1, 2. Anton pasingawey so naawat nen propeta Isaias, tan antoy ibabangat na satan ed sikatayo nipaakar ed si Jehova?

ATALAGNAW a maong si Isaias ed eksenan anengneng to​—sakey a pasingawey a nanlapud Dios. Singa itan tudtua! Insulat nen Isaias ed saginonor ya ‘anengneng [ton mismo] si Jehova’ ed atagey a trono To. Say saloy na kawes nen Jehova so sinmaknap ed maawang a templo ed Jerusalem.​—Isaias 6:1, 2.

² Atalagnaw met si Isaias ed nadngel to​—makmaksil a kansion a nanyegyeg ed saray mismon pundasyon na templo. Say kanta so ikakansion na saray serapin, espiritu iran pinalsa ya atagtagey ed rangko. Say mabiskeg tan bansag a pananganta ra so mangiyaaniweng ed saray salita a walaan na simplin karlangan: “Santo, santo, santo si Jehova na saray ehersito, say amin a dalin napno na liket to.” (Isaias 6:3, 4) Say amitlon impangikanta ed salitan “santo” so nikaduman angidanet ed satan, tan matukotukoy ya ontan, lapud si Jehova so masanto ed sankatageyan a kipapasen. (Apocalipsis 4:8) Say inkasanto nen Jehova so nidadanet ed interon Biblia. Isisiglaot na nilasus iran bersikulo so ngaran to ed saray salitan “santo” tan “inkasanto.”

3. Panon a saray lingon panmoria ed inkasanto nen Jehova so mangitotonton ed dakel ya onarawi ed Dios imbes ya onapit ed sikato?

³ Malinew sirin a sakey ed saray manunan bengatla a kaliktan nen Jehova a natebek tayo nipaakar ed sikato et sikatoy masanto. Ingen, dakel natan so mangipupulisay ed satan a mismon ideya. Arum so sililingon mangisisiglaot ed inkasanto ed dilin-inkatunong odino palson inka-debosyonado. Saray totoo a mibabarangkaan ed negatibon panmoria ed inkasikaran dili so nayarin mas natatakot ed inkasanto na Dios imbes a nasagyat. Nayarin natatakot ira ompan ag-iran balot manepeg ya onapit ed sayan masanto a Dios. Kanian, dakel so onaarawi ed Dios lapud inkasanto to. Makapaermen itan, lapud say inkasanto na Dios so talagan manamakiwas a rason pian  onapit ed sikato. Akin? Sakbay tayon ebatan itan a tepet, singbaten tayo no anto so tuan inkasanto.

4, 5. (a) Anto so kabaliksan na inkasanto, tan anto so agkabaliksan na satan? (b) Diad anton duaran importantin paraan a si Jehova et “biig”?

⁴ Say katuaan a say Dios et masanto so agmankabaliksan a sikatoy mapasirayew, mapangta, odino malames ed arum. Diad kasunian, kagula to iratan a kalidad. (Uliran 16:5; Santiago 4:6) Kanian, anton talaga so kabaliksan na salitan “santo”? Unong ed Biblikon Hebreo, satan a salita so nanlapud terminon mankabaliksan na “biig.” Diad panagdayew, say “santo” so onaaplika ed sakey ya akabiig manlapud kaslakan ya uusaren, odino impasen a sagrado. Say inkasanto so mapuersa met a mangipapasabi ed ideya na inkalinis tan inkamaralus. Panon ya onaaplika iyan salita ed si Jehova? Kasin kabaliksan na satan a sikatoy “biig” manlapud ag-ayadyarin totoo, ya arawrawi ed sikatayo?

⁵ Aliwa ya ontan. Bilang “Santo na Israel,” deneskribe nen Jehova so inkasikato bilang manaayam ed ‘pegley na’ totoo to, anggaman makasalanan ira. (Isaias 12:6; Oseas 11:9) Kanian say inkasanto to so agmanggagawa ed sikaton arawdawi. Panon, sirin, a sikatoy “biig”? Diad duaran importantin paraan. Unona, sikatoy biig manlapud amin a pinalsa ta sikato labat so Sankatageyan. Say inkamaralus to, inkalinis to, so sigpot tan magnayon. (Salmo 40:5; 83:18) Komadua, si Jehova so interamintin nibiig manlapud amin ya inkauges, tan satan so makapaseseg ed sikatayo. Akin?

6. Akin a makaligliwa ed sikatayo so sigpot ya inkibiig nen Jehova manlapud inkauges?

⁶ Manbibilay itayo ed mundon mataltalag so tuan inkasanto. Amin a bengatlan nipaakar ed sosyedad na too a sian ed Dios et arutakan ed arum a paraan, amatikan na kasalanan tan ag-inkayadyari. Kaukolan tayon amin a labanan so kasalanan a walad sikatayo. Tan amin tayo so walad kapeligroan a nadaeg na kasalanan no ag-itayo manalwar. (Roma 7:15-25; 1 Corinto 10:12) Si Jehova so anggapo ed ontan a kapeligroan. Lapud sigpot a nibiig manlapud inkauges, sikato so agbalot namatikan na anggan  sankamelantingan a bakat na kasalanan. Saya so mamekder lamet ed panmoria tayo ed si Jehova bilang naspot ya Ama, lapud kabaliksan na satan a sikatoy sigpot a napanmatalkan. Aliwan singa say dakel a makasalanan a totoon ama, si Jehova so agbalot magmaliw ya abulok ed moral, mabanday, odino maabuso. Talagan imposible so dinanman ed ontan a bengatla lapud inkasanto to. Panapanaon a nansamba si Jehova panamegley na dilin inkasanto to, tan satan so nanggawa ed samba to a sigpot a napanmatalkan. (Amos 4:2) Agta satan so makapaseguro?

7. Akin a nibaga a say inkasanto et sipor la ed si Jehova?

⁷ Say inkasanto so sipor la ed si Jehova. Anto so kabaliksan na satan? Diad pangiyilustra: Konsideraen iray salitan “too” tan “ag-ayadyari.” Agmo nadeskribe so too no agmo nonoten so ag-inkayadyari. Say ag-inkayadyari so mabitar ed sikatayo tan mangiimpluensya ed amin a bengatlan gawaen tayo. Konsideraen natan so duaran salita a mandumaan a tuloy​—“Jehova” tan “santo.” Say inkasanto so mabitar ed si Jehova. Amin a bengatlan nipaakar ed sikato et malinis, maralus, tan maptek. Agtayo nakabat a peteg si Jehova no agtayo konsideraen a maong tan talosan iyan nagnap a salita​—“santo.”

8, 9. Antoy mangipapanengneng a tutulongan nen Jehova iray ag-ayadyarin totoo pian magmaliw a masanto ed relatibon pantalos?

⁸ Lapud si Jehova so mangilalaman ed kalidad na inkasanto, makatunongan a nibaga a sikatoy lapuan na amin ya inkasanto. Agto isisiblet iyan mablin kalidad; mabunlok ton inanabang itan ed arum. Agayla, sanen akitongtong so Dios ed si Moises panamegley na sakey ya anghel diad mandarlang a tanaman, anggan say kaliberliber na dalin so nagmaliw a masanto bilang resulta na inkisiglaot na satan ed si Jehova!​—Exodo 3:5.

⁹ Nayari kasin magmaliw a masanto iray ag-ayadyarin totoo diad tulong nen Jehova? On, diad relatibon pantalos. Inikdan na Dios so baley ton Israel na ilalon magmaliw a “masanton nasyon.” (Exodo 19:6, NW) Pinalaboan to itan a nasyon na sakey a sistema na panagdayew a masanto, malinis, tan puro. Say  inkasanto sirin so paulit-ulit a tema na Mosaikon Ganggan. Diad tua, say atagey a saserdote so akasulong na balitok a plata a walad arap na turbante to, ya amin so makanengneng ed satan a mankirlap diad liwawa. Niukit ditan iray salitan: “Say inkasanto so kien nen Jehova.” (Exodo 28:36, NW) Kanian say atagey ya estandarte na kalinisan tan inkamaralus so pakapangibiigan ed panagdayew da ontan met ed dalan na panagbilay da. Inkuan nen Jehova ed sikara: “Sikayo onsantos kayo naani; lapu ed siak a Jehova a Dios yo et santo ak.” (Levitico 19:2) Basta manbilay iray Israelita unong ed simbawa na Dios anggad posibli parad ag-ayadyarin totoo, sikaray masanto ed relatibon pantalos.

10. No nipaakar ed inkasanto, anto so pandumaan na kadaanan ya Israel tan say kabangibang iran nasyon?

¹⁰ Sayan panangipurek ed inkasanto so midumaan a maong ed panagdayew na saray nasyon a kabangibang na Israel. Saraman a paganon nasyon so nandayew ed dirios a say kiwawala ran mismo et katilaan tan panamalikdo labat, dirios a nirepresenta bilang marawal, maagum, tan mabanday ed sekso. Sikaray agmasanto ed amin a pamaakaran. Say panagdayew ed ontan a dirios so sengeg na impagmaliw na totoo ya aliwan masanto. Kanian, pinasakbayan nen Jehova iray lingkor to a mansiansian biig manlapud pagano iran managdayew tan ed marutak a relihyoson agagamil da.​—Levitico 18:24-28; 1 Arari 11:1, 2.

11. Panon a say inkasanto na mangatatawen ya organisasyon nen Jehova so mapatnag ed (a) saray anghel? (b) saray serapin? (c) si Jesus?

¹¹ Anggan diad paborablin tuloy iran sirkumstansya, say pinili nen Jehova a nasyon na kadaanan ya Israel so makapangitarya lambengat na samet a panangisindag ed inkasanto na mangatatawen ya organisasyon na Dios. Saray minilyon ya espiritun pinalsa a matoor a manlilingkor ed Dios so atukoy bilang “masanton nilaksalaksa” a kien to. (Deuteronomio 33:2, NW; Judas 14) Nagnap dan isisindag so masnag tan puron karlangan na inkasanto na Dios. Tan tandaan iray serapin ya anengneng nen Isaias diad pasingawey ed sikato. Isusuheri na kakantaen da a sarayan mabiskeg ya espiritun pinalsa so walaan na importantin betang ed pangipapakabat ed inkasanto nen Jehova diad interon uniberso. Balet, sakey ya espiritun pinalsa so atagey  nen sarayan amin​—say bogbogtong ya Anak na Dios. Si Jesus so sankatageyan ya angisindag na inkasanto nen Jehova. Matukotukoy, sikatoy akabatan bilang “Santo na Dios.”​—Juan 6:68, 69.

12, 13. (a) Akin a say ngaran na Dios so matukotukoy ya adeskribe bilang masanto? (b) Akin a nepeg a napasantos so ngaran na Dios?

¹² Komusta met so nipaakar ed mismon ngaran na Dios? Unong a naimano tayo ed Kapitulo 1, satan a ngaran et aliwa labat a titulo odino pakabidbiran. Irerepresenta na satan si Jehova a Dios, a manasayakup ed amin a kalidad to. Kanian, ibabaga ed sikatayo na Biblia a say ‘ngaran to so santo.’ (Isaias 57:15) Unong ed Mosaikon Ganggan et makanepegan na dusan patey so pangayew ed ngaran na Dios. (Levitico 24:16) Tan imanoen so inmunan sinalambit nen Jesus ed pikakasi to: “Ama min wala ka ed tawen, nagalang [“napasantos,” NW] komon so ngaran mo.” (Mateo 6:9) Say pamasantos ed sakey a bengatla et kabaliksan toy pangibiig ed satan bilang sagrado tan pian igalang itan, pian ipasen itan bilang masanto. Balet akin a say bengatlan sipor lan maralus a singa say mismon ngaran na Dios et nakaukolan nin napasantos?

¹³ Say masanton ngaran na Dios so sinuppiat, pinabanday panamegley na katilaan tan panagpauges. Diad Eden, nantila si Satanas nipaakar ed si Jehova tan impasiki ton Sikatoy agmaptek a Soberano. (Genesis 3:1-5) Nanlapu la’d saman, sineguro nen Satanas​—say manuley na sayan agmasanton mundo—​a saray katilaan nipaakar ed Dios so onlaknab. (Juan 8:44; 12:31; Apocalipsis 12:9) Saray relihyon so angirepresenta ed Dios bilang diktador, mabinbinta, odino maruksa. Ibabaga ran sikatoy ontutulong ed sikara diad saray pambabakal da. Say galang parad makapakelkelaw iran palsa na Dios so mabetbet a nipapaarap ed kibanbana, odino ebolusyon. On, say ngaran na Dios so pirmin napapabanday. Satan so nepeg a napasantos; nepeg a nipawil so makanepegan a gloria na satan. Pampipirawatan tayo so pamasantos ed ngaran to tan pangitandoro ed inkasoberano to, tan panliketan tayo so panggawa na dinanman a betang ed satan ya engranden gagala.

14. Akin a say espiritu na Dios so atawag a masanto, tan akin a seryoson tuloy so pangayew ed masanton espiritu?

 ¹⁴ Wala ni bengatlan maapit a misiglaotan ed si Jehova a mabetbet a tatawagen a masanto​—say espiritu, odino aktibon puersa to. (Genesis 1:2) Uusaren nen Jehova iyan mabiskeg a puersa pian sumpalen iray gagala to. Amin a gagawaen na Dios, gagawaen to ed masanto, maralus, tan malinis a paraan, kanian say aktibon puersa to so matukotukoy ya atawag a masanton espiritu, odino espiritu na inkasanto. (Lucas 11:13; Roma 1:4) Say pangayew ed masanton espiritu, a mangilalanor ed ginagalan isusumlang ed saray gagala nen Jehova, et laktipen na agnaperdonan kasalanan.​—Marcos 3:29.

15. Akin a say pakawalaan na maridios a takot et matukoy a kiwas ed inkasanto nen Jehova, tan anto so lalanoren na satan a takot?

¹⁵ Sirin, agmairap a talosan no akin ya insiglaot na Biblia so inkasanto na Dios ed maridios a takot ed biang na too. Alimbawa, onia so nabasa ed Salmo 99:3: “Idayew da so abalbaleg tan tatakotan a ngaran mo. Ta sikato so masantos.” Balet, sayan takot so aliwan makapakebbiew. Imbes, satan et mapagalang a takot tan panagrespeto diad nitandoron nengneng na satan. Matukoy labat a nalikna so ontan, lapud say inkasanto na Dios et palumbasan to itayon maong. Satan so masmasnag a malinis, magloria. Ingen, nepeg ya ag-itan mangamper ed sikatayo. Diad biek a dapag, onapit itayo ed Dios no susto so panmoria tayo ed inkasanto to. Akin?

16. (a) Panon a misiglaotan so inkasanto ed karakpan? Mangiter na alimbawa. (b) Panon a saray pasingawey a deskripsion ed si Jehova so mangidadanet ed kalinisan, inkamaralus, tan liwawa?

¹⁶ Say sakey a rason et isisiglaot na Biblia so inkasanto ed karakpan. Diad Isaias 63:15, say tawen so adeskribe bilang “panag-ayaman na inkasanto tan gloria [“karakpan,”NW]” na Dios. Say karakpan so manasagyat ed sikatayo. Alimbawa, nengnengen pa so retrato ed pahina 33. Agkayo ta nasagyat ed ontan ya eksena? Anto so manggagawa ed satan a makapasagyat? Imanoen no panon kalinew so nengneng na danum. Anggan say dagem  so malinis, lapud say tawen so asul tan say liwawa et singa mankirlap. Natan, no satan a parehon eksena so nauman​—say agus na danum so akeneng lapud basura, saray kakiewan tan angkabaleg a bato so asulat-sulatan na graffiti, say dagem so adutakan lapud asewek​—ag-itayo la nasagyat ed satan; sikatayo so onarawi ed satan. Kaslakan ya isisiglaot tayo so karakpan ed kalinisan, inkamaralus, tan liwawa. Sarayan parehon salita so nayarin usaren pian deskribien so inkasanto nen Jehova. Agpankelawan a nasagyat itayo ed saray pasingawey a deskripsion ed si Jehova! Mansyayap a liwawa, mankirlap a singa ankabli iran bato (gemstones), mandarlang a singa apoy odino puro-puro tan masmasnag a mabli iran metal​—ontan so karakpan na masanton Dios tayo.​—Ezequiel 1:25-28; Apocalipsis 4:2, 3.

17, 18. (a) Panon a diad inmuna et naapektaan si Isaias ed pasingawey ed sikato? (b) Panon ya inusar nen Jehova so serapin pian tambayoen si Isaias, tan anto so kabaliksan na inkiwas na serapin?

¹⁷ Anggaman ontan, kasin say inkasanto na Dios so mangipalikna ed sikatayon abebbeba diad pangikompara? Siempre say ebat et on. Diad tua, sikatayo so abebbeba ed si Jehova​—tan satan so abalbaleg a pidumaan. Kasin say pikabat ed satan so mangisian ed sikatayo manlapud sikato? Konsideraen so reaksion nen Isaias ed impakarengel to ed saray serapin a mangiyaabawag ed inkasanto nen Jehova. “Diad saman inkuan ko, Abagey ak la! Ta nabalang ak; lapu ed too ak a marutak so saray bibil, tan manaayam ak dia ed pegley na baley a marutak so saray bibil: ta saray matak anengneng da so Ari, si Jehova na saray ehersito.” (Isaias 6:5) On, say magnayon ya inkasanto nen Jehova so angipanonot ed si Isaias nipaakar ed inkamakasalanan to tan agto inkayadyari. Unona, satan a matoor a too so walad pakaskasin kipapasen. Balet sikatoy agkinaindanan nen Jehova ed ontan a kipapasen.

¹⁸ Sakey a serapin so tampol ya anambayo ed propeta. Panon? Say mabiskeg ya espiritu so tinmekkiab ed altar, angala na ngalab ditan, tan indelnet to ed saray bibil nen Isaias. Satan so singa mas makapasinagem imbes a makaligliwa. Balet tandaan a saya so sakey a pasingawey, a napno na simbolikon kabaliksan. Si Isaias, a matoor a Judio, so mikabat a maong a saray bagat  so inagew-agew ya iyaapay diad altar na templo pian manggawa na pananakbong parad saray kasalanan. Tan say serapin so simamaaron angipanonot ed propeta ya anggaman sikatoy ag-ayadyari, “marutak so saray bibil,” siansian sikatoy nawalaan na malinis a talindeg ed arap na Dios. * Si Jehova so mabulos a manmoria ed ag-ayadyari, makasalanan a too bilang masanto​—anggan panon et diad relatibon pantalos.​—Isaias 6:6, 7.

19. Panon a posibli parad sikatayo so pagmaliw a masanto diad relatibon pantalos, anggaman ag-itayo ayadyari?

¹⁹ Tua met itan natan. Amin na saraman a bagat ya inyapay ed altar diad Jerusalem so mangiyaanino labat ed bengatlan babaleg​—samay ayadyarin bagat ya inyapay nen Jesu-Kristo nen 33 K.P. (Hebreos 9:11-14) No talagan magbabawi itayo ed saray kasalanan tayo, ipetek iray lingon kurang tayo, tan agamilen so pananisia ed satan a bagat, naperdona itayo. (1 Juan 2:2) Napanggayagaan tayo met so malinis a talindeg ed arap na Dios. Kanian, sikatayoy papanonotan nen apostol Pedro: “Ta nisulat ya: Masantos kayo komon ta masantos ak.” (1 Pedro 1:16) Imanoen  ya ag imbaga nen Jehova a nepeg itayon magmaliw a masanto a singa sikato. Agton balot iilaloan so imposible manlapud sikatayo. (Salmo 103:13, 14) Imbes, ibabaga ed sikatayo nen Jehova a magmaliw a masanto lapud sikatoy masanto. ‘Singa anak ya inararo,’ sikatoy panggunaetan tayon aligen anggad anggaay nayarian tayo bilang ag-ayadyarin totoo. (Efeso 5:1) Kanian say pandampot ed inkasanto so tuloytuloy a proseso. Legan ya ombubulaslas itayo ed espiritual, pankimeyan tayon ‘yadyarien so kasantosan’ ya inagew-agew.​—2 Corinto 7:1.

20. (a) Akin ya importantin talosan a nayarian tayoy magmaliw a malinis ed imaton na masanton Dios tayo? (b) Panon a naapektaan si Isaias sanen naaralan to a saray kasalanan to so asakbongan la?

²⁰ Inaro nen Jehova no anto so maptek tan maralus. Kagula to so kasalanan. (Habacuc 1:13) Balet agto itayo gugulaen. Basta moriaen tayo so kasalanan a singa ed panmoria to​—gulaen so mauges, aroen so maong​—tan panggunaetan tayon tumboken so ayadyarin bakat nen Kristo Jesus, perdonaen nen Jehova iray kasalanan tayo. (Amos 5:15; 1 Pedro 2:21) Sano natalosan tayo a nayarian tayoy magmaliw a malinis ed imaton na masanton Dios tayo, saray epekto so mapatnag. Tandaan, say inkasanto nen Jehova diad inmuna so angipanonot ed si Isaias nipaakar ed agto inkalinis. Inkelyaw to: “Abagey ak la!” Balet sanen atalosan to a saray kasalanan to et asakbongan la, nauman so panmoria to. Sanen kinerew nen Jehova so manboluntaryo pian gawaen so sakey ya asainmin, tampol ya inmebat si Isaias, anggaman agto anggan amta so nalalanor. Inkelyaw to: “Wadia ak; Ibaki moak.”​—Isaias 6:5-8.

21. Anto so walan basiyan tayo pian mankompiyansa a nayarian tayon bayuboan so kalidad na inkasanto?

²¹ Apalsa itayo unong ed indengan na masanton Dios, tan naikdan itayo na moral iran kalidad tan say abilidad a makatebek na espiritual iran bengatla. (Genesis 1:26) Amin tayo et walaan na posibilidad a magmaliw a masanto. Legan ya itutultuloy tayon bayuboan so inkasanto, si Jehova so maliket ya ontulong. Kaleganan, sikatayo so lawas napaapit ed masanton Dios tayo. Sakey ni, legan tayon kokonsideraen iray kalidad nen Jehova diad saray ontumbok a kapitulo, natalosan tayo a walaray dakel a mabiskeg a rason pian onapit ed sikato!