1, 2. Us mirekul dɛn Ilayja bin dɔn si na in layf? Us wɔndaful tin dɛn i bin si we i bin de na wan kev na Mawnt Orɛb?

ILAYJA bin dɔn si bɔku mirekul dɛn. I bin dɔn si we bɔd dɛn de kɛr it fɔ am tu tɛm ɛvride di tɛm we i bin de ayd pan Kwin Jezibɛl. I bin dɔn si we tu kɔntena dɛn we bin gɛt flawa ɛn ɔyl nɔ ɛva ɛmti pan ɔl we bad bad angri bin de na di land fɔ lɔng tɛm. I bin dɔn ivin si we faya kɔmɔt na di skay as ansa to in prea. (Fɔs Kiŋ, chapta 17 ɛn 18) Bɔt pan ɔl dat, Ilayja nɔ ɛva si ɛnitin lɛk dis.

² As i butu de wach na di frɔnt pat na wan kev na Mawnt Orɛb, i si bɔku wɔndaful tin dɛn. Fɔs, briz blo. I go mɔs dɔn mek lawd lawd nɔys, bikɔs i bin so pawaful dat i bin mek di mawntin dɛn plit ɛn di rɔk dɛn skata. Afta dat, pawaful pawaful atkwek apin. Dɔn faya bigin kech. As di faya de kech na di eria, Ilayja go dɔn fil di we aw i wam pasmak.—Fɔs Kiŋ 19:​8-12.

3. Us kwaliti Ilayja bin si we i bin de wach di difrɛn tin dɛn we bin de apin? Usay wi go si dis sem kwaliti tide?

³ Ɔl dɛn difrɛn difrɛn tin dɛn we Ilayja bin si de sho se Jiova Gɔd gɛt bɔku pawa. Bɔt wi nɔ nid fɔ si mirekul fɔ no se Gɔd gɛt pawa. Wi de si in pawa ɔlsay. Di Baybul tɛl wi se di tin dɛn we Jiova mek de sho “in pawa we go de sote go ɛn tin dɛn we de sho se in na Gɔd.” (Romans 1:​20) Jɔs tink bɔt di brayt brayt laytin ɛn di lawd lawd tɛnda, di fayn we aw bɔku bɔku wata de rɔndɔŋ dɛn il dɛn (wɔtafɔl), di bɔku bɔku sta dɛn we kin de na di skay! Yu nɔ kin si Gɔd in pawa pan dɛn tin dɛn de? Bɔt bɔku pipul dɛn tide nɔ rili no se na Gɔd in pawa. Ɛn di wan dɛn we de si am di rayt we, nɔ bɔku. Bɔt we wi ɔndastand dis kwaliti we Gɔd gɛt, i go mek wi gɛt bɔku rizin fɔ kam nia Jiova mɔ ɛn mɔ.  Insay dis sɛkshɔn, wi go stɔdi gud gud wan bɔt di kayn pawa we Jiova gɛt.

4, 5. (a) Wetin Jiova in nem gɛt fɔ du wit in pawa? (b) Wetin mek i fit we Jiova yuz man kaw fɔ tinap fɔ in pawa?

⁴ Nɔbɔdi nɔ gɛt di kayn pawa we Jiova gɛt. Jɛrimaya 10:​6 tɔk se: “Nɔn gɔd nɔ de we tan lɛkɛ yu, PAPA GƆD [“Jiova,” NWT]; yu wɔndaful, ɛn yu nem gret ɛn pawaful.” Notis se pawa gɛt sɔntin fɔ du wit Jiova in nem. Mɛmba se dis nem min “I De Mek Wetin I Want Bi.” Wetin de mek Jiova ebul fɔ mek ɛnitin we i want ɛn bi ɛnitin we i want fɔ bi? Wan rizin na bikɔs i gɛt pawa. Fɔ tru, Jiova ebul fɔ du ɛnitin, dat min se i ebul fɔ mek ɛnitin we i want fɔ apin. Dis kayn pawa na wan pan in men kwaliti dɛn.

⁵ Bikɔs wi nɔ go ɛva ebul fɔ ɔndastand di kayn we aw Jiova gɛt pawa, na dat mek i yuz ɛgzampul dɛn fɔ ɛp wi fɔ ɔndastand di kayn pawa we i gɛt. As wi bin dɔn si, i yuz man kaw fɔ tinap fɔ in pawa. (Izikɛl 1:​4-10) Dis rili fit, bikɔs ivin di man kaw we pipul dɛn kin mɛn na animal we big ɛn pawaful. I nɔ bin izi fɔ lɛ pipul dɛn we bin de na Palestayn di tɛm we dɛn bin de rayt di Baybul si animal we strɔng pas man kaw, infakt dɛn nɔ bin ɛva si ɛnitin we strɔng pas am. Bɔt dɛn bin no bɔt wan kayn man kaw, we dɛn de kɔl orɔk, we bin fiaful pas ɔda man kaw dɛn. Dis kayn bush kaw nɔ de igen. (Job 39:​9-12) Juliɔs Siza bin tɔk wan tɛm se i lɛf smɔl lɛ dɛn man kaw dɛn ya big lɛk ɛlifant. I bin rayt se: “Dɛn gɛt trɛnk pasmak, ɛn dɛn gɛt spid bad bad wan.” Imajin aw wik ɛn smɔl yu go fil we yu tinap nia da kayn animal de!

6. Wetin mek na Jiova nɔmɔ dɛn kɔl “di Ɔlmayti”?

⁶ Semweso, mɔtalman smɔl ɛn nɔ gɛt pawa we yu  kɔmpia am to di Gɔd we gɛt pawa, we na Jiova. To Jiova, ivin dɛn pawaful neshɔn dɛn tan lɛk dɔst na skel. (Ayzaya 40:​15) Jiova nɔ tan lɛk di tin dɛn we i mek, i gɛt pawa fɔ du ɛnitin we i want, na dat mek na in nɔmɔ dɛn kɔl “di Ɔlmayti.” * (Rɛvɛleshɔn 15:​3) Jiova “gɛt pawa bad bad wan,” ɛn i “gɛt trɛnk bad bad wan.” (Ayzaya 40:​26) Na frɔm am bɔku bɔku pawa we nɔ de dɔn de kɔmɔt. I nɔ abop pan ɛnibɔdi ɔ ɛnitin fɔ gi am pawa, bikɔs “PAPA GƆD se nain gɛt pawa.” (Na wi mek am italiks; Sam 62:​11) Wetin Jiova de yuz fɔ sho in pawa?

7. Wetin na Jiova in oli spirit? Wetin di orijinal wɔd dɛn we dɛn yuz na di Baybul min?

⁷ Jiova de yuz in oli spirit bɔku we dɛn, ɛn i nɔ de dɔn. Na di pawa we Gɔd de yuz fɔ du sɔntin. Infakt, na Jɛnɛsis 1:​2 (NWT), di Baybul kɔl am “Gɔd in pawa we i de yuz fɔ du wetin i want.” Di orijinal Ibru ɛn Grik wɔd dɛn we dɛn translet as “spirit” kin min “briz,” “di briz we wi de blo,” ɛn “ebi ebi briz” na ɔda say dɛn. Di wan dɛn we de rayt dikshɔnari se di orijinal wɔd dɛn min we pawa we wi nɔ de si de wok. Jɔs lɛk briz, wi nɔ de si Gɔd in spirit, bɔt wi de si di tin dɛn we i de du ɛn wi no se i de.

8. Us ɔda we di Baybul kɔl Gɔd in spirit? Wetin mek i fayn we dɛn kɔmpia am to dɛn tin dɛn de?

⁸ Gɔd in oli spirit ebul fɔ du ɛnitin. Jiova kin yuz am fɔ du ɛnitin we i want fɔ du. Na dat mek di Baybul kɔl Gɔd in spirit in “finga,” ɔ in “an.” (Lyuk 11:​20; Sam 102:​25) Jɔs lɛk aw mɔtalman kin yuz in an fɔ du difrɛn difrɛn tin dɛn, pan ɔl we nɔto di sem trɛnk i go yuz fɔ du dɛn, na so Gɔd kin yuz in spirit fɔ du ɛnitin we i want fɔ du, lɛk fɔ mek smɔl smɔl tin dɛn we dɛn kɔl atɔm, ɔ fɔ sheb di  Rɛd Si, ɔ fɔ mek di fɔstɛm Kristian dɛn tɔk difrɛn langwej dɛn.

9. Udat dɛn Jiova de rul?

⁹ Jiova kin yuz di rayt we i gɛt as di Wan we de rul di wan ol wɔl fɔ sho in pawa. Yu dɔn ɛva imajin se milyɔn milyɔn pipul dɛn de ɔnda yu ɛn dɛn rɛdi fɔ du wetin yu tɛl dɛn fɔ du? Jiova gɛt da kayn pawa de fɔ rul. I gɛt savant dɛn na di wɔl, ɛn bɔku tɛm di Baybul kin kɔmpia dɛn to sojaman dɛn. (Sam 68:​11; 110:​3, NWT) Bɔt mɔtalman wik we yu kɔmpia am to enjɛl. Fɔ ɛgzampul, we di Asirian dɛn bin atak Gɔd in pipul dɛn, na wangren enjɛl bin kil 185,000 sojaman dɛn insay wangren nɛt! (2 Kiŋ 19:​35) Gɔd in enjɛl dɛn “rili gɛt pawa.”—Sam 103:​19, 20, NWT.

10. (a) Wetin mek dɛn kɔl di Ɔlmayti, Jiova we gɛt bɔku bɔku sojaman dɛn? (b) Udat pawaful pas ɔltin we Jiova mek?

¹⁰ Ɔmɔs enjɛl dɛn de? Di prɔfɛt Daniɛl bin si ɛvin na wan vishɔn. Insay da vishɔn de, i bin si pas 100 milyɔn enjɛl dɛn bifo Jiova in tron, bɔt natin nɔ de we sho se i si ɔl di enjɛl dɛn we Jiova mek. (Daniɛl 7:​10) So i go bi se di enjɛl dɛn pas 100 milyɔn fa fawe. Na dat mek dɛn de kɔl Gɔd, Jiova we gɛt bɔku bɔku sojaman dɛn. Dis taytul de sho di pawaful pozishɔn we i gɛt as Kɔmanda na big big ami we ɔganayz, usay pawaful enjɛl dɛn de. Jiova dɔn put wan enjɛl pantap ɔl dɛn enjɛl dɛn ya, dat na in Pikin we i rili lɛk, we “na in fɔs [i] mek bifo ɛni ɔda tin.” (Koloshians 1:​15) As di enjɛl dɛn edman, dat na di pɔsin we de oba ɔl di enjɛl dɛn, siraf dɛn, ɛn chɛrɔb dɛn; Jizɔs pawaful pas ɔltin we Jiova mek.

11, 12. (a) Us we dɛn Gɔd in wɔd gɛt pawa? (b) Wetin Jizɔs tɔk we sho se Jiova gɛt bɔku pawa?

¹¹ Jiova gɛt wan ɔda we bak aw i de yuz in pawa. Ibruz 4:​12 tɔk se: “Gɔd in wɔd de alayv ɛn i gɛt pawa.” Yu dɔn ɛva si di wɔndaful pawa we Gɔd in wɔd we de insay di Baybul, gɛt? I kin ɛnkɔrej wi, mek wi gɛt mɔ fet, ɛn ɛp wi fɔ mek  big chenj dɛn na wi layf. Di apɔsul Pɔl bin wɔn in kɔmpin Kristian dɛn se dɛn nɔ fɔ fala pipul dɛn we de liv dɛn layf di we aw Gɔd nɔ want. Dɔn i tɔk bak se: “Na so sɔm pan una bin de.” (1 Kɔrintians 6:​9-11) Fɔ tru, di pawa we “Gɔd in wɔd” gɛt bin ɛp dɛn fɔ chenj.

¹² Jiova gɛt bɔku bɔku pawa ɛn di we dɛn aw i de yuz in pawa so fayn dat natin nɔ go stɔp am. Jizɔs bin tɔk se: “To Gɔd ɔltin pɔsibul.” (Matyu 19:​26) Wetin-ɛn-wetin Jiova de yuz in pawa fɔ du?

13, 14. (a) Wetin mek wi go se Jiova nɔto lɛk dɛn tin dɛn we pawa kin kɔmɔt pan? (b) Us we dɛn Jiova de yuz in pawa?

¹³ Jiova in spirit pas ɛni ɔda pawa we de na di wɔl fa fawe; ɛn Jiova nɔto lɛk dɛn tin dɛn we pawa kin kɔmɔt pan. In na rial pɔsin we ebul fɔ kɔntrol in pawa. Bɔt wetin kin mek i de yuz in pawa?

¹⁴ As wi go lan, Gɔd de yuz in pawa fɔ mek, fɔ pwɛl, fɔ protɛkt, ɛn fɔ mek sɔntin lɛk aw i bin de, dis min se i de yuz in pawa fɔ du ɛnitin we de in layn wit wetin i want. (Ayzaya 46:​10) Sɔntɛnde, Jiova kin yuz in pawa fɔ sho impɔtant tin dɛn bɔt insɛf ɛn wetin i want wi fɔ du. Di tin we pas ɔl na dat, i de yuz in pawa fɔ mek wetin i want apin, dat na fɔ yuz in Kiŋdɔm we di Mɛsaya de rul fɔ mek ɔlman no se na In gɛt di rayt fɔ rul ɛn fɔ mek In nem oli. Natin nɔ go ɛva stɔp dat fɔ apin.

15. Wetin mek Jiova de yuz in pawa fɔ in savant dɛn? Aw i bin du dis fɔ Ilayja?

¹⁵ Jiova kin yuz in pawa bak fɔ bɛnifit wi ɔl wan bay wan. Notis wetin Sɛkɛn Kronikul 16:​9 tɔk. I se: “PAPA GƆD [“Jiova,” NWT] in yay de de ɔlsay na di wan ol wɔl, fɔ sho in pawa fɔseka di wan dɛn . . . we dɛn at klin fɔ am.” Di tin dɛn we Ilayja bin si, we wi tɔk bɔt na di biginin, na wan ɛgzampul. Wetin mek Jiova bin mek i si di wɔndaful  we we I de sho in pawa? Wɛl, wikɛd Kwin Jezibɛl bin dɔn swɛ se i go kil Ilayja. Di prɔfɛt bin de rɔn fɔ in layf. I bin de fil lɛk se na in wangren de, i bin de fred, ɛn in at bin pwɛl; i bin tan lɛk se ɔl wetin i bin dɔn wok tranga wan fɔ, na fɔ natin. Fɔ ɛnkɔrej Ilayja we in at bin pwɛl, Jiova bin sho am dɛn tin dɛn ya fɔ mɛmba am bɔt di pawa we I gɛt. Di briz, di atkwek, ɛn di faya bin sho se di Pɔsin we pawaful pas ɔlman na di wan ol wɔl de wit Ilayja. Wetin i fɔ fred Jezibɛl fɔ, we di ɔlmayti Gɔd de wit am?—Fɔs Kiŋ 19:​1-12. *

16. Wetin mek wi de fil fayn we wi tink bɔt di wɔndaful pawa we Jiova gɛt?

¹⁶ Pan ɔl we Jiova nɔ de pafɔm mirekul dɛn naw, i nɔ stil chenj frɔm Ilayja in tɛm. (1 Kɔrintians 13:​8) I stil rɛdi fɔ yuz in pawa tide fɔ ɛp di wan dɛn we lɛk am. Na tru se in na spirit ɛn i de na in wɔndaful tron na ɛvin, bɔt i stil de nia wi. In pawa nɔ gɛt bawndri, so ilɛk ples fa te, in pawa de rich de. Infakt, di Baybul se: “Jiova de nia ɔl di wan dɛn we de kɔl am.” (Sam 145:​18, NWT) Wan tɛm, we di prɔfɛt Daniɛl bin de pre to Jiova fɔ lɛ I ɛp am, wan enjɛl apia to am ivin bifo i dɔn fɔ pre! (Daniɛl 9:​20-23) Natin nɔ go stɔp Jiova fɔ ɛp ɛn ɛnkɔrej di wan dɛn we i lɛk.—Sam 118:​6.

17. Uskayn we Jiova in pawa de mek wi fred am? Us we Gɔd in pawa nɔ de mek wi fred am?

¹⁷ Fɔ se Gɔd in pawa fɔ mek wi fred am? Wi fɔ se yɛs, ɛn wi fɔ se nɔ. Wi fɔ se yɛs bikɔs di pawa we Gɔd gɛt de  mek wi fred am, dat min se wi de kɔle, wɔnda, ɛn rili rili rɛspɛkt am, jɔs lɛk aw wi tɔk na Chapta 3. Di Baybul se: “Wɛn yu gɛt fred fɔ PAPA GƆD [“Jiova,” NWT], yu jɛs de bigin fɔ gɛt di sɛns we i de gi fɔ du wetin rayt.” (Sam 111:​10) Bɔt wi fɔ se nɔ bak bikɔs Gɔd in pawa nɔ gi wi ɛni rizin fɔ fred am da pasmak we we nɔ fayn ɔ we go mek wi nɔ go nia am.

18. (a) Wetin mek bɔku pipul dɛn nɔ gɛt kɔnfidɛns pan di wan dɛn we gɛt pawa? (b) Aw wi no se Jiova in pawa nɔ go mek i kɔrɔpt?

¹⁸ Lɔd Atɔn we na wan Inglishman we bin de rayt istri, bin tɔk insay 1887 se: “Pawa kin mek pɔsin kɔrɔpt, ɛn we pɔsin gɛt pawa fɔ du ɛnitin, na soso kɔrɔpshɔn i kin de pan.” Plɛnti tɛm, pipul dɛn kin tɔk wetin i bin se, bikɔs bɔku pipul dɛn de si am se na tru. Istri dɔn sho bɔku tɛm se mɔtalman kin yuz pawa di rɔng we. (Ɛkliziastis 4:​1; 8:​9) Na dis mek bɔku pipul dɛn nɔ gɛt kɔnfidɛns pan di wan dɛn we gɛt pawa, ɛn dɛn kin kɔmɔt nia dɛn. Bɔt Jiova gɛt pawa fɔ du ɛnitin we i want. Fɔ se dis pawa dɔn mek i kɔrɔpt? Nɔ-o! Jɔs lɛk aw wi bin dɔn lan, i oli, natin nɔ de mek i kɔrɔpt. Jiova nɔ tan lɛk mɔtalman dɛn we gɛt pawa na dis kɔrɔpt wɔl. I nɔ ɛva yuz in pawa di rɔng we, ɛn i nɔ go ɛva du dat.

19, 20. (a) Us ɔda kwaliti dɛn Jiova de yuz ɛnitɛm we i de sho in pawa? Wetin mek dis de ɛnkɔrej wi? (b) Us ɛgzampul yu go gi fɔ sho aw Jiova de kɔntrol insɛf? Wetin mek yu lɛk dat?

¹⁹ Mɛmba se pawa nɔto di wangren kwaliti we Jiova gɛt. Wi gɛt fɔ stɔdi bɔt in jɔstis, in sɛns, ɛn in lɔv. Bɔt wi nɔ fɔ tink se Jiova de yuz in kwaliti dɛn strikt we, lɛk se na wan kwaliti nɔmɔ i de yuz we i de du sɔntin. Bifo dat, wi go si na di ɔda chapta dɛn se ɛnitɛm we Jiova de yuz in pawa, i de yuz am wit jɔstis, i de yuz am wit sɛns, ɛn i de yuz am wit lɔv. Tink bɔt wan ɔda kwaliti we Gɔd gɛt, we at fɔ si pan di rula dɛn na dis wɔl; Gɔd ebul fɔ kɔntrol insɛf.

 ²⁰ Imajin se yu mit wan man we big ɛn gɛt trɛnk ɛn dat mek yu fred. Bɔt as tɛm de go, yu kam fɔ si se in na pɔsin we izi fɔ dil wit. I rɛdi ɔltɛm fɔ yuz in trɛnk fɔ ɛp ɛn protɛkt pipul dɛn, mɔ di wan dɛn we nɔ ebul protɛkt dɛnsɛf ɛn we pipul dɛn de trit bad. I nɔ de ɛva yuz in trɛnk di rɔng we. Yu dɔn si we dɛn tɔk bad bɔt am fɔ natin, bɔt i nɔ de wɔri, i de du tin fayn, ɛn ivin de du gud, pan ɔl we i strikt. Yu bigin fɔ wɔnda if yu go ebul biev lɛk am, mɔ if yu bin gɛt di kayn trɛnk we i gɛt! Yu nɔ tink se yu go want fɔ de nia da kayn man de as yu de no mɔ bɔt am? Wi gɛt mɔ rizin fɔ kam nia Jiova we na di Ɔlmayti. Tink bɔt di sɛntɛns usay di taytul fɔ dis chapta kɔmɔt. I se: “Jiova nɔ de vɛks kwik ɛn i gɛt bɔku pawa.” (Neɔm 1:​3, NWT) Jiova nɔ de yuz in pawa kwik kwik wan pan pipul dɛn, ivin to di wan dɛn we wikɛd. I de tek tɛm du tin ɛn i gud. I dɔn sho se i “nɔ de vɛks kwik” pan ɔl we bɔku tɛm dɛn de du tin dɛn we fɔ mek i vɛks.—Sam 78:​37-41.

21. Wetin mek Jiova nɔ de fos pipul dɛn fɔ du wetin i want? Wetin dat de tich wi bɔt am?

²¹ Tink bɔt wan ɔda we aw Jiova de sho se i de kɔntrol insɛf. If yu bin gɛt pawa fɔ du ɛnitin we yu want, yu  tink se yu fɔ de mek pipul dɛn du tin yu yon we? Jiova gɛt bɔku bɔku pawa, bɔt stil i nɔ de fos pipul dɛn fɔ sav am. Pan ɔl we fɔ sav Gɔd na di wangren we dat fɔ gɛt layf we go de sote go, i stil nɔ de fos wi fɔ sav am. Bifo dat, i rɛspɛkt wi ɔl ɛn i gi wi di fridɔm fɔ disayd wetin wi want fɔ du. I wɔn wi bɔt di tin dɛn we go apin to wi if wi disayd fɔ du bad tin ɛn di blɛsin dɛn we wi go gɛt if wi disayd fɔ du gud tin dɛn. Bɔt i lɛf wi fɔ lɛ wi disayd fɔ wisɛf. (Ditarɔnɔmi 30:​19, 20) Jiova nɔ want wi fɔ wɔship am bikɔs dɛn de fos wi ɔ bikɔs wi de fred am bad bad wan bikɔs ɔf in wɔndaful pawa. I de luk fɔ di wan dɛn we rɛdi fɔ wɔship am bikɔs dɛn lɛk am.—2 Kɔrintians 9:​7.

22, 23. (a) Wetin sho se Jiova gladi fɔ gi pawa to ɔda pipul dɛn? (b) Wetin wi go tɔk bɔt na di nɛks chapta?

²² Lɛ wi tɔk bɔt wan las rizin we mek wi nɔ nid fɔ fred di Ɔlmayti Gɔd da pasmak we. Mɔtalman dɛn we gɛt pawa kin fred fɔ gi sɔm pan dɛn pawa to ɔda pipul dɛn. Bɔt Jiova gladi fɔ gi pawa to di wan dɛn we de wɔship am fetful wan. I kin gi bɔku pawa to ɔda pipul dɛn. Wan pan di pipul dɛn we i dɔn gi bɔku pawa na in Pikin. (Matyu 28:​18) Jiova de gi pawa to in savant dɛn wan ɔda we bak. Di Baybul se: “PAPA GƆD [“Jiova,” NWT] yu gret, yu gɛt pawa, na yu dɛn de kɔle pan, yu de win ɔltɛm, ɛn yu gɛt di ɔna we pas ɔl ɔna, bikɔs ɔl wetin de na ɛvin ɛn dis wɔl na yu yon. . . . Pawa ɛn trɛnk de na yu an; ɛn yu an na fɔ mek pɔsin pawaful ɛn fɔ gi ɔlman trɛnk.”—Fɔs Kronikul 29:​11, 12.

²³ Fɔ tru, Jiova go gladi fɔ gi yu trɛnk. I kin ivin gi di wan dɛn we want fɔ sav am “di pawa we pas mɔtalman in yon.” (2 Kɔrintians 4:​7) Yu nɔ tink se yu go want fɔ kam nia dis kayn Gɔd we gɛt bɔku bɔku trɛnk ɛn we de yuz in pawa fayn fayn wan? Insay di nɛks chapta, wi go pe atɛnshɔn mɔ pan di we aw Jiova de yuz in pawa fɔ mek tin dɛn.