1, 2. Eelaasi ba deˈuwan beˈido garamissiyaabay aybee, shin I Koreba Deriyan gonggoluwaa doonan eqqidi maalaalissiyaabi aybi hanishin beˈidee?

EELAASI maalaalissiyaabaa kase beˈiis. I qosetti uttidaashin issi gallassi naaˈˈutoo qooraaseti qumaa ayyo ehiyoogaa beˈiis. Koshay takkido adussa wodiyan otuwaappe xiillee mule wuribeennaagaanne xaaruwaappe zaytee mule cinggettibeennaagaa beˈiis. Yihoowa I woossin, A woosaa zaaruwawu tamay saluwaappe wodhdhishinkka beˈiis. (1 Kawotu Maxaafaa, shemppo 17, 18) SHin, Eelaasi kase hagaa malabaa aybanne beˈi erenna.

² I Koreba Deriyan gonggoluwaa doonan eqqido wode, kaalli kaallidi haniya maalaalissiyaabaa beˈiis. Koyro carkkoy carkkiis. Hegee wolqqaama cenggurssay siyettanaadan oottennan waayi aggana; ayssi giikko, he carkkoy keehi wolqqaama gidiyo gishshawu dereta phalqqiisinne zaallata kinchchiis. Kaallidi biittay wolqqappe qaaxxiis. Hegaappe simmin tamay kiyiis. Tamay heeraa miyo wode, hobbee Eelaasa lashennan waayi aggana.—1 Kawotu Maxaafaa 19:8-12.

3. Eelaasi qonccin beˈido Xoossaa eeshshay aybee, qassi he eeshshay aybin qoncciyoogaa nuuni beˈana danddayiyoo?

³ Eelaasi beˈido dumma dummabay Xoossaa Yihoowa gita wolqqaa qonccissees. Xoossawu he eeshshay deˈiyoogaa eranawu nuuni maalaalissiyaabaa beˈana koshshennaagee qoncce. Ha eeshshay qonccidi beettiyaaba. Yihoowa ‘merinaa wolqqaanne Xoossatettaa’ meretay qonccissiyoogaa Geeshsha Maxaafay yootees. (Roome 1:20) Daday keehi guummiyoogaa, wolqqanttay wolqqammiyoogaa, gita soossuwaanne xoolinttetun kumida aaho saluwaa ane qoppa! Hegaa malabaa beˈiyo wode neeni Xoossaa wolqqaa akeekikkii? Gidoppe attin, ha alamiyan Xoossaa wolqqaa keehi guutta asay akeekees. Yaatikkonne hegaa bessiyaagaadan xeelliyaageeti guutta. SHin, Xoossaa eeshsha gidida wolqqaa nuuni loyttidi akeekiyoogee kaseegaappe aaruwan Yihoowakko shiiqanaadan oottees. Ha shaahuwan, zawi baynna Yihoowa wolqqaabaa nuuni loyttidi pilggana.

4, 5. (a) Yihoowa sunttaa giddooninne A gitatettaa woy A wolqqaa giddon ayba gaytotetti deˈii? (b) Yihooway ba wolqqaa booran leemisidoogee bessiyaaba gidiyoy aybissee?

⁴ Yihooway wolqqan dummatees. Ermmaasa 10:6y hagaadan gees: “Abeet GODAU, ne mali ooninne baawa. Neeni gita; ne sunttaikka gitanne wolqqaama.” He gitatettay woy wolqqay Yihoowa sunttaara gayttidoogaa akeeka. Naqaashay bessiyoogaadan, Yihoowa giyo sunttay “I Hananaadan Oottiyoogaa” qonccissees giyo gaasoy deˈees. Yihooway I koyido aybanne medhdhanaadan, qassi I dooridoba aybanne hananaadan oottiyaabay aybee? Issibay wolqqaa. Ee, Yihooway oottanawunne ba sheniyaa polanawu danddayiyoobawu zawi baa. He wolqqay A waanna eeshshatuppe issuwaa.

⁵ Nuuni A wolqqaa muleera aynne akeekana danddayenna gishshawu, Yihooway nuna maaddanawu leemisota goˈettees. Nuuni beˈidoogaadan, I ba wolqqaa qonccissanawu booraa goˈettees. (Hizqqeela 1:4-10) Booray gitanne wolqqaama mereta gidiyo gishshawu, he dooroy bessiyaaba. Beni Pilisxxeema biittan deˈida asay boorappe wolqqaamiyaabaa waayi beˈi erana. SHin, booraa sheeshsha gidida, mentta mala yashshiya, guyyeppe xayida doˈaa eroosona. (Iyyooba 39:9-12) He mentta mala doˈati qottan danggarssaappe guuxxiyoogaa Juuliyees Qeesaari issi wode yootiis. I “Eti wolqqan keehi mino gidiyoogaanne keehi eesotiyoogaa” yootiis. Neeni hegaa mala meretaa matan eqqiyaakko ay keena guuttakkonne laafakko qoppa!

6. Yihoowa xalaalay ‘Ubbaa Danddayiyaagaa’ geetettiyoy aybissee?

⁶ Hegaadankka, wolqqaama Xoossaa Yihoowaara geeddarssiyo wode asi keehi guuttaanne laafa. Ayyo wolqqaama kawotettatikka meezaanan deˈiya guutta baana mala. (Isiyaasa 40:15) Yihoowa xaalaalay ‘Ubbaa Danddayiyaagaa’ * geetettiyo gishshawu, hara ayba meretaappenne dumma hanotan, ayyo zawi baynna  wolqqay deˈees. (Kessaabaa 6:3) Yihooway ‘anggan gitanne wolqqan mino.’ (Isiyaasa 40:26) I zawi baynna wolqqawu pultto. “Wolqqai Xoossaassa” gidiyo gishshawu, ayyo hara wolqqa koshshenna. (Mazamure 62:11) Gidoppe attin, Yihooway ba wolqqaa ayba ogiyan goˈettii?

7. Yihoowa geeshsha ayyaanay aybee, qassi Geeshsha Maxaafan ayyaanaa geetettida Ibrawettonne Giriiketto qaalay ay qonccissii?

⁷ Yihooway zawi baynna geeshsha ayyaanaa immees. Hegee oosuwan deˈiya Xoossaa wolqqaa. Geeshsha Maxaafay Doomettaabaa 1:2n, ‘ayyaanaa’ giyoy oosuwan deˈiya he wolqqaa. “Ayyaanaa” geetetti birshshettida Ibraawettonne Giriiketto qaalati, hara sohotun “carkkuwaanne” “shemppuwaa” geetettidi birshshettana danddayoosona. Ibrawettonne Giriiketto qaalati oottiiddi deˈiya, ayfiyan beettenna wolqqaa bessiyoogaa qaalaa kochchaa giigissiyaageeti yootoosona. Carkkoy ayfiyan beettennaagaadan Xoossaa ayyaanaykka beettenna; shin I oottiyooban A beˈana danddayoos.

8. Geeshsha Maxaafan Xoossaa geeshsha ayyaanay aybin leemisettidee, qassi hegaadan leemisettidoogee bessiyaaba gidiyoy aybissee?

⁸ Xoossaa geeshsha ayyaanay oottiyo dumma dummabawu zawi baawa. Yihooway ba halchcho ubbaa polanawu hegaa goˈettana danddayees. Geeshsha Maxaafay, Xoossaa geeshsha ayyaanaa leemiso hanotan A ‘biradhdhiyaa,’ A ‘wolqqaama kushiyaa,’ woy A ‘micettida qesiyaa’ giyoogee bessiyaaba. (Zaarettido Wogaa 9:10; 5:15; Mazamure 8:3) Issi asi wolqqaa woy hiillaa koshshiya, dumma dumma daro oosuwaa oottanawu ba kushiyaa goˈettana danddayiyoogaadan, Xoossay ba halchchuwaa polanawu ba geeshsha ayyaanaa goˈettana danddayees. Leemisuwawu, I ayfiyan beettenna atoomiyaa medhdhanawu woy Zoˈˈo Abbaa shaakkanawu, woy koyro xeetu layttan deˈida Kiristtaaneti hara qaalaa haasayanaadan oottanawu ba geeshsha ayyaanaa goˈettiis.

9. Haariyo ay keena maatay Yihoowawu deˈii?

⁹ Yihooway Ubbaa Haariyo ba maatankka ba wolqqaa goˈettees. Ne azazuwaa polanawu laamotiya qoppana danddayiya miilooniyan  qoodettiyaageeti neeyyo deˈiyaabadan qoppana danddayay? Yihooway haariyo hegaa mala maataa goˈettees. Ayyo ashkkarati deˈoosona; Geeshsha Maxaafay eta darotoo olanchchatun leemisees. (Mazamure 68:11, NW; 110:3) SHin, kiitanchchaara geeddarssiyo wode issi asi keehi laafa mereta. Asoore olanchchati Xoossaa asaa bolli denddido wode, mexi issi kiitanchchay 185,000 wotaaddarata issi qammi woriis! (2 Kawotu Maxaafaa 19:35) Xoossaa kiitanchchati keehi ‘wolqqaama.’—Mazamure 103:19, 20.

10. (a) Ubbaa Haariya Yihooway olanchchatu Godaa geetettiyoy aybissee? (b) Yihooway medhdhido meretatu ubbaappe wolqqaamay oonee?

¹⁰ Saluwan aappun kiitanchchati deˈiyoonaa? Saluwan Yihoowa araata sinttan 100 miilooneppe dariya ayyaana meretati deˈiyoogaa hananabaa yootiya Daaneeli ajjuutan beˈiis; shin I Yihooway medhdhido ubba kiitanchchata beˈidoogaa bessiyaabi baawa. (Daaneela 7:10) Hegaa gishshawu, daro xeetu miilooniyan qoodettiya kiitanchchati deˈennan waayi aggana. Hegaappe denddidaagan, Yihooway olanchchatu Xoossaa geetettees. Ha bonchcho sunttay loytti darajjayettida keehi cora wolqqaama kiitanchchata azaziyo maatay awu deˈiyoogaa qonccissees. I ba siiqiyo, “merettidabaa ubbaappe aadhdhiya baira” Naˈawu he ayyaana meretatu ubbaa bolli maataa immiis. (Qolasiyaasa 1:15) Yesuusi kiitanchchatu, suraafeeletunne kiruubetu ubbaa halaqa gidiyo gishshawu Yihooway medhdhido meretatu ubbaappe wolqqaama.

11, 12. (a) Xoossaa qaalawu wolqqay deˈiyoogaa bessiyaabi aybee? (b) Yihoowa wolqqaa xeelliyaagan Yesuusi yootidobay aybee?

¹¹ Yihooway ba wolqqaa goˈettiyo hara ogeekka deˈees. Ibraawe 4:12y, “Xoossaa qaalai paxa de7eesinne oottees” yaagees. Xoossaa Qaalan woy geeshsha ayyaanay kaalettin xaafettida Geeshsha Maxaafan deˈiya maalaalissiya wolqqaa neeni akeekadii? I nuna minttana, nu ammanoy kaseegaappe mino gidanaadan oottananne nuuni nu deˈuwan keehippe laamettanaadan maaddana danddayees. Kiitettida PHawuloosi ba mala Kiristtaaneti pokko deˈuwaa deˈiyaageetuppe naagettanaadan yootiis. Yooti simmidi, gujjidi hagaadan giis: ‘Intteppekka issi issi asay  kase hegeetu mala.’ (1 Qoronttoosa 6:9-11) Ee, ‘Xoossa qaalawu’ wolqqay deˈiyo gishshawu, eti bantta deˈuwaa laamanaadan maaddiis.

¹² Yihoowa wolqqay keehi gita; qassi I he wolqqaa goˈettiyo ogee keehi muruta; yaatiyo gishshawu, A wolqqaa aybinne teqqana danddayenna. Yesuusi, “Xoossau ubbabai danddayettees” yaagiis. (Maatiyoosa 19:26) Yihooway ayba halchchuwawu ba wolqqaa goˈettii?

13, 14. (a) Nuuni Yihooway wolqqawu coo pultto xalla gidenna gaana danddayiyoy aybissee? (b) Yihooway ba wolqqaa ayba ogetun goˈettii?

¹³ Yihoowa ayyaanay ayba wolqqaappekka keehi aadhdhees; qassi Yihooway wolqqawu coo pultto xalla gidenna. I ba wolqqaa koyido ogiyan goˈettana danddayiya Xoossa. SHin, I ba wolqqaa goˈettanaadan A aybi denttettii?

¹⁴ Nuuni beˈanaagaadan, Xoossay medhdhanawu, xayssanawu, ba ashkkarata naaganawu, ooraxissanawu, wottiyoobi baynna ba halchchuwaara gayttida aybanne polanawu ba wolqqaa goˈettees. (Isiyaasa 46:10) Amarida hanotatun, Yihooway ba oonatettaappenne ba maaratuppe keehi koshshiya macarata qonccissanawu ba wolqqaa goˈettees. Ubbaappe aaruwan, I Mase Kawotettaa baggaara ba sheniyaa polanawu, ubbabaa haariyo ba maataa qonccissanawunne ba geeshsha sunttaa bonchchissanawu ba wolqqaa goˈettees. Aybinne he halchchuwaa teqqana danddayenna.

15. Yihooway ba ashkkaratuura gayttidaagan ba wolqqaa ayba halchchuwawu goˈettii, qassi hegee Eelaasa gakkida hanotan waani qonccidee?

¹⁵ Yihooway nuna issuwaa issuwaa maaddanawukka ba wolqqaa goˈettees. Naaˈˈantto Hanidabaa Odiya Maxaafaa 16:9y, “Ba kumetta wozanaappe GODAN ammanettiya asa minttettanau GODAA aifee sa7aa bollan ubbasaa xeellees” yaagiyoogaa akeeka. Doomettan qonccida Eelaasa hanotay hegawu leemiso gidees. Yihooway ba wolqqaa maalaalissiya hanotan ayyo qonccissidoy aybissee? Iita Kawiyaa Elzzaabeela Eelaasa woranawu qofaa  qachchaasu. Hananabaa yootiyaagee ba shemppuwawu baqatiis. I yayyiisinne hidootaa qanxxiis, ubba qassi I barkka attidabadaaninne I minnidi oottido ubbabay hada gididabadan qoppiis. Metootida Eelaasa minttettanawu, Yihooway ba wolqqaa awu loytti qonccissiis. Carkkoy, biittaa qaattaynne tamay salo gufantton keehi wolqqaama Xoossay deˈiyoogaa Eelaasawu qonccissiis. Ubba danddayiya Xoossay aara deˈikko, I Elzzaabeeliyyo yayyana koshshii?—1 Kawotu Maxaafaa 19:1-12. *

16. Nuuni Yihoowa gita wolqqaabaa wotti dentti qoppiyoogee minttettana danddayiyoy aybissee?

¹⁶ Ha wodee Yihooway maalaalissiyaabata oottiyo wode gidana xayikkonne, I Eelaasa wode laamettibeennaagaadan haˈˈikka laamettenna. (1 Qoronttoosa 13:8) I bana siiqiyaageetu gishshawu ba wolqqaa goˈettanawu ha wodiyankka keehippe laamotees. I ayyaana alamiyan keehi xoqqasan deˈikkonne, nuuppe haakkenna. A wolqqawu zawi baynna gishshawu, haahoy A teqqenna. ‘Yihooway bana xeesiya ubbawu matan deˈees.’ (Mazamure 145:18) Hananabaa yootiya Daaneeli maaduwawu Yihoowa oychchido wode, ubba I woossiyoogaa wurssennan issi kiitanchchay ayyo qoncciis! (Daaneela 9:20-23) Yihooway bana siiqiyaageeta maaddiyoogaanne minttettiyoogaa aybinne teqqana danddayenna.—Mazamure 118:6.

17. Yihoowa wolqqay nuuni yayyanaadan oottiyoy ayba ogiyaanee, shin nuuni ay mala yashshaa yayyana koshshennee?

¹⁷ Xoossaa wolqqaynne maatay nuuni A yayyanaadan oottana koshshii? Zaaroy eekka chiikka gidana bessees. Nuuni ee giidi zaariyoy hagaappe kasetiya shemppuwan qanttan tobbido A anggaanne A bonchchuwaa gitatettaa gaasuwan he eeshshay  nuuni Xoossawu yayyanaadan oottiyo daro gaasoy deˈiyo gishshataassa. Hegaa mala yashshay ‘eratettawu koyro’ gidiyoogaa Geeshsha Maxaafay yootees. (Mazamure 111:10) Gidoppe attin, nuuni chii giidi zaariyoy Xoossaa wolqqaynne maatay nuuni ayyo yashshan kokkoranaadan woy akko shiiqennaadan oottenna gishshataassa.

18. (a) Maatay deˈiyo asaa daroti ammanettennay aybissee? (b) Yihooway ba maataa bessenna ogiyan goˈettennaagaa nuuni waati eriyoo?

¹⁸ “Maatay moorobaa ootissees; zawi baynna maatay zawi baynna mooruwaa ootissees.” Lord Akten giyo Inggilize biittaa taarikiyaa eranchchay 1887n hegaa xaafiis. Keehi daro asay hegee awudenne attenna tuma giidi qoppiyo gishshawu, I xaafidobaa asay zaaretti zaarettidi darotoo haasayiis. Taarikee loyttidi qonccissiyoogaadan nagaranchcha asay wolqqaa darotoo maara goˈettenna. (Eranchchaa 4:1; 8:9) Hegaappe denddidaagan, maatay deˈiyoogeeta daro asay ammanettenna gishshawu etappe haakkees. Yihoowawu ubbaappe aadhdhiya maatay deˈees. He maatay I moorobaa oottanaadan oottii? Mule oottenna! Nuuni beˈidoogaadan, I geeshsha, moorobaa aynne oottenna. Ha moorettida alamiyan maatay deˈiyo nagaranchcha asaagaappe Yihooway dummatees. I ba maataa bessenna ogiyan mule goˈetti erenna; qassi mule goˈettenna.

19, 20. (a) Yihooway ubbatoo ba wolqqaa hara ay eeshshatuura maayiya ogiyan goˈettii, qassi hegee minttettiyaaba gidiyoy aybissee? (b) Yihooway ba huuphiyaa naagiyaagaa gidiyoogaa leemisuwan waata qonccissana danddayay, qassi hegee nena ufayssiyoy aybissee?

¹⁹ Yihoowawu wolqqaa xalla gidennan hara eeshshati deˈiyoogaa hassaya. Nuuni A suure pirddaa, A aadhdhida eratettaanne A siiquwaa biron xannaˈana. SHin, Yihooway issitoo issi eeshsha xallaa goˈettiyoobadan, A eeshshati qoppennan ubbatoo issi mala ogiyan qonccoosona giidi nuuni qoppana koshshenna. Yihooway ba suure pirddaara, ba aadhdhida eratettaaranne ba siiquwaara maayiya ogiyan ba wolqqaa ubbatoo goˈettiyoogaa kaalliya shemppotun nuuni beˈana. Alamiyaa haariyaageetuyyo baynna issi eeshshay, hegeekka ba huuphiyaa naagiyo eeshshay Xoossawu deˈiyoogaa akeeka.

 ²⁰ Neeni A yayyanaadan oottiya keehi gitanne wolqqaama uraara gayttiyaabadan qoppa. Gidoppe attin, I ashkke gidiyoogaa neeni guyyeppe akeekaasa. Eesuwan qohettiyaageetanne maaddiyaabi baynnaageeta gujjin, asa ubbaa I maaddanawunne naaganawu ba wolqqaa goˈettanawu awudenne laamotan naagees. I ba wolqqaa bessenna ogiyan mule goˈettenna. Gaasoy baynnan A sunttaa harati mooriyoogaa akeekaasa, shin I mino gidikkonne woppa, bonchchettidaagaanne keha. Neeyyo he bitaniyaagaa keena wolqqay deˈiyaakko, neeni aagaadan ashkkenne ne huuphiyaa naagiyaagaa gidana danddayiyaakkonne qoppaasa! Neeni hegaa mala asa loytta eriyo wode, akko shiiqanawu koyanaagee qoncce. Ubbaa danddayiya Yihoowakko nuuni shiiqanaadan oottiya hegaappe aadhdhiya gaasoy deˈees. Ha shemppuwaa huuphe yohuwawu denddo gidida kumetta qofaa qashuwaa akeeka: “GODAI hanqqettanau eesotenna; wolqqaikka aagee gita.” (Naahooma 1:3) Iita asaa bollikka gidin, Yihooway ba wolqqaa goˈettanawu eesotenna. I ashkkenne keha. Hanqqettanaadan oottiya darobay deˈishinkka, I ‘hanqqettanawu eesotennaagaa’ gidiyoogaa bessiis.—Mazamure 78:37-41.

21. Yihooway ba sheniyaa asay oottanaadan wolqqanttennay aybissee, qassi hagee abaa xeelliyaagan nuna ay tamaarissii?

²¹ Yihooway ba huuphiyaa naagiyo hara ginaa ane qoppa.  Neeyyo daro wolqqay deˈiyaakko, asay ne koyiyo ogiyan oottanaadan issi issitoo wolqqanttanawu neeni paacettana danddayiyoogee qoncce. Yihooway ha ubba wolqqay ayyo deˈikkonne, asay awu haggaazanaadan wolqqanttenna. Merinaa deˈuwaa demmana danddayiyoy Xoossaassi haggaaziyoogaa xallaana gidikkonne, nuuni ayyo haggaazanaadan Yihooway nuna wolqqanttenna. SHin koyidobaa dooriyo maataa asaassi issuwawu issuwawu kehatettan immiyoogan I eta bonchchees. Iitabaa dooriyoogee kaalettiyoobaanne loˈˈobaa dooriyoogee demissiyo anjjuwaa I yootees. SHin, I nuuni dooranaadan koyees. (Zaarettido Wogaa 30:19, 20) Yihooway nuuni A gita wolqqaa gaasuwan awu yayyidi woy wolqqanttin haggaazanaadan koyenna. Nuuni A siiqiyo gishshawu, dosan haggaazanaadan koyees.—2 Qoronttoosa 9:7.

22, 23. (a) Yihooway haratussi maataanne wolqqaa immiyoogan ufayttiyoogaa bessiyaabi aybee? (b) Nuuni kaalliya shemppuwan ay xannaˈanee?

²² Ubbaa Danddayiya Xoossaa nuuni yayyana koshshenna wurssetta gaasuwaa ane beˈoos. Maatay deˈiyo asati he maataappe haratuyyo immanawu yayyoosona. SHin, Yihooway baayyo ammanettidi goynniyaageetuyyo maataa immiyoogan ufayttees. I haratussi gita maataa immees; hegeetuppe issoy A Naˈaa. (Maatiyoosa 28:18) Yihooway ba ashkkaratuyyo hara ogiyankka wolqqaa immees. Geeshsha Maxaafay hagaadan gees: “Abeet GODAU, saluwaaninne sa7an de7iya ubbabai nebaa! Gitatettai, wolqqai, bonchchoi, xoonoinne anggai nebaa! Abeet GODAU, maatai nebaa; . . . Wolqqainne minotai ne kushiyaana; neeni asaa ubbaa gitayanaunne minttanau danddayaasa.”—1 Hanidabaa Odiya Maxaafaa 29:11, 12.

²³ Ee, neessi wolqqaa immiyoogan Yihooway ufayttees. I baassi haggaazanawu koyiyaageetuyyo ‘ubbaappe aadhdhiya wolqqaa’ immees. (2 Qoronttoosa 4:7) Yihooway ba wolqqaa kehatettaaninne xoqqa kandduwaa maaratuura maayiya ogiyan goˈettees; hegee neeni gita Xoossaakko shiiqanaadan oottennee? Yihooway medhdhanawu ba wolqqaa waati goˈettiyaakko nuuni kaalliya shemppuwan xannaˈana.