1, 2. Kumbi mchimi Yesaya wanguwona chiwona wuli, nanga chiwona chenichi chititisambizganji vakukwaskana ndi Yehova?

 YESAYA wanguchita mantha ukongwa ndi vo wanguwona muchiwona chakutuliya kwaku Chiuta. Vawonekanga nge vichitika nadi! Pavuli paki, Yesaya wangulemba kuti, “ndinguwona Yehova” waja pampandu Waki waufumu wapachanya. Chakuvwala chaki chinguzaza munyumba yakusopiyamu ku Yerusalemu.—Yesaya 6:1, 2.

² Yesaya wanguchita so mantha ukongwa ndi vo wanguvwa. Iyu wanguvwa kumba kwakudaniriza, mwakuti nyumba yakusopiyamu kweniso mafawundeshoni ngaki vasukunyikanga. Wo ambanga sumu yo ŵenga aserafi wo ndi vakulengeka vauzimu vo ve ndi udindu ukulu. Yiwu ambanga sumu yipusu kweni yo yenga ndi uthenga wanthazi, ndipu sumu yaki yenga yakuti: “Mtuŵa, mtuŵa, mtuŵa ndi Yehova wa mizinda. Charu chosi chazaza ndi unkhankhu waki.” (Yesaya 6:3, 4) Kuzumbulika katatu kwa mazu ngakuti “mtuŵa” kulongo kuti Yehova ngwapade ukongwa ndipuso ndi mtuŵa kuluska weyosi. (Chivumbuzi 4:8) Mu Bayibolu Yehova wakambika kananandi waka kuti ndi mtuŵa. Ndipu mavesi nganandi ngo nge ndi zina laku Yehova nge ndi so mazu ngakuti “mtuŵa” ndipuso “wakupaturika.”

3. Kumbi maŵanaŵanu ngaheni ngakukwaskana ndi utuŵa waku Yehova, ngatiŵachitiska wuli ŵanthu kuti aleki kuja nayu pa ubwezi?

³ Chinthu chakukhumbika ukongwa cho Yehova wakhumba kuti tiziŵi chakukwaskana ndi iyu, ntchakuti iyu ndi mtuŵa. Kweni mazuŵa nganu, ŵanthu anandi ŵe ndi maŵanaŵanu ngambula kwenere pa nkhani ya utuŵa. Ŵanthu anyaki awona kuti munthu mtuŵa ndi mweniyo watijiwona kuti ndi murunji ukongwa kuluska anyaki, kweniso mweniyo wapusikizgiya waka kuti wateŵete Chiuta. Ŵanthu wo atijiwona kuti mbambula kukhumbika angawona kuti utuŵa waku Chiuta ngwakuchitisa mantha, mumalu mwakuja chinthu chakukondwesa. Yiwu angajiwona kuti mbambula kwenere kundere kufupi ndi Chiuta yo ndi mtuŵa. Mwaviyo,  anandi atondeka kuja pa ubwezi ndi Chiuta chifukwa cha utuŵa waki. Venivi vakupasa chitima ukongwa. Tikamba viyo chifukwa utuŵa waku Chiuta ndiwu utitipasa mwaŵi wakuti tije nayu pa ubwezi. Chifukwa wuli? Techendamuki fumbu ili, tiyeni tikambiskani vo utuŵa chayiwu ung’anamuwa.

4, 5. (a) Kumbi mazu ngakuti “utuŵa” ngang’anamuwanji, nanga ndi vinthu wuli vo ving’anamuwa cha? (b) Kumbi Yehova ‘ngwakupaturika’ munthowa ziŵi nizi zakukhumbika ukongwa?

⁴ Pakuja mtuŵa, ving’anamuwa cha kuti Chiuta ngwakujiŵikamu, ngwakujikuza pamwenga kuti anyaki watiŵatoliyaku kanthu cha. Mumalu mwaki, iyu watinkha ukongwa mijalidu yeniyi. (Nthanthi 16:5; Yakobe 4:6) Sonu, kumbi mazu ngakuti “mtuŵa” ngang’anamuwanji? Muchiheberi cho angugwiriskiya ntchitu pakulemba Bayibolu, mazu yanga ngakutuliya ku mazu ngo ngang’anamuwa “kupatuwa.” Pankhani yakusopa, mazu ngakuti “utuŵa” ngagwiriskikiya ntchitu pakukamba va munthu pamwenga chinthu chinyaki cho chapaturika kuti chigwiri ntchitu yinyaki yapade. Ndipuso asani chinthu ntchituŵa, vingang’anamuwa so kuti chinthu cho ntchakutowa ndipuso chilivi kalema. Kumbi mazu ngenanga ngalongonji vakukwaskana ndi Yehova? Kumbi venivi ving’anamuwa kuti iyu ‘ngwakupaturika’ ukongwa mwakuti wangaja nasi pa ubwezi cha taŵanthu ambula kufikapu?

⁵ Awa. Mwakuyeruzgiyapu, chinanga kuti Yehova wenga “Mtuŵa waku Isirayeli,” ndipu Ayisirayeli ŵenga akubuda, kweni iyu wanguŵasimikiziya kuti wenga pakati pawu. (Yesaya 12:6; Hoseya 11:9) Mwaviyo chinanga kuti iyu ndi mtuŵa, kweni we pafupi ndi ŵanthu wo atimusopa. Sonu nanga ‘ngwakupaturika’ munthowa wuli? Ngwakupaturika munthowa ziŵi zakukhumbika ukongwa. Yakwamba, iyu ngwakupambana ukongwa ndi vinthu vosi vo wakulenga chifukwa iyu yija ndiyu Ngwapachanya Limu. Iyu ndi mtuŵa ndipu utuŵa waki ngwambula kumala. (Salimo 40:5; 83:18) Yachiŵi, Yehova wangachita cha ubudi wewosi ndipu fundu yeniyi njakuchiska ukongwa. Ntchifukwa wuli tikamba viyo?

6. Ntchifukwa wuli vakuchiska kuziŵa kuti Yehova wangachita cha chinthu chechosi chiheni?

⁶ Tija mucharu cho ŵanthu anandi vitiŵasuzga kuja atuŵa. Chinthu chechosi chakukwaskana ndi ŵanthu wo aleka kuziŵa Chiuta  mucharu ichi, ntchakufipiskika munthowa inyaki chifukwa cha ubudi ndipuso kuleka kufikapu. Tosi tikhumbika kulimbana ndi ubudi wo we mwaku isi. Ndipu asani tingaleka kuphwere, tingathereskeka ndi ubudi. (Aroma 7:15-25; 1 Akorinto 10:12) Kweni venivi vingamuchitikiya cha Yehova. Iyu wangachita cha ubudi wewosi kweniso chinthu chechosi chiheni. Venivi vititisimikiziya kuti Yehova Mbawusefwi amampha ukongwa ndipu tikhumbika kuŵathemba ndi mtima wosi. Mwakupambana ndi da weyosi pacharu chapasi, Yehova wangatiguŵisa cha, wangachita cha vinthu mwambula kugomezgeka pamwenga mwankhaza. Ndipu utuŵa waki ndiwu utimuchitisa kuti waleki kuja ndi mijalidu yeniyi. Ndipu nyengu zinyaki wagwiriskiyanga ntchitu utuŵa waki pakulayizga vinthu. (Amosi 4:2) Kumbi venivi vakuchiska cha?

7. Ntchifukwa wuli tingakamba kuti Yehova ndi mtuŵa ukongwa?

⁷ Yehova ndi mtuŵa ukongwa ndipu utuŵa waki ngwambula kumala. Kumbi venivi ving’anamuwanji? Tiyeni tiyeruzgi viyo: Ŵanaŵaniyani mazu ngakuti “munthu” ndi ngakuti “kuleka kufikapu.” Mungakonkhoska cha vakukwaskana ndi munthu kwambula kuŵanaŵaniya kuti munthu yo ngwambula kufikapu. Kuleka kufikapu kukusere mwaku isi ndipu kukwaska vosi vo tichita. Sonu ŵanaŵaniyani mazu ngaŵi yanga, “Yehova” ndipuso “utuŵa.” Yehova ndi mtuŵa pa chechosi. Ndipu chechosi chakukwaskana ndi iyu ntchakutowa, ntchaurunji ndipuso ntchakunyoloka. Mwaviyo tingamuziŵa umampha cha Yehova asani tileka kuvwisa mazu ngakuti “mtuŵa.”

8, 9. Kumbi ndi vinthu wuli vo vilongo kuti Yehova watovya ŵanthu ambula kufikapu kuti aje atuŵa chinanga kuti angayanana ndi iyu cha?

⁸ Chifukwa chakuti Yehova ndi mtuŵa pa chechosi, tingakamba kuti iyu ndiyu mweneku wa utuŵa. Iyu waja nalu yija pe cha jalidu lenili, mumalu mwaki wagaŵiyaku anyaki mwawanangwa. Aŵanaŵaniyani ivi: panyengu yo Chiuta wakambiskananga ndi Mozesi kuziya mwa mungelu pachivwati cho chakoliyanga motu, malu ngosi ngo Mozesi wanguma, ngenga ngakupaturika chifukwa Yehova wenga pamalu ngo!—Ekisodo 3:5.

⁹ Kumbi vingachitika kuti ŵanthu ambula kufikapu aje atuŵa mwakuwovyeka ndi Yehova? Hinya vingachitika, kweni mwakuyanana  ndi Yehova cha. Chiuta wangukambiya ŵanthu ŵaki Ayisirayeli kuti azamuja “mtundu wakupaturika.” (Ekisodo 19:6) Iyu wangutumbika mtundu uwu mwakuŵakambiya nthowa yo angamusope mwambula kufipiskika. Ndichu chifukwa chaki Dangu lo Chiuta wangupasa Mozesi lakambanga mwakuwerezawereza vakukwaskana ndi utuŵa. Ndipu wasembi mura wavwalanga kachisulu kakung’anima kagolidi chayiyu, ko akamangiliyanga panthazi pa mphumphu kuti weyosi wawonengi kung’anima kwakachisulu kenaka. Pakachisulu kenaka pangulembeka mazu ngakuchita kujoba ngakuti: “Utuŵa ngwaku Yehova.” (Ekisodo 28:36) Mwaviyo, iyu wakhumbanga kuti kusopa kwawu kweniso mo achitiyanga vinthu pa umoyu wawu kuje kwakutowa. Yehova wanguŵakambiya kuti: “Mujengi atuŵa, chifukwa ini Yehova Chiuta winu nde mtuŵa.” (Levitiko 19:2) Asani Ayisirayeli achita vinthu mwakukoliyana ndi ulongozgi waku Chiuta, iyu waŵawonanga kuti mbatuŵa chinanga kuti yiwu ŵenga ambula kufikapu.

10. Pankhani yakuja atuŵa, kumbi penga mphambanu wuli pakati pa Ayisirayeli ndi mitundu yo yinguŵazunguliya?

¹⁰ Mo Ayisirayeli achitiyanga vinthu kweniso kusopa kwawu kutuŵa venga vakupambana ndi mo ŵanthu anyaki wo anguŵazunguliya asopiyanga. Mitundu yo yinguŵazunguliya yasopanga achiuta aboza, ndipu achiuta ŵenaŵa akambikanga kuti mbamoyu, penipo ŵenga amoyu cha. Achiuta ŵenaŵa ŵenga akazuzgi ndipuso akufipiskika. Kusopa achiuta ŵenaŵa kwachitiskanga kuti ŵanthu aje akufipiskika. Ndichu chifukwa chaki Yehova wangutcheŵesa ateŵeti ŵaki kuti ajipatuwi kumitundu yeniyi kweniso vakuchitika vawu vaukazuzi.—Levitiko 18:24-28; 1 Mafumu 11:1, 2.

11. Kumbi ntchinthu wuli cho chilongo kuti chigaŵa chakuchanya cha gulu laku Yehova ntchituŵa (a) angelu? (b) aserafi? (c) Yesu?

¹¹ Chinanga kuti Ayisirayeli anguyesesa kuja atuŵa, kweni atingi afiskengi cha kuja atuŵa nge mo chigaŵa chakuchanya cha gulu laku Yehova chiliri. Angelu mamiliyoni nganandi wo ateŵete Yehova mwakugomezgeka adanika kuti “masawuzandi nganandi nga akupaturika.” (Dotoronome 33:2; Yuda 14) Mo angelu achitiya vinthu, alongo utuŵa waku Chiuta. Ndipu kumbukani aserafi wo Yesaya wanguwona muchiwona chaki. Sumu yo aserafi ambanga, yalongonga kuti agwira ntchitu yakukhumbika ukongwa yakuziŵikisa utuŵa waku Yehova muchilengedu chosi. Kweni pe  mungelu yumoza yo waluska angelu wosi ndipu mwenuyu ndi Mwana wapade waku Chiuta. Yesu walongo utuŵa waku Yehova munthowa yapade ukongwa. Ndichu chifukwa chaki Bayibolu litimuzumbuŵa kuti “Mtuŵa waku Chiuta.”—Yohane 6:68, 69.

12, 13. (a) Ntchifukwa wuli zina laku Chiuta likambika kuti ndakupaturika? (b) Ntchifukwa wuli zina laku Chiuta likhumbika kutoweseka?

¹² Wuli pakukamba va zina laku Chiuta? Nge mo tinguwone mu Mutu 1, ili ndi zina laudindu waka cha. Mumalu mwaki, limiya Yehova Chiuta ndipuso lilongo mijalidu yaki yosi. Mphaki kuti Bayibolu lititikambiya kuti “zina laki ndakupaturika.” (Yesaya 57:15) Dangu laku Mozesi lakambanga kuti weyosi yo wanyoza zina laku Chiuta, watenere kubayika. (Levitiko 24:16) Wonani vo Yesu wangukamba kuti tikhumbika kuzumbuwa asani tipemphera, iyu wanguti: “Awusefwi akuchanya, zina linu litoweseki.” (Mateyu 6:9) Kutowesa chinthu chinyaki, kung’anamuwa kuchiŵika kuja chapade pamwenga chambula kufipiskika. Asani zina laku Yehova ndakutowa kali ntchifukwa wuli likhumbika so kutoweseka?

¹³ Zina laku Chiuta laja lichinyozeka kweniso kufipiskika ndi maboza. Mu munda wa Edeni, Satana wangupusikiziya kuti Yehova ngwakulamuliya wamampha cha ndipuso ngwambula urunji. (Genezesi 3:1-5) Kutuliya panyengu yeniyi, Satana yo ngwakulamuliya wacharu chiheni ichi, wawonesesa kuti maboza ngakukwaskana ndi Chiuta ngawanda pacharu chosi. (Yohane 8:44; 12:31; Chivumbuzi 12:9) Visopa visambiza ŵanthu kuti Chiuta ngwambula urunji, watitiphwere cha kweniso ndiyu wachitisa kuti tisuzgikengi. Yiwu akamba kuti Chiuta ndiyu watiŵawovya pankhondu. Mumalu mwakuthamika Chiuta pa vinthu vakutowa vo wakulenga, ŵanthu anandi agomezga kuti vinthu vikuchita kusambuka pamwenga vikujaku waka mwangozi. Kukamba uneneska, zina laku Chiuta laja lichinyozeka ukongwa. Ndichu chifukwa chaki likhumbika kutoweseka ndipuso unkhankhu waki ukhumbika kuwezekiyapu. Tilindiza zuŵa lo Yehova wazamutowese limu zina laki ndipu lazamunyozeka so cha. Iyu wazamuchita venivi mwakugwiriskiya ntchitu Ufumu wo wazamulamulika ndi Mwana waki. Tikondwa kuchita chechosi cho tingafiska pakuwovya kuti chilatu chenichi chifiskiki.

14. Ntchifukwa wuli mzimu waku Chiuta udanika kuti mzimu wakupaturika, ndipu ntchifukwa wuli kunyoza mzimu wenuwu nkhwakofya?

 ¹⁴ Pe so chinthu chinyaki chakukwaskana ndi Yehova cho kanandi chikambika kuti ntchakupaturika, ndipu chenichi ndi mzimu waki pamwenga kuti nthazi yaki yo watiyigwiriskiya ntchitu. (Genezesi 1:2) Yehova wagwiriskiya ntchitu nthazi yeniyi kuti wafiski khumbu laki. Chechosi cho Yehova wachita ntchakupaturika. Ndichu chifukwa chaki nthazi yo wagwiriskiya ntchitu yidanika kuti mzimu wakupaturika pamwenga kuti mzimu utuŵa. (Luka 11:13; Aroma 1:4) Kunyoza mzimu wakupaturika vo visazgiyapu kuchitiya dala vo visuskana ndi khumbu laku Yehova, mbubudi wo ungagowokereka cha.—Mariko 3:29.

15. Ntchifukwa wuli kuwopa Chiuta mwakwenere nkwakukhumbika pakuzomereza utuŵa waku Yehova, nanga kumbi kuwopa kwenuku kusazganjipu?

¹⁵ Tingavwisa chifukwa cho Bayibolu lititikambiya kuti ŵanthu akhumbika kuwopa Chiuta, chifukwa iyu ndi mutuŵa. Mwakuyeruzgiyapu, pa Salimo 99:3 pakamba kuti: “Yiwu athamiki zina linu likulu, pakuti ndakuchitiska mantha kweniso ndakupaturika.” Mantha ngenanga ndi mantha ngo munthu waja nangu chifukwa chakopa chinthu chinyaki chakofya cha, kweni ndi mantha ngo munthu waja nangu chifukwa chakupereka ulemu ku munthu munyaki. Mphakwenere nadi kuja ndi mantha ngaviyo chifukwa utuŵa waku Yehova ngwapachanya ukongwa. Chinanga kuti veviyo, venivi vingatitondekesanga cha kuja pa ubwezi ndi Chiuta. Mumalu mwaki, kuja ndi maŵanaŵanu ngakwenere pankhani yaku Chiuta kungatipangisa kuti tindere kufupi ndi iyu. Chifukwa wuli?

16. (a) Ntchifukwa wuli tingakamba kuti chinthu cho ntchituŵa ntchakutowa? Kambani chakuyeruzgiyapu. (b) Kumbi viwona vo vikonkhoska utuŵa waku Yehova vilongo wuli kuti iyu ngwakutowa ndipuso walivi kalema?

¹⁶ Chifukwa chimoza ntchakuti, Bayibolu lilongo kuti chinthu cho ntchituŵa ntchakutowa. Pa Yesaya 63:15, pakamba kuti kuchanya ndi ‘malu ngaki ngakujaku ngapachanya ngatuŵa kweniso ngaunkhankhu [pamwenga kuti “ngakutowa,” mazu ngamumphata].’ Tosi tikondweseka ndi chinthu cho ntchaunkhankhu ndipuso  chakutowa. Mwakuyeruzgiyapu, wonani chithuzi cho che papeji  33. Kumbi chithuzi chenichi chakukondwesani? Ntchifukwa wuli chakukondwesani? Wonani mo maji ngawoneke ngakutowa. Pawoneka kuti paputa timphepu tamampha ndipu kuchanya naku kuwoneka kuti nkhwakutowa. Kweni tingangayanja cha malu ngenanga asani musinji ungajalika ndi viswaswa ndipuso vimiti, kweniso asani mya yo ye pamalu ngenanga yingaja yakulembekalembeka. Tingajapu so cha pa malu ngenanga asani paputa mphepu yakununkha. Mwakawi, taŵanthu tiwona kuti chinthu ntchamampha asani ntchakutowa kweniso ntchambula kufipiskika. Mazu ngenanga ngangagwiriskikiya ntchitu pakukonkhoska utuŵa waku Yehova. Ndichu chifukwa chaki titanja kuŵerenga vakukwaskana ndi kutowa kwaku Yehova. Mwakuyeruzgiyapu, pakukonkhoska vakukwaskana ndi Chiuta widu mutuŵa yo waja pampandu waki wa Ufumu, Bayibolu likamba kuti iyu ngwakuŵala ukongwa ndipu wenge mya yakung’anima motu kweniso mya yakuzirwa.—Ezekiyeli 1:25-28; Chivumbuzi 4:2, 3.

17, 18. (a) Kumbi pakwamba Yesaya wanguvwa wuli ndi vo wanguwona muchiwona chaki? (b) Kumbi Yehova wangugwiriskiya wuli ntchitu muserafi pakuchipembuzga Yesaya, nanga vo muserafi wanguchita vang’anamuwanganji?

¹⁷ Kumbi utuŵa waku Chiuta utenere kutichitisa kujivwa kuti te akusika kuyeruzgiya ndi iyu? Kwamuka nkhwakuti hinya. Tikamba viyo chifukwa te akusika nadi pakuyeruzgiya ndi Yehova, ndipu tingafikiyapu cha chinanga nkhamanavi. Kumbi venivi ving’anamuwa kuti tingatondeka kundere kufupi ndi iyu? Ŵanaŵaniyani mo Yesaya wanguvwiya wati wavwa mazu ngakudaniriza ngo aserafi angukamba ngakukwaskana ndi utuŵa waku Yehova. Iyu wanguti: “Pavuli paki ndingukamba kuti: ‘Soka ini! Ndifwengi, pakuti nde munthu wa milomu yakufipiskika, ndipuso ndija pakati pa ŵanthu a milomu yakufipiskika, chifukwa masu ngangu ngawona Fumu, Yehova wa mizinda!’” (Yesaya 6:5) Utuŵa waku Yehova ungukumbusa Yesaya kuti iyu ngwakubuda kweniso kuti ngwambula kufikapu. Pakwamba munthu wakugomezgeka mwenuyu wati wavwa venivi nthazi zingumumaliya. Kweni Yehova wanguzomereza cha kuti waje ndi maŵanaŵanu ngenanga.

¹⁸ Nyengu yeniyo Yehova wangutumiza muserafi kuti wakamupembuzgi mchimi mwenuyu. Munthowa wuli? Mungelu wanthazi mwenuyu wanguphululukiya ku guwa la sembi ndikuchito  ga lamotu, ndi kuzikwaskisa mulomu waku Yesaya. Venivi vingawoneka vakupweteka ukongwa, mumalu mwakupembuzga. Kweni kumbukani kuti ichi chenga waka chiwona cho chamiyanga vinthu vinyaki. Yesaya yo wenga Myuda wakugomezgeka, waziŵanga kuti sembi zaperekekanga zuŵa lelosi paguwa la sembi ndi chilatu chakuti maubudi nga ŵanthu ngagowokereki. Mwachanju muserafi wangukumbusa mchimi uyu kuti chinanga kuti wenga wambula kufikapu, “wamilomu yakufipiskika,” watingi wajengi mbwenu wakutowa pamasu paku Chiuta. a Yehova wakhumbisiskanga kuwona Yesaya nge munthu mtuŵa pamwenga wakupaturika, chinanga kuti wangayanana nayu cha.—Yesaya 6:6, 7.

19. Kumbi ndi vinthu wuli vo titenere kuchita kuti tije atuŵa chinanga kuti te ambula kufikapu?

¹⁹ Ndimu so vilili mazuŵa nganu. Sembi zosi zo zaperekekanga ku Yerusalemu zamiyanga waka chinthu chinyaki chakukhumbika ukongwa. Zamiyanga sembi yakufikapu yo Yesu Khristu wangupereka mu 33 C.E. (Aheberi 9:11-14) Asani talapa nadi mwakutuliya pasi pamtima, ndikunozga vo tikunangisa kweniso kulongo chivwanu mu sembi yaku Yesu, tigowokereka. (1 Yohane 2:2) Ndipu  asani tachita venivi tingaja akutowa pamasu paku Chiuta. Ndichu chifukwa chaki wakutumika Peturo watitikumbusa kuti: “Pakuti kukulembeka kuti: ‘Muje atuŵa, chifukwa ini nde mtuŵa.’” (1 Peturo 1:16) Pa lemba ili, Yehova wakukamba kuti tikhumbika kuja atuŵa nge mo iyu waliri cha. Iyu wakhumba cha kuti tichitengi vinthu vo tingatondeka kufiska. (Salimo 103:13, 14) Mumalu mwaki, Yehova watitikambiya kuti tije atuŵa chifukwa iyu ndi mtuŵa. Ndipu “nge ŵana ŵaki akwanjiwa,” titesesa kuchita vosi vo tingafiska kuti timuyezgi chinanga kuti te ambula kufikapu. (Aefeso 5:1) Mwaviyo, tikhumbika kulutirizga kuja atuŵa. Po tikuwa mwauzimu titesesa “kuti tifiki pa kutowa chayiku” zuŵa ndi zuŵa.—2 Akorinto 7:1.

20. (a) Ntchifukwa wuli kuziŵa kuti tingaja atuŵa pamasu paku Chiuta yo ndi mtuŵa nkhwakukhumbika ukongwa? (b) Kumbi Yesaya wanguvwa wuli wati waziŵa kuti maubudi ngaki ngatoweseka?

²⁰ Yehova watanja vinthu vaurunji kweniso vakutowa. Iyu watinkha ubudi. (Habakuku 1:13) Kweni watinkha isi taŵanthu cha. Asani titinkha vinthu viheni nge mo iyu wachitiya, ndi kwanja cho ntchamampha kweniso kwesesa kulondo maphazi ngaku Yesu mwakugomezgeka, Yehova watitigowoke maubudi ngidu. (Amosi 5:15; 1 Peturo 2:21) Asani taziŵa kuti tingaja akutoŵa pamasu paku Chiuta widu mtuŵa, vinthu vingatiyende umampha ukongwa. Kumbukani kuti pakwamba utuŵa waku Yehova ungumukumbusa Yesaya kuti wenga wakufipiskika. Iyu wangudaniriza kuti: “Soka ini!” Kweni wati waziŵa kuti maubudi ngaki ngagowokereka, wanguchiskika ukongwa. Mwakuti Yehova wati wafumba kuti ndiyani yo wangajipereka kuchigwira ntchitu yo watingi wamupasengi, nyengu yeniyo Yesaya wangujipereka, chinanga kuti waziŵanga cha kuti wamugwira ntchitu wuli. Iyu wangudaniriza kuti: “Ndini panu! Nditumeni!”—Yesaya 6:5-8.

21. Kumbi ntchinthu wuli cho chititisimikiziya kuti nasi tingaja atuŵa?

²¹ Tikulengeka muchikozgu chaku Chiuta yo ndi mtuŵa, mwakuti tingatoliyaku mijalidu yaki ndipuso tingaja nayu pa ubwezi. (Genezesi 1:26) Munthu weyosi wangafiska kuja mtuŵa. Asani tilutiriza kuja atuŵa, Yehova ngwakunozgeka kutiwovya. Po tichita venivi tinderengi kufupi ukongwa ndi Chiuta widu mtuŵa. Kweniso, po tilutirizengi kusambira mijalidu yaku Yehova mumitu yakunthazi, tiwonengi kuti pe vifukwa vakuvwika vakujaliya nayu pa ubwezi!