, kyāsela dikala dya mudilo, ne kutengeja’dyo ku milomo ya Isaya. Kino kilongwa kibwanya kumweka bu kisanshija, pa kyaba kya kusenga. Ino vuluka amba, kino i kimonwa, kyādi na nshintulwilo ya kyelekejo. Isaya byaādi Muyuda wa kikōkeji, wādi uyukile biyampe amba bitapwa byādi byelwa difuku ne difuku pa kisōkelo kya ku tempelo mwanda  wa kutalula bubi. Kadi selafimi wāvulwije mupolofeto na buswe amba nansha byadi wampikwa kubwaninina, “wa milomo ya disubi,” ubwanya kwikala wa kubulwa disubi ku meso a Leza. a Yehova wādi witabije kumona muntu wampikwa kubwaninina, wa bubi bu ujila—shako i mu muswelo kampanda.—Isaya 6:6, 7.

19. Le bibwanika namani kwikala bajila mu muswelo kampanda nansha byotudi ba kubulwa kubwaninina?

¹⁹ Ne dyalelo nadyo, monka na monka. Bitapwa byonso byādi byelwa pa kisōkelo mu Yelusalema wādi’tu munjiñininya wa kintu kikatampe—kitapwa kibwaninine, kyāelele Yesu Kidishitu mu 33 K.K. (Bahebelu 9:11-14) Shi twisāse binebine bubi bwetu, tushinte ngikadila yetu mibi, ne kulombola lwitabijo mu kino kitapwa, tukalekelwa. (1 Yoano 2:2) Batwe netu tubwanya kwikala ba kubulwa disubi ku meso a Leza. O mwanda, mutumibwa Petelo wituvuluja amba: “Mufwaninwe kwikala bajila, mwanda amiwa ne ujila.” (1 Petelo 1:16) Vuluka amba Yehova kanenenepo amba tufwaninwe kwikala  bajila pamo bwa aye. Ketulombanga bintu byoketubwanyapo kulonga. (Ñimbo ya Mitōto 103:13, 14) Ino, Yehova witwita twikale bajila mwanda aye i ujila. Byotudi “pamo bwa bana baswedibwe,” tukimbanga kumwiula mungya bukomo bwetu bwa bu bantu ba kubulwa kubwaninina. (Bene Efisesa 5:1) Nanshi kufikila pa buujila kulombanga kitatyi. Shi tutame ku mushipiditu, ‘tukabwanininya buujila’ difuku ne difuku!— 2 Bene Kodinda 7:1.

20. (a) Mwanda waka i biyampe twivwanije amba tubwanya kwikala bampikwa disubi ku meso a Leza ujila? (b) Le Isaya weivwene namani paāyukile amba bubi bwandi bubamulekelwa?

²⁰ Yehova usenswe byoloke ne butōki. Ushikilwe bubi. (Habakuka 1:13) Ino ketushikilwepo batwe. Shi tumone bubi mwibumwenine Leza—tushikwe bibi, tusanswe biyampe—ne kulonga bukomo bwa kulonda mu mayo mabwaninine a Kidishitu Yesu, Yehova uketulekela bubi bwetu. (Amose 5:15; 1 Petelo 2:21) Shi tubaivwanija amba tubwanya kwikala bampikwa disubi ku meso a Leza wetu ujila, bikekala biyampe. Vuluka amba, buujila bwa Yehova bwavulwije dibajinji Isaya disubi dyandi. Wādidile amba: “Malwa ami!” Inoko pawāivwanije amba bubi bwandi bubamulekelwa, mumweno wandi wāshintyile. Yehova pa kukimba muntu wa kuvuija mwingilo kampanda, Isaya wāitabija ponka na ponka, nansha byākadipo wiuyukile. Wānenene amba: “Ami uno! Ntume!”— Isaya 6:5-8.

21. Le i bubinga’ka botudi nabo bwitukulupija amba tubwanya kutamija buujila?

²¹ Twi bapangwe mu kyelekejo kya Leza ujila, i mwitupe ngikadila yandi ne bukomo bwa kuyuka myanda ya ku mushipiditu. (Ngalwilo 1:26) Batwe bonso tubwanya kwikala bajila. Shi twendelele kutamija buujila, Yehova uketukwasha na nsangaji. Potwendelela kutamija’bo, tukafwena bininge kudi Leza wetu ujila. Ne kadi, potusa kubandaula ngikadila ya Yehova mu mashapita alonda’ko, tukajingulula amba tudi na bubinga buvule botufwaninwe kumufwenena!