1, 2. Aw di san de sho di pawa we Jiova gɛt fɔ mek tin dɛn?

YU DƆN ɛva tinap nia faya we di ples rili kol na nɛt? Sɔntɛm yu bin de put yu an oba di faya di kayn we we di faya nɔ go bɔn yu bɔt we yu go stil ɛnjɔy di it. If yu kam nia di faya tumɔs, yu nɔ go ebul bia di it. If yu go biɛn tumɔs, yu nɔ go fil di it ɛn yu go bigin fil kol.

² Wan “faya” de we de wam wi bɔdi ɛvride. Da “faya” de, de lɛk 93 milyɔn mayl frɔm wi! * Di san rili gɛt pawa, bikɔs wi ebul fɔ fil in it we i gɛt pan ɔl we i de fa fawe. Bɔt pan ɔl dat, di ath de na di rayt pozishɔn as i de go rawnd di wɔndaful ɛn pawaful san. If di ath go nia di san tumɔs, ɔl di wata na di ath go dray; if i go tu fa frɔm di san, ɔl di wata go tɔn ays. If i go tu fa ɔ kam nia di san tumɔs, layf nɔ go ebul fɔ de na di ath. Apat frɔm di layf we di san de mek wi gɛt na di ath, di san in layt klin, i de ɛp wi, ɛn i fayn fɔ luk.—Ɛkliziastis 11:​7.

3. Us impɔtant tin di san de tich wi?

³ Bɔt bɔku pipul dɛn nɔ kin si di san as sɔntin we rili impɔtant, pan ɔl we na di san de mek dɛn de liv. So dɛn nɔ de gri fɔ lan wetin di san de tich wi. Di Baybul tɔk bɔt Jiova se: “Na yu mek di mun ɛn di san.” (Sam 74:​16) Fɔ tru, di san de briŋ prez to Jiova, we na di Wan we “mek ɛvin ɛn ath.” (Sam 19:​1; 146:​6) Di san na wan pan di bɔku tin dɛn we de na di skay we de tich wi bɔt Jiova in wɔndaful pawa fɔ mek tin dɛn. Lɛ wi tek tɛm luk sɔm pan dɛn gud gud  wan, dɔn wi go pe atɛnshɔn mɔ to di ath ɛn di tin dɛn we gɛt layf we de de.

4, 5. Aw pawaful ɛn aw big di san bi? Wetin yu go tɔk we yu kɔmpia am wit ɔda sta dɛn?

⁴ I go bi se yusɛf no se di san na sta. I luk big pas di ɔda sta dɛn we wi de si na nɛt bikɔs in de nia wi pas dɛn. Aw pawaful di san bi? Wata de bwɛl we i rich 100 digri. Bɔt midul di san wam lɛk 150,000 tɛm pas dat. If yu tek smɔl pan di san ilɛk di sayz na lɛk pin-ed ɛn put am na di ath, yu nɔ go ebul fɔ tinap nia da kenkeni san de pas yu go lɛk 90 mayl. Di pawa we di san de pul ɛvri sɛkɔn ikwal to di pawa we bɔku bɔku pawaful bɔm dɛn gɛt we dɛn ib togɛda.

⁵ Di san so big dat yu go ebul fɔ put 1,300,000 ath dɛn insay de. Fɔ se di san na sta we rili big pasmak? Nɔ, sayɛnsman dɛn we de stɔdi di tin dɛn we de ɔp spes kɔl di san yɛlo dwaf. Di apɔsul Pɔl bin tɔk se “di we aw wan  sta fayn difrɛn frɔm di we aw ɔda sta fayn.” (1 Kɔrintians 15:​41) I go mɔs bi se Pɔl nɔ bin no aw tru dɛn wɔd dɛn de bi. Wan sta de we so big dat if dɛn put am usay di san de, i go rich usay di ath de, ɛn di ath go de insay am. If dɛn put wan ɔda jayant sta usay di san de, i go rich usay wan ɔda planɛt we nem Satɔn de. Satɔn rili de fa dat we dɛn sɛn wan pawaful tin we dɛn kin sɛn fɔ go spes frɔm di ath, i tek 4 ia fɔ rich de, pan ɔl we i bin de travul 40 tɛm fast pas bulɛt we de kɔmɔt frɔm wan pawaful smɔl gɔn lɛk pistul.

6. Aw di Baybul sho se di sta dɛn bɔku fa fawe pas aw wi de tink?

⁶ Di tin we wɔndaful bak bɔt di sta dɛn, na dɛn nɔmba nɔto jɔs dɛn sayz. Infakt, di Baybul tɔk se wi nɔ go ebul fɔ kɔnt di sta dɛn jɔs lɛk aw “pɔsin nɔ go ebul kɔnt di sansan na di si.” (Jɛrimaya 33:​22) Dɛn wɔd dɛn ya sho se bɔku  bɔku sta dɛn de we wi yay nɔ de si. Infakt, if pɔsin we rayt di Baybul lɛk Jɛrimaya, luk di skay na nɛt ɛn tray fɔ kɔnt di sta dɛn we i de si, na lɛk 3,000 nɔmɔ i go ebul fɔ kɔnt bikɔs na da nɔmba de nɔmɔ mɔtalman yay ebul fɔ si we di skay klia na nɛt. Wi go kɔmpia da nɔmba de to we yu ful-ɔp yu an wit sansan. So fɔ tru tru, di sta dɛn rili bɔku lɛk di sansan na di si. * Udat go ebul kɔnt da kayn nɔmba de?

7. (a) Na lɛk ɔmɔs sta dɛn de na wi Milki We galaksi? Aw big da nɔmba de bi? (b) Sayɛnsman dɛn we de stɔdi di tin dɛn we de ɔp spes nɔ no di nɔmba ɔf sta dɛn we de. Wetin mek dat impɔtant? Wetin dis de tich wi bɔt di pawa we Jiova gɛt fɔ mek?

⁷ Ayzaya 40:​26 tɔk se: “Es yu yay ɔp ɛn si: udat mek dɛn wan ya? In we de pul di san, mun, ɛn sta dɛn, ɛn kɔnt dɛn, de kɔl dɛn ɔl bay nem.” Sam 147:​4 (NWT) tɔk se: “I de kɔnt di sta dɛn; i de kɔl dɛn ɔl bay nem.” Ɔmɔs sta dɛn de? Dis nɔto simpul kwɛstyɔn. Sayɛnsman dɛn we de stɔdi di tin dɛn we de ɔp spes tɔk se i pas 100 bilyɔn sta dɛn we de na wi Milki We galaksi nɔmɔ. * Bɔt di Milki We galaksi na jɔs wan pan di bɔku bɔku galaksi dɛn we de, ɛn bɔku pan dɛn galaksi dɛn de gɛt plɛnti plɛnti sta dɛn pas am. Ɔmɔs galaksi dɛn de? Sɔm sayɛnsman dɛn tɔk se na lɛk 50 bilyɔn. Ɔda wan dɛn se sɔntɛm na lɛk 125 bilyɔn galaksi dɛn de. So mɔtalman nɔ ivin no ɔmɔs galaksi dɛn de, bifo wi tɔk bɔt ɔmɔs sta dɛn dɛn gɛt. Bɔt pan ɔl dat, Jiova no dɛn nɔmba. Ɛn i nɔ jɔs tap de, i gi dɛn nem wan bay wan!

8. (a) Aw yu go ɛksplen aw big di Milki We galaksi bi? (b) Wetin Jiova de yuz fɔ ɔganayz di we aw di galaksi ɛn tin dɛn we de na spes de muv?

 ⁸ Wi go fred Gɔd ɛn ɔnɔ am mɔ ɛn mɔ if wi kɔntinyu fɔ tink bɔt aw di galaksi dɛn big. I go tek layt 100,000 ia fɔ krɔs di Milki We galaksi. Layt de travul 186,000 mayl ɛni sɛkɔn. Naw, tink bɔt dis; if layt de travul wit da kayn spid de, i go tek 100,000 ia fɔ krɔs wi galaksi! Ɛn sɔm galaksi dɛn big pas wi galaksi fa fawe. Di Baybul tɔk se Jiova de “strɛch” di ɛvin ɔ di galaksi dɛn lɛk se na klos. (Sam 104:​2, NWT) Na in de mek dɛn muv. Frɔm di kenkeni dɔst frɔm di sta dɛn to di galaksi we big pas ɔl di ɔda galaksi dɛn, ɔltin de muv akɔdin to di lɔ we Gɔd put fɔ kɔntrol dɛn. (Job 38:​31-33) Na dat mek sayɛnsman dɛn kɔmpia di ɔganayz we aw di galaksi ɛn tin dɛn we de na spes de muv to di we aw grup dans ɔganayz. Naw, tink bɔt di Wan we mek dɛn tin dɛn ya. Yu nɔ go wɔnda, kɔle, ɛn fred di Gɔd we gɛt dis kayn bɔku bɔku pawa fɔ mek tin dɛn?

9, 10. Aw wi si Jiova in pawa pan di we aw i put di sola sistɛm, Jupita, di ath, ɛn di mun na di rayt say?

⁹ Wi go si di pawa we Jiova gɛt fɔ mek tin dɛn we wi wach di ath. I tek tɛm put di ath midul di san, mun, sta, ɛn ɔda tin dɛn we de na spes. We yu kɔmpia ɔda planɛt dɛn to dis wi planɛt we de sɔpɔt layf, sɔm sayɛnsman dɛn biliv se ɛnitin we gɛt layf nɔ go ebul de na bɔku galaksi dɛn. Jiova nɔ mek di bɔku bɔku sta dɛn na wi galaksi fɔ lɛ ɛnitin we gɛt layf go de de. Na bɔku bɔku sta dɛn de midul di galaksi. De kin rili wam pasmak, ɛn na kɔmɔn tin fɔ lɛ di sta dɛn nia dɛnsɛf di kayn we we go mek dɛn jam. Di ɛj pat pan di galaksi nɔ gɛt bɔku pan di tin dɛn we go mek ɛnitin we gɛt layf de de. Wi sola sistɛm de bitwin di pat we wam pasmak na di galaksi ɛn di ɛj pat pan di galaksi.

 ¹⁰ Di ath de bɛnifit frɔm wan jayant planɛt we de fa we dɛn kɔl Jupita, ɛn na dis planɛt de protɛkt di ath. Jupita big pas di ath pas wan tawzin tɛm, ɛn i gɛt bɔku bɔku graviti we de ɛp di ath. Dat de mek i de drɔ di tin dɛn we de spid na spes to insɛf ɔ mek dɛn nɔ rich di ath. Sayɛnsman dɛn dɔn kam fɔ no se if Jupita nɔ bin de protɛkt di ath, bɔku big big tin dɛn we de fɔdɔm na di ath fɔ dɔn fɔdɔm pas 10,000 tɛm pas aw i de bi rayt naw. Wi ath de bɛnifit frɔm wan spɛshal satalayt we de nia wi we na di mun. Di mun nɔ jɔs fayn ɛn de gi “layt na nɛt,” bɔt na in de mek di ath stɛdi ɛn ling smɔl ɔltɛm. Di we aw di ath ling smɔl, de mek di difrɛn sizin dɛn kam di rayt tɛm we dɛn fɔ kam. Dis na wan ɔda impɔtant tin we de bɛnifit ɔl di tin dɛn we gɛt layf na di ath.

11. Aw di difrɛn difrɛn gas dɛn we de arawnd di ath de protɛkt am?

¹¹ Wi kin si klia wan Jiova in pawa fɔ mek frɔm di we aw i dizayn di ath. Tink bɔt di difrɛn difrɛn gas dɛn we de arawnd di ath we de protɛkt am. Di san kin gi gud layt ɛn bad bad layt. We di bad bad layt we de kɔmɔt frɔm di san mit di gas dɛn we de arawnd di ath, i de mek ɔdinari ɔksijɛn tɔn to wan gas we dɛn kɔl ozon. Dis de mek sɔntin we dɛn kɔl ozon leya we de tek bɔku pan di layt we de kɔmɔt frɔm di san. So Jiova mek di ath wit in yon ɔmbrɛla we de protɛkt am.

12. Aw di wata saykul de sho Jiova in pawa fɔ mek tin dɛn?

¹² Dat na jɔs wan tin bɔt di difrɛn difrɛn gas dɛn we de arawnd di ath we de na di rayt ples fɔ sɔpɔt di tin dɛn we gɛt layf we de liv na di ath ɔ arawnd di ath. Wan ɔda wɔndaful tin bɔt di difrɛn difrɛn gas dɛn we de arawnd di ath na di wata saykul. Ɛvri ia, di san kin mek bɔku bɔku wata frɔm di oshɔn ɛn si go ɔp, ɛn dis wata kin bɔku pas di wata we de na ɔl di lek dɛn na di ath. Di wata kin mek klawd dɛn we di briz we di difrɛn difrɛn gas dɛn we de arawnd di ath kin kɛr go fa. Dis tin we kin apin kin shifta  di wata, mek am klin, ɛn i kin kam as ren, sno, ɛn ays fɔ riples di wata we fɔ de na di ath. Dis kin apin jɔs lɛk wetin Ɛkliziastis 1:​7 tɔk we i se: “Ɔl di watasay de rɔn go na di si, bɔt di si nɔ de ful; Na usay di wata de go ɔltɛm, na de i de go ɔltɛm.” Na Jiova nɔmɔ go mek da kayn saykul de.

13. Wetin pruv se di Wan we mek ɔltin gɛt pawa we wi wach di plant dɛn ɛn di grɔn?

¹³ Ɛnisay wi si layf, wi de si sɔntin we de pruv se di Wan we mek ɔltin gɛt pawa. Wi de si pruf fɔ se Jiova gɛt pawa fɔ mek tin dɛn frɔm di big big rɛdwud tik we tɔl pas 30 stori bildin to di smɔl smɔl plant dɛn we de na di oshɔn we wi nɔ de si wit wi yay ɛn we de gi bɔku pan di ɔksijɛn we wi de blo. Di grɔn gɛt bɔku bɔku tin dɛn we gɛt layf lɛk wɔm dɛn, fungay, ɛn maykrob dɛn, ɛn dɛn ɔl de wok togɛda fɔ ɛp plant dɛn fɔ gro. No wɔnda di Baybul se di grɔn gɛt pawa.—Jɛnɛsis 4:​12.

14. Uskayn pawa kenkeni atɔm gɛt?

¹⁴ Wi nɔ gɛt wan dawt se na Jiova “mek di wɔl wit in pawa.” (Jɛrimaya 10:​12) Wi de si Gɔd in pawa ivin pan di smɔl smɔl tin dɛn we i mek. Fɔ ɛgzampul, ilɛksɛf dɛn put wan milyɔn atɔm dɛn togɛda, dɛn nɔ go tik rich wan ia na mɔtalman ed. Ɛn ivin if dɛn strɛch atɔm te i tɔl lɛk 14 stori bildin, in nyuklɔs go tan lɛk wan sid sɔl we go de na di sɛvint flɔ. Bɔt na da kenkeni nyuklɔs de de gi bɔku bɔku pawa we nyuklia ɛksploshɔn apin!

15. Us lɛsin Jiova bin tich Job we I bin de tɔk bɔt difrɛn wayl animal dɛn?

¹⁵ Wi de si wan ɔda klia pruf fɔ se Jiova gɛt pawa fɔ mek tin dɛn pan di animal dɛn we de na dis ath. Sam 148 tɔk bɔt bɔku tin dɛn we de prez Jiova, ɛn vas 10 tɔk bɔt “dɛn bush animal ɛn . . . dɛn animal we dɛn de mɛn na os.” Wan tɛm, Jiova bin tɔk to Job bɔt animal dɛn lɛk layɔn, zibra, bush kaw, biamɔth (ɔ ipɔpɔtemɔs), ɛn Lɛviathan  (sɔntɛm krɔkɔdayl) fɔ sho wetin mek mɔtalman fɔ wɔnda, kɔle, ɛn fred di Wan we mek ɔltin. Us pɔynt Jiova bin want fɔ mek? If mɔtalman de wɔnda, kɔle, ɛn fred dɛn mayti, fiaful, ɛn wayl animal dɛn de, yu nɔ tink se wi fɔ wɔnda, kɔle, ɛn fred di Wan we mek dɛn animal dɛn ya mɔ ɛn mɔ?—Job, chapta 38 to 41.

16. Wetin yu lɛk bɔt sɔm pan di bɔd dɛn we Jiova mek?

¹⁶ Sam 148:​10 tɔk bak bɔt “dɛn bɔd we de flay.” Jɔs tink bɔt di difrɛn difrɛn bɔd dɛn we de! Jiova bin tɛl Job bɔt wan big bɔd we dɛn kɔl ɔstrich we “kin laf pɔsin ɛn di ɔs we di pɔsin de rayd.” Fɔ tru, dis big bɔd we tɔl lɛk et fit (2.5 mita) nɔ ebul fɔ flay, bɔt i kin rɔn 40 mayl insay wan awa ɛn ɛni wan stɛp we i tek na 15 fit (4.5 mita)! (Job 39:​13, 18) Wan ɔda bɔd na di albatros we de spɛn bɔku pan in tɛm na di skay oba di si. Pan ɔl we i tan lɛk se dis bɔd nɔ de yuz ɛnaji we i de flay, we i strɛch in wiŋ dɛn, na lɛk 11 fit (3 mita). I kin flay go rayt ɔp fɔ lɔng tɛm ɛn nɔ muv in wiŋ dɛn. Bɔt lɛ wi tɔk bɔt di ɔminbɔd we na lɛk tu inchis (5 sɛntimita) ɛn na di bɔd we smɔl pas ɔl di bɔd dɛn na di wɔl. I kin muv in wiŋ dɛn fɔ lɛk 80 tɛm so insay wan sɛkɔn. Ɔminbɔd dɛn kin rili fayn fɔ si, dɛn kin flay lɛk ɛlikɔpta ɛn dɛn kin ivin flay go biɛn.

17. Wetin na di blu wel in sayz? Wetin wi go se we wi tink bɔt di we aw Jiova mek di animal dɛn?

¹⁷ Sam 148:​7 tɔk se ivin di big big animal dɛn na wata de prez Jiova. Tink bɔt di animal we bɔku pipul dɛn biliv se na in big pas ɔl di animal dɛn na dis ath, dat na di blu wel. Dis blu wel we de na di oshɔn kin lɔng lɛk 100 fit (30 mita) ɔ sɔntɛnde i kin pas. In wet kin rich lɛk we yu put 30 big ɛlifant dɛn togɛda. In tɔŋ in wet na lɛk wan ɛlifant. In at na lɛk smɔl motoka. Di blu wel in at de bit 9 tɛm insay wan minit; bɔt di ɔminbɔd in at de bit lɛk 1,200 tɛm insay wan minit. Di blu wel in ven so big dat smɔl pikin go ebul krip insay de. Ɔl dɛn tin dɛn ya kin mek wi want fɔ tɔk  wetin di las vas na di Sam buk tɔk we i se: “Lɛ ɔltin we gɛt bloblo prez PAPA GƆD [“Jiova,” NWT].”—Sam 150:​6.

18, 19. Ɔmɔs difrɛn difrɛn tin dɛn we gɛt layf we Jiova mek? Wetin di tin dɛn we Jiova mek tich wi bɔt di rayt we i gɛt fɔ rul?

¹⁸ Wetin wi lan frɔm di we aw Jiova de yuz in pawa fɔ mek tin dɛn? Wi kin kɔle, wɔnda, ɛn fred we wi tink bɔt di difrɛn difrɛn tin dɛn we Gɔd mek. Wan pan di man dɛn we rayt di sam buk tɔk se: “PAPA GƆD [“Jiova,” NWT], yu de du bɔku tin! . . . Ɔl wetin de na [di] wɔl, na yu mek am.” (Sam 104:​24) Dat na tru! Sayɛnsman dɛn we de stɔdi bɔt layf dɔn kam fɔ no se i pas wan milyɔn difrɛn kayn tin dɛn we gɛt layf we de na di ath; bɔt sɔm kin tɔk se na lɛk 10 milyɔn, 30 milyɔn, ɔ i ivin pas dat. Sɔntɛnde pɔsin we de drɔ kin si se di sɛns we i gɛt fɔ drɔ kin dɔn. Bɔt di pawa we Jiova gɛt fɔ mek nyu ɛn difrɛn tin dɛn nɔ go ɛva dɔn.

¹⁹ Di we aw Jiova de yuz di pawa we i gɛt fɔ mek tin dɛn de tich wi bɔt di rayt we i gɛt fɔ rul. Bikɔs na Jiova na di “Wan we mek ɔltin,” dat mek i difrɛn frɔm ɔl ɔda tin dɛn we de na di ath ɛn ɔp spes; dɛn ɔl na “tin dɛn we i mek.” Di Baybul nɔ ɛva kɔl Jiova in wangren Pikin we insɛf sɛf  mek we na bin “man we sabi wok” as Pɔsin we mek ɔltin. (Prɔvabs 8:​30, NWT; Matyu 19:​4) Bifo dat, na in “fɔs Gɔd mek bifo ɛni ɔda tin.” (Koloshians 1:​15) Di pozishɔn we Jiova gɛt as di Wan we mek ɔltin gi am di ful rayt fɔ yuz in pawa fɔ rul ɔltin we de na di ath ɛn na spes.—Romans 1:​20; Rɛvɛleshɔn 4:​11.

20. Aw Jiova dɔn de rɛst frɔm di tɛm we i dɔn fɔ mek di tin dɛn we de na di ath?

²⁰ Fɔ se Jiova dɔn stɔp fɔ yuz di pawa we i gɛt fɔ mek tin dɛn? Wɛl, di Baybul se we Jiova dɔn fɔ mek di tin dɛn we i mek di de we mek siks, “bay di tɛm we di de we mek sɛvin rich, PAPA GƆD bin dɔn dɔn ɔl wetin i bin de du, so i blo da de de.” (Jɛnɛsis 2:​2) Di apɔsul Pɔl bin mek wi no se dis “de” we mek sɛvin na tawzin tawzin ia dɛn bikɔs di de bin stil de go ɔn na insay in yon tɛm. (Ibruz 4:​3-6) Bɔt yu tink se fɔ “rɛst” min se Jiova dɔn stɔp fɔ wok? Nɔ, Jiova nɔ ɛva stɔp fɔ wok. (Sam 92:​4; Jɔn 5:​17) Bɔt di rɛst jɔs min se Jiova dɔn stɔp fɔ mek tin dɛn na di ath. In wok we i gɛt fɔ mek wetin in want bi dɔn de apin ɛn i nɔ stɔp. Wan pan di wok na we i yuz in oli spirit fɔ mek dɛn rayt di Oli Skripchɔ dɛn. I gɛt di wok bak fɔ mek “nyu pɔsin” we wi go tɔk mɔ bɔt na Chapta 19.—2 Kɔrintians 5:​17.

21. Aw di pawa we Jiova gɛt fɔ mek tin dɛn go afɛkt fetful mɔtalman dɛn sote go?

²¹ We Jiova in de fɔ rɛst go dɔn, i go ebul fɔ tɔk se ɔl di tin dɛn we i mek na di ath “gud ɛn fayn” jɔs lɛk aw i bin tɔk di de we mek siks we i dɔn fɔ mek tin dɛn. (Jɛnɛsis 1:​31) Wi de wet fɔ si aw i go yuz in pawa we i gɛt fɔ mek tin dɛn we nɔ de dɔn afta dat. Ɛni aw i bi, wi shɔ se wi go kɔntinyu fɔ de kɔle di we aw Jiova go yuz di pawa we i gɛt fɔ mek tin dɛn. Wi go lan bɔt Jiova frɔm di tin dɛn we i mek sote go. (Ɛkliziastis 3:​11, NWT) Di mɔ wi de lan bɔt am, na di mɔ wi go de wɔnda, kɔle, ɛn fred am mɔ ɛn mɔ, dɔn wi go kam nia di Gret Gɔd We Mek Ɔltin.