1, 2. Janabi Isaya noneno fweny mane, to fwenyno puonjowa ang’o e wi Jehova?

 ISAYA ne obwok ka ne oneno fweny moa kuom Nyasaye. Fwenyno ne chalo gima timore adier! Isaya noduogo ondiko bang’e ni ‘noneno Jehova’ kobet e kom loch. Lewni ma Jehova norwako nopong’o hekalu maduong’ man Jerusalem.​—Isaya 6:1, 2.

² Gimachielo ma ne omiyo Isaya ohum ahinya, ne en dwol maduong’ miwuoro ma ne winjore ka wer, kendo dwolno ne yiengo kata mana mise mar hekalu. Joserafi ma gin malaike manie rang’iny ma malo ahinya e ma ne wer. Wer mamit ma ne giwero gi dwol maduong’ ne oting’o weche mamiyo Nyasaye luor. Ne giwer niya: “Maler, maler, maler, en Jehova Nyasach oganda lweny. Piny duto opong’ gi duong’ni.” (Isaya 6:3, 4) Kuom wer ka ginwoyo wacho ni “maler” nyadidek nyiso ni Jehova ler e okang’ makende. (Fweny 4:8) Muma mangima wuoyo kuom ler mar Jehova. Nitie ndiko mang’eny ma nyiso ni Jehova ‘ler’.

3. Ere kaka paro ma ok owinjore e wi ler mar Jehova osemiyo ji mang’eny osudo mabor gi Nyasaye kar sudo machiegni kode?

³ Omiyo, nenore maler ni achiel kuom gik madongo ma Jehova dwaro ni wang’e kuome en ni oler. Kata kamano, wachno chando ji mang’eny e kindegi. Ji mang’eny paro ni bedo maler en bedo ng’ama kare mokalo tong’ kata bedo ng’ama dwaro ni ji one ni oluwo chik din. Jomoko ma paro ni gin joma ok owinjore e nyim Nyasaye, neno ka ler mar Nyasaye miyogi luoro kar miyo gisud machiegni kode. Samoro giparo ni kata gitim ang’o, ok ginyal sudo machiegni gi Nyasaye maler kamano. Paro ma kamago osemiyo ji mang’eny osudo mabor gi Nyasaye kar sudo  machiegni kode. To mano en gima lit nimar ler mar Nyasaye en gima onego omiwa siso mar sudo machiegni kode. Ang’o momiyo inyalo wach kamano? Kapok wadwoko penjono, we wane ane tiend bedo maler.

4, 5. (a) Bedo ni Nyasaye ‘ler’ tiende ang’o, to ler mar Nyasaye ok nyis ang’o? (b) Jehova ni tenge e yore ariyo mage madongo?

⁴ Bedo ni Nyasaye ler ok nyis ni en jasunga ma ochayo jomoko. Kar mano, osin gi kido ma kamago. (Ngeche 16:5; Jakobo 4:6) To kare tiend bedo “maler” en ang’o kuom adier? E dho-Hibrania, wach motigo e Muma ni “maler” otudore gi “keto gimoro tenge.” E weche lamo, gima ‘ler’ en gima owal ne tich makende kata gima oket tenge ne Nyasaye. Ler bende en bedo ma onge chilo kata matin. To kare sama Muma wacho ni Jehova ler tiende en ang’o? Be dibed ni tiende en ni Nyasaye ni mabor gi dhano morem?

⁵ Ooyo ngang’. Kata obedo ni Jehova ne en “Ng’at Maler mar Israel,” nowacho ne joge ni nodak ‘e diergi’ kata obedo ni ne gin joricho. (Isaya 12:6; Hosea 11:9) Omiyo, bedo ni oler ok mi obed mabor gi dhano. To kare en “tenge” e yo mane? En tenge e yore ariyo madongo. Mokwongo, en tenge gi chuech duto nikech en kende e Nyasaye Manyalo Duto. Oonge chilo moro amora kendo oler e okang’ ma malo chuth. (Zaburi 40:5; 83:18) Mar ariyo, Jehova ni tenge gi richo duto, kendo mano en wach ma jiwowa ahinya. Nikech ang’o?

6. Bedo ni Jehova ni tenge gi richo moro amora jiwowa e yo mane?

⁶ E piny ma wadakieni, ler madier nok. Gimoro amora e piny ma Satan chikoni ochido e yo moro nikech richo kod rem ma ne onyuolgo dhano. Waduto nyaka waked gi richo monyuolwago. Kendo ka ok watang’, richo nyalo loyo ng’ato ang’ata kuomwa. (Jo-Rumi 7:15-25; 1 Jo-Korintho 10:12) Jehova to opogore, richo ok nyal loye. Nikech  obor chuth gi richo, richo ok nyal miene ngang’. Mano miyo wamedo bedo gadier ni Jehova e Wuoro mowinjore kodwa nikech wanyalo gene chuth. Mopogore gi wuone ma joricho ma kinde moko bedo jo mibadhi, kata ma tiyo gi tekogi marach e wi nyithindgi, Jehova to ok nyal timo kamano. Bedo ni en ng’at maler miyo mano ok nyalre kata matin. Kinde moko, Jehova osekwong’ore gi lerne nikech onge gimoro amora minyalo gen ma loyo ler mare. (Amos 4:2) Donge mano en wach ma jiwowa?

7. Ang’o momiyo wanyalo wacho ni ok nyal pog Jehova gi ler?

⁷ Ok nyal pog Jehova gi ler. Mano tiende ang’o? Kaw ane ranyisi mar “dhano” kod “richo.” Ok inyal pogo dhano gi richo. Richo mieno gimoro amora ma dhano timo. Koro kaw ane ranyisi mar “Jehova” kod “ler.” Gimoro amora ma Jehova timo nyiso lerne. Gik moko duto motimo ler, gionge chilo moro amora, kendo gin kare. Ok wanyal ng’eyo Jehova maber ka ok wang’eyo tiend bedone “maler.”

8, 9. Ang’o ma nyiso ni Jehova konyo dhano morem obed maler e okang’ moro?

⁸ Nikech Jehova ler, mano miyo inyalo wachi ni en e soko mar ler duto. Kar bedo ngudi, omiyo ji thuolo mar bedo gi kidoni. Mano nonenore ayanga e kinde ma ne Jehova otiyoe gi malaika e wuoyo gi Musa e bungu ma ne liel mach. Jehova nomiyo kata mana alwora mar bunguno obedo kama ler!​—Wuok 3:5.

⁹ Be Jehova nyalo konyo dhano ma joricho obed maler? Ee, onyalo miyo dhano obed maler e okang’ moro. Nyasaye nomiyo Jo-Israel thuolo mar bedo “oganda maler.” (Wuok 19:6) Noguedho ogandano gi kit lamo maler. Omiyo, Chik Musa wuoyo nyadinwoya e wi ler. E wi mano, jadolo maduong’ ne nigi kilemba ma norwako e wiye to nyim kilembano notue dhahabu mopamore kendo ma rieny ma ji duto ne nyalo neno, kendo e wi dhahabuno,  ne ondik wechegi: “Ler en mar Jehova.” (Wuok 28:36) Omiyo, lamo margi kod kit ngimagi ne onego obed maler e rang’iny ma malo mondo onere ayanga ni gipogore gi ogendni mamoko. Jehova nonyisogi niya: “Nyaka ubed jo maler nikech an Jehova Nyasachu aler.” (Tim Jo-Lawi 19:2) Ka ne Jo-Israel otimo duto ma ne ginyalo kaka dhano morem mondo giluw puonj mag Nyasaye, ne ikwano ni giler e okang’ moro.

10. Ne nitie pogruok mane e kind Jo-Israel gi ogendni ma ne olworogi kodok korka bedo maler?

¹⁰ Okang’ ma ne ijiwogo ler e oganda Israel ne miyo gibedo mopogore chuth gi ogendni ma ne olworogi. Ogendnigo ne lamo nyiseche mag miriambo ma ne gin nyiseche mager, ma igi lach, kendo ma timbegi onjawore. Nyisechego ne ochido e yore duto. Lamo nyiseche ma kamago ne miyo joma lamogi bedo ma ok ler. Omiyo, Jehova ne okwero jotichne ni kik giriwre gi joma lamo nyiseche manono kendo kik gidonj e timbegi ma ok ler.​—Tim Jo-Lawi 18:24-28; 1 Ruodhi 11:1, 2.

11. Ere kaka ler mar riwruok mar Jehova manie polo nenore ayanga kokalo kuom (a) malaike? (b) joserafi? (c) Yesu?

¹¹ Kata mana e kinde ma oganda Jo-Israel ne tiyo ne Nyasaye kaka owinjore, ne ginyiso mana e okang’ matin kaka riwruok mar Nyasaye manie polo ler. Malaike mathoth ma tiyo ne Nyasaye iluongo ni “jo maler gana gi gana.” (Rapar mar Chik 33:2; Juda 14) Malaikego nyiso ler mar Nyasaye e yo makare chuth. Par bende joserafi ma Isaya noneno e fweny. Weche ma ne giwero nyiso ni malaikego nigi migawo maduong’ e lando ler mar Jehova e piny gi polo. Kata kamano, nitie malaika moro maduong’ moloyo malaikegi duto. Malaikano en Wuod Nyasaye ma miderma. Yesu e ma nyiso ler mar Jehova e okang’ ma malo mogik. Mano e gimomiyo iluonge ni “Ng’at Maler mar Nyasaye.”​—Johana 6:68, 69.

12, 13. (a) Ang’o momiyo en gima owinjore wacho ni nying Nyasaye en nying maler? (b) Ang’o momiyo onego ogol miriambo moseket ne nying Nyasaye?

¹² To nade nying Nyasaye? Mana kaka ne waneno e Sula Mokwongo, nyingno ok en mana nying mar telo. En nying mochung’ ne Jehova Nyasaye, moriwo nyaka kido mage duto. Mano e momiyo Muma nyisowa ni “nyinge ler.” (Isaya 57:15) E bwo Chik Musa, ng’at ma ne oyanyo nying Nyasaye ne ing’adone buch tho. (Tim Jo-Lawi 24:16) Kendo ne ane gima Yesu noketo motelo sama ne opuonjo ji lemo. Nowacho kama: “Wuonwa manie polo, nyingi mondo obed maler.” (Mathayo 6:9) Keto gimoro obed maler tiende en kete tenge mondo obed mar Nyasaye kata miye luor matut. To ang’o momiyo nying Nyasaye ma en nying maler chuth pod dwarore ni oket maler?

¹³ Nying maler mar Nyasaye oseketh kendo osemien gi miriambo. E puodho mar Eden, Satan nowacho miriambo e wi Jehova konyiso ni Jehova ok en jaloch makare. (Chakruok 3:1-5) Chakre kindeno ka dhi nyime, Satan ma e jaloch e wi piny ma ok lerni, osedhi nyime lando miriambo mang’eny e wi Nyasaye. (Johana 8:44; 12:31; Fweny 12:9) Dinde osemiyo Nyasaye onere ka ng’ama tiyo gi tekone marach, ng’at man mabor gi joge, kata ng’at ma sando ji. Giwacho ni Nyasaye osebedo ka konyogi e lwenjegi ma gisechueroe remb ji mang’eny kayiem nono. Kar pako Nyasaye nikech chuechne mabeyo, ji osewacho ni gik moko nosieko asieka kendgi ma ok ochuegi. Kuom adier, oseketh nying Nyasaye marach ahinya. Omiyo, nyaka ket nying Nyasaye obed maler kendo omi nyingno duong’ mowinjorego. Wagombo ahinya kinde ma Jehova biro keto nyinge mondo obed maler. Obiro timo kamano kokalo kuom Pinyruoth ma Wuode biro lochoe. Wamor timo gimoro amora ma dwarore e chopo wach maduong’ni.

14. Ang’o momiyo iluongo teko ma Nyasaye tiyogo ni roho maler, to ang’o momiyo yanyo roho maler en richo maduong’ ahinya?

 ¹⁴ Nitie gimachielo ma bende ler ma itudogo Nyasaye ma en roho maler kata tekone motiyogo e timo gik moko. (Chakruok 1:2) Teko malich miwuoroni e ma Jehova tiyogo e chopo dwache. Gik moko duto ma Nyasaye timo, otimo e yo maler. Mano e momiyo iluongo teko motiyogo ni roho maler. (Luka 11:13; Jo-Rumi 1:4) Yanyo roho maler, moriwo kwedo dwach Jehova goyiem, en richo ma ok nyal we ne ng’ato.​—Mariko 3:29.

15. Ang’o momiyo owinjore waluor Jehova nikech ler mare, to luoro ma kamano oriwo ang’o?

¹⁵ Ok tek neno gimomiyo Muma tudo ler mar Nyasaye kod luor ma dhano miyo Nyasaye. Kuom ranyisi, Zaburi 99:3 wacho kama: “Mad gipak nyingi maduong’, nimar nyingino ler kendo onego omiye luor.” Kata kamano, luor miwuoyoe kae en miyo ng’ato luor matut kendo mowinjore. En gima kare luoro Nyasaye e yo ma kamano nikech ler mare ni e okang’ ma malo ahinya. Oler e yo makare chuth. Kata kamano, mano ok onego omi waluor sudo machiegni gi Nyasaye. Mopogore gi mano, neno ler mar Nyasaye e yo mowinjore biro miyo wasud machiegni kode. Nikech ang’o?

16. (a) Ere kaka ler otudore gi duong’ kata ber? Chiw ane ranyisi. (b) Ere kaka fweny moro ma lero chal mar Jehova jiwo okang’ ma olergo?

¹⁶ Achiel kuom gimomiyo ler mar Nyasaye miyo wasudo machiegni kode en nikech Muma tudo ler gi gik mabeyo kendo ma lombo wang’. Bug Isaya 63:15 nyiso ni polo kama Nyasaye odakie en “ka maler . . . , kendo ma nigi duong’.” Gik ma nigi duong’ kendo mabeyo morowaga. Kuom ranyisi, ne ane picha manie ite mar 33. Donge pichano mori? Ang’o momiyo omori? Ne ane kaka pigno ler. Polo rambulu kendo piny ler. Nyaka bed ni muya  man kuno bende ler. Kaw ane ni alworano olokore. Owit taka e pigno, otong’ yiende, omien kitego gi chilo, kendo alworano ng’we marach. Be diher bet kanyo? Ooyo. Pile, watudoga gik mabeyo kata ma nigi duong’ gi ler. E yo ma kamano bende, wanyalo wacho ni ler mar Jehova ber kata morowa. Mano e momiyo fweny ma temo leronwa kaka Jehova chal morowa! Fwenygo nyiso kaka ber kata duong’ mar Nyasachwa maler chalo. Orieny gi ler matamre gi nono, ochalo gi kite ma nengogi tek ma nyilni, kendo orieny kaka mach kata kaka mula maler.​—Ezekiel 1:25-28; Fweny 4:2, 3.

17, 18. (a) Fweny ma ne Isaya oneno nomiyo okwongo winjo nade? (b) Ere kaka Jehova notiyo gi jaserafi mondo oho chuny Isaya, to tiend gima jaserafino notimo ne en ang’o?

¹⁷ Kata kamano, be ler mar Nyasaye onego omi wawinj ni wan joma tindo ahinya? Dwoko en ee. Kuom adier, watindo ahinya kendo ok wanyal pimore kata matin gi Jehova. Be ng’eyo mano onego oketwa mabor kode? Ne ane gima Isaya nowacho bang’ winjo ka joserafi pako ler mar Jehova. “Eka ne awacho niya: ‘Yaye, piny lichna! Achalo mana ng’at mosetho, an ng’at ma dhoge ok ler, kendo adak e kind jo ma dhogi ok ler; to aseneno Jehova Ruoth kendo Nyasach oganda lweny!’” (Isaya 6:5) Ee, ler mar Jehova matamre gi nono noparo ne Isaya kaka ne en ng’at ma jaricho kendo morem. Isaya ne owinjo malit ahinya ka ne okwongo winjo wechego. Kata kamano, Jehova ne ok oweye e chalno.

¹⁸ Mapiyo nono, Jehova nooro jaserafi moro mondo obi oho chuny janabino. E yo mane? Malaikano ne ofuyo modhi e kendo mar misango, mokawo mach kuno mobiro omulogo dho Isaya. Nyalo nenore ni kar konyo Isaya, nomedone mana rem. Kata kamano, ket e paro ni mani ne en mana fweny, kendo ne oting’o puonj mang’eny. Isaya, ma ne en Ja-Yahudi, nong’eyo ni ne ichiwo misengni e  altar pile ka pile mondo owe ne ji richogi. Kendo jaserafino noparo ne janabino e yo mang’won ni kata obedo ni ne en dhano morem kendo “ng’at ma dhoge ok ler,” pod nonyalo bedo ng’at maler e nyim Nyasaye. a Jehova ne oikore neno dhano morem kendo ma jaricho kaka ng’at maler e okang’ moro.​—Isaya 6:6, 7.

19. Kata obedo ni warem, en yo mane ma wanyalo bedogo maler e okang’ moro?

¹⁹ Kindegi bende, Nyasaye oikore timo kamano. Misengni duto ma ne igolo e kendo mar misango mar Jerusalem ne gin mana tipo mar gimoro maduong’, ma en misango makare chuth ma ne Yesu Kristo ochiwo e higa 33. (Jo-Hibrania 9:11-14) Ka waloko chunywa gadier ma waweyo richo kod yore maricho ma waluwo, kendo waketo yie e misango mar rawar, iweyonwa richowa. (1 Johana 2:2) Wan be wanyalo bedo maler e nyim Nyasaye. Omiyo, jaote Petro paronwa kama: “Ondik niya: ‘Nyaka ubed jo maler, nikech  an aler.’” (1 Petro 1:16) Ne ni Jehova ne ok owacho ni nyaka wabed maler kaka oler. Ong’eyo ni mano en gima ok nyalrenwa. (Zaburi 103:13, 14) Kar mano, Jehova nyisowa ni wabed maler nikech oler. Kata obedo ni wan dhano morem, watemo kar nyalowa mondo waluwe “kaka nyithindo moher.” (Jo-Efeso 5:1) Omiyo, bedo maler dwaro ni ng’ato otim kinda kinde duto. Kaka wadhi nyime timo dongruok e winjruokwa gi Nyasaye, e kaka wamedo “bedo maler chuth” pile ka pile.​—2 Jo-Korintho 7:1.

20. (a) Ang’o momiyo dwarore ni wang’e ni wanyalo bedo maler e wang’ Nyasachwa maler? (b) Isaya nowinjo nade bang’ fwenyo ni ne osewene richone?

²⁰ Jehova ohero gik makare kendo maler. Osin gi richo. (Habakuk 1:13) Kata kamano, ok osin gi dhano. Jehova weyonwa richowa mana ka waneno richo kaka oneno, tiende ni wasin gi gik maricho kendo waher gik mabeyo, kendo watim kar nyalowa mondo waluw ranyisi makare chuth ma Yesu Kristo noketo. (Amos 5:15; 1 Petro 2:21) Ng’eyo ni wanyalo bedo maler e wang’ Nyasachwa maler, en gima nyalo konyowa ahinya. Par ni neno ler mar Jehova nokwongo oparo ne Isaya kaka ne en ng’at ma ok ler. Noywagore niya: “Yaye, piny lichna!” To ka nong’eyo ni nosewene richone, nobedo gi paro mopogore. Ka ne Jehova dwaro ng’at ma ne nyalo chiwore ne migawo moro, Isaya noyie mapiyo kata obedo ni ne ok ong’eyo gima migawono ne en. Nowacho niya: “An ka! Ora!”​—Isaya 6:5-8.

21. Ang’o momiyo wan gadier ni wanyalo bedo joma ler?

²¹ Ochuewa e kit Nyasaye maler, ma tiende ni wan gi kido kaka mage kendo wanyalo bedo gi winjruok maber kode. (Chakruok 1:26) Waduto wanyalo bedo maler. Jehova oikore mar konyowa ka wadhi nyime temo bedo maler. Timo kamano biro miyo wasik ka wasudo machiegni gi Nyasachwa maler. E wi mano, kaka wabiro medo puonjore e wi kido mag Jehova, e kaka wabiro medo neno gik mang’eny monego omi wasud machiegni kode!