1, 2. Hananabaa yootiya Isiyaasi beˈido ajjuutay aybee, qassi hegee Yihoowabaa nuna ay tamaarissii?

ISIYAASI Xoossaappe yiida ajjuutaa beˈido wode keehi maalaalettidi Xoossaa bonchchiis. Hegee ayyo beettiyaagaa keena qoncce! Isiyaasi ‘xoqqa araatan uttida Yihoowa beˈidoogaa’ guyyeppe xaafiis. Yihoowa maayoy Yerusalaamen deˈiya gita beeta maqidasiyaa kumiis.—Isiyaasa 6:1, 2.

² Beeta maqidasiyaa baasuwaa qaattiya wolqqaamaa cenggurssan yexxiyoogaa siyidoogan Isiyaasi keehi maalaalettidi Xoossaa bonchchiis. He mazamuriyaa yexxiyaageeti Suraafeelata giyo keehi gita maatay deˈiyo ayyaana meretata. Ha Suraafeelati Yihoowa gita bonchchuwawu maalaalissiya ogiyan issippe hagaadan yexxidosona: “Geshshai, geshshai, geshshai, Ubbaappe Wolqqaama GODAATTENNEE! Sa7a ubbay a bonchchuwan kumiis.” (Isiyaasa 6:3, 4) “Geeshshau” giidi heezzutoo yexxiyoogee he qofaa minttanaassa; qassi ubbaappe aadhdhiya geeshshay Yihoowa gidiyo gishshawu hegee ayyo bessiyaaba. (Ajjuutaa 4:8) Kumetta Geeshsha Maxaafay Yihoowa geeshshatettaa mintti yootees. Xeetan qoodettiya xiqiseti A sunttaa “geeshshaa” giyaanne “geeshshatettaa” giya qaalatuura gattidi qonccissoosona.

3. Daroti Yihoowa geeshshatettaa xeelliyaagan balabaa qoppiyoogee eti Xoossaakko shiiqiyoogaa aggidi haakkanaadan waati oottidee?

³ Hegaa gishshawu, Yihooway abaa nuuni eranaadan koyiyo waannabatuppe issoy I geeshsha gidiyoogaa. SHin, ha wodiyan he qofaa daroti dosokkona. Amarida asay geeshshatettaa bana keehi daro xillo oottiyoogaara gatti xeellees. Banttana pattennabadan xeelliya asati Xoossaa geeshshatettaa ufayssiyaabadan gidennan, yashshiyaabadan xeellana danddayoosona. Geeshsha Xoossaakko shiiqiyoogee banttawu mule bessiyaaba gidenna  giidi eti yayyana danddayoosona. Yaatiyo gishshawu, Xoossay geeshsha gidiyo gishshawu daroti appe haakkoosona. SHin Xoossaa geeshshatettay asay akko shiiqanaadan oottiyaagaa gidishin, asay appe haakkiyoogee azanttiyaaba. Aybissi? He oyshaa zaaranaappe kase, tumu geeshshatettay aybakko ane beˈoos.

4, 5. (a) Geeshshatettaa giyoogee woygiyoogee, qassi woygiyoogaa gidennee? (b) Yihooway ‘dummatiyo’ keehi koshshiya naaˈˈu ogeti aybee?

⁴ Xoossay geeshsha giyoogee I bana xoqqu xoqqu oottees, otorettees woy harata qilliiccees giyoogaa gidenna. I he eeshshata ixxees. (Leemiso 16:5; Yaaqooba 4:6) Yaatin, “geeshsha” giyo qaalaa birshshettay woygiyoogee? Geeshsha Maxaafay xaafettido Ibraawetto doonan, he qaalay “dummayiyoogaa” giyo birshshettay deˈiyo qaalaappe yiis. Goynuwaara gayttidaagan, “geeshsha” giyo qaalay coo goˈettiyoobaappe dummayidobaa qonccissiyaaba. Yihoowaara gayttidaagan ha qaalay oosuwan waani peˈii? Hegee I nagaranchcha asaappe bana “dummayees” woy nuukko shiiqenna giyoogee?

⁵ Mulekka hegaadan gidenna. Eti nagaranchcha gidikkokka, “Israa7eela geeshshai” Yihooway I ba asaa “giddon” deˈiyoogaa yootiis. (Isiyaasa 12:6; Hoose7a 11:9) Hegaa gishshawu, A geeshshatettay I asaakko shiiqennaadan oottenna. Yaatin, I bana “dummayiyoy” ayba ogiyaanee? Keehi koshshiya naaˈˈu ogetuuna. Koyruwan, A xalaalay Ubbaappe Xoqqa gidiyo gishshawu, I mereta ubbaappe dummatees. A geeshshatettawu zawi baawa. (Mazamure 40:5; 83:18) Naaˈˈanttuwan, Yihooway nagara ubbaappe muleera dummatees; hegee qassi minttettiyaaba. Aybissi?

6. Yihooway nagaraappe muleera haakkidoogee nuna minttettana danddayiyoy aybissee?

⁶ Nuuni tumu geeshshatettay baynna alamiyan deˈoos. Xoossaappe haakkida asay nagaraa gaasuwan moorettiis. Nuuni ubbay nu giddon deˈiya nagaraara baaxetana bessees. Nuuni  naagettana xayikko, nagaraa oottana danddayoos. (Roome 7:15-25; 1 Qoronttoosa 10:12) Yihoowa hegaa malabay mule gakkenna. I nagaraappe muleera haakkidaagaa gidiyo gishshawu, nagari A mule shaallenna. Hegee nuuni Yihooway ooppenne aadhdhiya ammanttiya Aawaa giidi ammananaadan oottees. Yihooway nagaranchcha gidida daro aawatudan ammanettennaagaa, kandduwan moorettidaagaa woy qohiyaagaa mule gidenna. A geeshshatettay I hegaa malabaa mule hanennaadan oottees. Yihooway issi issitoo ba geeshshatettan caaqqees; hegee I maacettiyo maachchaa keehi ammanttiyaaba oottees. (Amoxa 4:2) Hegee keehi minttettiyaaba gidennee?

7. Geeshshatettay Yihoowa waanna eeshsha geetettana danddayiyoy aybissee?

⁷ Geeshshatettay Yihoowa waanna eeshsha. Hegee woygiyoogee? Leemisuwawu, “Asaa” giyoonne “nagaranchcha” giyo qaalata qoppa. Nagaraappe dummayidi asaabaa qoppana danddayokko. Nagaray nu oottiyo ubbaban qonccees. “Yihoowa” giyaanne “geeshshatettaa” giya keehi dummatiya naaˈˈu qaalata ane qoppa. Yihooway geeshshatettan kumi uttiis. Abay ubbabay geeshshanne suure. “Geeshsha” giyo qaalaa nuuni loytti akeekennan Yihoowa erana danddayokko.

8, 9. Nagaranchcha asay amarida hanotan geeshsha gidanaadan Yihooway maaddiyoogaa bessiyaabi aybee?

⁸ Yihooway geeshshatettaa eeshshawu leemiso gidiyo gishshawu, geeshshatetta ubbawu I pultto geetettidi xeesettiyoogee bessiyaaba. I ba xallaa siiqiyoogan ha alˈˈo eeshshaa bawu wottibeenna; I kehatettan hegaa haratussi immees. Taman xuugettiya buuraa matan Xoossay ba kiittanchchaa baggaara Muusa haasayissido wode, Muusee eqqido biittay Yihoowaara gayttidaagan geeshsha gidiis!—Kessaabaa 3:5.

⁹ Nagaranchcha asay Yihooway maaddin geeshsha gidana danddayii? Ee, amarida hanotan gidana danddayees. “Geeshsha kawotetta” gidiyo hidootaa Xoossay ba asaa Israaˈeelatuyyo immiis. (Kessaabaa 19:6) I he deriyawu geeshsha goynuwaa  maaraa immiyoogan eta anjjiis. Geeshshatettay Muuse Higgiyan darotoo odettiya waannaba. Qeese ubbatu halaqay, ubba asawu beettanaadan, huuphiyan xaaxido shaashiyawu sintta baggaara worqqaappe medhdhido phooliyaa alleequwaa wottees. Hegaa bollan woocetti xaafettidaagee hagaadan gees: ‘Geeshshatettay Yihoowaba.’ (Kessaabaa 28:36, NW) Hegaa gishshawu, eti bantta goynuwaaninne bantta deˈuwan geeshshatettaara gayttidaagan Yihooway kessido xoqqa maarata naagidi deˈana bessees. Yihooway etayyo, “Taani GODAI, intte Xoossai geeshsha gidiyo gishshau, inttekka geeshsha gidite” yaagiis. (Wogaabaa 19:2) Israaˈeelati nagaranchchatussi danddayettiyaagaa keenan Yihoowa zoriyaadan deˈiyoogan, amarida hanotan eti geeshsha.

10. Geeshshatettaara gayttidaagan, Israaˈeelatu giddooninne eta yuushuwan deˈiya deretu giddon ayba dummatettay deˈii?

¹⁰ Geeshshatettaabaa yootiya ha mino qofay Israaˈeelatu yuushuwan deˈiya deretu goynuwaappe keehi dummatees. Eeqawu goynniya he dereti danobaa oottiyoogan, yaaretiyoogaaninne pokkoban erettiya worddo xoossatussi goynnoosona. Eti ubbabankka geeshsha gidokkona. Hegaa mala eeqatussi goynniyoogee asay geeshsha gidennaadan oottees. Hegaa gishshawu, Yihooway ba ashkkarati eeqawu goynniyaageetuppenne hambbalaashettida eta goynuwaa meezetuppe dummatidi deˈanaadan yootiis.—Wogaabaa 18:24-28; 1 Kawotu Maxaafaa 11:1, 2.

11. Yihoowa dirijjitiyawu saluwaa baggaa geeshshatettay (a) kiitanchchatun, (b) suraafeelatun, (c) Yesuusan waani qonccidee?

¹¹ Yihooway doorido beni Israaˈeela deree keehi injje hanotankka, Xoossaa dirijjitiyawu saluwaa baggaa geeshshatettaa qii guuttaa qonccissees. Xoossawu ammanettidi haggaaziya miilooniyan qoodettiya ayyaana meretati ‘geeshsha’ kiitanchchata geetettoosona. (Zaarettido Wogaa 33:2; Yihudaa 14) Eti wottiyoobi baynna ogiyan Xoossaa geeshshatettaa qonccissoosona. Qassi Isiyaasi ajjuutan beˈido suraafeelata hassaya. He wolqqaama ayyaana meretati yexxido mazamuree eti Yihoowa geeshshatettay saluwan saˈan erettanaadan keehi gitabaa oottiyoogaa bessees. SHin, issi ayyaana meretay, hegeekka  Xoossawu mexi issi Naˈay he ayyaana meretatu ubbaappe aadhdhees. Yesuusi Yihoowa geeshshatettaa oogaappenne aadhdhiya ogiyan qonccissiis. I “Xoossaa geeshshaa” geetettiyoogee bessiyaaba.—Yohaannisa 6:68, 69.

12, 13. (a) Xoossaa sunttay geeshsha geetettiyoogee bessiyaaba gidiyoy aybissee? (b) Xoossaa sunttay geeyana bessiyoy aybissee?

¹² Xoossaa sunttaabaa shin? Nuuni SHemppo 1n beˈidoogaadan, he sunttay coo bonchcho suntta gidenna. He sunttay Xoossaa Yihoowa eeshshata ubbaa xaaxi waaxidi A loytti qonccissees. Hegaa gishshawu, Geeshsha Maxaafay, “A sunttaikka geeshsha” gidiyoogaa yootees. (Isiyaasa 57:15) Muuse Higgee Xoossaa sunttaa cayiya uri hayqqanaadan azazees. (Wogaabaa 24:16) Qassi Yesuusi woosan koyro denttidobay aybakko akeeka: “Saluwan de7iya nu Aawau ne geeshsha sunttai anjjetto.” (Maatiyoosa 6:9) Issibay geeshsha gidanaadan oottiyoogee bonchchobaa oottidi dummayiyoogaa giyoogaa. SHin geeshshatettan leemiso gidida Xoossaa sunttay geeshsha gidana koshshiyoy aybissee?

¹³ Seexaanay worddotidi Xoossaa geeshsha sunttaa cayidoogee Xoossaa sunttaa mooriis. Edenen, Seexaanay Yihooway suure haarennabadan abaa wordduwaa yootiis. (Doomettaabaa 3:1-5) He wodeppe doommidi, ha iita alamiyaa haariya Seexaanay, Xoossaa xeelliyaagan odettiya worddoy keehi daranaadan oottiis. (Yohaannisa 8:44; 12:31; Ajjuutaa 12:9) Haymaanooteti Xoossaa huqqunniyaagaa, ookkonne shiiqennaagaa woy meqetti baynnaagaa oottidi qonccissoosona. Eti olettiyo olan I maaddees giidi yootoosona. Maalaaliya Xoossaa meretatu gishshawu A bonchchiyoogaa aggidi daroti hegee lodda laamiyan yiis goosona. Ee, Xoossaa sunttay keehi cayettiis. A sunttay geeyana bessees; A sunttay zaarettidi bonchchettana bessees. A sunttay geeyanaadaaninne A haaroy suure gidiyoogee qonccanaadan laamotoos; qassi he halchchuwan nuuppe koyettiya aybanne oottanawu ufayttoos.

14. Xoossaa ayyaanay geeshsha geetettiyoy aybissee, qassi geeshsha ayyaanaa cayiyoogee wolqqaama nagara gidiyoy aybissee?

 ¹⁴ Yihoowaara gayttidaagan darotoo geeshsha geetettidi xeesettiya harabay deˈees; hegee A ayyaanaa woy A wolqqaa. (Doomettaabaa 1:2) Yihooway ba halchchuwaa polanawu aybippenne aaruwan mino gidida he wolqqaa goˈettees. Xoossay ubbabaa geeshsha gidida ogiyan oottees; hegaa gishshawu, A wolqqay geeshsha ayyaanaa woy geeshshatettaa ayyaanaa geetettiyoogee bessiyaaba. (Luqaasa 11:13; Roome 1:4) Yihoowa halchchuwaa eriiddi eqettiyoogan geeshsha ayyaanaa cayiyoogee atto geetettenna nagara.—Marqqoosa 3:29.

15. Yihoowa geeshshatettay nuuni ayyo yayyanaadan oottiyoogee bessiyaaba gidiyoy aybissee, qassi Xoossawu yayyiyoogaa giyoogee woygiyoogee?

¹⁵ Yaanikko, Geeshsha Maxaafay Xoossaa geeshshatettaa asay Xoossawu yayyiyoogaara aybissi gattiyaakko akeekanawu metenna. Leemisuwawu, Mazamure 99:3y, “Daroppe yashshiya a gita sunttaa eti ubbai galatona. I geeshshattennee!” yaagees. SHin he yashshay coo kokkoriyoogaa gidenna. Hegee keehi maalaalettidi wozanappe bonchchiyoogaa bessiyaaba. Xoossaa geeshshatettay nu qoppiyoogaappe keehi aadhdhiyo gishshawu, hegaadan yayyiyoogee awu bessiyaaba. Hegee keehi geeshshaanne bonchcho. Gidikkonne, hegee nuuni appe haakkanaadan oottana bessenna. Qassi, Xoossaa geeshshatettaa bessiyaagaadan xeelliyoogee nuuni akko shiiqanaadan oottana. Aybissi?

16. (a) Geeshshatettay puulaara waani gayttii? Leemisuwaa yoota. (b) Yihoowabaa yootiya ajjuutay geeshshatettaanne pooˈuwaa waati qonccissii?

¹⁶ Geeshsha Maxaafay geeshshatettaa puulaara gattees. Mazamure 96:6y Xoossaa bonchcho sohuwaa xeelliyaagan hagaadan gees: “Minotettainne puulai a Beeta Maqidasiyan de7ees.” Beˈiyo wode puulay loˈˈees. Leemisuwawu, sinttaa 33n deˈiya misiliyaa xeella. He sohoy nena loˈˈennee? Hegee keehi loˈˈanaadan  oottidabay aybee? Haattay ay keena xillokko akeeka. Qassi saloy wagagganne pooˈoy wajajja gidiyo gishshawu carkkoy geeshsha gidiyoogee qoncce. Hara baggaara qassi hambbalaashshettida shaafaanne moorettida carkkuwaa malabati nuuni etakko shiiqanaadan gidennan, etappe haakkanaadan oottoosona. Nuuni puulaa geeshshatettaaranne pooˈuwaara gattiyoogee erettidaba. Ha qaalata Yihoowa geeshshatettaa qonccissanawu goˈettana danddayoos. Yihoowabaa yootiya ajjuutati nuna keehi ufayssiyoogan garamettokko! Nu geeshsha Xoossaa puulay pozhzhu giya pooˈuwaa, loˈˈiya alleequwaa, phalqqi giya tamaa woy keehi geeshsha alˈˈo birata mala.—Hizqqeela 1:25-28; Ajjuutaa 4:2, 3.

17, 18. (a) Isiyaasi ba beˈido ajjuutan koyro waani qohettidee? (b) Isiyaasa minttettanawu Yihooway issi suraafeliyaa waati goˈettidee, qassi he suraafeelee keehi koshshiyaabaa ay oottidee?

¹⁷ SHin, Xoossaa geeshshatettay nuuni nuna laafabadan xeellanaadan oottennee? Ee, hegaadan xeellanaadan oottiyoogee qoncce. Yihoowaara gatti xeelliyo wode nuuni keehi laafa. Hegaa eriyoogee nuuni appe haakkanaadan oottana bessii? Suraafeelati Yihoowa geeshshatettaa awaajjiyoogaa siyido wode Isiyaasi waatidaakko akeeka. “Taani, ‘Taayyo aayye7ana! Taani bayaas; aissi giikko, taani doonai tunido asa; qassi doonai tunido asatu giddon de7ais; shin taani Kawuwaa, Ubbaappe Wolqqaama GODAA ta aifiyan be7aas’ yaagaas.” (Isiyaasa 6:5) Ee, zawi baynna Yihoowa geeshshatettay Isiyaasi keehi nagaranchcha gidiyoogaa hassayanaadan oottiis. Koyro, he ammanettida bitanee keehi azzaniis. SHin Yihooway A hegaadan aggiigibeenna.

¹⁸ He hananabaa yootiyaagaa issi suraafeelee eesuwan minttettiis. Waatidi? Wolqqaama suraafeelee yarshshiyoosaa paallidi, hegaappe tamaa bonqquwaa ekkiis, yaatidi he bonqquwan Isiyaasa doonaa bochchiis. Hegee keehi qoheesippe attin, minttettenna gaada qoppana danddayaasa. SHin, hegee daro birshshettay deˈiyoobaa leemiso gidiya ajjuutaa gidiyoogaa hassaya. Isiyaasi ammanettida Ayhuda gidiyo gishshawu, beeta maqidasiyan yarshshiyoosan nagaray atto geetettana mala galla  galla yarshshoy yarshshettiyoogaa loytti erees. Hananabaa yootiya Isiyaasi “doonai tunido” nagaranchcha gidikkonne, Xoossaa sinttan geeshsha gidiyoogaa he suraafeelee siiquwan A hassayissiis. * Amarida hanotan gidikkonne, Yihooway nagaranchcha asa geeshshadan xeellanawu koyiis.—Isiyaasa 6:6, 7.

19. Nuuni nagaranchchati amarida hanotan waani geeshsha gidana danddayiyoo?

¹⁹ Hanotay ha wodiyankka hegaa mala gidiyoogee tuma. Yerusalaamen yarshshiyo sohuwan yarshshido yarshsho ubbay Yesuus Kiristtoosi 33 M.Ln, yarshshido wottiyoobi baynna gita yarshshuwaayyo eesho xalla. (Ibraawe 9:11-14) Nuuni nu nagaraappe tumuppe simmikko, nu bala ogiyaa suurissikko, qassi he yarshshuwan ammaniyoogaa oosuwan bessikko nu nagaray atto geetettana. (1 Yohaannisa 2:2) Nuunikka Xoossaa sinttan geeshsha gidana danddayoos. Hegaa gishshawu, kiitettida PHeexiroosi, “‘Taani geeshsha gidiyo gishshau, inttekka geeshsha gidite’ geetettidi xaafettiis” yaagidi nuna hassayissiis.  (1 PHeexiroosa 1:16) Yihooway baagaadan nuuni geeshsha gidana bessees gibeennaagaa akeeka. Nuuni danddayennabaa I nuuppe mule naagenna. (Mazamure 103:13, 14) Yihooway geeshsha gidiyo gishshawu nuunikka geeshsha gidanaadan yootees. Nuuni nagaranchcha asa gidikkonne, “siiqiyo naatudan,” nuussi danddayettida ubban A milatanawu baaxetoos. (Efisoona 5:1) Yaatiyo gishshawu, geeshshatettay ubbatoo baaxetana koshshiyaaba. Nuuni ayyaanaaban dicciiddi, ‘muleera geeyanawu’ galla galla baaxetana koshshees.—2 Qoronttoosa 7:1.

20. (a) Nuuni nu geeshsha Xoossaa sinttan geeshsha gidana danddayiyoogaa eriyoogee keehi koshshiyoy aybissee? (b) Isiyaasi ba nagaray atto geetettidoogaa eridoogee A waati maaddidee?

²⁰ Yihooway suurebaanne geeshshabaa dosees. I nagaraa ixxees. (Imbbaaqooma 1:13) Gidoppe attin, I nuna ixxenna. Nuuni iitabaa ixxiyoogaaninne loˈˈobaa dosiyoogan nagaraa Yihoowagaadan xeellikko, qassi Kiristtoos Yesuusa leemisuwaa kaallanawu baaxetikko, Yihooway nu nagaraa atto gees. (Amoxa 5:15; 1 PHeexiroosa 2:21) Nuuni nu geeshsha Xoossaa sinttan geeshsha gidana danddayiyoogaa akeekiyo wode, keehi maadettoos. Yihoowa geeshshatettay Isiyaasi ba huuphen geeshsha gidennaagaa hassayanaadan oottidoogaa akeeka. I cenggurssaa xoqqu oottidi hagaadan giis: “Taayyo aayye7ana!” SHin I ba nagaray atto geetettidoogaa erido wode, A xeelay laamettiis. Isiyaasi oottanabay aybakko erana xayikkonne, Yihooway issi oosuwaa ba dosan oottiya ura oychchido wode, I eesuwan zaariis. I, “Hekko, tana kiitta” yaagiis.—Isiyaasa 6:5-8.

21. Nuuni geeshshatettaa eeshshay deˈiyoogeeta gidana danddayiyoogaa ammanettana koshshiyoy aybissee?

²¹ Nuuyyo loˈˈo eeshshatanne ayyaanaabaa akeekiyo abbiyaa immida geeshsha Xoossaa leemisuwan nuuni merettida. (Doomettaabaa 1:26) Nuuni ubbay geeshsha gidana danddayoos. Nuuni geeshsha gidanawu baaxetiyo wode ubban Yihooway nuna maaddanawu ufayttees. Yaatiyoogan, nuuni nu geeshsha Xoossaakko kaseegaappe aaruwan shiiqana. Qassi, kaalliya shemppotun nuuni Yihoowa eeshshata pilggiyo wode, nu akko shiiqanaadan oottiya daro gaasoy deˈiyoogaa akeekana!