1, 2. Kasi ntchimi Yesaya yikawona mboniwoni wuli, ndipo yikutisambizga vichi za Yehova?

 YESAYA wakachita wofi na ivyo wakawona mu mboniwoni yakufuma kwa Chiuta. Vikawonekanga nga ni vinthu vyanadi! Pamanyuma Yesaya wakalemba kuti “nkhawona Yehova” wakhala pa chitengo chake chapachanya. Chakuvwara cha Yehova chikazura tempile likuru ku Yerusalemu.—Yesaya 6:1, 2.

² Yesaya wakachitaso wofi na ivyo wakapulika. Wakapulika kwimba kwa nkhongono uko kukasunkhunya tempile na malufura ghake. Sumu iyi ŵakimbanga mbaserafi, vilengiŵa vyauzimu ivyo vili na udindo ukuru. Ŵakimbanga sumu iyi mwakukolerana, mwankhongono kweniso mwakukondweska ndipo ŵakazunuranga mazgu gha ntchindi ghakuti: “Mutuŵa, mutuŵa, mutuŵa ni Yehova wa mawumba. Charu chose chapasi chazura na uchindami wake.” (Yesaya 6:3, 4) Ŵakadidimizga na kuzunura mazgu ghakuti “mutuŵa” katatu, chikaŵa chakwenelera kuchita nthena chifukwa Yehova ni mutuŵa kuluska waliyose. (Chivumbuzi 4:8) Mu Baibolo, mazgu gha utuŵa wa Yehova ghakuyowoyeka mwakuwerezgawerezga. Mavesi ghanandi ghakuyowoya kuti zina la Yehova ‘ndituŵa.’

3. Kasi maghanoghano ghaheni ghakukhwaskana na utuŵa wa Yehova ghapangiska wuli ŵanthu ŵanandi kuŵa kutali na Chiuta m’malo mwa kusendelera kwa iyo?

³ Ntchakuwonekerathu kuti, chinthu chimoza chakuzirwa icho Yehova wakukhumba kuti timanye chakukhwaskana na iyo, ntchakuti ni mutuŵa. Kweni ŵanthu ŵanandi mazuŵa ghano, ŵakukolerana nayo yayi fundo iyi. Ŵanthu ŵanyake ŵakughanaghana mwakubudika para ŵapulika mazgu ghakuti utuŵa. Chifukwa iwo ŵakughanaghana kuti para munthu ni mutuŵa ndikuti wakujiwona kuti ni murunji. Ntheura ŵakuti munthu uyo wakujiwona nthena ni musopi mutesi. Ŵanthu awo ŵakujiwona  kuti mbambura kuzirwa ŵangawona utuŵa wa Yehova kuŵa wakuchitiska wofi m’malo mwakuŵa wakukondweska. Iwo ŵangajiwona kuti mbambura kwenelera kusendelera kwa Chiuta uyo ni mutuŵa. Nakuti ŵanthu ŵanandi vikuŵasuzga kusendelera kwa Chiuta chifukwa chakuti ni mutuŵa. Ichi ntchachitima chomene, chifukwa chikuru icho tikusendelera kwa Chiuta ntchakuti iyo ni mutuŵa. Chifukwa wuli? Pambere tindazgore fumbo ili, tiyeni tiwone dankha kuti utuŵa wanadi ni vichi.

4, 5. (a) Kasi mazgu ghakuti “utuŵa” ghakung’anamurachi, ndipo ntchivichi icho ghakuleka kung’anamura? (b) Kasi Yehova “ngwakupatulika” munthowa ziŵiri zini zakuzirwa?

⁴ Pakuti Chiuta ni mutuŵa, chikung’anamura kuti ngwakujikuzga panji kujitemwa yayi. Iyo wakuyitinkha chomene mikhaliro iyi. (Zintharika 16:5; Yakobe 4:6) Kasi lizgu lakuti “utuŵa” likung’anamura vichi chomene? Mu Chihebere, lizgu ili lili kufuma ku lizgu ilo likung’anamura “patura.” Pa kusopa, “utuŵa” ntchinthu icho chapatulika kuti chileke kugwira ntchito zawakawaka. Mazgu ghakuti utuŵa na utozi ghali na ng’anamuro lakuyana waka. Kasi mazgu agha ghakugwira wuli ntchito kwa Yehova? Kasi chikung’anamura kuti “wajipatura” ku ŵanthu ŵakwananga, kweniso kuti wali kutali chomene na iwo?

⁵ Yayi nthe! Pakuŵa “Mutuŵa wa Israyeli,” Yehova wakasimikizgira ŵanthu ŵake kuti nangauli mbakwananga kweni iyo wakukhala “pakati” pawo. (Yesaya 12:6; Hoseya 11:9) Nakuti utuŵa wake ukumupangiska kuti waŵe kutali na ŵanthu yayi. Kasi iyo “ngwakupatulika” munthowa wuli? Iyo ngwakupatulika mu nthowa ziŵiri zakuzirwa. Yakwamba, ngwakupatulika ku chilengiwa chose chifukwa iyo yekha ndiyo Wapachanya Nkhanira. Iyo ni mutuŵa chomene ndipo utozi wake ngwambura kumara. (Salimo 40:5; 83:18) Yachiŵiri, Yehova ngwakupatulika chomene ku kwananga kulikose, ndipo ichi ntchakukhozga nadi. Chifukwa wuli?

6. Chifukwa wuli tikukhozgeka chomene na fundo yakuti Yehova wali kutali chomene na kwananga?

⁶ Tikukhala mu charu icho mulije utuŵa. Chinthu chilichose chakukhwaskana na ŵanthu awo ŵakukana kuŵa paubwezi na  Chiuta ntchakufipirwa na kwananga kweniso chifukwa cha kuŵavya urunji. Waliyose wakwenera kulimbana na kwananga uko wali nako. Ndipo usange tingapusa, tingathera ku kwananga. (Ŵaroma 7:15-25; 1 Ŵakorinte 10:12) Kweni Yehova ndimo waliri yayi. Chifukwa kwananga kuli kutali chomene na iyo, ndipo vingachitika yayi kuti waŵe wakufipirwa chifukwa cha kwananga. Ivi vikutovwira kugomezga kuti Yehova ndiyo ni Dada muwemi chomene, kweniso ngwakugomezgeka nyengo zose. Mwakupambana na ŵadada ŵanandi awo mbakwananga, Yehova wazamuchitapo yayi vinthu mwaupusikizgi, kwambura kujikora, panji mwankhaza. Utuŵa wake ukukanizgirathu nkharo yiliyose yiheni. Nyengo zinyake Yehova wakulapizga na utuŵa wake, ndipo ivyo walapa vikuŵa vyakugomezgeka. (Amosi 4:2) Kasi ichi ntchakukondweska yayi?

7. Chifukwa wuli tingayowoya kuti utuŵa ni mukhaliro wenecho wa Yehova?

⁷ Utuŵa wa Yehova ni ukhaliro wake wenecho. Kasi ichi chikung’anamurachi? Tiyelezgere nthena: Ghanaghanirani mazgu ghakuti “munthu” kweniso “kwambura kufikapo.” Mungalongosora yayi munthu kwambura kuyowoya mazgu ghakuti ngwambura kufikapo. Kuŵa ŵanthu ŵambura kufikapo kukukhwaska chilichose icho tikuchita. Sono ghanaghanirani za mazgu ghaŵiri agho ghakupambana chomene, “Yehova” na “utuŵa.” Yehova ni mutuŵa chomene. Chinthu chilichose chakukhwaskana na iyo ntchituŵa kweniso ntchaurunji. Tingamumanya makora yayi Yehova para tindapulikiske mazgu ghakuzirwa ghakuti, “utuŵa.”

8, 9. Kasi ntchivichi icho chikulongora kuti Yehova wakovwira ŵanthu ŵambura urunji kuti ŵaŵe ŵatuŵa pachoko waka?

⁸ Chifukwa chakuti Yehova ni mutuŵa, tingayowoya na mtima wose kuti ndiyo ntchinyina cha utuŵa uliwose. Iyo wakukanilira yayi mukhaliro uwemi uwu; wakuwupeleka ku ŵanji, ndipo wakuwupeleka mwawanangwa. Mwachiyelezgero, apo Chiuta wakayowoyanga na Mozesi kwizira mwa mungelo mu chivwati icho chikagoleranga moto, malo agho ghakazingilira chivwati chira ghakazgoka ghatuŵa chifukwa chakuti Yehova wakayowoyanga pa malo agha!—Ekisodo 3:5.

 ⁹ Kasi vingachitika kuti ŵanthu ŵambura kufikapo ŵaŵe ŵatuŵa? Enya, kweni pachoko waka. Chiuta wakaphalira ŵanthu ŵake, Ŵaisrayeli, kuti ŵazamuŵa “mtundu utuŵa.” (Ekisodo 19:6) Wakatumbika mtundu uwu na kasopero ako kakaŵa katuŵa, kweniso kaurunji. Nakuti Dango la Mozesi likadidimizganga chomene nkhani ya utuŵa. Nanga ni musofi mukuru wakavwaranga chisoti icho chikaŵa na kachisulo kakupangika na golide kunthazi kwake, kuti waliyose wawonenge kuŵala na kugadima kwake. Pa kachisulo aka pakalembeka mazgu ghakuti: “Utuŵa ngwa Yehova.” (Ekisodo 28:36) Ntheura mukhaliro wapachanya wa utuŵa kweniso kutowa vikapangiskanga kuti kasopero ka Ŵaisrayeli kweniso umoyo wawo, vipambane na umo mitundu yinyake yikachitiranga vinthu. Yehova wakaŵaphalira kuti: “Muŵenge ŵatuŵa, chifukwa ine Yehova Chiuta winu nili mutuŵa.” (Levitiko 19:2) Ntheura para Ŵaisrayeli ŵachita vinthu mwakukolerana na ulongozgi wa Chiuta, ŵakaŵanga ŵatuŵa pachoko waka.

10. Kasi Ŵaisrayeli ŵakapambananga wuli na mitundu yakuŵazingilira pa nkhani ya utuŵa?

¹⁰ Ŵaisrayeli ŵakapambananga chomene na mitundu yinyake chifukwa iwo ŵakayezgeskanga kuŵa ŵatuŵa. Mitundu iyo yikagomezganga Yehova yayi yikasopanga ŵachiuta ŵatesi. Ŵachiuta aŵa ŵakaŵa ŵankhondo, ŵazukusi, kweniso ŵakazuzi. Ŵakaŵa ŵakufipirwa. Kusopa ŵachiuta ŵanthena aŵa kukapangiskanga munthu kuŵa wakufipirwa. Lekani Yehova wakachenjezga ŵateŵeti ŵake kuti ŵapatukeko ku ŵanthu awo ŵakasopanga ŵachiuta ŵatesi pamoza na vyakuchita vyawo vya chisopa.—Levitiko 18:24-28; 1 Mathemba 11:1, 2.

11. Kasi utuŵa wa gulu la Yehova la kuchanya ukulongoleka wuli mu (a) ŵangelo? (b) ŵaserafi? (c) Yesu?

¹¹ Nanga ŵangayezgayezga wuli, mtundu wakusankhika na Yehova uwu ukalongoranga pachoko waka utuŵa wa gulu la Chiuta la kuchanya. Vilengiwa mamiliyoni ghanandi ivyo vikuteŵetera Chiuta mwakugomezgeka vikuchemeka kuti “ŵatuŵa ŵake ŵanandi.” (Dotoronome 33:2; Yuda 14) Vikulongora ungweru, kutowa kwenecho kwa utuŵa wa Chiuta. Kumbukirani ŵaserafi awo Yesaya wakawona mu mboniwoni yake. Mazgu gha mu sumu iyo ŵakimbanga ghakulongora kuti vilengiwa  vyauzimu vyankhongono ivi vikuchita chigaŵa chakuzirwa pa kumanyiska chilengiwa chose za utuŵa wa Yehova. Kweni pali chilengiwa chimoza chauzimu icho chikuluska vinyake vyose. Chilengiwa ichi ni Yesu, Mwana yumoza pera wa Chiuta. Yesu ndiyo wakulongora utuŵa wa Yehova kujumpha waliyose. Iyo wakumanyikwa kuti ni “Mutuŵa wa Chiuta.”—Yohane 6:68, 69.

12, 13. (a) Chifukwa wuli tingati zina la Chiuta ndituŵa nadi? (b) Chifukwa wuli zina la Chiuta likwenera kutuŵiskika?

¹² Wuli pakuyowoya za zina la Chiuta? Nga umo tikasambilira mu Mutu 1, zina ili, ni zina waka yayi. Likwimira Yehova Chiuta, pamoza na mikhaliro yake yose. Baibolo likutiphalira kuti “zina lake ni mutuŵa.” (Yesaya 57:15) Dango la Mozesi likayowoyanga kuti waliyose uyo wakuyuyura zina la Chiuta wakwenera kukomeka. (Levitiko 24:16) Wonani chinthu icho Yesu wakati chikwenera kuŵa chakwamba para tikulomba: “Adada ŵithu imwe muli kuchanya, zina linu lituŵiskike.” (Mateyu 6:9) Kutuŵiska chinthu chinyake kukung’anamura kuchipanga chinthu icho kuti chiŵe chambura kufipiskika ndiposo chakuchindikika. Kweni chifukwa wuli chinthu icho ntchakutowa kale nga ni zina la Chiuta chikukhumbikwira kutuŵiskika?

¹³ Ŵanthu ŵaliyuyura chomene zina la Yehova, ŵalifipiska ndipo ŵakuliyowoyera mautesi ghanandi chomene. Mu Edeni, Satana wakapusikizgira Yehova kuti ni Muwusi wambura urunji. (Genizesi 3:1-5) Kwambira pa nyengo iyo, Satana, wakuwusa charu chakufipirwa ichi, wakukhuŵirizga ŵanthu ŵanandi kuti ŵamuyowoyerenge mauheni Chiuta. (Yohane 8:44; 12:31; Chivumbuzi 12:9) Ivyo visopa vikuchita vikupangiska ŵanthu kughanaghana kuti Chiuta wakuŵaghanaghanira yayi, wakuŵatemwa yayi kweniso kuti ngwankhaza chomene. Mwachiyelezgero, vikusambizga kuti Chiuta ndiyo wakovwira ŵanthu kuti ŵaluskenge nkhondo. M’malo mwakusambizga ŵanthu kuti Chiuta ndiyo wakalenga vinthu vyose, iwo ŵakuti vinthu vikaŵako vyekha. Kuyowoya unenesko, ŵanthu ŵafipiska chomene zina la Chiuta. Likwenera kutuŵiskika; likwenera kupika uchindami wakwenelera uwo likaŵa nalo pakwamba. Tikulindilira waka zuŵa ilo Chiuta wazamutuŵiskira zina lake kwamuyirayira ndipo  wazamugwiliskira ntchito Ufumu uwo Themba lake ni Mwana wake Yesu Khristu. Ndipo tikukondwa kuchita chilichose icho tingakwaniska kuti tifiske khumbo likuru ili.

14. Chifukwa wuli mzimu wa Chiuta ukuchemeka utuŵa, ndipo chifukwa wuli kutuka mzimu utuŵa nkhwananga kwambura kugowokereka?

¹⁴ Paliso chinthu chinyake chakukhwaskana na Yehova icho nyengo zose chikusintha chara ndipo chikuchemeka chituŵa. Chinthu ichi ni mzimu wake, panji kuti nkhongono iyo wakugwiliskira ntchito. (Genizesi 1:2) Yehova wakugwiliskira ntchito nkhongono iyo njakuluska chinthu chilichose kuti wafiske khumbo lake. Chilichose icho Chiuta wakuchita, wakuchita mu nthowa iyo njituŵa ndiposo yautozi. Ntheura nkhongono iyo wakugwiliskira ntchito njakwenelera nadi kuchemeka kuti mzimu utuŵa. (Luka 11:13; Ŵaroma 1:4) Kutuka mzimu utuŵa, uko kukusazgapo kuchitira dala vinthu ivyo vikukolerana yayi na khumbo la Yehova, nkhwananga kwambura kugowokeleka.—Mariko 3:29.

15. Chifukwa wuli Yehova ngwakwenelera nadi kumopa mwakwenelera na kumupa ntchindi, ndipo vikusazgapo vichi?

¹⁵ Baibolo likuyaniska utuŵa na kopa Chiuta. Mwachiyelezgero, pa lemba la Salimo 99:3 pakuti: “Ŵanthu ŵalumbe zina linu likuru, pakuti ndituŵa na lakofya.” Wofi uwo ukuzunulika pa lemba ili, ngwakuti tikwenera kupeleka ntchindi kwa Chiuta. Ntchakwenelera kuchita wofi, chifukwa utuŵa wa Chiuta ngwapachanya chomene. Ngwakutowa kweniso ngwauchindami. Kweni fundo iyi, yikung’anamura kuti tileke kusendelera kwa iyo yayi. Para tikuwuwona mwakwenelera utuŵa wa Chiuta vitovwirenge kuti tisendelere kwa Iyo. Chifukwa wuli?

16. (a) Kasi utuŵa ukukolerana wuli na uchindami panji kutowa? Pelekani chiyelezgero. (b) Kasi mboniwoni yakulongosora za Yehova yikudidimizga wuli utuŵa, na ungweru?

¹⁶ Chifukwa chimoza ntchakuti, Baibolo likuyaniska utuŵa na kutowa. Pa lemba la Yesaya 63:15, machanya ghakulongosoleka kuti ni malo “ghatuŵa na ghauchindami” gha Chiuta. Tose  tikutoleka mtima na kutowa. Mwachiyelezgero, wonani pa chithuzi icho chili pa peji 33. Kasi imwe mukutoleka mtima yayi na malo agha? Ntchivichi icho chikupangiska kuti ghaŵe ghakutowa? Wonani umo maji ghaliri ghakutowa. Mphepo nayo njiwemi, chifukwa kulije mtambo ndipo nkhwa kuŵala makora. Kweni wuli usange malo agha ghanganangika, mlonga wazura na viswaswa, makuni na malibwe ghalembeka vinthu vyawakawaka, mphepo yanangika na josi? Tingatorekaso nagho mtima chara; ghangatiseluska. Mwakawiro tikuyaniska kutowa panji uchindami na chinthu chambura kufipirwa na ungweru. Umu ndimo tingalongosoleraso utuŵa wa Yehova. Lekani tikukondwa chomene na umo Ezekiyeli na Yohane ŵakamulongosolera Yehova mu mboniwoni! Wakugadima na ungweru, kuŵala nga ni malibwe ghapachanya, nga ni dimi la moto panji malibwe agho ghakunyezimira chomene, ndimo kuliri kutowa panji uchindani wa Chiuta withu mutuŵa.—Ezekiyeli 1:25-28; Chivumbuzi 4:2, 3.

17, 18. (a) Kasi Yesaya wakakhwaskika wuli wakati wawona waka mboniwoni? (b) Kasi Yehova wakagwiliskira wuli ntchito muserafi kuti wapembuzge Yesaya, ndipo ivyo muserafi wakachita vikang’anamuranga vichi?

¹⁷ Kasi tikwenera kujiwona kuti tili ŵapasi chomene para tikujiyelezgera na utuŵa wa Chiuta? Zgoro ndakuti enya. Fundo iyi njambura kususkika, ndise ŵanthu ŵapasi chomene kuyaniska na Yehova; nakuti uku nkhuyaniska kwa vinthu ivyo vikuyana yayi. Kasi fundo iyi yikung’anamura kuti tileke kusendelera kwa iyo? Ghanaghanirani ivyo Yesaya wakayowoya apo wakapulika ŵaserafi ŵakupharazga za utuŵa wa Yehova. Yesaya wakati: “Mbaya ine! Nafwa kale, chifukwa nili munthu wa milomo yakufipirwa, nkhukhala pakati pa ŵanthu ŵa milomo yakufipirwa. Pakuti maso ghane ghawona Themba, Yehova wa mawumba!” (Yesaya 6:5) Utuŵa wa Yehova wambura mphaka ukamukumbuska Yesaya kuti iyo wakaŵa wakwananga ndiposo wambura urunji. Pakwamba mwanalume wakugomezgeka uyu wakagongowa chomene. Kweni Yehova wakamuleka waka yayi.

¹⁸ Nyengo yeneiyo muserafi wakayipembuzga ntchimi iyi. Kasi wakayipembuzga wuli? Chilengiwa chauzimu cha nkhongono ichi chikawulukira uko kukaŵa jotchero, ndipo chikatora khala la moto, na kumukhwaska nalo Yesaya pa mulomo. Ichi  chingawoneka kuti chikaŵa chakuŵinya chomene m’malo mwakumukhozga. Kweni kuluwa yayi kuti iyi yikaŵa mboniwoni, iyo yikaŵa na mang’anamuro ghanandi ghakuyelezgera waka. Yesaya, Muyuda wakugomezgeka, wakamanyanga makora kuti sembe zikapelekekanga zuŵa lililose pa jotchero la pa tempile na chilato chakuti zakwananga zigowokereke. Ndipo muserafi wakayikumbuska ntchimi iyi mwachitemwa nangauli yikaŵa yambura urunji, ya “milomo yakufipirwa,” kuti chikaŵa chamachitiko kuti yiŵe paubwezi uwemi na Chiuta. a Yehova wakakhumbisiska kuwona munthu wambura urunji ndiposo wakwananga uyu kuŵa mutuŵa pachoko waka.—Yesaya 6:6, 7.

19. Nangauli ndise ŵanthu ŵakwananga, kweni kasi tingachita wuli kuti tiŵe ŵatuŵa pachoko waka?

¹⁹ Ndimo viliriso mazuŵa ghano. Sembe zose izo zikapelekekanga ku Yerusalemu zikimiranga chinthu chinyake chakuzirwa, sembe yaurunji, iyo Yesu Khristu wakapeleka mu 33 C.E. (Ŵahebere 9:11-14) Usange talapa nadi zakwananga zithu, na kulekerathu kuchita vinthu viheni, tizamugowokereka. (1 Yohane 2:2)  Nase tingasangwa na ubwezi uwemi na Chiuta. Lekani mpositole Petrosi wakuti: “Pakuti kuli kulembeka kuti: ‘Muŵenge ŵatuŵa, chifukwa ine nili mutuŵa.’” (1 Petrosi 1:16) Yehova wakayowoyapo yayi kuti tikwenera kuŵa ŵatuŵa nga ndiyo. Wakukhumba yayi kuti tichite vinthu ivyo tingatondeka kukwaniska. (Salimo 103:13, 14) M’malo mwake, Yehova wakukhumba kuti tiŵe ŵatuŵa chifukwa iyo ni mutuŵa. Nga “mbana ŵakutemweka,” tikuyezgayezga kumuyezga iyo umo tingakwaniskira nga ŵanthu ŵakwananga. (Ŵaefeso 5:1) Ntheura, nyengo zose tikwenera kuyezgayezga kuti tiŵe ŵatuŵa. Apo tikukura mwauzimu, tikuyezgayezga kuti “tilutilire kuŵa ŵatuŵa” zuŵa na zuŵa.—2 Ŵakorinte 7:1.

20. (a) Chifukwa wuli ntchakuzirwa kumanya kuti tingaŵa ŵatuŵa pamaso pa Chiuta withu mutuŵa? (b) Kasi Yesaya wakajipulika wuli wati wamanya kuti zakwananga zake zagowokereka?

²⁰ Yehova wakutemwa chomene urunji na kutowa. Wakutinkha kwananga. (Habakuku 1:13) Kweni iyo wakutinkha ise yayi. Para ise tikutinkha kwananga nga ndiyo, kutinkha icho ntchiheni, kutemwa icho ntchiwemi, na kuyezgayezga kuchita vinthu nga umo Yesu Khristu wakachitiranga, Yehova wazamutigowokera zakwananga zithu. (Amosi 5:15; 1 Petrosi 2:21) Tikuŵa ŵakukondwa chomene para tamanya kuti tingaŵa ŵakutowa pa maso pa Chiuta withu mutuŵa. Manyani kuti pakwamba, utuŵa wa Yehova ukamukumbuska Yesaya zakwananga zake. Wakalira chomene kuti: “Mbaya ine!” Kweni wakati wamanya kuti zakwananga zake zagowokereka, wakasintha. Apo Yehova wakapenjanga munthu wakuti wamutume, Yesaya wakazomera mwaluŵiro, nangauli wakamanya yayi ivyo wamuchita. Iyo wakachemerezga kuti: “Ndine pano! Nitumani!”—Yesaya 6:5-8.

21. Kasi ntchivichi icho chikutikhozga kuti nase tingaŵa ŵatuŵa?

²¹ Tili kulengeka mu chikozgo cha Chiuta mutuŵa, ndipo wali kutipa mikhaliro yiwemi na luso lwa kupulikiska makora vinthu vyauzimu. (Genizesi 1:26) Waliyose wa ise wangaŵa mutuŵa. Apo tikulutilira kuyezgayezga kuti tiŵe ŵatuŵa, Yehova ngwakunweka kutovwira. Para tikuchita nthena, tizamusendelera kwa Chiuta withu mutuŵa. Kweniso, apo tikusambira mikhaliro ya Yehova mu mitu yakulondezgapo, tizamuwona kuti pali vifukwa viwemi chomene vyakusendelera kwa iyo!