ບົດທີ 4
“ພະເຢໂຫວາມີລິດເດດຫຼາຍ”
1, 2. ເອລີຢາເຄີຍເຫັນເຫດການທີ່ໜ້າຕື່ນເຕັ້ນຫຍັງແດ່ໃນຊີວິດຂອງລາວ ແຕ່ລາວໄດ້ເຫັນເຫດການຫຍັງຢູ່ພູໂຮເຣັບ?
ເອລີຢາເຄີຍເຫັນເຫດການທີ່ໜ້າຕື່ນເຕັ້ນມາແລ້ວ ເຊັ່ນ: ຕອນທີ່ລີ້ພວກສັດຕູ ລາວໄດ້ເຫັນໂຕກາເອົາຂອງກິນມາໃຫ້ລາວມື້ລະ 2 ຄາບ. ຕອນທີ່ມີຄວາມອຶດຢາກຍາວນານ ລາວໄດ້ເຫັນໄຫ 2 ໜ່ວຍທີ່ມີແປ້ງແລະນ້ຳມັນທີ່ບໍ່ໝົດຈັກເທື່ອ. ນອກຈາກນັ້ນ ລາວຍັງໄດ້ເຫັນພະເຢໂຫວາຕອບຄຳອະທິດຖານຂອງລາວໂດຍໃຫ້ໄຟຕົກລົງມາຈາກຟ້າ. (1 ກະສັດບົດ 17, 18) ແຕ່ຕອນນີ້ ເອລີຢາຈະໄດ້ເຫັນເຫດການທີ່ໜ້າຕື່ນເຕັ້ນຫຼາຍກວ່າທີ່ຜ່ານມາອີກ.
2 ຕອນທີ່ລີ້ຢູ່ໃກ້ປາກຖ້ຳບ່ອນໜຶ່ງເທິງພູໂຮເຣັບ ເອລີຢາໄດ້ເຫັນເຫດການທີ່ໜ້າຕື່ນເຕັ້ນຫຼາຍຢ່າງ. ທຳອິດ ລາວເຫັນພາຍຸ. ສຽງພາຍຸນັ້ນດັງແຮງຈົນເຮັດໃຫ້ຫູອື້ ແລະພັດແຮງຫຼາຍຈົນເຮັດໃຫ້ພູຫຼາຍໜ່ວຍແຍກອອກຈາກກັນແລະກ້ອນຫີນກໍແຕກເປັນປ່ຽງໆ. ຈາກນັ້ນກໍມີແຜ່ນດິນໄຫວທີ່ປ່ອຍພະລັງມະຫາສານທີ່ຖືກກັກຢູ່ເປືອກໂລກອອກມາ ແລ້ວໄຟກໍໄໝ້. ຕອນທີ່ໄຟໄໝ້ລາມໄປທົ່ວບໍລິເວນນັ້ນ ເອລີຢາຮູ້ສຶກໄດ້ວ່າໄຟນັ້ນຮ້ອນຫຼາຍສ່ຳໃດ.—1 ກະສັດ 19:8-12
3. ເອລີຢາໄດ້ເຫັນຄຸນລັກສະນະຫຍັງຂອງພະເຢໂຫວາ ແລະເຮົາຈະເຫັນຄຸນລັກສະນະນັ້ນຢູ່ໃສ?
3 ເຫດການທັງໝົດທີ່ເອລີຢາໄດ້ເຫັນສະແດງວ່າພະເຢໂຫວາພະເຈົ້າມີລິດເດດທີ່ຍິ່ງໃຫຍ່. ເຮົາບໍ່ຈຳເປັນຕ້ອງເຫັນການອັດສະຈັນຈຶ່ງຈະຮູ້ວ່າພະເຈົ້າມີລິດເດດທີ່ຍິ່ງໃຫຍ່ ຍ້ອນຄຸນລັກສະນະນີ້ເຫັນໄດ້ຢູ່ທຸກບ່ອນ. ຄຳພີໄບເບິນບອກວ່າສິ່ງທີ່ພະເຢໂຫວາສ້າງພິສູດວ່າ: ‘ລິດເດດຂອງເພິ່ນມີຢູ່ຕະຫຼອດໄປ ແລະພິສູດວ່າເພິ່ນເປັນພະເຈົ້າແທ້ໆ.’ (ໂຣມ 1:20) ຂໍໃຫ້ຄິດເຖິງຟ້າເຫຼື້ອມຟ້າແມບ ສຽງຟ້າຮ້ອງແຮງດັງກ້ອງສະໜັ່ນຕອນທີ່ມີລົມພາຍຸ ມີຝົນຕົກແຮງໆ ນ້ຳຕົກຕາດທີ່ໃຫຍ່ໆງາມໆ ຫຼືທ້ອງຟ້າທີ່ກວ້າງໃຫຍ່ທີ່ມີດາວບັກຫຼາຍໆ. ເຈົ້າເຫັນລິດເດດຂອງພະເຈົ້າຈາກສິ່ງເຫຼົ່ານັ້ນບໍ? ແຕ່ຄົນສ່ວນຫຼາຍໃນທຸກມື້ນີ້ບໍ່ໄດ້ຢາກຮູ້ຈັກລິດເດດຂອງພະເຈົ້າແລະເຂົາເຈົ້າບໍ່ເຂົ້າໃຈວ່າເລື່ອງນີ້ຄວນຈະເຮັດໃຫ້ເຂົາເຈົ້າຮູ້ສຶກ ແນວໃດຕໍ່ເພິ່ນ. ແຕ່ການເຂົ້າໃຈກ່ຽວກັບຄຸນລັກສະນະນີ້ຂອງພະເຈົ້າເຮັດໃຫ້ເຮົາມີເຫດຜົນທີ່ຢາກຈະໃກ້ຊິດກັບພະເຢໂຫວາຫຼາຍຂຶ້ນ. ຕອນນີ້ ເຮົາຈະເບິ່ງຢ່າງລະອຽດກ່ຽວກັບພະລັງທີ່ບໍ່ມີຫຍັງທຽບໄດ້ຂອງພະເຢໂຫວາ.
“ພະເຢໂຫວາໄດ້ກາຍລາວໄປ”
ຄຸນລັກສະນະເດັ່ນຂອງພະເຢໂຫວາ
4, 5. (ກ) ຊື່ຂອງພະເຢໂຫວາບອກໃຫ້ຮູ້ຫຍັງກ່ຽວກັບເພິ່ນ? (ຂ) ເປັນຫຍັງຈຶ່ງເໝາະສົມທີ່ພະເຢໂຫວາໃຊ້ງົວເປັນສັນຍະລັກສະແດງເຖິງລິດເດດຂອງເພິ່ນ?
4 ພະເຢໂຫວາມີລິດເດດທີ່ບໍ່ມີໃຜທຽບໄດ້. ເຢເຣມີຢາ 10:6 ບອກວ່າ: “ພະເຢໂຫວາເອີ້ຍ ບໍ່ມີໃຜຄືກັບພະອົງ. ພະອົງຍິ່ງໃຫຍ່ ຊື່ຂອງພະອົງກໍຍິ່ງໃຫຍ່ແລະສະແດງໃຫ້ເຫັນລິດເດດຂອງພະອົງ.” ຂໍໃຫ້ສັງເກດວ່າ ຂໍ້ນີ້ບອກວ່າຊື່ຂອງພະເຢໂຫວາຍິ່ງໃຫຍ່ແລະມີລິດເດດ. ຢ່າລືມວ່າຊື່ນີ້ມີຄວາມໝາຍວ່າ “ເພິ່ນເຮັດໃຫ້ເປັນ.” ແມ່ນຫຍັງເຮັດໃຫ້ພະເຢໂຫວາສາມາດເປັນຫຍັງກໍໄດ້ຕາມທີ່ເພິ່ນຕ້ອງການແລະສ້າງໄດ້ທຸກຢ່າງຕາມທີ່ເພິ່ນຕັ້ງໃຈໄວ້? ສິ່ງໜຶ່ງກໍແມ່ນຍ້ອນເພິ່ນມີລິດເດດ. ລິດເດດຂອງພະເຢໂຫວາບໍ່ມີຂີດຈຳກັດ ເພິ່ນຈຶ່ງເຮັດໄດ້ທຸກຢ່າງຕາມທີ່ເພິ່ນຕ້ອງການ ແລະຄຸນລັກສະນະທີ່ເດັ່ນຢ່າງໜຶ່ງຂອງເພິ່ນກໍແມ່ນລິດເດດ.
5 ຍ້ອນເຮົາບໍ່ສາມາດເຂົ້າໃຈລິດເດດຂອງພະເຢໂຫວາໄດ້ທັງໝົດ ເພິ່ນຈຶ່ງໃຊ້ການປຽບທຽບເພື່ອຊ່ວຍເຮົາໃຫ້ເຂົ້າໃຈ. ຄືກັບທີ່ເຮົາຮູ້ແລ້ວ ເພິ່ນໃຊ້ງົວເປັນສັນຍະລັກທີ່ສະແດງເຖິງລິດເດດຂອງເພິ່ນ. (ເອເຊກຽນ 1:4-10) ການປຽບທຽບນີ້ເໝາະສົມແທ້ໆ ຍ້ອນວ່າແມ່ນແຕ່ງົວບ້ານກໍເປັນສັດທີ່ໃຫຍ່ແລະມີແຮງຫຼາຍ. ໃນສະໄໝທີ່ຂຽນຄຳພີໄບເບິນ ຄົນໃນປາແລັດສະຕິນບໍ່ຄ່ອຍໄດ້ເຫັນສັດທີ່ມີແຮງຫຼາຍກວ່າງົວ. ແຕ່ເຂົາເຈົ້າຍັງຮູ້ຈັກງົວບາງຊະນິດທີ່ເປັນຕາຢ້ານຫຼາຍກວ່ານັ້ນອີກ ເຊິ່ງກໍແມ່ນງົວເຖິກປ່າຫຼືງົວກະທິງທີ່ສູນພັນໄປແລ້ວ. (ໂຢບ 39:9-12) ມີເທື່ອໜຶ່ງຈູເລຍ ກາຍຊາທີ່ເປັນຈັກກະພັດໂຣມໄດ້ໃຫ້ຂໍ້ສັງເກດວ່າ ງົວສາຍພັນນີ້ໃຫຍ່ເກືອບສ່ຳກັບຊ້າງ. ລາວຂຽນວ່າ “ແຮງຂອງພວກມັນຫຼາຍແທ້ຫຼາຍວ່າ ແລະພວກມັນກໍໄວຫຼາຍ.” ລອງຄິດເບິ່ງວ່າຖ້າເຮົາໄປຢືນຢູ່ໃກ້ພວກມັນ ເຮົາຄືຊິໂຕນ້ອຍໆແລະມີແຮງແຕ່ໜ້ອຍດຽວ!
6. ເປັນຫຍັງຈຶ່ງມີແຕ່ພະເຢໂຫວາຜູ້ດຽວເທົ່ານັ້ນທີ່ຖືກເອີ້ນວ່າ “ຜູ້ມີລິດເດດສູງສຸດ”?
6 ຄ້າຍຄືກັນ ເມື່ອທຽບກັບພະເຢໂຫວາພະເຈົ້າຜູ້ມີລິດເດດຫຼາຍ ມະນຸດກໍໂຕນ້ອຍໆແລະບໍ່ມີແຮງ. ສຳລັບເພິ່ນແລ້ວ ແມ່ນແຕ່ຊາດຕ່າງໆທີ່ມີແຮງຫຼາຍກໍຄືກັບຂີ້ຝຸ່ນທີ່ຢູ່ເທິງຊິງ. (ເອຊາຢາ 40:15) ບໍ່ຄືກັບສິ່ງທີ່ມີຊີວິດອື່ນໆ ພະເຢໂຫວາມີລິດເດດແບບບໍ່ມີຂີດຈຳກັດຈຶ່ງມີແຕ່ເພິ່ນຜູ້ດຽວເທົ່ານັ້ນທີ່ຖືກເອີ້ນວ່າ: “ຜູ້ມີລິດເດດສູງສຸດ.” a (ພະນິມິດ 15:3) ພະເຢໂຫວາມີ “ພະລັງອຳນາດແລະມີລິດເດດຫຼາຍ.” (ເອຊາຢາ 40:26) ເພິ່ນເປັນບໍ່ເກີດຂອງພະລັງມະຫາສານແລະບໍ່ມີມື້ໝົດຈັກເທື່ອ. ເພິ່ນບໍ່ຕ້ອງອາໄສພະລັງຈາກຜູ້ໃດຫຼືຈາກສິ່ງໃດ ຍ້ອນ “ລິດເດດເປັນຂອງພະເຈົ້າ.” (ເພງສັນລະເສີນ 62:11) ແຕ່ພະເຢໂຫວາໃຊ້ລິດເດດຂອງເພິ່ນແນວໃດ?
ວິທີທີ່ພະເຢໂຫວາໃຊ້ລິດເດດ
7. ພະລັງບໍລິສຸດຂອງພະເຢໂຫວາແມ່ນຫຍັງ ແລະຄຳວ່າ “ພະລັງ” ໃນພາສາດັ້ງເດີມທີ່ໃຊ້ໃນຄຳພີໄບເບິນຖືກແປວ່າແນວໃດ?
7 ພະລັງບໍລິສຸດຂອງພະເຢໂຫວາບໍ່ມີຂີດຈຳກັດ. ພະລັງບໍລິສຸດແມ່ນພະລັງທີ່ພະເຈົ້າໃຊ້ເຮັດສິ່ງຕ່າງໆ. ທີ່ຈິງ ໃນຄຳພີໄບເບິນຢູ່ປະຖົມມະການ 1:2 ເວົ້າເຖິງພະລັງບໍລິສຸດວ່າເປັນ “ພະລັງຂອງພະເຈົ້າ.” ຄຳໃນພາສາເຮັບເຣີແລະພາສາກຣີກດັ້ງເດີມທີ່ຖືກແປວ່າ “ພະລັງ” ອາດມີການແປໃນແວດບົດອື່ນວ່າ “ລົມ” “ລົມຫາຍໃຈ” ແລະ “ລົມພາຍຸ.” ຜູ້ຊ່ຽວຊານດ້ານຄຳພີໄບເບິນບອກວ່າ ຄຳພາສາດັ້ງເດີມໝາຍເຖິງພະລັງທີ່ເບິ່ງບໍ່ເຫັນເຊິ່ງເຮັດວຽກຢູ່. ຄືກັບລົມ ພະລັງຂອງພະເຈົ້າເປັນພະລັງທີ່ເຮົາເບິ່ງບໍ່ເຫັນ ແຕ່ສາມາດເຫັນຜົນທີ່ພະລັງນັ້ນເຮັດໃຫ້ເກີດຂຶ້ນ.
8. ໃນຄຳພີໄບເບິນມີການເອີ້ນພະລັງຂອງພະເຈົ້າໂດຍໃຊ້ພາບປຽບທຽບກັບຫຍັງ ແລະເປັນຫຍັງການປຽບທຽບແບບນີ້ຈຶ່ງເໝາະສົມ?
8 ພະເຢໂຫວາໃຊ້ພະລັງບໍລິສຸດຂອງເພິ່ນເຮັດຫຍັງກໍໄດ້. ເພິ່ນສາມາດໃຊ້ພະລັງນັ້ນເພື່ອເຮັດໃຫ້ຄວາມຕ້ອງການຂອງເພິ່ນສຳເລັດ. ໃນຄຳພີໄບເບິນມີການເອີ້ນພະລັງຂອງພະເຈົ້າໂດຍໃຊ້ພາບປຽບທຽບທີ່ເໝາະສົມວ່າ “ນິ້ວມືຂອງພະເຈົ້າ” “ມືທີ່ແຂງແຮງ” ຫຼື “ແຂນທີ່ຢຽດອອກ” ຂອງເພິ່ນ. (ລູກາ 11:20, ໄຂເງື່ອນ; ພະບັນຍັດ 5:15, ໄຂເງື່ອນ; ເພງສັນລະເສີນ 8:3) ຄືກັບທີ່ຄົນໃຊ້ມືເຮັດວຽກຫຼາຍຢ່າງໄດ້ ທັງວຽກທີ່ຕ້ອງໃຊ້ແຮງແລະວຽກທີ່ລະອຽດອ່ອນ ຄ້າຍຄືກັນ ພະເຈົ້າກໍໃຊ້ພະລັງຂອງເພິ່ນເຮັດໃຫ້ຫຼາຍໆຢ່າງສຳເລັດໄດ້ຕາມຄວາມຕ້ອງການຂອງເພິ່ນ ເຊັ່ນ: ສ້າງອາໂຕມນ້ອຍໆ ຫຼືແຍກທະເລແດງ ຫຼືເຮັດໃຫ້ຄລິດສະຕຽນໃນສະຕະວັດທຳອິດເວົ້າພາສາຕ່າງປະເທດໄດ້.
9. ພະເຢໂຫວາໃຊ້ອຳນາດຂອງເພິ່ນປົກຄອງໃຜແດ່?
9 ພະເຢໂຫວາຍັງໃຊ້ອຳນາດຂອງເພິ່ນໃນຖານະເປັນຜູ້ປົກຄອງສູງສຸດໃນເອກະພົບ. ໃຫ້ຄິດເບິ່ງວ່າ ພະເຢໂຫວາປົກຄອງທູດສະຫວັນຫຼາຍລ້ານອົງແລະຜູ້ຮັບໃຊ້ຫຼາຍລ້ານຄົນໃນໂລກທີ່ເຕັມໃຈເຮັດທຸກຢ່າງຕາມຄຳສັ່ງຂອງເພິ່ນ. ໃນຄຳພີໄບເບິນມັກປຽບທຽບຜູ້ຮັບໃຊ້ຂອງພະເຈົ້າທີ່ເປັນມະນຸດວ່າເປັນກອງທັບໃຫຍ່. (ເພງສັນລະເສີນ 68:11; 110:3) ແຕ່ຖ້າທຽບກັບທູດສະຫວັນແລ້ວ ມະນຸດກໍບໍ່ມີລິດເດດຫຍັງ. ຕົວຢ່າງເຊັ່ນ ຕອນທີ່ກອງທັບອັດຊີເຣຍມາໂຈມຕີປະຊາຊົນຂອງພະເຈົ້າ ທູດສະຫວັນອົງດຽວໄດ້ຂ້າທະຫານ 185.000 ຄົນຕາຍໃນຄືນດຽວ. (2 ກະສັດ 19:35) ທູດສະຫວັນຂອງພະເຈົ້າມີ “ລິດເດດຫຼາຍ.”—ເພງສັນລະເສີນ 103:19, 20
10. (ກ) ເປັນຫຍັງຈຶ່ງເອີ້ນພະເຈົ້າຜູ້ມີລິດເດດສູງສຸດວ່າພະເຢໂຫວາຜູ້ບັນຊາການກອງທັບ? (ຂ) ໃຜເປັນຜູ້ມີລິດເດດຫຼາຍທີ່ສຸດໃນທຸກສິ່ງທີ່ພະເຢໂຫວາສ້າງ?
10 ມີທູດສະຫວັນຫຼາຍສ່ຳໃດ? ຜູ້ພະຍາກອນດານີເອນໄດ້ເຫັນນິມິດກ່ຽວກັບສະຫວັນ. ໃນນັ້ນລາວໄດ້ເຫັນທູດສະຫວັນຫຼາຍກວ່າ 100 ລ້ານອົງຢູ່ຕໍ່ໜ້າບັນລັງຂອງພະເຢໂຫວາ. ແຕ່ນີ້ບໍ່ໄດ້ໝາຍຄວາມວ່າລາວເຫັນທູດສະຫວັນທຸກອົງທີ່ພະເຢໂຫວາສ້າງ. (ດານີເອນ 7:10) ດັ່ງນັ້ນກໍອາດຈະມີທູດສະຫວັນຫຼາຍຮ້ອຍລ້ານອົງ. ຍ້ອນແນວນີ້ຈຶ່ງມີການເອີ້ນພະເຈົ້າວ່າ ພະເຢໂຫວາຜູ້ບັນຊາການກອງທັບ. ຕຳແໜ່ງນີ້ຊ່ວຍເຮົາໃຫ້ຄິດເຖິງຜູ້ບັນຊາການກອງທັບທູດສະຫວັນທີ່ມີຈຳນວນຫຼາຍແທ້ຫຼາຍວ່າ. ນອກຈາກນັ້ນ ພະເຈົ້າຍັງແຕ່ງຕັ້ງຜູ້ໜຶ່ງໃຫ້ມີອຳນາດເໜືອທູດສະຫວັນເຫຼົ່ານີ້ທັງໝົດ ຜູ້ນັ້ນແມ່ນລູກຊາຍທີ່ເພິ່ນຮັກເຊິ່ງເປັນ “ຜູ້ທຳອິດທີ່ຖືກສ້າງກ່ອນທຸກສິ່ງ.” (ໂກໂລຊາຍ 1:15) ພະເຢຊູໃນຖານະອັກຄະທູດສະຫວັນ ຫຼືເປັນຫົວໜ້າທູດສະຫວັນທັງໝົດ ຫົວໜ້າເຊຣາຟີມ ແລະຫົວໜ້າເຄຣູບ ພະເຢຊູມີລິດເດດຫຼາຍທີ່ສຸດໃນທຸກສິ່ງທີ່ພະເຢໂຫວາສ້າງ.
11, 12. (ກ) ຖ້ອຍຄຳຂອງພະເຈົ້າມີພະລັງແນວໃດ? (ຂ) ພະເຢຊູເວົ້າແນວໃດກ່ຽວກັບລິດເດດຂອງພະເຢໂຫວາ?
11 ພະເຢໂຫວາຍັງໃຊ້ລິດເດດຂອງເພິ່ນໃນອີກທາງໜຶ່ງ. ເຮັບເຣີ 4:12 ບອກວ່າ: “ຖ້ອຍຄຳຂອງພະເຈົ້າມີຊີວິດ ມີພະລັງຫຼາຍ.” ເຈົ້າເຫັນບໍວ່າຖ້ອຍຄຳຫຼືຂ່າວສານທີ່ພະເຢໂຫວາໃຫ້ຂຽນຂຶ້ນມາມີພະລັງຫຼາຍສ່ຳໃດ. ຂ່າວສານນັ້ນມີຢູ່ໃນຄຳພີໄບເບິນຈົນຮອດທຸກມື້ນີ້ເຊິ່ງເຮັດໃຫ້ເຮົາມີຄວາມເຊື່ອເຂັ້ມແຂງ ແລະຊ່ວຍເຮົາໃຫ້ປ່ຽນແປງໂຕເອງໄດ້. ອັກຄະສາວົກໂປໂລໄດ້ເຕືອນເພື່ອນຮ່ວມຄວາມເຊື່ອໃຫ້ລະວັງຄົນທີ່ໃຊ້ຊີວິດແບບຜິດສິນລະທຳ. ລາວເວົ້າຕື່ມອີກວ່າ: “ພວກເຈົ້າບາງຄົນເຄີຍເປັນແບບນັ້ນ.” (1 ໂກຣິນໂທ 6:9-11) ແມ່ນແລ້ວ “ຖ້ອຍຄຳຂອງພະເຈົ້າ” ມີພະລັງໃນໂຕເຂົາເຈົ້າແລະຊ່ວຍເຂົາເຈົ້າໃຫ້ປ່ຽນແປງໂຕເອງໄດ້.
12 ພະເຢໂຫວາມີລິດເດດຫຼາຍແທ້ໆແລະເພິ່ນໃຊ້ລິດເດດຢ່າງດີສະເໝີ ແລະບໍ່ມີຫຍັງຈະຂັດຂວາງເພິ່ນໄດ້. ພະເຢຊູເວົ້າວ່າ: “ພະເຈົ້າເຮັດໄດ້ທຸກຢ່າງ.” (ມັດທາຍ 19:26) ພະເຢໂຫວາໃຊ້ລິດເດດຂອງເພິ່ນເພື່ອເຮັດຫຍັງແດ່?
ພະເຈົ້າໃຊ້ລິດເດດເພື່ອເຮັດສິ່ງທີ່ເພິ່ນຕ້ອງການ
13, 14. (ກ) ເປັນຫຍັງເຮົາເວົ້າວ່າພະເຢໂຫວາບໍ່ໄດ້ເປັນພຽງບໍ່ເກີດພະລັງທີ່ບໍ່ມີໂຕຕົນ? (ຂ) ພະເຢໂຫວາໃຊ້ລິດເດດຂອງເພິ່ນໃນທາງໃດແດ່?
13 ພະລັງຂອງພະເຢໂຫວາຍິ່ງໃຫຍ່ກວ່າພະລັງໃດໆທັງໝົດ. ພະເຢໂຫວາບໍ່ແມ່ນພະລັງທີ່ບໍ່ມີໂຕຕົນ ຫຼືເປັນພຽງບໍ່ເກີດຂອງພະລັງເທົ່ານັ້ນ ແຕ່ເພິ່ນເປັນພະເຈົ້າມີຄວາມຄິດ ຄວາມຮູ້ສຶກ ແລະຄວບຄຸມລິດເດດຂອງເພິ່ນໄດ້ຢ່າງສົມບູນແບບ. ແລ້ວມີຫຍັງກະຕຸ້ນເພິ່ນໃຫ້ໃຊ້ລິດເດດນັ້ນ?
14 ຄືກັບທີ່ເຮົາຈະເບິ່ງນຳກັນ ພະເຢໂຫວາໃຊ້ລິດເດດເພື່ອສ້າງ ທຳລາຍ ປົກປ້ອງ ແລະຟື້ນຟູ. ນີ້ໝາຍຄວາມວ່າເພິ່ນໃຊ້ລິດເດດເຮັດຫຍັງກໍໄດ້ເພື່ອເຮັດໃຫ້ຄວາມຕ້ອງການທີ່ດີໆຂອງເພິ່ນເກີດຂຶ້ນແທ້. (ເອຊາຢາ 46:10) ບາງເທື່ອ ພະເຢໂຫວາໃຊ້ລິດເດດເພື່ອສອນເຮົາເລື່ອງທີ່ສຳຄັນກ່ຽວກັບຄຸນລັກສະນະແລະມາດຕະຖານຂອງເພິ່ນ. ແຕ່ສິ່ງທີ່ສຳຄັນແມ່ນເພິ່ນໃຊ້ລິດເດດເພື່ອເຮັດໃຫ້ຄວາມຕ້ອງການຂອງເພິ່ນສຳເລັດ ເຮັດໃຫ້ຊື່ຂອງເພິ່ນໄດ້ຮັບຄວາມນັບຖືໂດຍທາງການປົກຄອງຂອງເມຊີອາ ແລະສະແດງໃຫ້ເຫັນວ່າການປົກຄອງຂອງເພິ່ນດີທີ່ສຸດ. ດັ່ງນັ້ນ ບໍ່ມີຫຍັງຈະຂັດຂວາງຄວາມຕ້ອງການຂອງເພິ່ນໄດ້.
15. ພະເຢໂຫວາໃຊ້ລິດເດດຂອງເພິ່ນເພື່ອຊ່ວຍຜູ້ຮັບໃຊ້ຂອງເພິ່ນແນວໃດ ແລະຕົວຢ່າງຂອງເອລີຢາຊ່ວຍໃຫ້ເຮົາເຫັນເລື່ອງນີ້ແນວໃດ?
15 ພະເຢໂຫວາຍັງໃຊ້ລິດເດດເພື່ອປະໂຫຍດຂອງເຮົາແຕ່ລະຄົນ. ຂໍໃຫ້ສັງເກດໃນ 2 ຂ່າວຄາວ 16:9 ບອກວ່າ: “ພະເຢໂຫວາແນມເບິ່ງທົ່ວໂລກເພື່ອສະແດງລິດເດດຂອງເພິ່ນໂດຍຊ່ວຍຄົນທີ່ຮັບໃຊ້ເພິ່ນສຸດຫົວໃຈ.” ປະສົບການຂອງເອລີຢາທີ່ເວົ້າເຖິງໃນຕອນທຳອິດເປັນຕົວຢ່າງໜຶ່ງໃນເລື່ອງນີ້. ເປັນຫຍັງພະເຢໂຫວາເຮັດໃຫ້ລາວເຫັນລິດເດດທີ່ຍິ່ງໃຫຍ່ຂອງເພິ່ນ? ກໍຍ້ອນວ່າລາຊີນີເຢເຊເບນຜູ້ຊົ່ວຮ້າຍໄດ້ສາບານວ່າຈະຂ້າເອລີຢາ. ຜູ້ພະຍາກອນເອລີຢາຈຶ່ງໜີເພື່ອເອົາຊີວິດລອດ. ລາວຮູ້ສຶກໂດດດ່ຽວ ຢ້ານ ແລະທໍ້ໃຈ. ລາວຮູ້ສຶກວ່າວຽກໜັກທີ່ລາວເຮັດບໍ່ມີປະໂຫຍດຫຍັງເລີຍ. ພະເຢໂຫວາປອບໃຈເອລີຢາຜູ້ທີ່ທຸກໃຈຜູ້ນີ້ໂດຍໃຫ້ລາວເຫັນວ່າເພິ່ນມີລິດເດດຫຼາຍສ່ຳໃດ. ພະເຢໂຫວາໃຊ້ລົມພາຍຸ ແຜ່ນດິນໄຫວ ແລະໄຟເພື່ອເຮັດໃຫ້ລາວຮູ້ວ່າຜູ້ທີ່ມີລິດເດດຫຼາຍທີ່ສຸດໃນເອກະພົບຢູ່ບ່ອນນັ້ນກັບລາວ. ຄັນຊັ້ນ ຖ້າພະເຈົ້າຜູ້ມີລິດເດດຍິ່ງໃຫຍ່ຢູ່ຝ່າຍລາວ ລາວກໍບໍ່ຕ້ອງຢ້ານເຢເຊເບນ.—1 ກະສັດ 19:1-12 b
16. ເປັນຫຍັງການຄິດເຖິງລິດເດດທີ່ຍິ່ງໃຫຍ່ຂອງພະເຢໂຫວາເຮັດໃຫ້ເຮົາໄດ້ກຳລັງໃຈ?
16 ເຖິງວ່າຕອນນີ້ພະເຢໂຫວາບໍ່ໄດ້ເຮັດການອັດສະຈັນແລ້ວ ແຕ່ເພິ່ນກໍບໍ່ໄດ້ປ່ຽນໄປ. (1 ໂກຣິນໂທ 13:8) ເພິ່ນຍັງຢາກໃຊ້ລິດເດດຂອງເພິ່ນເພື່ອຊ່ວຍຄົນເຫຼົ່ານັ້ນທີ່ຮັກເພິ່ນ. ເຖິງວ່າເພິ່ນຢູ່ໃນສະຫວັນ ແຕ່ເພິ່ນກໍບໍ່ໄດ້ຢູ່ໄກຈາກເຮົາ. ໄລຍະທາງລະຫວ່າງເຮົາກັບເພິ່ນບໍ່ໄດ້ເປັນອຸປະສັກ ຍ້ອນລິດເດດຂອງເພິ່ນບໍ່ມີຂີດຈຳກັດ ແລະ “ພະເຢໂຫວາຢູ່ໃກ້ຄົນທີ່ຮ້ອງຫາເພິ່ນ.” (ເພງສັນລະເສີນ 145:18) ມີເທື່ອໜຶ່ງທີ່ຜູ້ພະຍາກອນດານີເອນຂໍໃຫ້ພະເຢໂຫວາຊ່ວຍ ທູດສະຫວັນອົງໜຶ່ງໄດ້ມາຫາລາວກ່ອນຈະອະທິດຖານຈົບຊ້ຳ! (ດານີເອນ 9:20-23) ບໍ່ມີຫຍັງຂັດຂວາງພະເຢໂຫວາບໍ່ໃຫ້ຊ່ວຍແລະໃຫ້ກຳລັງໃຈຄົນເຫຼົ່ານັ້ນທີ່ເພິ່ນຮັກໄດ້.—ເພງສັນລະເສີນ 118:6
ລິດເດດຂອງພະເຈົ້າເຮັດໃຫ້ເຮົາບໍ່ສາມາດໃກ້ຊິດກັບເພິ່ນບໍ?
17. ເປັນຫຍັງລິດເດດຂອງພະເຢໂຫວາຄວນເຮັດໃຫ້ເຮົາຮູ້ສຶກຢ້ານເພິ່ນ ແຕ່ລິດເດດນີ້ບໍ່ຄວນເຮັດໃຫ້ເຮົາຢ້ານເພິ່ນຈົນບໍ່ກ້າເຮັດຫຍັງ?
17 ລິດເດດຂອງພະເຈົ້າຄວນເຮັດໃຫ້ເຮົາຢ້ານເພິ່ນບໍ? ຄຳຕອບແມ່ນທັງຢ້ານແລະບໍ່ຢ້ານ. ເຮົາຢ້ານກໍຍ້ອນເຮົາຄວນຢ້ານຢຳແລະນັບຖືເພິ່ນຈາກໃຈ ຄືກັບທີ່ເຮົາໄດ້ຮຽນໄປແລ້ວແບບຜ່ານໆໃນບົດກ່ອນ. ຄຳພີໄບເບິນບອກວ່າຄວາມຢ້ານຢຳຫຼືຄວາມນັບຖືແບບນັ້ນ “ເປັນຈຸດເລີ່ມຕົ້ນຂອງສະຕິປັນຍາ.” (ເພງສັນລະເສີນ 111:10) ແຕ່ເຮົາບໍ່ຄວນຢ້ານລິດເດດຂອງເພິ່ນຈົນເຮັດໃຫ້ເຮົາບໍ່ກ້າມາເປັນໝູ່ກັບເພິ່ນ.
18. (ກ) ເປັນຫຍັງຫຼາຍຄົນຈຶ່ງບໍ່ໄວ້ໃຈຜູ້ມີອຳນາດ? (ຂ) ເຮົາຮູ້ໄດ້ແນວໃດວ່າພະເຢໂຫວາບໍ່ມີທາງໃຊ້ອຳນາດຂອງເພິ່ນໃນທາງທີ່ຜິດ?
18 ໃນປີ 1887 ນັກປະຫວັດສາດຄົນອັງກິດທີ່ຊື່ຫຼອດແອັກທອນ ໄດ້ຂຽນວ່າ “ອຳນາດມັກຈະເຮັດໃຫ້ເສື່ອມເສຍ ແລະແຮ່ງມີອຳນາດຫຼາຍກໍແຮ່ງເຮັດໃຫ້ມີການກິນສິນບົນຫຼາຍ.” ຫຼາຍຄົນຍົກເອົາຄຳເວົ້າຂອງລາວມາເວົ້າຄືນເລື້ອຍໆ ຍ້ອນມັນເປັນແນວນັ້ນແທ້ໆ. ມະນຸດບໍ່ສົມບູນແບບມັກໃຊ້ອຳນາດໃນທາງທີ່ຜິດຄືກັບທີ່ເຫັນໃນປະຫວັດສາດມາຕະຫຼອດ. (ປັນຍາຈານ 4:1; 8:9) ຍ້ອນແນວນີ້ ຫຼາຍຄົນຈຶ່ງບໍ່ໄວ້ໃຈຄົນທີ່ມີອຳນາດແລະບໍ່ຢາກຮູ້ຈັກເຂົາເຈົ້າ. ພະເຢໂຫວາມີອຳນາດຫຼາຍທີ່ສຸດ. ແລ້ວເພິ່ນໃຊ້ອຳນາດຂອງເພິ່ນແບບຜິດໆບໍ? ບໍ່! ຄືກັບທີ່ເຮົາໄດ້ເບິ່ງໄປແລ້ວ ພະເຢໂຫວາບໍລິສຸດແລະຈະບໍ່ມີທາງເຮັດຊົ່ວເດັດຂາດ. ເພິ່ນບໍ່ຄືກັບມະນຸດທີ່ບໍ່ສົມບູນແບບເຊິ່ງມີອຳນາດໃນໂລກຊົ່ວນີ້. ເພິ່ນບໍ່ເຄີຍໃຊ້ອຳນາດຂອງເພິ່ນໃນທາງທີ່ຜິດ ແລະເພິ່ນຈະບໍ່ມີທາງເຮັດແນວນັ້ນຈັກເທື່ອ.
19, 20. (ກ) ພະເຢໂຫວາໃຊ້ລິດເດດພ້ອມກັບຄຸນລັກສະນະຫຍັງແດ່ ແລະເປັນຫຍັງຈຶ່ງເຮັດໃຫ້ເຮົາສະບາຍໃຈ? (ຂ) ເຈົ້າອາດຍົກຕົວຢ່າງຫຍັງທີ່ສະແດງວ່າພະເຢໂຫວາຄວບຄຸມໂຕເອງ ແລະເປັນຫຍັງເລື່ອງນີ້ຈຶ່ງເຮັດໃຫ້ເຈົ້າປະທັບໃຈ?
19 ຢ່າລືມວ່າພະເຢໂຫວາບໍ່ໄດ້ມີແຕ່ລິດເດດຢ່າງດຽວ. ເຮົາຍັງຈະໄດ້ຮຽນເລື່ອງຄວາມຍຸຕິທຳ ສະຕິປັນຍາ ແລະຄວາມຮັກຂອງເພິ່ນນຳ. ເຮົາບໍ່ຄວນຄິດວ່າພະເຢໂຫວາສະແດງຄຸນລັກສະນະຂອງເພິ່ນໃນແບບທີ່ເຂັ້ມງວດຫຼືບໍ່ມີຄວາມຮູ້ສຶກ ຄືກັບວ່າເພິ່ນສະແດງຄຸນລັກສະນະນີ້ເທື່ອລະຢ່າງ. ເຮົາຈະເຫັນໃນບົດຕໍ່ໆໄປວ່າພະເຢໂຫວາໃຊ້ລິດເດດຂອງເພິ່ນໄປພ້ອມໆກັບຄວາມຍຸຕິທຳ ສະຕິປັນຍາ ແລະຄວາມຮັກຂອງເພິ່ນສະເໝີ. ຕອນນີ້ໃຫ້ຄິດເຖິງອີກຄຸນລັກສະນະໜຶ່ງຂອງພະເຢໂຫວາທີ່ຜູ້ປົກຄອງໃນໂລກສ່ວນໃຫຍ່ບໍ່ໄດ້ສະແດງອອກ ນັ້ນແມ່ນການຄວບຄຸມໂຕເອງ.
20 ເຈົ້າຈະຮູ້ສຶກແນວໃດ ຖ້າເຈົ້າເຫັນຜູ້ຊາຍຄົນໜຶ່ງໂຕໃຫຍ່ແລະແຂງແຮງຫຼາຍ? ທຳອິດ ເຈົ້າຄືຊິຢ້ານລາວ ແຕ່ເມື່ອເຈົ້າຮູ້ຈັກລາວຫຼາຍຂຶ້ນ ເຈົ້າກໍເຫັນວ່າລາວເປັນຄົນອ່ອນໂຍນ. ລາວພ້ອມແລະມັກໃຊ້ກຳລັງຂອງລາວເພື່ອປົກປ້ອງແລະຊ່ວຍເຫຼືອຄົນອື່ນ ໂດຍສະເພາະແມ່ນຄົນທີ່ອ່ອນແອແລະປົກປ້ອງໂຕເອງບໍ່ໄດ້. ລາວບໍ່ເຄີຍໃຊ້ກຳລັງຂອງໂຕເອງເຮັດແນວບໍ່ດີ. ຕອນທີ່ເຈົ້າເຫັນລາວຖືກໃສ່ຮ້າຍແບບບໍ່ມີເຫດຜົນ ລາວກໍຍັງໃຈເຢັນໆ ອ່ອນໂຍນແລະໃຈດີດ້ວຍຊ້ຳ. ເຈົ້າຄິດວ່າຖ້າເຈົ້າເຈິເລື່ອງແບບນັ້ນເຈົ້າຈະສະແດງຄວາມອ່ອນໂຍນແລະຄວບຄຸມໂຕເອງຄືລາວໄດ້ບໍ ໂດຍສະເພາະຖ້າເຈົ້າແຂງແຮງຄືລາວ. ແຮ່ງເຈົ້າຮູ້ຈັກລາວຫຼາຍຂຶ້ນ ເຈົ້າກໍແຮ່ງຢາກເປັນໝູ່ກັບລາວ. ເຖິງວ່າພະເຢໂຫວາມີລິດເດດສູງສຸດ ແຕ່ເຮົາກໍມີເຫດຜົນຫຼາຍທີ່ຈະໃກ້ຊິດກັບເພິ່ນ. ຂໍໃຫ້ຄິດເຖິງຊື່ຂອງບົດນີ້ທີ່ກົງກັບຂໍ້ຄຳພີທີ່ວ່າ: “ພະເຢໂຫວາມີລິດເດດຫຼາຍແລະບໍ່ໃຈຮ້າຍງ່າຍໆ.” (ນາຮູມ 1:3) ເພິ່ນບໍ່ໄດ້ຟ້າວໃຊ້ລິດເດດຂອງເພິ່ນຈັດການກັບຄົນອື່ນໄວໆ ແມ່ນແຕ່ກັບຄົນຊົ່ວ. ເພິ່ນອ່ອນໂຍນແລະເມດຕາ. ເພິ່ນຍັງເຮັດໃຫ້ເຫັນວ່າເພິ່ນ “ບໍ່ໃຈຮ້າຍງ່າຍໆ” ເຖິງວ່າມະນຸດຈະເຮັດຫຼາຍຢ່າງທີ່ຍົວະໃຫ້ເພິ່ນໃຈຮ້າຍກໍຕາມ.—ເພງສັນລະເສີນ 78:37-41
21. ເປັນຫຍັງພະເຢໂຫວາບໍ່ໄດ້ບັງຄັບເຮົາໃຫ້ຮັບໃຊ້ເພິ່ນ ແລະເລື່ອງນີ້ບອກໃຫ້ເຮົາຮູ້ຫຍັງກ່ຽວກັບເພິ່ນ?
21 ຂໍໃຫ້ເບິ່ງອີກວິທີໜຶ່ງທີ່ພະເຢໂຫວາຄວບຄຸມໂຕເອງ. ຖ້າເຈົ້າມີອຳນາດບໍ່ຈຳກັດ ເຈົ້າຄິດວ່າເຈົ້າອາດຈະບັງຄັບຄົນອື່ນໃຫ້ເຮັດຕາມທີ່ເຈົ້າຕ້ອງການບໍ? ພະເຢໂຫວາມີລິດເດດສູງສຸດ ແຕ່ເພິ່ນບໍ່ເຄີຍບັງຄັບຜູ້ໃດໃຫ້ຮັບໃຊ້ເພິ່ນ. ເຖິງວ່າການຮັບໃຊ້ພະເຈົ້າເປັນວິທີດຽວເທົ່ານັ້ນທີ່ຈະເຮັດໃຫ້ໄດ້ຊີວິດຕະຫຼອດໄປ ແຕ່ພະເຢໂຫວາກໍບໍ່ໄດ້ບັງຄັບເຮົາໃຫ້ຮັບໃຊ້ເພິ່ນ. ແທນທີ່ຈະເຮັດແບບນັ້ນ ຍ້ອນເພິ່ນເມດຕາເຮົາເພິ່ນຈຶ່ງໃຫ້ກຽດເຮົາແຕ່ລະຄົນມີອິດສະຫຼະທີ່ຈະເລືອກເອງ. ເພິ່ນບອກໃຫ້ເຮົາຮູ້ວ່າຈະມີຜົນດີແນວໃດຖ້າເຮົາເລືອກທີ່ຈະຮັບໃຊ້ເພິ່ນ ແລະຈະມີຜົນເສຍແນວໃດຖ້າເຮົາເລືອກທີ່ຈະບໍ່ຮັບໃຊ້ເພິ່ນ. ເພິ່ນໃຫ້ໂອກາດເຮົາໄດ້ເລືອກເອົາເອງ. (ພະບັນຍັດ 30:19, 20) ພະເຢໂຫວາບໍ່ມັກຖ້າເຮົາຮັບໃຊ້ເພິ່ນຍ້ອນຖືກບັງຄັບຫຼືຍ້ອນຢ້ານລິດເດດທີ່ຍິ່ງໃຫຍ່ຂອງເພິ່ນ. ກົງກັນຂ້າມ ເພິ່ນຊອກຫາຜູ້ທີ່ເຕັມໃຈຮັບໃຊ້ເພິ່ນດ້ວຍຄວາມຮັກ.—2 ໂກຣິນໂທ 9:7
22, 23. (ກ) ແມ່ນຫຍັງສະແດງວ່າພະເຢໂຫວາຍິນດີເອົາອຳນາດຂອງເພິ່ນໃຫ້ຄົນອື່ນ? (ຂ) ເຮົາຈະເບິ່ງເລື່ອງຫຍັງໃນບົດຕໍ່ໄປ?
22 ຕອນນີ້ໃຫ້ເຮົາເບິ່ງເຫດຜົນສຸດທ້າຍທີ່ເຮົາຢ້ານພະເຢໂຫວາພະເຈົ້າຜູ້ມີລິດເດດສູງສຸດ. ຄົນທີ່ມີອຳນາດມັກຢ້ານວ່າຈະຕ້ອງແບ່ງອຳນາດຂອງໂຕເອງໃຫ້ຄົນອື່ນ. ແຕ່ພະເຢໂຫວາຍິນດີເອົາອຳນາດໃຫ້ຜູ້ນະມັດສະການທີ່ສັດຊື່ຂອງເພິ່ນ ເຊັ່ນ ເພິ່ນໃຫ້ອຳນາດກັບລູກຊາຍຂອງເພິ່ນ. (ມັດທາຍ 28:18) ພະເຢໂຫວາຍັງເອົາອຳນາດໃຫ້ຜູ້ຮັບໃຊ້ຂອງເພິ່ນໃນວິທີອື່ນໆອີກ. ຄຳພີໄບເບິນບອກວ່າ: “ພະເຢໂຫວາ ພະອົງຍິ່ງໃຫຍ່ ມີລິດເດດ ມີກຽດຕິຍົດແລະສະຫງ່າລາສີ ຍ້ອນວ່າທຸກສິ່ງທີ່ຢູ່ໃນສະຫວັນແລະຢູ່ໃນໂລກເປັນຂອງພະອົງ. . . . ພະອົງມີພະລັງອຳນາດ. ພະອົງສາມາດເຮັດໃຫ້ໃຜກໍໄດ້ຍິ່ງໃຫຍ່ແລະເຂັ້ມແຂງຂຶ້ນ.”—1 ຂ່າວຄາວ 29:11, 12
23 ແມ່ນແລ້ວ ພະເຢໂຫວາຍິນດີທີ່ຈະໃຫ້ກຳລັງກັບເຈົ້ານຳ. ເພິ່ນເຖິງຂັ້ນວ່າໃຫ້ “ກຳລັງທີ່ຫຼາຍກວ່າປົກກະຕິ” ກັບຄົນເຫຼົ່ານັ້ນທີ່ຢາກຮັບໃຊ້ເພິ່ນ. (2 ໂກຣິນໂທ 4:7) ເຈົ້າຄືຊິຢາກໃກ້ຊິດກັບພະເຈົ້າຜູ້ມີລິດເດດຫຼາຍທີ່ໃຊ້ລິດເດດໃນທາງທີ່ດີແລະດ້ວຍຄວາມຮັກສະເໝີ. ໃນບົດຕໍ່ໄປ ເຮົາຈະມາເບິ່ງວ່າພະເຢໂຫວາໃຊ້ລິດເດດຂອງເພິ່ນແນວໃດໃນການສ້າງສິ່ງຕ່າງໆ.
a ຄຳພາສາກຣີກທີ່ແປວ່າ “ຜູ້ມີລິດເດດສູງສຸດ” ມີຄວາມໝາຍຕາມໂຕວ່າ “ຜູ້ປົກຄອງທຸກສິ່ງ; ຜູ້ມີລິດເດດທຸກຢ່າງ.”
b ຄຳພີໄບເບິນບອກວ່າ: “ພະເຢໂຫວາບໍ່ຢູ່ໃນລົມ . . . ແຜ່ນດິນໄຫວ . . . ໄຟ.” ຜູ້ຮັບໃຊ້ຂອງພະເຢໂຫວາບໍ່ຄືກັບພວກທີ່ເບິ່ງວ່າພະລັງໃນທຳມະຊາດເປັນຄືກັບພະເຈົ້າແລະນະມັດສະການສິ່ງເຫຼົ່ານັ້ນ. ພະເຢໂຫວາຍິ່ງໃຫຍ່ກວ່າທຸກສິ່ງທີ່ເພິ່ນສ້າງຂຶ້ນມາ.—1 ກະສັດ 8:27
