1, 2. Ki cosnan asombroso Elias a yega di mira den su bida, pero ki susesonan espectacular el a presencia for di e cueba riba Sero Horeb?

ELIAS a yega di mira cosnan asombroso den pasado. El a mira raaf trece cuminda p’e dos biaha pa dia caminda e tawata sconde. Durante un periodo largo di scarsedad di cuminda el a mira con nan tawata saca hariña y azeta for di dos conchi sin cu esakinan a bira bashi. Asta el a mira candela cai for di shelo como contesta riba su oracion. (1 Reinan, capitulo 17 y 18) Toch, nunca Elias a yega di mira un cos asin’aki.

² Ora el a buk banda di e entrada di un cueba riba Sero Horeb, el a presencia un serie di suseso espectacular. Prome tawatin un biento cu lo mester a produci un zonido spantoso, manera cacho cu ta yora, pasobra e tawata asina poderoso cu el a split sero y kibra baranca. Despues a bin un temblor cu a los forsanan extraordinario cu tin wanta bou di capa di tera. Finalmente a bin un candela. Ora esaki tawata pasa door di e region, probablemente Elias a sinti rafaga di biento cayente cu su calor intenso a produci.—1 Reinan 19:8-12.

3. Elias a mira manifestacion di ki cualidad dibino, y unda nos por mira manifestacion di e mesun cualidad aki?

³ Tur e diferente acontecementonan aki cu Elias a presencia tawatin un cos en comun: nan tawata demostracionnan di Yehova Dios su gran poder. Claro cu nos no tin nodi mira un milager pa compronde cu Dios ta posee e cualidad aki. E ta claramente bisto. Bijbel ta bisa nos cu creacion ta duna prueba di Yehova su “poder eterno y naturalesa dibino.” (Romanonan 1:20) Djis pensa riba e lus skerpi di lamper y e zonido masha fuerte di strena, e caida mahestuoso di un waterval imponente, e inmensidad impresionante di un shelo yen di streya! Bo no ta mira un manifestacion di Dios su poder den  e cosnan aki? Toch, masha poco hende den e mundo djawe ta realmente reconoce e poder di Dios. Y menos hende ainda tin un punto di bista corecto tocante dje. Pero si nos ta compronde kico e cualidad di Dios aki ta, nos ta haya hopi motibo pa hala mas serca Yehova. Den e seccion aki nos lo analisa Yehova su poder incomparabel detayadamente.

4, 5. (a) Ki conexion tin entre Yehova su nomber y su poder? (b) Pakico toro ta un simbolo adecua di Yehova su poder?

⁴ Yehova su poder ta unico. Yeremias 10:6 ta bisa: “No tin ningun manera bo, o SEÑOR; grandi bo ta, y bo nomber ta grandi den poder.” Tuma nota cu poder ta conecta cu Yehova su nomber, y manera nos ta corda, su nomber evidentemente ta nifica “E Ta Causa pa Bira.” Kico ta permiti Yehova crea cualkier cos cu e kier y bira cualkier cos cu e kier? Esei ta principalmente su poder. Si, Yehova su capasidad di actua, pa realisa su boluntad, ta sin limite. E poder ei ta un di su cualidadnan esencial.

⁵ Pa motibo cu hamas nos lo por compronde e magnitud completo di su poder, Yehova ta uza ilustracion pa yuda nos. Manera nos a mira, e ta uza toro pa simbolisa su poder. (Ezekiel 1:4-10) Esei ta un simbolo adecua, pasobra asta un toro cu hende a tam ta keda un animal grandi y fuerte. Masha poco biaha hende den e Palestina di tempo di Bijbel a yega di topa un bestia mas fuerte, esta, si nan a topa uno mes. Pero loke si nan tawata conoce ta un tipo di toro cu tawata hinca mas miedo den hende; un toro salbahe cu entretanto no ta existi mas. (Job 39:9-12) E Emperado Romano Julio Cesar a remarca un biaha cu e toronan aki tawata casi mes grandi cu olifanti. El a skirbi: “Nan tin hopi forsa y tremendo velosidad.” Imagina bo con chikito y debil lo bo sinti bo para banda di un criatura asina!

6. Pakico ta Yehova so tin e titulo di “Todopoderoso”?

 ⁶ Mescos tambe, hende ta insignificante y impotente na comparacion cu Yehova, e Dios di poder. Den su bista, asta nacionnan poderoso ta manera djis un capa fini di stof riba un balansa. (Isaias 40:15) Distinto di cualkier criatura, Yehova su poder no tin limite, pasobra ta e so tin e titulo di “Todopoderoso.” * (Revelacion 15:3) Yehova tin un ‘forsa inmenso’ y masha “tanto poder.” (Isaias 40:26, BPK) E ta e fuente semper abundante y inagotabel di poder. E no ta depende di un fuente externo di energia, pasobra “poder ta pertenece na Dios.” (Salmo 62:11) Pero, ki medio Yehova ta uza pa eherce su poder?

7. Kico ta e spirito santo di Yehova, y ki idea e palabranan di e idiomanan original uza den Bijbel ta duna?

⁷ Yehova ta drama su spirito santo na cantidadnan sin limite. Esaki ta e forsa di Dios den accion. De echo, na Genesis 1:2 di e Traduccion di Mundo Nobo, Bijbel ta referi na dje como e “forsa activo” di Dios. E palabranan original na Hebreo y Griego cu ta ser traduci como “spirito”, den otro contextonan por ser traduci como “biento”, “rosea” y “rafaga.” Segun diccionarionan, e palabranan di e idioma original ta duna e idea di un forsa invisibel den accion. Mescos cu biento, e spirito di Dios ta invisibel pa nos bista, pero su efectonan ta real y nos por sinti nan.

8. Ki simbolo Bijbel ta uza pa e spirito di Dios, y pakico e comparacionnan aki ta adecua?

⁸ E spirito santo di Dios por obra den un sin fin di manera. Yehova por uz’e pa realisa cualkier proposito cu e tin na mente. Cu bon motibo anto Bijbel ta yama e spirito di Dios simbolicamente su “dede”, su “man poderoso” of su “brasa extendi.” (Lucas 11:20; Deuteronomio 5:15; Salmo 8:3) Mescos  cu un homber por uza su man pa cumpli cu tur tipo di tarea cu ta rekeri varios grado di forsa of delicadesa, asina Dios por uza su spirito pa cumpli cu cualkier proposito. Por ehempel, pa medio di dje el a crea atom sumamente chikito, el a parti Lama Cora na dos, y el a capasita e cristiannan di prome siglo pa papia diferente idioma.

9. Con extenso Yehova su poder di goberna ta?

⁹ Tambe Yehova ta eherce poder pa medio di su autoridad como Soberano di Universo. Bo por imagina bo kico kiermen dispone di miyones y miyones di subdito inteligente y competente cu ta ansioso pa cumpli cu bo ordo? Asina Yehova su poder di goberna ta. E tin sirbidonan humano, y e Scritura sa compara nan cu un ehersito. (Salmo 68:11; 110:3) Pero na comparacion cu angel, ser humano ta un criatura debil. Figura bo, ora e ehersito Asirio a ataca e pueblo di Dios, un angel so a mata 185.000 solda riba un solo anochi! (2 Reinan 19:35) E angelnan di Dios ta “poderoso den fortalesa.”—Salmo 103:19, 20.

10. (a) Pakico e Todopoderoso ta ser yama Yehova di ehersito? (b) Ken ta e ser di mas poderoso cu Yehova a crea?

¹⁰ Cuanto angel tin? Profeta Daniel a haya un vision di shelo den cua el a mira mas cu 100 miyon criatura spiritual dilanti e trono di Yehova, pero no tin ningun indicacion cu ta tur e angelnan cu Dios a crea el a mira. (Daniel 7:10) Podise tin centenares di miyones di angel. Pesei Bijbel ta yama Dios, ‘Yehova di ehersito.’ E titulo aki ta describi su posicion poderoso como Comandante di un enorme cuerpo di angel vigoroso y bon organisa. El a pone su Yiu stima, “e primogenito di henter creacion”, riba tur e criaturanan spiritual aki. (Colosensenan 1:15) Como e arcangel—hefe riba tur angel, serafin y kerubin—Hesus ta e ser di mas poderoso cu Yehova a crea.

11, 12. (a) Den ki manera e palabra di Dios ta eherce poder? (b) Ki testimonio Hesus a duna di e magnitud di Yehova su poder?

¹¹ Yehova tin mas medio pa eherce poder. Hebreonan 4:12 ta bisa: “E palabra di Dios ta bibo y [“ta eherce poder”,  NW].” Bo a yega di para keto na e poder fenomenal di e palabra di Dios, e mensahe inspira pa spirito cu awendia nos por haya preserva den Bijbel? E por fortalece nos, edifica nos fe y yuda nos haci cambionan grandi. Apostel Pablo a spierta su rumannan den fe contra hende cu ta hiba un bida sumamente inmoral. Anto el a agrega: “Y asina algun di boso tawata.” (1 Corintionan 6:9-11) Si, “e palabra di Dios” a eherce su poder den nan y a yuda nan cambia.

¹² Yehova su poder ta asina inmenso y su medionan pa eherce e poder ei ta asina efectivo cu nada no por para den su caminda. Hesus a bisa: “Serca Dios tur cos ta posibel.” (Mateo 19:26) Cu ki proposito Yehova ta uza su poder?

13, 14. (a) Pakico nos por bisa cu Yehova no ta un fuente di poder sin personalidad? (b) Den ki maneranan Yehova ta uza su poder?

¹³ E spirito di Yehova ta mucho mas grandi cu cualkier forsa fisico; y Yehova no ta un forsa sin personalidad, esta, djis un fuente di energia. Dios tin un personalidad y tambe e tin pleno control riba su poder. Pero kico ta impulsa Yehova pa uza e poder aki?

¹⁴ Manera nos lo mira, Dios ta uza poder pa crea, pa destrui, pa proteha, pa restaura—en fin, pa haci tur loke ta cuadra cu su proposito perfecto. (Isaias 46:10) Den algun caso, Yehova ta uza su poder pa revela aspectonan importante di su personalidad y normanan. Principalmente, e ta dirigi su poder pa cumpli cu su boluntad—pa kita tur duda tocante su derecho di goberna, y pa santifica su nomber sagrado pa medio di e Reino Mesianico. No tin nada cu lo por stroba e proposito ei di cumpli.

15. Cu ki proposito Yehova ta uza su poder en conexion cu su sirbidonan, y con esaki a keda demostra den e caso di Elias?

¹⁵ Tambe Yehova ta uza su poder pa beneficio di cada un di nos. Wak kico 2 Cronicanan 16:9 ta bisa: “Wowo di SEÑOR ta move bai bin door di henter tera, pa e por sostene fuertemente  esnan cu nan curason ta completamente di dje.” Nos ta haya un bon ehempel di esaki den e experencia di Elias, menciona na principio. Pakico Yehova a dun’e e demostracion asombroso ei di poder dibino? Wel, e reina malbado Jezabel a hura cu e lo a laga mata Elias. E profeta tawata na careda, huyendo pa scapa su bida. El a sintie su so, e tawata spanta, desanima—como si fuera tur su trabou duro tawata pornada. Pa consola e homber afligi aki, Yehova a recorda Elias na un manera bibo cuanto forsa E tin. E biento, e temblor y e candela a demostra cu Elias por a conta cu respaldo di e Ser mas poderoso di universo. Pakico e mester tawatin miedo di Jezabel, siendo cu e tawatin e Dios todopoderoso na su banda?—1 Reinan 19:1-12. *

16. Pakico nos ta haya un consuelo ora nos pensa riba e gran poder di Yehova?

¹⁶ Aunke aworaki no ta su tempo pa efectua milager, Yehova no a cambia desde e tempo di Elias. (1 Corintionan 13:8) E tin e mesun deseo awe pa uza su poder na fabor di esnan cu ta stim’e. Aunke e ta biba den un region spiritual hopi eleva, e no ta mucho leu for di nos. No tin un limite na su poder, pues distancia no ta un obstaculo. Mas bien, “SEÑOR ta serca di tur esnan cu ta sclama na dje.” (Salmo 145:18) Na un ocasion cu profeta Daniel a suplica Yehova pa yud’e, asta prome cu el a caba di haci oracion, un angel a aparece na dje! (Daniel 9:20-23) Nada por stroba Yehova di yuda y fortalece esnan cu e ta stima.—Salmo 118:6.

17. Den ki sentido e poder di Yehova ta duna nos temor, pero ki clase di temor e no ta lanta?

¹⁷ E echo cu Dios ta asina poderoso mester pone nos haya  temor di dje? Si y no. ‘Si’, den sentido cu e cualidad principal aki ta duna nos motibo amplio pa teme Dios y mustra un respet profundo p’e, manera nos a trata brevemente den e capitulo anterior. Bijbel ta bisa nos cu tal temor ta “e principio di sabiduria.” (Salmo 111:10) Pero e contesta ta ‘no’ tambe, pasobra e poder di Dios no ta duna nos motibo pa sinti un miedo insaludabel di dje of pa keda sin acerc’e.

18. (a) Pakico hopi hende ta desconfia esnan cu tin poder? (b) Con nos por sa cu poder no por corumpi Yehova?

¹⁸ “Poder tin tendencia di corumpi, y poder absoluto ta corumpi na un grado absoluto.” Asina e historiado Ingles Lord Acton a skirbi na 1887. Su declaracion a ser cita hopi biaha, talbes pa motibo cu hopi hende ta mira den dje un berdad innegabel. Hopi bes hende imperfecto ta haci mal uzo di nan poder, manera historia a confirma bes tras bes. (Eclesiastes 4:1; 8:9) Pa e motibo ei, hopi hende ta desconfia esnan cu tin poder, y ta hala leu for di nan. Awor, Yehova tin poder absoluto. Su poder a corumpie na un manera of otro? Claro cu no! Manera nos a mira, e ta santo, totalmente incoruptibel. Yehova no ta manera e homber y mohenan imperfecto cu ta na poder den e mundo corupto aki. Nunca el a haci mal uzo di su poder, y nunca lo e no hacie tampoco.

19, 20. (a) Semper Yehova ta eherce su poder na harmonia cu ki otro cualidadnan, y pakico esei ta un consuelo pa nos? (b) Con nos lo por ilustra Yehova su dominio propio, y pakico e cualidad aki ta atrae bo?

¹⁹ Corda cu poder no ta e unico cualidad principal di Yehova. Ainda nos tin cu studia su husticia, su sabiduria y su amor. Pero nos no mester kere cu Yehova ta manifesta e cualidadnan ei den un forma rigido, mecanico, como si fuera ta un pa un so e por eherce nan. Al contrario, manera nos lo mira den e capitulonan cu ta sigui, semper Yehova ta eherce su poder na harmonia cu su husticia, su sabiduria y su amor. Pensa riba un otro cualidad di Dios y cu masha poco gobernante di e mundo aki ta manifesta: dominio propio.

 ²⁰ Imagina bo cu bo ta topa un homber fuerte y hopi halto. Su aparencia ta intimida bo. Sinembargo, cu tempo bo ta ripara cu e ta amabel. Semper e ta cla y dispuesto pa uza su poder pa yuda y proteha hende, specialmente esnan indefenso y vulnerable. Nunca e ta haci mal uzo di su forsa. Bo ta mira cu nan ta papia malo di dje sin base, y toch e ta keda firme pero calmo, cu dignidad y asta bondadoso. Bo ta cuminsa puntra bo mes si abo lo por mustra e mesun bondad y dominio propio, specialmente si bo ta mes fuerte cu ne! Segun cu bo ta conoce un hende asina, lo bo no cuminsa sinti bo atrai na dje? Nos tin mucho mas motibo pa hala serca Yehova, e Dios todopoderoso. Considera e frase completo riba cua e titulo di e capitulo aki ta basa: “SEÑOR no ta rabia lihe  y ta grandi den poder.” (Nahum 1:3) Yehova no ta lihe pa uza su poder contra hende, ni sikiera contra e malbadonan. E tin un genio suave y ta bondadoso. El a demostra cu e “no ta rabia lihe” ni ora e ser proboca bes tras bes.—Salmo 78:37-41.

21. Pakico Yehova no ta forsa hende pa haci su boluntad, y kico esaki ta siña nos tocante dje?

²¹ Considera Yehova su dominio propio for di un otro  angulo. Si bo tawata un persona sumamente poderoso, bo no ta kere cu tin biaha lo bo sinti bo tenta pa obliga hende haci manera abo kier? Yehova, cu tur su poder, no ta forsa nos pa sirbie, aunke esei ta e unico manera cu nos por gana bida eterno. Mas bien, e ta honra cada un di nos bondadosamente cu e libertad di scohe. E ta spierta nos di e consecuencianan di scohe malo y ta bisa nos kico lo ta e recompensanan di haci bon. Pero e decision mes e ta laga den nos man. (Deuteronomio 30:19, 20) Yehova simplemente no tin ningun interes pa nos sirbie obliga ni pa motibo di un miedo insaludabel di su poder impresionante. E ta busca personanan cu ta desea di sirbie di nan propio boluntad, motiva pa amor.—2 Corintionan 9:7.

22, 23. (a) Kico ta mustra cu pa Yehova ta un placer di por delega autoridad y duna otronan poder? (b) Kico nos lo analisa den e siguiente capitulo?

²² Laga nos wak un ultimo motibo pakico nos no tin nodi biba cu miedo di e Dios Todopoderoso. Hende cu tin poder no ta mucho inclina pa comparti esaki cu otronan. Pero pa Yehova ta un placer di por duna poder na su fiel adoradonan. E ta delega bastante autoridad na otronan, por ehempel na su Yiu. (Mateo 28:18) Y e ta duna poder na su sirbidonan den un otro manera tambe. Bijbel ta splica: “Di bo, o SEÑOR, ta e grandesa, e poder, e gloria, e victoria y e mahestad, di berdad, tur loke ta den shelo y riba tera; e dominio ta di bo. . . . Den bo man tin poder y forsa; y ta den bo man pa engrandece y pa fortalece cada un.”—1 Cronicanan 29:11, 12.

²³ Si, Yehova lo duna bo su forsa gustosamente. E ta duna asta “e poder mas aya di loke ta normal” na ken cu kier sirbie. (2 Corintionan 4:7, NW) Bo no ta sinti bo atrai na e Dios dinamico aki, kende ta uza su poder cu bondad y na harmonia cu principionan husto? Den e siguiente capitulo, nos lo enfoca riba con Yehova ta uza su poder pa crea.