1, 2. O le ā le faaaliga na vaaia e le perofeta o Isaia, ma o le ā ua tatou a‘oa‘oina mai ai e uiga iā Ieova?

 NA MATUĀ faagaeetia Isaia i le mea sa ia vaaia—o se faaaliga mai le Atua. Na matuā foliga mai o se mea moni! Mulimuli ane na tusi mai Isaia e faapea, sa ia ‘iloa tino atu lava Ieova’ o afio mai i Lona nofoalii. O loo fofola mai pito ofu o Ieova ma ua ufitia ai le malumalu telē i Ierusalema.—Isaia 6:1, 2.

² Sa matuā ofo Isaia i mea na ia faalogoina—o pesega sa malosi lona usuina, ma oo ai ina matuā lūlūina le faavae o le malumalu. Na usuina le pese e serafi, o ni foafoaga agaga ua iai i ni tofiga maualuluga. Sa matagofie lo latou usuina o upu mamalu nei: “E paia, e paia, e paia Ieova o ‘au; ua tumu le lalolagi uma i lona mamalu.” (Isaia 6:3, 4) O le faatolu ona usuina o le faaupuga “e paia” e faamaonia ai sa matuā faamamafaina lenā manatu, ma ua talafeagai lenā mea, auā e silisili lava le paia o Ieova. (Faaaliga 4:8) O loo faamamafaina i le Tusi Paia atoa le paia o Ieova. E anoanoa‘i fuaiupu o loo faafesoota‘i atu ai lona suafa i le upu “paia.”

3. Ua faapefea i manatu sesē e faatatau i le paia o Ieova ona faapogaia ai le liliu ese o le to‘atele mai le Atua, na i lo le faalatalata atu iā te ia?

³ E mautinoa, o se tasi o manatu autū o loo finagalo Ieova ia tatou malamalama i ai, o le iloa lea o ia e paia. Peita‘i, e to‘atele tagata i aso nei e lē taliaina lenā manatu. Ua faauiga sesē e nisi tagata le paia, i le faafia amiotonu po o le faafia amiolelei. Ua faataugāina nisi tagata i mafaufauga faapea e faatauvaa lava i latou, ma ua sili atu ona fefefe pe a ta‘ua le paia o le Atua, na i lo o lo latou fiafia ai. E popole faapea e lē taitai talafeagai ona latou faalatalata atu i lenei Atua e paia. O le i‘uga, ua liliu ese le to‘atele mai le Atua ona o lona paia. E faanoanoa ai lava, auā o le paia o le Atua, o le pogai sili lenā mo le fia faalatalata atu iā te ia. Aiseā? A o le‘i taliina lenā fesili, se‘i tatou talanoa i le uiga moni o le paia.

4, 5. (a) O le ā le uiga o le “paia,” ae o le ā e lē o uiga i ai? (e) O ā auala e lua ua “faaesea mai” ai Ieova?

⁴ O le ta‘ua o le Atua e paia, e lē uiga ai faapea e fia viiviia, faamaualuga, pe silasila faatauvaa i isi. E na te inosia na uiga. (Faataoto 16:5; Iakopo 4:6) O le ā tonu lava le uiga o le upu “paia”? I tusitusiga paia faa-Eperu, o lenā upu e maua mai i le faaupuga o loo faauiga i le “faaesea mai.” I le tapua‘iga, o loo faatatau atu le “paia” i se mea ua faaesea mai i le auala masani o loo faaaogā ai, po ua faamamaluina. O le paia fo‘i ua faaalia ai le manatu o le mamā ma le lē ponā. E faapefea ona faatatau atu lenei upu iā Ieova? Po o lona uiga ea ua “faaesea mai” o ia mai tagata lē lelei atoatoa, ma ua mamao ese mai iā i tatou?

⁵ E leai. Ona o ia o “le Paia o Isaraelu,” ua faamautinoa atu ai e Ieova i ona tagata o loo ia iai faatasi ma i latou, e ui lava i so latou tulaga agasala. (Isaia 12:6; Hosea 11:9) O lona paia ua lē mamao ese ai o ia. E faapefea la ona “faaesea mai” o ia? E lua auala tāua. Muamua, ua faaesea o ia mai ana foafoaga uma, i le uiga faapea, ua na o ia lava le Silisili Ese. E matuā manino lava ma e lē muta mai lona tulaga lē ponā ma lona tulaga mamā. (Salamo 40:5; 83:18) Lona lua, e matuā faaesea lava Ieova mai agasala uma, ma e faamāfanafanaloto lenā manatu. Aiseā?

6. Aiseā e faamāfanafanaloto ai lo tatou iloa, e matuā vavaeese lava Ieova mai le agasala?

⁶ O loo tatou iai i se lalolagi ua tau lē maua ai le tulaga paia moni. O mea uma i le olaga o tagata ia ua faaesea mai le Atua, ua oo ina faaleagaina ma pisipisia i le agasala ma le lē lelei atoatoa. E tatau ona tatou tetee malosi atu i le agasala o loo tatou aafia ai. Pe afai tatou te lē mataala, e mafai ona lamatia i tatou uma i le ono faia o le agasala. (Roma 7:15-25; 1 Korinito 10:12) E lē fesaga‘i Ieova ma se lamatiaga faapena. Talu ai e lē agasala lava o ia, e lē taitai fo‘i ona pisipisia o ia i so o se agasala. Ua atili faamausalīina ai lo  tatou mautinoa, o Ieova o le Tamā e sili ona lelei; e matuā maufaatuatuaina o ia. E lē tutusa Ieova ma le to‘atele o tamā faaletagata, auā e lē taitai ona aafia o ia i ni faiga pi‘opi‘o, ni amioga leaga, po o ni faiga sauā. E matuā lē mafai lava ona ia faia na mea ona o lona tulaga paia. I nisi taimi e tautō ai Ieova i lona lava paia, auā e leai se isi mea e sili atu ona maufaatuatuaina i lo lenā. (Amosa 4:2) Po ua lē faamāfanafanaloto ea lenā manatu?

7. Aiseā e faapea atu ai, o le paia o le vala autū lea o uiga masani o Ieova?

⁷ O le paia, o le vala autū lea i le uiga masani o Ieova. O le ā le uiga o lenā manatu? Mo se faata‘ita‘iga: Se‘i manatu i le upu “tagata” ma le faaupuga “lē lelei atoatoa.” E lē mafai ona e faamatalaina le upu muamua e aunoa ma le faaaofia ai o le faaupuga lona lua. Ua tatou lē lelei atoatoa uma, ma ua aafia ai mea uma tatou te faia. Se‘i manatu nei la i ni upu se lua e matuā ese lava mai na upu—o “Ieova” ma le “paia.” E paia Ieova. O mea uma e fesoota‘i atu iā te ia e mamā, e lē ponā, ma e tonu. E faato‘ā mafai ona tatou iloa lelei le uiga moni o Ieova, pe afai tatou te malamalama i lenei upu tāua, o le “paia.”

8, 9. O le ā e faaalia ai e fesoasoani mai Ieova i tagata lē lelei ina ia mafai ona paia e ui e lē ausia atoatoa lenā tulaga?

⁸ Talu ai e paia Ieova, e sa‘o ai la le faapea atu o ia e puna mai ai mea paia uma. E na te lē taofiofia mo ia lava lenei uiga tautele; na te foa‘i mai i isi, ma e faia ma le alofa tele. Ioe, ina ua fetalai le Atua iā Mose e ala mai i se agelu i le laau lea na sasao ai le afi, na oo lava i lenā laueleele sa latalata ane, sa paia uma ona o lenā fesoota‘iga ma Ieova!—Esoto 3:5.

⁹ Pe mafai ona paia tagata lē lelei atoatoa e ala i le fesoasoani mai a Ieova? Ioe, ae e lē i se tulaga atoatoa. Na foa‘i atu e le Atua i lona nuu o Isaraelu le faamoemoe o le avea “ma nuu paia.” (Esoto 19:6) Na ia faamanuia i lenā nuu e ala i se faatulagaga tau i le tapua‘iga e paia, e mamā, e lē ponā. Sa avea  ai le paia o se matua e ta‘ua e lē aunoa i le Tulafono na tuuina atu iā Mose. Manatua fo‘i, sa fusi e le faitaulaga sili i le pito i luma o lona pulou‘ie se mea iila e faia i le auro, ina ia faigofie i tagata ona iloa mai le ‘ila‘ila atu o le auro. O inā sa tusia ai upu nei: ‘E Paia Ieova.’ (Esoto 28:36) O lea la, o le tulaga maualuga o le paia ma le lē ponā sa matilatila ai la latou tapua‘iga ma o latou olaga. Na fetalai mai Ieova iā i latou: “Ia paia outou; auā o a‘u o Ieova lo outou Atua e paia lava a‘u.” (Levitiko 19:2) O le tele lava la sa tausia ai e Isaraelu lē lelei atoatoa faatonuga a le Atua o lo latou paia fo‘i lea i se tulaga faatatau.

10. Sa ese faapefea le paia, sa iai i le va o Isaraelu anamua ma ona nuu tuaoi?

¹⁰ Sa matuā eseese lenei faamamafaina o le paia ma le tapua‘iga a nuu tuaoi o Isaraelu. Na tapua‘ia e na nuu faapaupau atua pepelo, o atua sa faia faiga sauā, e matape‘ape‘a, ma amio lē mamā. E augapiu ma se mea na paia ai i latou. O le tapua‘ia o na atua sa avea ma pogai na lē paia ai tagata. Ona lapata‘ia lea e Ieova ana auauna ina ia vavaeese mai tagata faapaupau ma a latou tapua‘iga lē mamā.—Levitiko 18:24-28; 1 Tupu 11:1, 2.

11. Ua manino mai faapefea le paia o le vaega faalelagi o le faalapotopotoga a Ieova (a) i agelu? (e) i serafi? (i) iā Iesu?

¹¹ I taimi sa sili ona lelei, na mafai ai fo‘i ona faaalia e le nuu filifilia o Ieova, o Isaraelu anamua, sina faaataga o le paia o le vaega faalelagi o le faalapotopotoga a le Atua. E faitau miliona agelu o loo auauna faamaoni i le Atua, ma ua ta‘ua i latou o lana “‘au paia e manomano.” (Teuteronome 33:2; Iuta 14) Ua latou faaatagia mai i se tulaga atoatoa, le matuā matagofie o le paia o le Atua. Se‘i manatu fo‘i i agelu ua ta‘ua o serafi ia na vaaia e Isaia i le faaaliga. O upu o la latou pese e ta‘u mai ai, o loo faia e nei serafi se matafaioi tāua i le faalauiloaina atu o le paia o Ieova i le aoao o mea. Peita‘i e iai se isi agelu, e silisili iā i latou uma nei—le Alo pele e to‘atasi o le Atua. O Iesu, o le faaataga sili lea o le paia o Ieova. Ua tonu ai ona ta‘ua o ia, “o le Paia o le Atua.”—Ioane 6:68, 69.

12, 13. (a) Aiseā ua tatau ai ona faamatalaina le suafa o le Atua o se suafa paia? (e) Aiseā e tatau ai ona taʻumamāina le suafa o le Atua mai i tulaga uma e faalumaina ai?

¹² Ae faapefea le suafa o le Atua? E pei ona tatou mātauina i le Mataupu 1, o lenā suafa ua lē na o se ta‘u po o se faailoilo. O le suafa lenā ua faamatalaina ai Ieova le Atua, ma e aofia uma ai ona uiga i lenā suafa. O lea la, ua faapea mai ai le Tusi Paia, e “paia lona suafa.” (Isaia 57:15) Sa faasalaina i le oti e le Tulafono sa tuuina atu iā Mose so o se tasi e upuvale pe faifai i le suafa o le Atua. (Levitiko 24:16) Se‘i mātau le manatu na ta‘ua muamua lava e Iesu i lana tatalo: “Lo matou Tamā e, o i le lagi, Ia paia lou suafa.” (Mataio 6:9) Ina ia faapaia se mea, o lona uiga ia faataatia ese lenā mea e pei o se mea e paia, e faaaloalo i ai, ma e faasilisilia fo‘i. Ae aiseā e ao ai ona toe faapaia fua se mea e matuā mamā lava e pei o le suafa o le Atua?

¹³ Ua faalumaina ma taʻuleagaina le suafa paia o le Atua i pepelo ma faamatalaga taufaaleaga. I Etena, na pepelo ai Satani e uiga iā Ieova, e pei o lea sa ia faapea mai, o Ieova o se Pule Silisili Ese e lē faimea tonu. (Kenese 3:1-5) Talu mai lenā taimi, ua taumafai ai pea Satani—le pule o lenei lalolagi lē paia—e faateleina pepelo e faatatau i le Atua. (Ioane 8:44; 12:31; Faaaliga 12:9) Ua faaatagia soo e lotu le Atua e peisea‘ī o sē e pulepuletutū, e lē māfana mai, ma faasauā. Ua latou manatu o le Atua lea e lagolagoina a latou taua fasioti tagata. Na i lo le avatu o le viiga i foafoaga ofoofogia a le Atua, ua masani ona viiviia le faaevolusione, le talitonuga fai mai na faafuase‘i lava ona tutupu mea uma. Ioe, ua matuā ta‘uleagaina lava le suafa o le Atua. E tatau ona faapaiaina; e tatau ona toe faamamaluina. Ua leva ona tatou moomoo i le aso o le a taʻumamāina ai e faavavau e Ieova lona suafa mai i tulaga uma e faalumaina ai. O le a ia faia faapea e ala i le Malo o loo pulea e lona Alo, ma e tatou te fia faia so o se vaega i lenā fuafuaga.

14. Aiseā ua ta‘ua ai le agaga o le Atua e paia, ma aiseā e matuiā ai le faifai i le agaga paia?

 ¹⁴ E iai se isi mea e tele sona sootaga iā Ieova e tatau fo‘i ona ta‘ua e paia—o lona agaga, po o lona malosi galue. (Kenese 1:2) E faaaogā e Ieova lenei malosi sili e faataunuu ai ana fuafuaga. O mea uma e faia e le Atua, e na te faataunuuina i se auala e paia, e lē ponā, ma e mamā. Ua tatau ai la ona ta‘ua lona malosi galue, o le agaga paia. (Luka 11:13; Roma 1:4) O le faifai i le agaga paia, o le faia lea ma le loto i ai o se gaoioiga e feteena‘i ma le finagalo o Ieova, ma e tutusa ma le faia o se agasala e lē mafai ona faamagaloina.—Mareko 3:29.

15. Aiseā ua talafeagai ai le mata‘u i le Atua ma le paia o Ieova, ma o le ā e aofia ai i lenā mataʻu?

¹⁵ E faigofie lava la ona iloa le māfuaaga ua faia ai e le Tusi Paia se sootaga o le paia o le Atua ma le mata‘u o le tagata i le Atua. E pei o le Salamo 99:3: “Ia latou vivii atu i lou suafa e sili ia ma le mata‘utia; e paia lava ia.” Peita‘i o lenei mataʻu e aofia ai faalogona o le āva ma le migao, po o le matuā faaaloalo lava. Ua talafeagai se lagona faapena, auā o le paia o le Atua e silisili lava iā i tatou. E matuā mamā, e mamalu. Peita‘i, e lē tatau ona tatou ‘alo‘alo mamao ese ai. Ae afai e sa‘o o tatou manatu i le paia o le Atua, ona tatou matuā māfana atu lea iā te ia. Aiseā?

16. (a) Ua faapefea ona fesoota‘i le paia ma le matagofie? Ta‘u mai se faaa‘oa‘oga. (e) Ua faapefea ona faamamafaina mai i faamatalaga faafaaaliga a Ieova lona tulaga mamā, le lē ponā, ma le malamalama?

¹⁶ Ua faia fo‘i e le Tusi Paia se sootaga i le va o le paia ma le matagofie po o le lalelei. I le Isaia 63:15, o loo faamatalaina ai le lagi o le “afioaga paia ma le matagofie” o le Atua. E tatou te tosina atu i ni vaaiga matagofie. Se‘i taga‘i fo‘i i le ata i le itulau e 33. Pe e te fiafia e taga‘i atu i lenā ata? Aiseā e matagofie ai lenā ata? Se‘i taga‘i i le manino lelei mai o le suāvai. O le ‘ea o loo foliga mai e mamā, auā o lea e lanumoana le vanimonimo ma ua peisea‘ī ai e iila feemoemoa‘i le  malamalama. Pe afai e suia lenā ata—ua lafo uma atu le lapisi i le vai, ua matagā solo laau ma maa tetele i tusitusiga e osiosi solo ai, ma ua faaoonaina le ‘ea i manogi leaga—e tatou te lē toe tosina atu la i ai; o le a tatou ‘ino‘ino i ai. E masani ona tatou faafesoota‘ia le matagofie po o le mamalu i le mamā, i le lē ponā, ma le malamalama. O upu lava nei e mafai fo‘i ona faaaogā e faamatala ai le paia o Ieova. E lētioa lava matuā faafiafiaina i tatou i na faamatalaga faafaaaliga e faatatau iā Ieova! Ua matuā pupula mai ai le malamalama, e tusa ma le fe‘ilafi solo mai ai o maatāua, ua aasa a‘e e pei o le afi po o le matuā iila mai o mea e sili ona matagofie ma le lelei—o le mamalu, po o le matagofie lenā o lo tatou Atua paia.—Esekielu 1:25-28; Faaaliga 4:2, 3.

17, 18. (a) O le ā le lagona na muamua oo iā Isaia ona o lenei faaaliga? (e) Na faaaogā faapefea e Ieova se serafi e faamāfanafana atu iā Isaia, ma o le ā le uiga o le gaoioiga sa faia e le serafi?

¹⁷ Ae pe tatau ea ona tatou lagona ai le faatauvaa pe a faatusatusa atu i le paia o le Atua? O le mea moni lenā. Auā o loo matuā faatauvaa lava i tatou pe a faatusatusa atu iā Ieova—o se faamatalaga ua matuā talafeagai. Ae pe avea ea le iloaina o lenā mea, o le a tatou mamao ese ai mai iā te ia? Faafofoga fo‘i i le tali atu a Isaia ina ua ia faalogo o loo folafola mai e serafi le paia o Ieova. “Ona ou faapea atu ai lea, Auē a‘u nei! auā ai a‘u a fano; auā o a‘u o le tagata laugutu leaga, o a‘u fo‘i matou te mau faatasi ma le nuu laugutu leaga; auā lava ua iloa i o‘u mata le Tupu o Ieova o ‘au.” (Isaia 6:5) Ioe, o le paia o Ieova na manatua ai e Isaia lona tulaga agasala ma le lē lelei atoatoa. Ina ua faato‘ā tupu lenā mea, sa matuā atuatuvale lava lenā tagata faamaoni. Peita‘i sa le‘i tuulafoa‘ia o ia e Ieova.

¹⁸ Na vave ona faamāfanafanaina le perofeta e se serafi. I le ā le auala? Na lele atu le serafi i le fata faitaulaga, ua aumai se malala ola, ma faapapa‘i atu i laugutu o Isaia. Atonu ua foliga mai sa sili atu ona faatigā lea gaoioiga na i lo le faamāfanafanaina ai. Ae manatua, o lenei mea o se faaaliga, e faafaatusa lona uiga. Na iloa lelei e Isaia e faapea, sa ofoina atu i aso ta‘itasi taulaga i le fata faitaulaga o le malumalu e totogi  ai agasala. O lea sa faamanatu atu ma le alofa e le serafi i le perofeta, e ui sa lē lelei atoatoa o ia, sa “laugutu leaga,” ae na mafai pea ona ia maua se tulaga mamā i le silafaga a le Atua. a E tusa ai ma le finagalo o Ieova, sa paia lea tagata lē lelei atoatoa, e ui i se tulaga lē atoatoa.—Isaia 6:6, 7.

19. E mafai faapefea e i tatou o ni tagata e lē lelei atoatoa ona paia, e ui i se tulaga lē atoatoa?

¹⁹ O le tulaga fo‘i lenā i aso nei. O taulaga uma sa ofoina atu i le fata faitaulaga i Ierusalema sa na o ni ata o se mea e silisili atu—le taulaga lelei atoatoa lea na ofoina atu e Iesu Keriso i le 33 T.A. (Eperu 9:11-14) Pe afai tatou te salamō moni mai i a tatou agasala, toe faasa‘o o tatou ala sesē, ma faatuatua atu i lana taulaga, ona faamagaloina lea o i tatou. (1 Ioane 2:2) E mafai fo‘i ona tatou maua se tulaga mamā i luma o le Atua. O le mea lea, ua faamanatu mai ai le aposetolo o Peteru iā i tatou: “Ua tusia, Ia paia outou, auā o a‘u nei e paia lava a‘u.” (1 Peteru 1:16) Se‘i mātau mai, e le‘i faapea mai Ieova e tatau ona tatou paia e pei o ia. E lē taitai ona ia faatalitalia i tatou e  faia se mea faapena e lē mafai ona ausia. (Salamo 103:13, 14) Na i lo lea, ua fetalai mai Ieova ina ia tatou paia auā e paia o ia. I le “faapei o le fanau pele,” tatou te taumafai ai e faata‘ita‘i atu iā te ia i se tele tatou te mafaia, e tusa ai o o tatou tulaga o ni tagata lē lelei atoatoa. (Efeso 5:1) O lea la, o le ausiaina o le paia o se gaoioiga e faifai pea. A o tatou tutupu a‘e faaleagaga, tatou te taumafai ai e ‘faaatoatoaina i le faapaiaina’ i lea aso ma lea aso.—2 Korinito 7:1.

20. (a) Aiseā e tāua ai ona tatou malamalama e mafai ona mamā i tatou i le silafaga a lo tatou Atua? (e) O le ā le lagona na oo iā Isaia ina ua ia iloa ua faamagaloina ana agasala?

²⁰ E finagalo malie Ieova i mea e tonu ma mamā. E ‘ino‘ino o ia i le agasala. (Sapakuka 1:13) Peita‘i e lē ‘ino‘ino o ia iā i tatou. Pe afai e tutusa o tatou manatu ma lana silafaga i le agasala—e ‘ino‘ino i le leaga, ae loto atu i le lelei—ma tatou mulimuli atu i tulagāaao lelei atoatoa o Keriso Iesu, ona faamagaloina lea e Ieova a tatou agasala. (Amosa 5:15; 1 Peteru 2:21) E matuā aogā lo tatou malamalama e mafai ona paia i tatou i le silafaga a le Atua. O le paia o Ieova na mua‘i faamanatu mai ai iā Isaia lona lava tulaga lē paia. Na ia alaga: “Auē a‘u nei!” Peita‘i o le taimi lava na iloa ai e Isaia ua faamagaloina ana agasala, na suia ai loa lona manatu. Ina ua fesili mai Ieova mo sē e tauofo atu e faataunuu se tofiga, na vave ona tali atu Isaia, e ui na te le‘i iloa po o le ā lenā tofiga. Na ia tali atu: “O a‘u lenei, ina auina atu a‘u.”—Isaia 6:5-8.

21. O le ā le faavae mo lo tatou talitonuga mautinoa e faapea, e mafai ona tatou taumafai e ausia le tulaga paia?

²¹ Ua faia i tatou i le faatusa o le Atua paia, faatasi ma amioga lelei, ma le tomai e malamalama ai i mataupu faaleagaga. (Kenese 1:26) Ua tatou maua uma le avanoa e mafai ai ona tatou paia. A o faaauau pea ona tatou taumafai e ausia le tulaga paia, e finagalo malie fo‘i Ieova e fesoasoani mai. I le faagasologa o lenei mea, o le a atili ai ona tatou vavalalata atu i lo tatou Atua paia. A o talanoaina fo‘i uiga o Ieova i mataupu o loo sosoo mai, o le a tatou mātauina le tele o isi māfuaaga tāua, e tatau ai ona tatou faalatalata pea iā te ia!