1, 2. Wanem vision nao profet Isaiah kasem, and wanem nao hem teachim iumi abaotem Jehovah?

 ISAIAH hem feel smol and fulap witim bigfala praise long samting wea hem lukim​—wanfala vision from God. Hem barava luk real! Bihaen, Isaiah sei hem “lukim Jehovah” long hae throne bilong Hem. Longfala kaleko bilong Jehovah fulimap datfala big temple long Jerusalem.​—Isaiah 6:1, 2.

² Isaiah garem sem feeling long samting wea hem herem—barava laodfala singsing wea mekem full temple seksek. Olketa seraph nao singsing, olketa hia maeti spirit wea garem barava hae position. Strongfala singsing bilong olketa talemaot toktok wea simpol bat spesol: “Holy, holy, holy nao Jehovah bilong olketa army. Full earth hem fulap long glory bilong hem.” (Isaiah 6:3, 4) Wei for singim datfala word “holy” thrifala taem hem strongim datwan long spesol wei, and diswan hem barava fitim bikos Jehovah hem holy evribit long evri wei. (Revelation 4:8) Full Bible mekhae long holy fasin bilong Jehovah. Planti handred verse joinim nem bilong God witim datfala word “holy” and “holy fasin.”

3. Hao nao rong tingting abaotem holy fasin bilong Jehovah hem mekem planti pipol tanawe from God and no kam klos long hem?

³ So hem klia, wanfala first samting wea Jehovah wantem iumi for savve abaotem hem nao wei wea hem holy. Nomata olsem, planti pipol distaem no laekem datfala idea. Samfala pipol rong for sei holy fasin hem wei wea man seleva sei hem raeteous or wei for act holy nomoa. Pipol wea ting smol long olketa seleva maet no laek for tingim holy fasin bilong God bat fraetem datwan. Olketa maet ting olketa bae nating kamap fit for kam klos long disfala holy God. Bikos long holy fasin bilong God, planti pipol tanawe from hem. Datwan hem sorre samting bikos holy fasin bilong God hem wanfala strong reason  for kam klos long hem. Why nao olsem? Bifor iumi ansarem datfala kwestin, iumi storyim firstaem wanem nao trufala holy fasin.

4, 5. (a) Wanem nao holy fasin minim, and wanem nao hem no minim? (b) Long wanem tufala important wei nao Jehovah hem stap “separate”?

⁴ Wei wea God hem holy no minim hem tinghae long hemseleva, praod, or ting daonem nara pipol. Nomoa nao, hem heitim olketa fasin olsem. (Proverbs 16:5; James 4:6) So, wanem nao datfala word “holy” hem really minim? Long Hebrew languis wea olketa iusim for raetem Bible, datfala word hem kam from wanfala word wea minim “separate.” Saed long worship, “holy” hem fitim samting wea separate from wanem man iusim evritaem, or samting spesol saed long worship. Holy fasin barava minim wei for stap klia from eni dirty samting. Hao nao iumi iusim disfala word saed long Jehovah? Waswe, diswan minim hem “separate” from olketa man wea no perfect, hem stap farawe from iumi?

⁵ Nomoa nao. Olsem “datfala Holy Wan Bilong Israel,” Jehovah talem pipol bilong hem bae hem stap “midolwan” long olketa, nomata olketa garem sin. (Isaiah 12:6; Hosea 11:9) So, holy fasin bilong hem no mekem hem stap farawe. Sapos olsem, hao nao hem stap “separate”? Long tufala important wei. First wei, hem separate from evri samting bikos hem nomoa Most Hae. Wei wea hem klin hem long evri wei and hem for olowe. (Psalm 40:5; 83:18) Mek-tu wei, Jehovah hem stap separate evribit from evri samting wea sin, and datwan hem comfortim iumi. Hao nao olsem?

6. Why nao iumi savve kasem comfort long wei wea Jehovah separate evribit from wei for sin?

⁶ Iumi stap insaed wanfala world wea holy fasin hem hard for faendem. Evri samting insaed community bilong olketa man wea stap farawe from God hem dirty long samfala wei, hem garem sin and no perfect. Iumi evriwan mas faet againstim sin wea stap insaed long iumi. And sapos iumi no luk aot  gud, iumi evriwan stap long danger for sin hem winim iumi. (Romans 7:15-25; 1 Corinthians 10:12) Jehovah hem no stap long danger olsem. From hem no garem eni sin, hem bae nating kamap dirty from sin. Diswan mekem iumi barava sure hao Jehovah nao best Dadi, bikos iumi fit for trustim hem evribit. Long wei wea difren evribit from olketa dadi wea garem sin, Jehovah bae nating garem nogud fasin, or fasin wea spoelem man. Holy fasin bilong hem mekem diswan bae no savve happen. Samfala taem Jehovah talem promis and sei holy fasin bilong hemseleva nao mekem promis hia sure, bikos holy fasin hem samting wea iumi savve trustim evribit. (Amos 4:2) Datwan barava encouragem iumi!

7. Why nao iumi savve sei holy fasin hem insaed evri wei bilong Jehovah?

⁷ Holy fasin hem insaed evri wei bilong Jehovah. Wanem nao datwan hem minim? Olsem example: Tingim olketa word “man” and “no perfect.” Taem iu ting abaotem wei bilong man iu tingim tu hao hem no perfect. Wei for no perfect hem insaed long evri samting wea iumi duim. Distaem tingim tufala barava difren word—“Jehovah” and “holy.” Holy fasin hem olsem wei bilong Jehovah. Evri part bilong hem klin and stretfala. Iumi kanduit savve long really fasin bilong Jehovah sapos iumi no tingim and minim disfala important word​—“holy.”

8, 9. Wanem nao showimaot Jehovah helpem olketa man wea no perfect for kamap holy long samfala wei?

⁸ Bikos evri samting saed long Jehovah hem holy, iumi fit for sei hem nao start bilong evri samting wea holy. Hem no selfish for keepim disfala spesol fasin; hem givim diswan long planti pipol, and hem duim long bigfala wei. Tru tumas, taem God story long Moses thru long wanfala angel long smol tree wea bone, graon raonem datfala smol tree hem kamap holy tu bikos Jehovah kam long there!​—Exodus 3:5.

⁹ Waswe, olketa man wea no perfect savve kamap holy witim help bilong Jehovah? Yes, long samfala wei. God givim chance  long pipol bilong hem Israel for kamap “wanfala holy nation.” (Exodus 19:6) Hem givim datfala nation wanfala wei bilong worship wea holy and klin. Holy fasin hem kamap evritaem insaed long Law Bilong Moses. Tru nao, hae priest hem werem wanfala pis gold front long turban bilong hem, wea evriwan savve lukim from hem shaen. Olketa raetem disfala toktok long datwan: “Wei for holy hem bilong Jehovah.” (Exodus 28:36) So hae mark bilong wei for klin hem mekem worship bilong olketa difren, and living bilong olketa tu. Jehovah talem olketa: “Iufala mas holy, bikos mi Jehovah, God bilong iufala, mi holy.” (Leviticus 19:2) Taem olketa Israelite live followim kaonsel bilong God long wei wea fitim olketa man wea no perfect, olketa kamap holy long samfala wei.

10. Long saed bilong holy fasin, wanem nao difren midolwan long Israel bifor and olketa nation wea stap raonem olketa?

¹⁰ Disfala wei for holy hem difren evribit from worship bilong olketa nation wea stap raonem Israel. Olketa heathen nation hia worshipim olketa god wea no really stap, bat pipol biliv hao olketa god hia raf, greedy, and fulap witim dirty fasin. Evri wei bilong olketa barava nating holy. Wei for worshipim olketa god olsem hem mekem pipol no holy. So, Jehovah wantem olketa servant bilong hem for stap separate from olketa wea worshipim olketa heathen god and olketa dirty samting olketa duim saed long religion.​—Leviticus 18:24-28; 1 Kings 11:1, 2.

11. Hao nao holy fasin bilong part bilong organization bilong Jehovah hem showaot thru long (a) olketa angel? (b) olketa seraph? (c) Jesus?

¹¹ Nomata datfala nation bilong Israel wea Jehovah chusim bifor duim best bilong olketa, pipol hia savve showimaot long lelebet wei nomoa holy fasin bilong part bilong organization bilong God wea stap long heven. Bible kolem planti million angel wea servem God olsem “staka thousand holy angel” bilong hem. (Deuteronomy 33:2; Jude 14) Olketa showimaot long perfect wei holy fasin bilong God wea braet and klin and luk naes tumas. And tingim olketa seraph wea Isaiah lukim insaed vision bilong hem. Song bilong olketa showimaot olketa strongfala angel hia garem important waka for talemaot holy  fasin bilong Jehovah long full universe. Nomata olsem, wanfala angel hem winim evriwan hia—only-born Son bilong God. Wei wea Jesus showimaot klia holy fasin bilong Jehovah hem moa hae winim eni narawan. Dastawe hem fit for garem nem “Holy Man wea God sendem kam.”​—John 6:68, 69.

12, 13. (a) Why nao hem fitim for sei nem bilong God hem holy? (b) Why nao God mas kliarem nem bilong hem?

¹² Waswe long nem bilong God? Olsem iumi lukim long Chapter 1, datfala nem hem no title or nem nating. Hem stand for Jehovah God, wea minim evri fasin bilong hem. Dastawe Bible talem iumi dat ‘nem bilong hem holy.’ (Isaiah 57:15) Law Bilong Moses sei man mas dae sapos hem min for no showimaot respect long nem bilong God. (Leviticus 24:16) And lukim samting wea Jesus sei hem first samting for talem long prea: “Dadi bilong mifala long heven, mifala laekem nem bilong iu for holy.” (Matthew 6:9) For mekem samting holy hem minim for markem datwan olsem hem separate, for ting long hem olsem hem holy. Bat why nao samting wea klin tumas olsem nem bilong God mas kamap holy?

¹³ Olketa no respectim and tok spoelem nem bilong God taem olketa laea abaotem hem. Long Eden, Satan laea abaotem Jehovah and sei Hem wanfala Sovereign wea no followim justice. (Genesis 3:1-5) Start long datfala taem, Satan—​ruler bilong disfala world wea no holy—hem mek sure olketa laea toktok abaotem God kamap big. (John 8:44; 12:31; Revelation 12:9) Olketa religion story abaotem God olsem hem raf and stap farawe tumas. Olketa sei hem saportim olketa long olketa war wea olketa faet insaed. Olketa sei olketa nambawan samting wea God creatim hem kamap seleva nomoa, or from evolution. Tru nao, olketa barava nating respectim nem bilong God. Hem mas kamap holy; hem mas kasem bak glory wea hem fit for garem. Iumi luk forward tumas long taem wea Jehovah bae duim samting for kliarem nem bilong hem. Kingdom wea Son bilong hem rulim nao bae duim datwan. Iumi hapi for garem share insaed long datfala nambawan purpose.

14. Why nao iumi fit for sei spirit bilong God hem holy, and why nao wei for againstim holy spirit hem serious samting?

 ¹⁴ Nara samting moa hem join long klos wei witim Jehovah wea klosap evritaem olketa sei hem holy​—hem nao spirit, or paoa bilong hem. (Genesis 1:2) Jehovah iusim disfala barava strong paoa for duim olketa purpose bilong hem. Evri samting wea God duim hem duim long wei wea holy and klin dastawe paoa bilong hem fit for garem nem holy spirit. (Luke 11:13; Romans 1:4) Wei for againstim holy spirit, insaed diswan hem for min for waka againstim olketa purpose bilong Jehovah, hem wanfala sin wea no savve kasem forgiveness.​—Mark 3:29.

15. Why nao iumi fit for fraet long God or respectim hem bikos long holy fasin bilong hem, and wanem nao wei for respectim God hem minim?

¹⁵ Dastawe, planti taem Bible sei man shud fraet long God or respectim hem bikos diswan hem join witim holy fasin bilong God. Olsem example, Psalm 99:3 sei olsem: “Letem olketa praisem nambawan nem bilong iu, bikos hem holy and fit for man respectim.” Disfala wei for showimaot respect hem showaot lo wei wea iumi barava tinghae lo hem. Fitim for man feel olsem bikos holy fasin bilong God hem hae tumas winim iumi. Hem klia and klin and shaen fogud. Nomata olsem, datwan shud no mekem iumi les long hem. Bat, wei for garem stret tingting abaotem holy fasin bilong God bae mekem iumi kam moa klos long hem. Why nao olsem?

16. (a) Hao nao holy fasin hem join witim samting wea luk naes? Talem wanfala example. (b) Hao nao olketa vision wea showim Jehovah mekhae long wei for klin and laet?

¹⁶ Wanfala samting nao, Bible joinim holy fasin witim samting wea luk naes. Isaiah 63:15 storyim heven olsem ‘haefala ples bilong God wea holy and luk naes tumas.’ Iumi laekem tumas samting wea luk naes. Olsem example, lukim piksa long page 33. Waswe, iu laek for stap long ples olsem? Wanem nao mekem iu laekem? Lukim wei wea wata hia luk klin tumas. Air tu masbi klin bikos skae hem blue and laet hem shaen.  Sapos datfala piksa hem change​—wata hia garem rabis, pipol raetem enikaen samting long olketa tree and rok, air hem fulap witim smoke—​bae iumi no interest; bae iumi les long hem. Iumi joinim samting wea luk naes witim wei for klin and laet. Iumi savve iusim olketa word hia for story abaotem holy fasin bilong Jehovah. Dastawe olketa vision wea abaotem Jehovah hem mekem iumi for barava interest! Wei wea holy God bilong iumi luk naes hem olsem laet wea shaen, olketa naesfala ston, olsem fire or olketa spesol metal wea klin and shaen fogud.​—Ezekiel 1:25-28; Revelation 4:2, 3.

17, 18. (a) Long firstaem hao nao vision wea Isaiah lukim hem affectim hem? (b) Hao nao Jehovah iusim wanfala seraph for comfortim Isaiah, and wanem nao mining bilong samting wea datfala seraph duim?

¹⁷ Bat waswe, holy fasin bilong God shud mekem iumi feel smol? Ansa mas, yes. Tru nao, iumi barava smol sapos iumi trae for markem iumiseleva witim Jehovah. Waswe, datwan minim iumi mas stap farawe from hem? Lukim samting wea Isaiah duim taem hem herem olketa seraph talemaot holy fasin bilong Jehovah. “Mi sei: ‘Mi trabol nao! Mi fit for dae nomoa, bikos mi man wea lips bilong mi dirty, and mi stap midolwan long pipol wea lips bilong olketa dirty, from mi barava lukim King, Jehovah bilong olketa army long eye bilong mi!’” (Isaiah 6:5) Yes, holy fasin bilong Jehovah wea no garem eni spialaen mekem Isaiah tingim hao hem garem sin and barava no perfect. Long firstaem, datfala faithful man hem seke fogud. Bat Jehovah no lusim hem.

¹⁸ Stretawe wanfala seraph comfortim datfala profet. Long wanem wei? Datfala maeti spirit flae go long altar, tekem wanfala sakol from there, and tasim lips bilong Isaiah witim datfala sakol. Waswe, datwan feel soa winim wei for givim comfort? Iumi mas remember hao disfala vision hem garem bigfala tokpiksa mining. Isaiah, wanfala faithful Jew, hem savve gud hao olketa offerim olketa sakrifaes evriday long altar bilong temple for kavarem olketa sin. And long loving wei datfala seraph helpem datfala profet for tingim hao nomata hem no perfect, and ‘lips bilong hem dirty,’ hem savve still stap klin front long  God. a Jehovah hem willing for ting long man wea garem sin and no perfect olsem hem holy​—long samfala wei.​—Isaiah 6:6, 7.

19. Hao nao iumi fit for kamap holy long samfala wei nomata iumi no perfect?

¹⁹ Sem samting hem fitim distaem. Evri sakrifaes wea olketa offerim long altar long Jerusalem olketa olsem shadow bilong samting wea moa big—wanfala perfect sakrifaes, wea Jesus Christ offerim long 33 C.E. (Hebrews 9:11-14) Sapos iumi barava repent from olketa sin bilong iumi, stretem rong wei bilong iumi, and showimaot faith long datfala sakrifaes, bae iumi kasem forgiveness. (1 John 2:2) Iumi tu savve stap klin front long God. Dastawe aposol Paul talem iumi moa: “Olketa Holy Raeting sei: ‘Iufala mas holy bikos mi nao mi holy.’” (1 Peter 1:16) Lukim hao Jehovah no sei iumi mas holy olsem hem. Hem no expectim iumi for duim samting iumi no savve duim. (Psalm 103:13, 14) Bat, Jehovah talem iumi for holy bikos hem holy. ‘Olsem olketa pikinini wea hem lovem,’ iumi trae for followim hem long best wei wea fitim olketa man wea  no perfect. (Ephesians 5:1) So, wei for kasem holy fasin hem samting wea iumi go ahed for duim evritaem. Taem iumi grow long spiritual saed, iumi duim samting for “mekem holy fasin kamap perfect” evriday.​—2 Corinthians 7:1.

20. (a) Why nao hem important for luksavve iumi fit for klin long eye bilong holy God bilong iumi? (b) Hao nao samting wea Isaiah lanem abaotem wei wea God kavarem sin bilong hem affectim hem?

²⁰ Jehovah hem lovem samting wea stret and klin. Hem heitim sin. (Habakkuk 1:13) Bat hem no heitim iumi. Sapos iumi ting abaotem sin long sem wei olsem hem—heitim samting wea nogud, lovem samting wea gud—and trae hard for followim olketa perfect step bilong Christ Jesus, Jehovah hem forgivim olketa sin bilong iumi. (Amos 5:15; 1 Peter 2:21) Taem iumi luksavve iumi fit for klin long eye bilong holy God bilong iumi, diswan barava affectim iumi long bigfala wei. Remember hao long firstaem, holy fasin bilong Jehovah hem mekem Isaiah tingim wei wea hem no klin. Hem singaot olsem: “Mi trabol nao!” Bat taem hem minim hao God forgivim olketa sin bilong hem, tingting bilong hem change. Taem Jehovah ask for wanfala volunteer for duim wanfala assignment, Isaiah stretawe offerim hemseleva, nomata hem no really savve wanem nao insaed datwan. Hem sei: “Mi long hia! Sendem mi!”​—Isaiah 6:5-8.

21. Wanem reason nao iumi garem for feel sure iumi savve mekem grow holy fasin?

²¹ God hem wakem iumi followim holy image bilong hem, and givim iumi olketa gud fasin and savve for minim olketa spiritual samting. (Genesis 1:26) Iumi evriwan fit for kamap holy. Taem iumi go ahed for mekem grow holy fasin, Jehovah hem hapi for helpem iumi. Taem diswan go ahed, bae iumi kamap moa klos long holy God bilong iumi. And tu, taem iumi study abaotem olketa fasin bilong Jehovah insaed olketa chapter bihaen, bae iumi lukim hao planti strongfala reason stap for kam klos long hem!